An Roma 16
16
D'Po̱o̱sso̱
1Go̱to bo̱ na Fibi, hyanna cinna. A̱m napk o. I noca̱v d'kau. U el tu ema bugd a s'gabnanan rein a̱n le̱in Kankeriya m'coko. 2Kab na o c'kom c'il rem Kac'go̱m Kwe̱. A̱n ne̱e̱ o k'gwin ho̱da̱na̱n i hwentain a s'gab marssa netna. Se̱e̱te̱ na ta̱m o a̱n rina̱n u hobin kwe̱ baa no. Rem u se̱e̱tke̱ neta̱n hwe̱di. U se̱e̱tke̱ ta̱m me.
3Po̱o̱so̱ na Briskila na Akila, ac reina̱n yomka Ka̱risti Ye̱so d'kutu.#16:3 Go̱t ta̱m: YCCo 18:2. 4A ta ha̱l na hwaa na̱ rem ri da. Za mi ta̱m c'taa a̱n bo̱min na̱ da. Bugc a s'gab kwe̱ a an zain Yahude̱n da, a bo̱mk na̱. 5Po̱o̱so̱ na ta̱m a s'gabnanan rein ta karga a̱n buu na̱.
Po̱o̱so̱ na E̱pe̱netus ka m rein ta̱'m to̱n hwe̱di. Un e̱tina̱n kab Ka̱risti a̱n le̱in Asiya.
6Po̱o̱so̱ na Me̱e̱ri un emain no m'cok hwe̱di.
7Po̱o̱so̱ na Andronikus a̱n'a a Juniya na, an baco Yahude̱ne̱ an na gagin co a̱n buu s'ko̱m d'kutu. A emk din hwe̱di baa c'comtne. A baak a̱m ta̱m gaba̱m Ka̱risti.
8Po̱o̱so̱ na ta̱m Ampliyas kan gabs Kan Go̱mca̱n Kooye̱ u'na̱n m rein ta̱'m to̱n hwe̱di.
9Po̱o̱so̱ Ubanus kan yomka cinna baan gabs Ka̱risti, a̱n'a a Stakis kan ta̱'m to̱no̱.
10Po̱o̱so̱ na Apeles, un na go̱tin ho̱da̱n ha̱gca ru, na batk ta̱m d'ba̱t a unwan baan gabs Ka̱risti.
Po̱o̱so̱ na an buu Aristobulus.
11Po̱o̱so̱ na Herodiyo̱n kan ba̱ri k'Yahude̱.
Po̱o̱so̱ na an buuca̱n reina̱n gaba̱m Kan Go̱mca̱n Kooye̱.
12Po̱o̱so̱ na Traifina na Traifosa, netananan reina̱n coka̱m Kan Go̱mca̱n Kooye̱.
Po̱o̱so̱ na Pe̱sis kan ta̱'m to̱no̱. I neta hyan un emain Kan Go̱mca̱n Kooye̱ m'cok hwe̱di.
13Po̱o̱so̱ na Rufus kan Sila dagin baan gabs Kan Go̱mca̱n Kooye̱, a̱n inu, un rein ta̱m in mi.
14Po̱o̱so̱ Asunkritus, Flegon, Hemes, Patrobas, Hermes a hyannana̱n kwe̱.
15Po̱o̱so̱ Filologus na Juliya, Ne̱re̱yus a ha̱nu waa'wanta na, na Olimpas a a s'gabnanan rein baa na̱n kwe̱.
16Po̱o̱so̱ na hyannanon ta̱n le̱pk ta̱n le̱pke̱. Bugc an gabs Ka̱risti el ta̱m a̱n po̱o̱so̱m no kwe̱.
Lalksa̱ D'be̱se̱
17A̱m el a̱n kona̱m no hyaarene, gab na sasa a an rein ta damasa netna. A de̱le̱ na̱ ri c'ka̱tksi, a he̱lkse̱ ta̱m la̱a̱suna̱n na la̱a̱sa̱in na̱. Kwaa na na̱. 18Rema̱n goon o̱pnan lo, za Kan buu cinna Ye̱so Ka̱risti a reina̱n emam m'cok da, i ba̱tc na̱. A el ta palka̱l netnanan zattain s'ver da a̱n c'hwe̱e̱ls a la̱a̱ma̱n lalk na̱-na̱. 19Koowe̱ napk az a̱n el ta̱n gab rina̱n Kan Go̱mca̱n Kooye̱ zeine. Rema̱n taanlo, a̱m el a̱n c'za̱ngkta̱ rem no. Puti a tan na, a̱m to̱nk a̱n soot a s'vera̱n rema̱n a̱n napt rina̱n rein i kasi. I soot ta̱m az rihi za in tanin no a rihic naaka̱n da. 20Sila nan rein ta la̱ta̱sa̱ na c'de̱be̱, ta ne̱kt A̱krimu, a de̱l ta̱m a̱n pa̱t we̱sa̱m ru za a m'gosa̱n da.
Pusuu Kan buu cinna Ye̱so Ka̱risti boro baa no, A̱nha̱a̱n.
21Timoti, hyaare kanayomko, a̱n Lusiyo̱s, a̱n Jason, a̱n Sosipata, an baco Yahude̱n, el kwe̱ a̱n po̱o̱so̱m no.
22Mi ta̱m Tatiyus kan ge̱ne̱in Bulus taka̱llaka̱ ha̱n, a̱m el a̱n po̱o̱so̱m no a̱n dinda̱ Kan Go̱mca̱n Kooye̱.
23Gayus kan cila̱sa̱in me, u ne̱e̱ ta̱m a s'gab baada̱ d'mera, u el a̱n po̱o̱so̱m no. E̱rastus kan kinma̱n kind ni'le̱e̱ a Kwartus hyanna cinna ka s'gab na, a el kwe̱ a̱n po̱o̱so̱m no. [24Lag pusuu kan buu cinna Ye̱so Ka̱risti boro baa no kwe̱. A̱nha̱a̱n, a̱nha̱a̱n.]#16:24 Ge̱nke̱-ge̱nke̱ c hyan zatta za̱tva̱n 24 da.
Cepk u d'be̱se̱ a c'bo̱m no̱
25Na bo̱m o, un ciin m'we̱s u esasa batma̱n ba̱ta̱d no, ho̱da̱na̱n kasi lalk Ye̱so Ka̱risti um reina̱n d'ba̱s vattine. Kasi lalkun lo la, i rina̱n na lain na ze̱sk de̱ha̱nz lanma̱n takboda̱n copun yanda̱hna. 26A̱nta̱ma̱ la, Sila nan rein d'kala, a de̱lk baranc na̱ ba̱tkska̱ a ge̱n ta̱m ca̱. Rema̱n an copun yanda̱ha̱n batt d'ba̱t a gab rina̱n Sila zeine.
27Lag Sila s'ver kwe̱ kab k'gwin d'kal-d'kal rem Ye̱so Ka̱risti. A̱nha̱a̱n.
ទើបបានជ្រើសរើសហើយ៖
An Roma 16: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
