An Roma 15
15
Pusa̱sa̱ na neta̱n c'de̱be̱
1Cinnananan ko̱grin baa s'gaba, na gag na c'de̱b a an kalkma̱n bata̱m d'ba̱t baa Na'Sila̱. A na kwesa la to̱nca̱n hid cinna da. 2Lag koowe̱ baa cinna pusa̱sa̱ hyaaro c'de̱b rema̱n i se̱e̱tte̱ o. Bat ti swidi o we̱sa̱m s'gaba. 3Rema̱n Ka̱risti a̱n hid ru, u ta pusa̱sa̱ hid ru c'de̱b da. Ho̱da̱na̱n i retin a'ge̱n a̱n lalks Na'Sila̱, “Rebca̱n na rebga̱llin vo, i a̱n hid ri.”#15:3 Go̱t ta̱m: Zab 69:9.
4Rihica̱n na ge̱nin de̱ha̱nz kwe̱ a̱nmin ge̱nsa̱n lalks Na'Sila̱, na ge̱n-ge̱n ca̱ rema̱n na la̱a̱sta̱ na. I bat rema̱n gaga̱m c'de̱b a setasama̱n de̱bca̱n lalks Na'Sil sa̱n la̱a̱sa̱ na, nan sak u'con a̱n rihica̱n Sila zein az ta ema na. 5Lag Sila nan ta ne̱e̱ na we̱sma̱n gaga̱m c'de̱b a setasam c'de̱b ne̱, ne̱e̱ no hora̱mda̱n swe̱e̱m d'hi baan gabs Ka̱risti Ye̱so. 6I taanl a̱n ta̱n ne̱e̱t A'Sil Ceta cinna a Kanubu Ye̱so Ka̱ristin k'gwin nwaa kwe̱, k'nwa̱a̱ k'da̱nka̱, keka̱b uda̱nka̱.
Kasi lalk rem koowe̱
7Rema̱n taanlo, kab na hyannanon d'ba̱t d'da̱n ho̱da̱na̱n Ka̱risti kabtin na, rema̱n neta̱n bo̱mt A'Sila̱. 8Lag a̱m ve̱ce̱te̱ no m'ga̱u. Ka̱risti emaka Yahude̱n m'cok rema̱n na kwesata az A'Sil i ka m'ga̱u. Rema̱n ta̱m na esasta rina̱n Sila zein az ta ema cetonc Yahude̱ne̱. 9Sila emk taanlo bat an zain Yahude̱n da ta bo̱m A'Sil rema̱n kwisid na̱. Ho̱da̱na̱n i retin a'ge̱n a̱n lalks Na'Sila̱. Sa̱ zeka,
“Rema̱n taanlo, A'Sila̱,
ta̱'m bo̱m dind rov
baad an zain Yahude̱n da,
a̱m bo̱m ta̱m dind rov a̱n c'sepa.”#15:9 Go̱t ta̱m: 2Sam 22:50; Zab 18:49.
10I el ta̱m a'ge̱ne̱,
“Nwaa an zain Yahude̱n da,
em na c'za̱ngkta̱ d'kut a neta̱n ru nu.”
11Ta̱ma̱,
“Nwaa an zain Yahude̱n da,
bo̱m na Kan Go̱mca̱n Kooye̱.#15:11 Go̱t ta̱m: Zab 117:1.
Hwe̱ls na ta̱m o,
nwaa neta̱n kwe̱.”
12Isaaya k'barav Na'Sil zeka ta̱ma̱,
“Nan kum goov Je̱si,
kan tu unva̱ u em go̱mc an zain Yahude̱n da,
ta̱ma̱ an zain Yahude̱n da ta sav c'de̱b baa ru.”#15:12 Go̱t ta̱m: Isa 11:10.
13Lag Sila nan ne̱in no sava̱m c'de̱b baa na̱, hiis de̱bc no a̱n c'za̱ngkta̱ a la̱ta̱m c'de̱b ne̱ an retina̱n bata̱m d'ba̱t baa na̱. I bat savma̱n de̱bc no baa Na'Sil ca̱n soot d'ba̱t d'da̱n rema̱n we̱sma̱n Hora̱md Na'Sila̱.
Rina̱n de̱lin Bulus ge̱nt k'taka̱lla?
14Hyaarene, mi a̱n hid ri, a̱m batk d'ba̱t az nwaa i netnan emma̱n rihic kasi, an ciin ta̱m s'nap hwe̱di. An ta la̱a̱ ta̱m a̱n sakt hyannana̱n a̱n k'le̱ve̱. 15Da̱n lalksa̱n rihic hyan, a̱m ge̱na̱vke̱ no̱ a̱n c'a̱ra̱m rem a̱m bakasta no da̱n ca̱nca, ai retin Sila ne̱e̱k a̱m pusuu na̱. 16Sila ne̱e̱k a̱m u'pusu a̱m soot kan coka̱m Ka̱risti Ye̱so baa an zain Yahude̱n da. A̱m em yomka go̱m va̱ d'ka̱b un ba̱sda̱n kasi lalk Na'Sila̱. I bat an zain Yahude̱n da ta vaak sakun tu ke̱be̱ baa Na'Sila̱. An Hora̱md Na'Sil vaaksain an zattin ri d'reb da.
17Rema̱n taanlo, a̱m el a̱n c'ka̱ndi an Ka̱risti Ye̱so a̱n cokma̱ m reina̱n emam Na'Sila̱. 18A ta̱'m mak a̱m tana rihi da a za rihica̱n Ka̱risti emin a̱n koma ri da. U de̱lk an zain Yahude̱n da a gab lalk Na'Sil rema̱n rihica̱ m ve̱ce̱in na̱ a rihica̱ m emin ne. 19Rihica̱ c'he̱t a ca̱n sipa̱m na'nwa̱a̱ na̱, a̱n we̱sma̱n Hora̱md Na'Sila̱. Rema̱n taanlo, a̱m ba̱sk kasi lalk Ka̱risti a̱n c'ke̱e̱ kwe̱ lanma̱n le̱in Urisalima caama̱n copun Ilirikum. 20To̱nun de̱bc ri, i a̱m em ba̱sda̱n kasi lalk Ka̱risti va̱na̱n a na takina̱n nap o da. Rema̱n am em la a'maa a̱n kaaka̱d noc hyan da. 21Ho̱da̱na̱n i retin a'ge̱n a̱n lalks Na'Sila̱,
“An a na takin na ve̱ce̱ke̱ da̱n unwa da,
ta he̱n o.
An ta takin a hongk ta̱m da̱n unwa da,
ta ke̱e̱se̱.”#15:21 Go̱t ta̱m: Isa 52:15.
22I rina̱n lain ha̱n ti hol a̱m u'noko baa no.
Bulus walgk havma̱n Roma
23A̱nta̱ma̱, baad ta kus a̱m da̱n ta̱'m hav a̱n ke̱e̱ca̱n lo da. Go̱t ta̱m a̱m rigk s'we̱e̱ hwe̱di na̱m'to̱n a̱m hau baa no. 24A̱m se̱e̱pske̱ az am ze havma̱n copun Spe̱in, ta̱'m hato baa no na he̱nne. A̱m de̱lk c'de̱b az am wa ta̱'m to̱o̱-to̱o̱, ta̱'m hato baa no, a̱m la̱v c'hona. Am ze m'to̱o̱, ta̱n ema m d'se̱e̱te̱ a̱m cet a̱n a̱n'a. 25A̱nta̱ma̱ la, ta̱'m baa se̱ve̱ a s'gab m'ho̱s a̱n le̱in Urisalima.#15:25 Go̱t ta̱m: 1Kor 16:1-4. 26I emk an Makidoniya a an Akayan d'ke̱m a kargsa c'rihi rem kobneta̱n a s'gab an rein a̱n le̱in Urisalima.
27I emk na̱ d'ke̱m hwe̱di a em tan, rem i sootk ho̱d d'mo̱g a se̱e̱te̱ na̱. Awaz an zain Yahude̱n da kumk pusuu Na'Sil rem Yahude̱ne̱, i sootk na̱ ho̱d d'mo̱g a se̱e̱te̱ Yahude̱ne̱ a̱n rihica̱ c'nocurimu. 28Am taas yomka hna, a̱m he̱n ta̱'m a̱m nesk na̱ ho̱sma̱ ne kwe̱, ta̱'m hato baa no ta̱'m hav-hav Spe̱in. 29A̱m napk la az am cau baa no, ta̱'m cau a pusuu Ka̱ristin hwe̱di.
30Hyaarene, a̱m el a̱n kona̱m no rem Kanubu Ye̱so Ka̱risti, a rema̱n to̱nca̱n Hora̱md Na'Sil da̱n ne̱e̱ ne, az a̱n se̱e̱te̱ m a̱n s'cepk a̱n ma̱dca̱ m retine. 31Bat Sila ta gwa̱a̱ m a̱n komc an ta batin d'ba̱t baa Na'Sil da, an rein a̱n copun Judiya. Bat ta̱m yomkanan ta̱'m em a̱n le̱in Urisalima, ta ke̱be̱ baa a s'gaba. 32Ai em taanlo, ta̱'m can kaa baa no a̱n c'za̱ngkta̱. A̱m hwera d'kut a nwaa na, a Sila se̱se̱. 33Lag Silan la̱ta̱sa̱m na c'de̱b boro baa no kwe̱. A̱nha̱a̱n!
ទើបបានជ្រើសរើសហើយ៖
An Roma 15: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
