An Roma 7
7
C'Hwennsa a̱n c'ga̱i
1Hyaarene, i nwaananan napin giiras Mosa a̱m ciini. A̱n ta nap az i daava̱n noc retina̱n c'nocurimu a̱n giira citin m'we̱s baa ru da? 2Lag na em lalkun giira c'ga̱i. A̱n giira, netauna̱n ciin c'ga̱i, tu gab rina̱n giira c'ga̱i zein awaz wa̱ru ta wa̱a̱ da. A wa̱ru wa̱a̱ la, u zatta ta̱m hwenv c'ga̱i da. 3A wa̱ru ta wa̱a̱ la da, a a̱ra̱m hyan gaa o, i o̱mda u retine. A wa̱ru wa̱a̱ la, na butk o hwenva̱ c'ga̱i. A to̱n kaa a̱ra̱m hyan gaa o, za o̱mda u retin da.
4Hyaarene, ho̱da̱na̱n Ka̱risti utin a̱n cona k'ka̱n, i ho̱da̱n lo bo̱ a̱n nwaa ta̱m a̱n retin a'uk baa s'giira. I bat ta̱n vaak neta̱n noc hyan. Neta̱n kan na po̱to̱so̱in au utine. Rema̱n na emata A'Sil yomka kasi, ho̱da̱na̱n ce tu matt yaanc kasi. 5Rema̱n daava̱n na latina̱n gabma̱n rihica̱ c'nocurimu c'naake, giiras de̱lk na a̱n to̱nca̱n rihica̱ c'ko̱to, ca̱n we̱du cinna rein na̱m'to̱no̱. Rihica̱n lo ryaak hwic na'yomk a̱n we̱du cinna. Ca̱n nokta la a'wa̱a̱, ho̱da̱na̱n nan hot ceuna̱n matin yaanc naake.
6A̱nta̱ma̱ la, na butk na baan we̱sa̱m s'giira, ai retin na el ho̱d an wa̱in baan rina̱n lain i gagk na. I bat nan ema A'Sil m'cok a̱n d'hormo, a̱n le̱vk pookne. Za a̱n le̱vk ut ka̱n gabma̱n giiras ge̱nk da.
Giiras Na'Sil nakka c'ko̱to
7Iye̱ bo̱ kaa a̱n nan ze? Giiras Mosa bo̱ kaa i d'ko̱te? A̱'a̱. Za taanl da! Rema̱n a ta̱'m nap be̱ c'ko̱t da, a za rema̱n giira da. A ta̱'m nap be̱ ta̱m az c'zo̱rmo̱'is i d'ko̱t da, a za be̱ an giira zein, “Av em la c'zo̱rmo̱'is da.”#7:7 Go̱t ta̱m: U'Rwa̱ 20:17; Rsgi 5:21.
8Rema̱n rina̱n giira zeine, i de̱lk ko̱tc kumk ke̱e̱da̱n de̱le̱ m ri c'zo̱rmo̱'is a̱n kooye̱. Awaz be̱ za rema̱n giira da, lak be̱ ko̱tc uku. 9A̱m lak u'po̱tk daava̱n giiras ta latin da. Daava̱n giiras uvta̱ini, ko̱tc kumk m'we̱se̱. I emuz zai a̱m wa̱a̱-wa̱a̱. 10A̱m napt bo̱ kaa az giirasa̱n ge̱be̱se̱in be̱ sa̱ po̱to̱so̱, i a'wa̱a̱ a̱n sa̱ noktaine. 11Ko̱tc kumk d'ke̱e̱ rema̱n giira, c palkk me, c hok ta̱m me.
12Rema̱n taanlo, giira zatta ri d'reb da. Rihica̱n giira kain ta̱ma̱, c zatta ri d'reb da. Ic honhono, ta̱m i c'kasi. 13I giira kasi unlo bo̱ kaa a̱n kwe̱lve̱in m a'wa̱a̱? A̱'a̱. Za taanl da. Rema̱n na napt la c'ko̱t a na he̱n ca̱, ko̱tc kwe̱la̱vke̱ m a'wa̱a̱ rema̱n giiras kasi sa̱nlo. Bat rem s'giira, nan nap c'ko̱t a naakda̱n ca̱ncan kwe̱ a̱ngau.
C'Ma̱d a c'ko̱t no
14Na napk az s'giira, i d'hormo. Mi la i nocurimu, coka̱v c'ko̱to. 15A̱m ta ke̱e̱se̱ rina̱n m rein nu'em da. Rina̱n ta̱'m to̱n be̱ u'emo, za inya a̱m rein ta̱'m em da. Rina̱n m ha̱lin la, i inya a̱m rein ta̱'m ema. 16Awaz la a̱m el a̱n emma̱n rihica̱n ca̱ m ha̱lini, a̱m se̱sk az giira iu kasi. 17I sootk bo̱ kaa az za mi a̱n reina̱n emma̱n ca̱nca da, i ko̱tca̱n ca̱n rein a̱nmin de̱bc ri. 18A̱m napk az rihi kasi za baa ri a̱n de̱bc ri ca̱ c'nocurimu da. A̱m el be̱ la ta̱'m to̱n emma̱n rihic kasi. I za la kaa ti ema da.
19Rihic kasi ca̱ m to̱nin be̱ u'emo, a̱m ta em ca̱ da. Rihic naak ca̱ m ha̱lin la, i ca̱nca m rein nu'emo. 20Ai kus az a̱m el a̱n emma̱n rihica̱ m ha̱lini, i kwesaka az za mi a̱n reina̱n emma̱n ca̱nca da. I ko̱tca̱n ca̱n rein a̱nmin de̱bc ri.
21A̱m pamaska bo̱ kaa yomka giira: Am unu a̱n emma̱n rihi kasi, naaka̱d el lippi baa ri.
22Rema̱n a̱nmin de̱bc ri, a̱m el a̱n to̱nca̱n giira Na'Sila̱. 23Go̱t la kaa giira hyan el na'yomk a̱n yobca̱n we̱du ri, a̱n d'gaag a giirauna̱n reina̱n de̱bc ri ni. I de̱lk m a̱n emam giirauna̱n rein na'yomk a̱n yobca̱n we̱du ri m'cok v'daa. 24I naak me! Iwe̱ a̱n tu gwa̱a̱ m baan nocurimuca̱ ha̱n ca̱ c'ko̱to? Ca̱n be̱se̱da̱n ca̱nca i a'wa̱a̱? 25A̱m bo̱mk A'Sil rem Ye̱so Ka̱risti Kan buu cinna.
Ho̱da̱na̱n rihic soottine, a̱m el a̱n cokma̱n giira Na'Sil a̱nmin de̱bc ri. A̱n de̱bca̱ c'nocurimu la, ko̱tca m reina̱n emam m'coko.
ទើបបានជ្រើសរើសហើយ៖
An Roma 7: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
