Ma-thi-ơ 19
19
Kaar Brah Jê-sus tu Ju-đê u Jê-ru-sa-lem
(19:1 – 25:46)
Baak kaar teq lơơi
(Mak 10:1-12)
1Tơt kne pal ntil au luôih, Brah Jê-sus lơơi kwaal Ga-li-lê han tơt kwaal Ju-đê, mak tôw daak glung Jô-đanh. 2Phung bnih ơk đat han tênh Pang; tu nei Pang tơmbah pơrtanh aan bu.
3Bơl bnih Pha-ri-si lôh jah tuul Pang u ôp laah: “Mbu bnih geh kươt ch'bap teq lơơi sai ur đươm paich pal rơ kheet ơơn 'bưn?” 4Pang ơh: “Bơl 'bei ndah chôôl laang? A daak bôôk Yaang Tơmbut Sun ja tơmbut bnih klau u bnih dơur, 5u lah: ‘Đươm rơ kheet nei, bnih klau a kươi lơơi mei bươp baah prơgap n'hai sai ur nơơm; u baar du a kươi but di mlơm chhak’. 6Bei nei ur sai 'bưn nh'hơơm laa baar hôm, baah dơơn laa di mlơm chhak. Bei nei, koon bnih 'bưn kươt pơrgah bơl bnih baah Brah Ưn ja ta pơrgap.”
7Bu nha ôp Pang: “Mơq bei nei, a hay Môi-se leet tơmbơh aan kơrđaih teq lơơi, ja nei teq sai ur?” 8Pang ơh: “Đươm chưt bơl 'bei kraam, mơ Môi-se aan ch'bap teq lơơi sai ur; dôh, a daak bôôk 'bưn geh bei nei. 9Dôh Hei lah n'hai bơl 'bei: Mơq bnih êch 'bưn geh đươm jrôq jrơm;#19:9 'bưn geh đươm jrôq jrơm: Knông m'baak plơơp 'bian ti laa 'bưn geh đươm rơ kheet jrôq jrơm nei tak lơh sai ur geh dôih jrôq jrơm. u ja nei kliêr bnih nday nei geh dôih ta tưr.”#19:9 geh dôih ta tưr: Knông m'baak plơơp 'bian ti laa geh dôih ta tưr, nha 'bơơn kliêr bnih dol teq lơơi kot geh dôih ta tưr.#Mat 5:32; I Kô 7:10-11. 10Bơl jơrnơ ơh laah: “Mơq dơơn awap teq lơơi sai ur đươm rơ kheet tôw nei khơơm kliêr sai ur nha huôih.” 11Dôh Pang ơh: “'bưn geh 'bơơn kot awap pơih kươt baak au laang, dôh dơơn geh bơl bnih kươt ươn ei. 12Đươm geh bơl bnih dol lach a mhei lgơơch; geh bnih lach đươm ti bu nday, u geh bnih lach êêng đươm u nggoor trôôk. Bnih êch awap pơih kươt baak au, phrui pơih ơơi.”
Brah Jê-sus ươn smlaang aan koon ksei
13Khal nei bu nday liêu bơl koon ksei lôh jah Pang dơih ti u r'bon dan, dôh bơl jơrnơ têh gmhaar bu. 14Brah Jê-sus lah: “Phrui teq bơl koon ksei lôh u Hei, khơơm pơrkhaang bơl nei đươm nggoor trôôk pơơn teq u bơl bnih bei bơl koon ksei nei.” 15Pang dơih ti lơ bơl drêên, ja nei du rlach ktôk nei.
Bnih dơlu khunh geh
(Mak 10:17-31; Lu-ka 18:18-30)
16Khal nei, geh mbu bnih lôh ôp Pang: “Ơi Yau, hei phrui lơh ntil klanh ơơn jah kươt baak rêh yoot yôw?” 17Brah Jê-sus ơh: “A hay 'bei ôp Hei teq u ntil klanh? Dơơn geh di Yaang sơp klanh ei. Mơq 'bei êch mưt baak rêh, phrui prap ơn pal baak ch'bap.” 18Bnih nei ôp: “Pal baak ch'bap ơơn?” Brah Jê-sus ơh: “'Bei khơơm lưm bnih; khơơm jrôq jrơm; khơơm ttung lmuôich; khơơm lơh ndraanh lhiat; 19phrui kôt nhôt mei bươp 'bei u phrui srlanh bnih a gêêng bei chhak jan nơơm.” 20Bnih dơlu nei ơh: “Hei ja kan prap leq sêch pal ntil au, hei nha khwaq ntil ơơn 'bưn?” 21Brah Jê-sus ơh: “Mơq 'bei êch kươt sơp grơp, phrui han, tech ntil ơơn nơơm geh u tacheq aan bnih l'ơơi nei 'bei a kươi geh griêng preh a lơ trôôk; ja nei phrui lôh tênh Hei.” 22Tơt iat baak au, bnih dơlu nei chhong rmlơng lơơi du, đươm bu nei geh ơk đat griêng grau.
23Brah Jê-sus lah n'hai bơl jơrnơ: “ngan, Hei lah bơl 'bei, bnih khunh mưt nggoor trôôk nei laa rngiêl đat. 24Hei nha mor n'hai bơl 'bei, seh joong kôw mưt u trôôm nglaai nha snôk huôih bnih khunh mưt nggoor Brah Ưn.” 25Bơl jơrnơ ttang ntil au, nei êêng aang bơm yoh u mor laah: “Bei nei 'bơơn awap kươt đoh?” 26Brah Jê-sus mơq bu u lah: “Koon bnih 'bưn geh lơh kươt ntil au, dôh Brah Ưn lơh kươt jôm baak nei.” 27Phi-e-rơ ơh laah: “Ơi Yau, bơl hei ja teq leq sêch griêng baah han tênh Yau, bei nei bơl hei a kươi kươt pi ơơn?” 28Brah Jê-sus ơh: “A ngan, Hei maanh bơl 'bei, lôh kmlap mrơk 'bơk chhư gơl mhei, tơt Koon Bnih a kươi gôq lơ gơrnôq chring chraang Pang ri nei bơl 'bei laa bơl bnih ja han tênh Hei, a kươi kot gôq lơ jmơt baar gơrnôq, jah pơrkat jmơt baar puich I-sra-ên.#Mat 25:31; Lu 22:30. 29Leq bơl 'bơơn đươm saak Hei baah teq lơi nhi ba, oh bi, ruh, mei bươp, koon sau, pưng srei, bnih nei a kươi pơih lơơi kươt ơk đat, u dơơn ryơơng baak rêh yoot yôw. 30Dôh geh ơk bnih a bôôk a kươi but ptut, u bnih ptut a kươi but a bôôk.”#Mat 20:16; Lu 13:30.
ទើបបានជ្រើសរើសហើយ៖
Ma-thi-ơ 19: SBL2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.
