Yomka C'Comtne 7
7
Istifanus baan gedma̱n lalko
1Go̱m va̱ d'ka̱b u Na'Sil u so̱dk ipkt bo̱ Istifanus, “Lalksa̱n a uvta̱in az a̱v vatka, i m'ga̱u?”
2Istifanus se̱st bo̱ na̱, “Cet me ne a hyaaren ne, hong na me. An ceta cinna Ibrahi latina̱n d'sooc a̱n copun Me̱sopotamiya, ai u cet Haran, Sila k'gwin nokka baa ru.#7:2 Go̱t ta̱m: D'Tak 12:1. 3Sila zek o, ‘Unu v lag copu rov a an bano no, a̱v caa copuna̱n ta̱'m kwesa vo.’
4“Ibrahi lagta bo̱ la copu an Kaldiya u havk u sootk a̱n copun Haran. An ceto utine, u una̱vka̱ lanma̱n a̱n'a, u ceka copu ha̱n va̱na̱n a̱n rein a'soot a̱nta̱ma̱.#7:4 Go̱t ta̱m: D'Tak 11:31; 12:4. 5Sila ta ne̱e̱ la o baada̱n tu soot a̱n a̱n'a da, daat v'kyoo da. Sila gigiki la o lalk az ta ne̱e̱ o a goov run copune. Go̱t la a̱n daava̱n lo, Ibrahi zatta waa da.#7:5 Go̱t ta̱m: D'Tak 12:7; 13:15; 15:18; 17:8. 6Sila zeka la o, ‘Goov rov ta̱'v em d'hamc a̱n copun mammama. Ta de̱l na̱ na̱m'coko, a ryeesa ta̱m na̱ d'kob s'we̱e̱ s'za̱ngu s'naase.’
7“Sila zeka, ‘Ta̱'m geda la copuna̱n de̱lin na̱ na̱m'cok lalko. A daava̱n lo to̱o̱, ta rwa̱n a han a emam c'hwiipsa̱ a̱n baada̱ hna.’#7:7 Go̱t ta̱m: U'Rwa̱ 3:12. 8Sila gigk lalkun emma̱ s'ged a Ibrahi ni. Ibrahi matt bo̱ Isaaku, u ema ta̱m o s'ged a̱n hweda̱ v'ya̱a̱ru. An daav cetine, Isaaku matk Yakubu un matin la c'ceton oopa c'ila̱.#7:8 Go̱t ta̱m: D'Tak 17:10-14; 21:2-4.
9“Rem d'hyubu, ceta cinnan babk Isuhu na savk o na̱m'cok a̱n copun Masar. Sila lak la d'kut a unwa na.#7:9 Go̱t ta̱m: D'Tak 37:11-28; 39:2-21. 10A gwa̱a̱k o lanma̱n kooye̱ kobda. A ne̱e̱k o s'vere. A de̱lk ta̱m Fe̱ro kan go̱mca̱n copun Masar he̱nk ke̱md ru, u kaak ta̱m o go̱mca̱n copun Masar a kan go̱teca̱n buu run kwe̱.#7:10 Go̱t ta̱m: D'Tak 41:39-41.
11“A̱n daava̱n lo, mer emk u damra a̱n copun Masar a copun Kana na, un ne̱in neta̱n damra d'koba. I de̱lk ceta cinna robk rina̱n ta ryaa. 12An Yakubu hongtin az ryaakc el a̱n copun Masar, u comk ceta cinnan na̱m'e̱te̱. 13A̱n hav u v'illa̱, Isuhu ve̱ce̱ke̱ na̱ az i unwa ha̱na na̱. Fe̱ro napuz kaa av Isuhu nu. 14An ta̱da̱ to̱o̱tine, Isuhu comt bo̱ na nokta ceto Yakubu baa ru d'kut a an ba̱na̱n kwe̱, neta̱n kwe̱zc c'ta̱a̱cu a̱n oopa ni'tan. 15Rema̱n taanlo Yakubu havk copun Masar va̱na̱n u wa̱in a ceta cinnan kwe̱. 16Na o̱mko̱ na̱ na saka Shekem. Na sagk na̱ a̱n saguna̱n Ibrahi wain baa aka̱n Hamo.
17“An daava̱n Sila ta esasta lalkuna̱n a gigiin Ibrahi bo̱ptina̱n can, neta̱n cinna sudk a̱n ma̱ca̱m hwe̱di d'kal a̱n copun Masar. 18Noc hyan un ta napin Isuhu da, ryaat bo̱ go̱mca̱n copun Masar.#7:18 Go̱t ta̱m: U'Rwa̱ 1:7-8. 19Go̱mune ta̱a̱ska̱ ceta cinna ka̱ngu. U de̱lk na̱ a̱n we̱sma̱n go̱mc ru a dukurku yaa'gyoza̱n na̱ na'is rema̱n a uti. 20I a̱n daava̱n lo a̱n na mattin Mosa, waa a c'kempan hwe̱di. Inu a̱sa̱ska̱ o s'pe̱e̱t s'ta̱a̱c a̱n buu ceto.#7:20 Go̱t ta̱m: U'Rwa̱ 2:2. 21An na dukutuin o, waav Fe̱ro waa'wanta o̱mk o u guba̱ska̱ o u soot waav ru. 22Na la̱a̱ska̱ Mosa kooye̱ goon napsa sa̱n copun Masar. U sootk damran noc a̱n lalks ru a yomka ru nu.
23“An Mosa cetin s'we̱e̱ kwe̱zc c'il nu'maco, i kwesaka o a̱n de̱bc ru az u rig baa an ba̱na̱ an Isra'ila. 24Au he̱ntin kan Masar a̱n pita̱lsa̱m da̱nv an Isra'ila, u uviki o. U hok kan Masar une. 25U de̱lk be̱ c'de̱b a̱n daava̱n lo, az ha̱nun ta ke̱e̱se̱ az Sila la na'yomk a unwan u gwa̱a̱t na̱. A ta ke̱e̱se̱ la da.
26“A̱n zantam hyan, u he̱nk ta̱m an Isra'ila i'il ni'dumi. U to̱nk be̱ u se̱e̱pse̱ na̱. U zet bo̱ na̱, ‘Kayya anba̱rini. Nwaa ge̱ nu'ha̱nu, i rema̱n ye̱ kaa a̱n ta̱n hwesete hic no?’
27“Kan laina̱n pita̱lsa̱m hyaaro cuka̱nta̱ bo̱ Mosa. U zeka, ‘Iwe̱ a̱n kain va̱ c'go̱m a kan gedma̱n lalka̱n baa co? 28A̱v to̱n-to̱n a̱v hwaa m ho̱da̱na̱n v hotin noc va̱n Masar de̱e̱de̱?’ 29An Mosa hongtin taanlo, u somk u cek copun Midiyan, va̱na̱n u sootin u mat yaa'a̱ra̱m ni'ila̱.
30“An s'we̱e̱ kwe̱zc c'il to̱o̱tine, k'comta̱v Na'Sila̱ nokka baa Mosa a̱n remda̱n hwelan a̱n k'boba a̱n copu k'mam a̱n paata̱n se̱mka̱n Sinai. 31An Mosa he̱ntin hwelanane, u sipk a'nwa̱a̱ rema̱n rina̱n u he̱nine. Au cetin d'viivi u keksta, u hong-hong goda̱v Na'Sila̱. A zeka,
32“ ‘I mi Sila ceta no,
Ibrahi, Isaaku, a Yakubun ta̱ma̱.’
“Mosa he̱e̱kk a̱n s'zapa. U ta sud ta̱m a̱n go̱t da.
33“Sila zet bo̱ o,
“ ‘Ho̱l kaatc rovo.
Rema̱n va̱na̱n v rein bo̱ a'esa,
i baada̱n zattin ri d'reb da.
34A̱m he̱nk kobda̱n neta̱n ri rein nu'ryau a̱n copun Masar.
A̱m hongk ta̱m kans na̱.
A̱m ciza̱-ciza̱ a̱m gwa̱a̱t na̱.
Noka ha. Ta̱'m com v a̱n copun Masar.’
35“I Mosa unlo ge̱, un an Isra'ila ha̱lin a zeka, ‘Iwe̱ a̱n kain v c'go̱m a kan gedma̱n lalka̱n baa co?’ I unwa ge̱ a̱n Sila comin u soot go̱m a kan gwa̱a̱ma̱d na̱ a̱n nwa̱a̱'a k'comta̱v Na'Sil un nokain baa ru a̱n k'boba. 36U rutka̱ na̱ lanma̱n copun Masar au emka̱ltin rihica̱ c'he̱t a sipa̱m na'nwa̱a̱n a̱nmin copun Masar, a baan saam gyo̱za̱mne. U emk ta̱m tan a̱nmin k'kad s'we̱e̱ kwe̱zc c'ila̱.
37“I Mosa unlo a̱n zein netnan Isra'ila, ‘Sila no ta kwimi no k'barav na̱ ho̱d ri baa no.’#7:37 Go̱t ta̱m: Rsgi 18:15-18. 38U lak baan kargad netnan Isra'ila a̱nmi k'kade. K'Comta̱v Na'Sil iga̱msk ta̱m o a̱n Se̱mka̱n Sinai d'kut a ceta cinna na. I a̱n a̱n'a u ke̱bve̱in cinna lalks nu'po̱to.#7:38 Go̱t ta̱mU'Rwa̱ 19:1-20; Rsgi 5:1-33.
39“Ceta cinna ta gab la lalk ru da. A ha̱lk o. A emk getun de̱be̱, a to̱nk be̱ a vaak Masar. 40A zek Haruna, ‘Be̱le̱ na cepkuna̱n tu ge̱e̱ na hwici. Rema̱n Mosa uha̱n bo̱ un ruta̱in na a̱n copun Masar, a̱n na nap rina̱n kuma̱in o da.’#7:40 Go̱t ta̱m: U'Rwa̱ 32:1.
41“I a̱n daava̱n lo a zuttin rihi ho̱d d'waa naama, a ema da̱ sako. A he̱nk ke̱mda̱n rina̱n a emin a̱n komc na̱. 42Sila batt bo̱ na̱. A lagk ta̱m na̱ a ema d'hwen, pe̱e̱te̱ a keba̱n c'hwiipsa̱. I ho̱da̱na̱n i retin a'ge̱n a̱nmin taka̱llac baranc Na'Sila̱. Ca̱ zeka,
“ ‘Nwaa netnan Isra'ila,
a̱n tak a̱n ema m
sako alla a̱n san m'ho̱so̱,
a̱n we̱e̱sa̱ ha̱n kwe̱zc c'il
a̱nmi k'kade?
43A̱n o̱mko̱ ka̱bu Mole̱k
a keba̱v cepk non Remfan na.
Rihica̱n a̱n emka̱llin rema̱n a̱n emata ca̱ c'hwiipsa̱.
Ta̱'m sav no na̱m'cok copun Babilo̱n.’
44“Ceta cinna ciki buuk Na'Sil a̱n k'kade. Ka̱n ta̱k kwesa az Sila el a̱n a̱n'a. Na emk ka̱ ho̱da̱n ka̱n Mosa he̱ne̱ine.#7:44 Go̱t ta̱m: U'Rwa̱ 25:9-40. 45An ceta cinnan kabtin buuk ne a̱n daava̱n Jo̱suwa retina̱n gabta̱m na̱, a noktk ka̱ daava̱n a swe̱ge̱te̱in copca̱n netnanan Sila vogin a̱n d'gaag rem na̱. Buuka̱n lo el la a̱n copu na̱ na ceta daava̱n go̱mc Dauda. 46Dauda kumk hya̱a̱ma̱n baa Na'Sila̱. U kont bo̱ az u me̱e̱ Sila Yakubu u'bu.#7:46 Go̱t ta̱m: 2Sam 7:1-16. 47I So̱lmo̱n la a̱n me̱in A'Sil buune.
48“Go̱t la, Kac'go̱m Kwe̱, u za tu soot a̱n buuca̱n na main a̱n c'kom da. Go̱t rina̱n k'barav Na'Sil vatine. U zeka,
49“ ‘Sila zeka,
i a'con an rein taarda̱n go̱mc ri.#7:49 Go̱t ta̱m: Isa 66:1-2.
Copun yanda̱ha̱n ta̱ma̱,
i dotada̱n sakasama̱n naas ri.
Iye̱ goon buuwa a̱n ta̱n me̱e̱ me?
Alla ipe̱ a̱n ma hwera?
50Za mi ho a̱n balin rihica̱ ha̱n kwe̱ a̱n komc ri da?’
51“Nwaa a c'honga̱mzan, an de̱bc kandin ho̱da̱n an ta napin A'Sil da. An zain ta̱m ta hong lalks Na'Sil da. A̱n ha̱lk ta̱m ge̱ne̱m Hora̱mda̱n zattin ri d'reb da u'con. I ho̱da̱n lo bo̱ a̱n ceta non emtin de̱hne.#7:51 Go̱t ta̱m: Isa 63:10. 52Iye̱ k'barav Na'Sil wa a̱n ceta non ta ta̱a̱sa̱in ka̱ng da? A hweela̱lk ta̱m an vatin de̱ha̱nz az kan gela̱v Na'Sila̱ lan na̱m'han. I unwa ta̱m a̱n babin a̱n hoka. 53I nwaa la a̱n kabin s'giira baa k'comta̱v Na'Sila̱, a̱n ta gab la sa̱ da.”
Na hok Istifanus
54An an gedma̱n lalk hongtin rihica̱n Istifanus vatine, i do̱o̱k na̱ c'de̱be̱. A puuku. 55Istifanus la, a̱n we̱sma̱n Hora̱mda̱n zattin ri d'reb da, u wa̱lkk a'con u he̱nko gwink Na'Sil a Ye̱son a'es a̱n komas'to̱ a Na'Sila̱, 56U zeka, “Go̱t na, cona a̱ba̱ska̱. A̱m he̱nko Waav Noc a̱n komas'to̱ a Na'Sil a k'gwin.”
57A ze̱lt bo̱ s'god a zo̱p ta̱m conc na̱. A gudgva̱z o v'daa v'da̱nka̱. 58A rutk ta̱m o pangad ni'le̱e̱ a bonga̱lk o. An bongin o u uti, a kink kusa̱m na̱ a̱n naas waa'beb u'na̱n nan po̱g So̱o̱l. 59Aa retina̱n bonga̱m Istifanus, u zeka, “A'Sil Ye̱so, kab hora̱md ri.” 60U hek ta̱m a̱n c'rwin u ze̱lk v'god u kanka, “A'Sila̱, kwisi na̱ ko̱tc na̱.” Au vattin taanlo, u wa̱uzo.
ទើបបានជ្រើសរើសហើយ៖
Yomka C'Comtne 7: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
