An Roma 6
6
A uk baa c'ko̱to
1Iye̱ bo̱ kaa a̱n na̱n ze? I na ryaa hwic a̱n c'ko̱t bat ho̱sa̱m Na'Sil ma̱n ma̱cmi? 2Sila bita̱! Cinnananan rein a uk baa c'ko̱to, i'le̱e̱le̱ ta̱m a̱n nan emt c'nocurimu a̱n emma̱n ca̱nca? 3A̱n ta nap az ho̱da̱na̱n baptisma weranstain cinna a Ye̱so Ka̱risti ni, i ho̱da̱n lo bo̱ ta̱m a̱n baptisma weransta na a̱n wa̱a̱'a ru da? 4Rema̱n taanlo, baan baptisma u'na̱n na emain cinna, na sagk na. Na sootk ta̱m rihi i'da̱n a Ka̱ristin baan wa̱a̱'a ru. Bat ho̱da̱na̱n na po̱to̱sto̱in Ka̱risti a̱n gwink K'Ceto, i ho̱da̱n lo bo̱ ta̱m i ge̱be̱ste̱in na em c'nocurimu a̱n le̱vk pookne.
5Ai retin na sootk rihi i'da̱n a unwan rema̱n wa̱a̱'a ru, lans za da, nan soot ta̱m rihi i'da̱n a unwan rema̱n po̱tu ru. 6Na napk az daava̱n na edgtin Ye̱so a̱n k'kan, na edgk ta̱m c'rihi c'naak ca̱n de̱bca̱ nocurimuc cinna ca̱ ut a unwa na. I bat nan o̱m we̱sa̱m c'ko̱t baa cinna. Na em-em taanl bat a na soot la ta̱m cokna c'ko̱t da. 7Rema̱n koowe̱ a̱n baasin u uku, u kobk c'ko̱to.
8Awaz na uk d'kut a Ka̱risti ni, na batk d'ba̱t az nan po̱t ta̱m a unwa na. 9Ai retin na napk az Sila po̱to̱sko̱ Ka̱risti, a tu wa̱a̱ ta̱m da, wa̱a̱'a a ta pa̱t ta̱m we̱sa̱m ru da d'kala. 10Wa̱a̱'anan u wa̱ini, u uk a'da̱n c'taa rem u hot we̱sa̱m c'ko̱to. Au po̱ttin la, u el d'kut a A'Sil na̱. 11Nwaa ta̱ma̱, de̱lese na hid no baa an hatin we̱sa̱m c'ko̱to. A̱n po̱tk la baa Na'Sil d'kut a Ye̱so Ka̱ristin Kan buu cinna.
12Rema̱n taanlo, an lag la ko̱tc pa̱t we̱sa̱m no a̱n gabt to̱nun we̱du no, un tu wa̱a̱ da. 13An se̱s la yobca̱n we̱du no soot rihic na'yomk baan emma̱ c'ko̱t da. Nes na hid no baa Na'Sila̱. Rema̱n a̱n lak a̱n uk baa c'ko̱to, a̱nta̱ma̱ la, na po̱to̱sko̱ no. Nes na yobca̱n we̱du no ta̱m rihic na'yomk baan emma̱n rihica̱ m'ga̱u. 14Rema̱n ko̱tc zatta ta̱m m'we̱s baa no da, ai retin za giirasan a̱n rein nu'gab da, i pusuu Na'Sil a̱n reina̱n gabta̱m no.
Coknan emma̱n rihic kasi
15I'Le̱e̱le̱ bo̱ kaana? Ai retin i pusuu Na'Sil a̱n reina̱n gabta̱m cinna, za giira da, i na ryaa bo̱ kaa hwic a̱n c'ko̱te? Sila bita̱! 16A̱n napk az an de̱l hid no a̱n gab rina̱n noc zein no ho̱d cokno, za nwaa bo̱ kaa coka̱n kan rein ta̱n gab rina̱n u zein no da? Awaz i ko̱tcan reina̱n emam m'coko, be̱se̱d no i a'wa̱a̱. An gab la rina̱n Sila zeine, Sila ta vaaksa no neta̱n an zattin ri d'reb da.
17C'Bo̱m la baa Na'Sila̱. Ai retin a̱n lak de̱ha̱n an emam c'ko̱t m'coko, a̱n vaakka la a̱n gabk la̱a̱suna̱n na emain no d'ba̱t d'da̱n. 18Na rutk no coka̱m c'ko̱to. A̱n vaakk kaa coknan emma̱n rihica̱n gela̱v Na'Sila̱. 19A̱m emaka no lalksa̱ ha̱n ai retin i nwaa neta̱n a ka̱la̱nka̱i. Ho̱da̱na̱n latin de̱ha̱n a̱n nesk yobca̱n we̱du no a̱n emam c'ko̱t m'coko, a emma̱n rihica̱ v'dum nu, a̱nta̱ma̱ la, nes na yobca̱n we̱du no rema̱n emma̱n rihica̱n gela̱v Na'Sila̱. A̱n cet a̱n soocda̱n zattin ri d'reb da.
20Daava̱n a̱n latin cokna c'ko̱to, a̱n ta lak coknan emma̱n rihica̱n gela̱v Na'Sil da. 21Iye̱ a̱n kumin daava̱n lo? Daava̱n a̱n latina̱n emma̱n rihica̱n rein ca̱ m'e̱n baa no a̱nta̱ma̱? Be̱se̱da̱n rihica̱n lo, i a'wa̱a̱. 22A̱nta̱ma̱ la, ai retin na rutk no coka̱m c'ko̱to, a̱n vaakk kaa cokna Na'Sila̱. Rina̱n ta̱n kumu, ti cet no a̱n soocda̱n zattin ri d'reb da. A̱n d'be̱se̱ ta̱ma̱, a̱n po̱t d'kala. 23Rema̱n copa̱nca̱ c'ko̱to i a'wa̱a̱. Ho̱sa̱m Na'Sil la, i po̱tu d'kal rem Ye̱so Ka̱risti kan buu cinna.
ទើបបានជ្រើសរើសហើយ៖
An Roma 6: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
