Ma-thi-ơ 14
14
Baak chhưt Jang Bap-tit ri
(Mak 6:14-29; Lu-ka 9:7-9)
1Plah nei, snđach pơching Hê-rôt#14:1snđach pơching Hê-rôt: Au laa Hê-rôt An-ti-pa, koon klau snđach Hê-rôt ttih ri (mơq Ma-thi-ơ 2:1). ttang saak baak Brah Jê-sus, 2nei maanh bơl dêch tadơơh laah: “Au laa Jang Bap-tit, bnih a ktôk chhưt rêh kươi, nei mơ mhei lơh kươt chmlih chmleek au.” 3Đươm Hê-rôt ja nhôp, kơt u teq khaam Jang đươm kaar Hê-rô-đia, sai ur Phi-lip, oh snđach. 4Đươm Jang kaang snđach: “Snđach pơih mei laa ntil tih ch'bap.”#Lu 3:19-20. 5Paich êch lưm Jang, dôh snđach n'hông phung raih, đươm bu kot jơ laah Jang laa mbu grnưt noor.
6Dôh, jơl tơt ryơơng nar lgơơch snđach Hê-rôt, koon ur Hê-rô-đia njroh rơm di mat bnach joq sa, lơh broh chưt Hê-rôt, 7lôh aan snđach daai pơn aan mei paich ntil ơơn mei dan. 8Dol mei nôôl, bu dan laah: “Koon dan pi bôôk Jang Bap-tit ri dơih lơ thaail.” 9Snđach pơih lơh chhong rlmơng, dôh đươm ja rlach daai di mat bơl bnach han sa, mơ maanh ươn mei. 10Snđach maanh bnih paang bôôk Jang knông khaam, 11ja nei bu teq bôôk Jang ri lơ thaail, ndơơp aan dơur nei, u bu liêu lôh aan mei nơơm. 12Kơi nei, bơl jơrnơ Jang ri lôh, pơih kơmôich bu ri liêu rôôp, ja nei han tơmbơh baak aan Brah Jê-sus.
Brah Jê-sus tơ krik nom sot ơk wưt daak bôôk
(Mak 6:30-44; Lu-ka 9:10-17; Jang 6:1-14)
13Ttang baak nei, Brah Jê-sus jưr duuk, lơơi ktôk au han tơt ktôk rhông rhaang. Gưt bei nei, phung raih a pal poh han jơng tênh Pang. 14Mhei sot rlach duuk, Brah Jê-sus sau phung raih ơk nei gmaak, u tơmbah aan pal bnih pơrtanh.
15Tơt mau jơ ngôw, bơl jơrnơ lôh ơh n'hai Pang: “Ktôk au rhông rhaang, trôôk jơ ngôw hôm, dan Yau aan phung raih siq jah bu mưt pal poh dêq pook griêng sa.” 16Brah Jê-sus lah: “Bu 'bưn chkhôm phrui han laang; nơơm bơl 'bei phrui aan bu sa.” 17Bơl jơrnơ ơh laah: “A au, bơl koon dơơn geh pram ơơk nom u baar pi ka.” 18Pang lah: “Phrui liêu lôh u đau aan Hei.” 19Di kươi tơmbơh aan phung raih gôq lơ deh pndrêch, Pang pơih pram ơơk nom u baar pi ka, nggơơr mat u trôôk or hôm pak nom sot ndơơp aan jơrnơ, bu tacheq aan phung raih. 20Jôm bnih kot sa bơm hơơm. Bu pơrgum kơơi kươt jmơt baar sah bêêng nom ngroh. 21Nak bnih sa tơmlai pram ban ndu, 'bưn kơơp dơur u koon drêên.
Brah Jê-sus han lơ mat daak rmưt
(Mak 6:45-52; Jang 6:15-21)
22Kơi nei, Pang nôôl jơrnơ jưr duuk, han noor rlach mak kơh tôw, knông plah Pang aan phung raih sot siq. 23Tơt aan phung raih siq hôm, Pang han êêng hao bnơm jah r'bon dan. Tơt jơ ngôw, Pang nha a nei mbu êêng.
24Plah bei au na, duuk ja sot nggơl klung daak rmưt, dol kmbuôl khôm kơndang đươm chaal nkup. 25Êch dơơh aang,#14:25 Êch dơơh aang: Tơmlai pei tơt prau bêl aang. Brah Jê-sus chwaat han lơ mat daak rmưt, lôh u bơl jơrnơ. 26Tơt sau Pang chwaat han lơ mat daak rmưt, bơl jơrnơ ring n'hông u mor laah: “Nei laa chaak!” Hơơi bu troh đươm n'hông. 27Dôh Brah Jê-sus lah drơh n'hai bu: “Phrui un chưt, Hei au, khơơm n'hông!” 28Phi-e-rơ ơi mor laah: “Brah ơi, mơq phrui laa Brah, dan lơh koon han lơ mat daak lôh n'hai Brah.” 29Pang lah: “Phrui leet u đau!” Phi-e-rơ sot rlach duuk, chwaat han lơ mat daak, lôh n'hai Brah Jê-sus. 30Dôh tơt sau chaal khôm, Phi-e-rơ n'hông, bơjak a buk u daak mơ troh: “Brah ơi, dan đoh koon!” 31Kơndaal, Brah Jê-sus ndơơp ti dơp Phi-e-rơ u mor laah: “Chưt jơrnơ koon ndêq ngan, a hay koon leet nggich nggưl?” 32Tơt Pang u Phi-e-rơ hao duuk hôm, nei chaal rngơt. 33Pal bnih lơ duuk kơltut smbah Pang, u ơh laah: “Yau laa Koon Brah Ưn ngan!”
34Tơt ja han rlach kơh mak tôw, Brah Jê-sus u jơrnơ tơt teh Gê-nê-sa-rêt. 35Raih kwaal nei sot gưt Pang, bu maanh bnih tơmbơh baak jôm pal kwaal rlum u liêu leq pal bnih pơrtanh lôh u Pang, 36dan jjuh Pang dơơn aan bu buut teq u bơr ao Pang ri; u pal 'bơơn ja buut tơt kot kươt baaq.
ទើបបានជ្រើសរើសហើយ៖
Ma-thi-ơ 14: SBL2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.
