An Roma 12
12
Emma̱n yomka Na'Sila̱
1A̱m el a̱n kons no hyaarene, ai retin Sila hongk za̱im cinna, az a̱n nes hid no sak baa Na'Sil ho̱da̱n rina̱n reina̱n s'hobo. A̱n soot rihi in zattin ri d'reb da, in ti pusa̱sa̱ A'Sil c'de̱be̱. I inya a̱n rein hwiipsa̱c Na'Sil ca̱ m'ga̱u, ca̱n hwennainne. 2An gabese la ta̱m ho̱da̱na̱n an copun yanda̱ha̱n retina̱n emma̱n nocurimuc na̱ da. Lag Sila vodasa keka̱bs no, bat nocurimuc no ca̱n voda. I daava̱n lo kaana, a̱n ta̱n napt rina̱n Sila rein nu'to̱n baa no, in rein i kasi, honhono, ta̱ma̱ in ti pusa̱sa̱ na̱ c'de̱be̱.
3A̱m el a̱n kaaga̱m kooye̱ da̱nv no wa, rema̱n pusuuna̱n Sila ne̱in me. Az an guba̱sa̱ la hid no ho̱da̱na̱n i ta ge̱be̱ste̱in da. Go̱t na i kasi, a̱n o̱m ta̱m hid no a la̱ta̱sa̱m d'hin ho̱da̱n geda̱n batma̱n ba̱tda̱n Sila ne̱in no. 4Na ci c'yob hwe̱di nu'we̱d uda̱nka̱. Kooye̱ yobwa ci la yomka ru. 5I ho̱da̱na̱n i retin bo̱ baa cinna an gabs Ka̱risti. Go̱t ge̱ na el hwe̱di, cinna la kwe̱ i yobca̱n we̱du Ka̱risti. Koowe̱ ta̱m i u'yob baan we̱du hyaaro.
6Na ne̱e̱k na we̱sma̱n emka̱lla̱m c'rihi s'goo-s'goo ho̱da̱n pusuuna̱n Sila emain koowe̱. Awaz i vatma̱n com Na'Sila̱, vat ho̱da̱n geda̱n batma̱n ba̱ta̱d rov baa Na'Sil ne̱e̱tin vo. 7Awaz i c'go̱te, na kaa d'hi baa c'go̱te. Kan rein tu la̱a̱sa̱ netna, u de̱l m'we̱se̱. 8Kan setasam neta̱n c'de̱be̱, u pad a'cuu. Ka m'ho̱so̱, u em m'ho̱s yaga. Awaz i c'go̱mo̱, a̱n em c'go̱m i kasi. Ka d'kwisi, u em a̱n pusuu c'de̱be̱.
9Lag to̱nc no soot ca̱ m'ga̱u. Ha̱l na rihic naake, a̱n bo̱p rina̱n rein i kasi ke̱kk. 10To̱n na hyannanon ho̱d nu'ha̱nu. Koowe̱ ne̱e̱ ta̱m hyan k'gwin, i hat ho̱da̱na̱n tu ne̱e̱t hid ru. 11Soot na a̱n za̱ksa̱ s'gab male. Soot na kooye̱ daava gezgez a̱n d'hormo, a̱n emam Kan Go̱mca̱n Kooye̱ m'coko. 12Lag na sakma̱n cou no baa Na'Sil de̱l no a̱n c'za̱ngkta̱. Gag na ta̱m c'de̱b baan ryaaka̱ d'koba. An poo la s'cepk da. 13Se̱e̱te̱ na hyannano a s'gab an robine. A̱n vetasa ta̱m marssam hamcne.
14Pe̱ge̱ na an ryeesam no d'kob emu Na'Sila̱. Pe̱ge̱ na na̱ emu Na'Sila̱, an ema la na̱ s'nwa̱a̱ da. 15Se̱e̱te̱ na a c'za̱ngkta̱, c'za̱ngkta̱. An rein ta̱m a̱n naam c'de̱be̱, se̱e̱te̱ na na̱ naam c'de̱be̱. 16Soot na i kasi a hyannano no. An em la m'lo̱g da. Soot na la a'walgke, a̱n em c'bara a neta̱n kalkne. An dak la ta̱m d'gen az a̱n pa̱tk koowe̱ a̱n s'ver da.
17An em la k'so̱to̱so̱ da. Gab na sasa a̱n em rihica̱n neta̱n ta he̱n az i honhono. 18I lan baa no, awaz ti ema, em na rina̱n ti ema kwe̱ a̱n soott i kasi a neta̱n na. 19Nwaa baran ri, an em la k'so̱to̱so̱ da. Le̱gse̱ na A'Sil a so̱to̱so̱ no a̱n hwinsa̱d na̱. Rema̱n i el a'ge̱n a̱n laks Na'Sila̱, “I mi a̱n ta̱'m em k'so̱to̱so̱. I mi a̱n ta̱'m ve̱e̱kte̱ ta̱m na̱.” I Kan Go̱mca̱n Kooye̱ a̱n vatin taanlo.
20Lalks Na'Sil zek ta̱ma̱, “Awaz kan ha̱lc rov el a̱n mero, ryaaksa o. A so̱o̱ti ot o, ne̱e̱ o m'ho̱o̱ u so̱o̱.” Av em taanlo, a̱v la a̱n kargsam ru ka̱ngca̱n hwela a̱n d'hi.#12:20 Go̱t ta̱m: Llal 25:21-22. 21An lag la rihic naak pa̱t we̱sa̱m no da. Pa̱t na we̱sma̱n rihic naak a̱n rihic kasi.
ទើបបានជ្រើសរើសហើយ៖
An Roma 12: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
