An Roma 13
13
Na gab c'go̱mo̱
1Lag koowe̱ gab c'go̱mo̱. Rema̱n go̱mc za da, a za ca̱n Sila kain da. Go̱mca̱n rein ta̱m kwe̱, i Silan kain ca̱. 2Rema̱n taanlo, koowe̱ a̱n ha̱lin gaba̱m c'go̱mo̱, u ha̱lk gabma̱n rina̱n Sila zeine. Kan ha̱lin la u'gabo, u la a̱n kwe̱lve̱m hid ru gedma̱n lalko. 3Go̱mc za ri v'gel baa an ta em i kasi da. I an ta em i naak a̱n ta gel c'go̱mo̱. A̱v to̱nk a̱v rwa̱a̱ gela̱v c'go̱me? Em c'rihi c'kasi, go̱mc ca̱n bo̱m vo.
4Go̱m i coka̱v Na'Sil u emata no rihic kasi. Av em la rihi i naake, hong gela̱v c'go̱mo̱. Rema̱n za ka̱ka̱l a̱n go̱m bo̱ptin k'van da. I unwa coka̱v Na'Sila̱, k'comt va̱n hwinsa̱d Na'Sil u vent an emin rihic naake.
5Rema̱n taanlo, gab na c'go̱mo̱. Za rema̱n gelva̱n hwinsa̱d Na'Sil c'taa da, i rema̱n de̱bc no napk ta̱m rina̱n ge̱be̱se̱ine.
6I rema̱n taanl bo̱ ta̱m a̱n ta̱n copt tala. Rema̱n a c'go̱m i cokna Na'Sila̱, an nesin hid na̱ male rema̱n yomka ne. 7Cop na koowe̱ rina̱n tu gab no: Awaz i tala, cop na. Awaz i talun kumu no, cop na. Koowe̱ a̱n ge̱be̱se̱in na gela, gel na o. Kan nan ne̱e̱ ta̱m k'gwin, ne̱e̱ na o.
Rihica̱n ta̱n ema hyannano
8An lag la noc gab no d'mo̱g da, a za mo̱gda̱n to̱nc hyannanon da. Rema̱n koowe̱ a̱n to̱nin hyaaro, u taask gabma̱n giira. 9Giirasa̱ ha̱n kwe̱ sa̱n zeine, “Av em la d'o̱m da. Av hwaa la noc da. Av em la d'hiv da. Av ke̱m la noc a̱n c'ko̱l da. A av em la c'zo̱rmo̱'is da.” Sa̱nsa a giiras hyan sa̱n kusini, na weranska sa̱ kwe̱ va̱na̱n na zeine, “To̱n kan e̱s rov ho̱da̱n hid rovo.”#13:9 Go̱t ta̱m: U'Rwa̱ 20:13-15,17; Rsgi 5:17-19; 21; Ggdk 19:18. 10Av la a̱n to̱nc noco, a ta̱'v ema o rihic naak da. Rema̱n taanlo, i to̱ncan rein geda̱n gabma̱n giira.
11Em na taanl rema̱n go̱tma̱n daava̱n na retin a̱nta̱ma̱. Daav ceka va̱n ta̱n pa̱dkt na̱m'la̱va̱. Rema̱n daava̱n gwa̱a̱ma̱d cinna hodgka d'viivi. I hatk daava̱n na taktain bata̱m d'ba̱t baa Na'Sila̱. 12Gyop emk hwe̱di, i bo̱pk a̱n zana. Na lag emma̱n rihic naak ca̱n neta̱n rein ta em ni'cumunkunnu. Na walg emma̱n rihic kasi ca̱ d'za̱n. 13Na em rihica̱ d'kau ho̱d an rein a̱nmi d'za̱n. Za nu'ka̱a̱lka̱a̱l da. Za ho̱d so̱o̱ga̱n da. Za a̱n d'o̱m da alla emma̱n rihica̱ m'e̱n da. Za ni'dam a d'hyubun da. 14Em na c'nocurimu ho̱d Kanubu Ka̱risti. An keka̱b la emma̱n rihica̱n nocurimuca̱ c'ko̱t rein ca̱n to̱n da.
ទើបបានជ្រើសរើសហើយ៖
An Roma 13: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
