Yomka C'Comtne 6
6
A d'wank na̱i tan'ila̱
1A̱n hweca̱n lo, bugd a s'gab sudk a̱n ma̱ca̱m hwe̱di d'kala. I de̱lt bo̱ Yahude̱n an ta dam c'Girik baa na̱, emaka Yahude̱n an rein ta dam c'Aramaik s'remreme. Az kooye̱ hweda a emin d'wanko, a za ta ema bomsa̱n na̱ u'yob da. 2Oopa ni'il anlo kargsta bo̱ bugda̱n a s'gab baa na̱. A zeka na̱, “I ta hwenna c lag yomkan ba̱sda̱n lalks Na'Sil ca̱ soot a̱n d'wank da. 3Rema̱n taanlo hyaarene, dag na neta̱n i'tan'il baa no. An napin az i netna m'ga̱u, an rein ta̱m a Hora̱mda̱n zattin ri d'reba̱n da a s'ver ne, na nes na̱ yomka hna. 4Cwan la baco, ca̱n kaa d'hi a̱n s'cepk a yomkan ba̱sda̱n lalks Na'Sil na̱.”
5Lalksa̱ ha̱n emt bo̱ neta̱n d'ke̱m hwe̱di d'kala. A dagt bo̱ Istifanus, nocuna̱n batin d'ba̱t baa Na'Sil hwe̱di, u ci ta̱m Hora̱mda̱n zattin ri d'reb da. A dagt bo̱ ta̱m Filip, Prokorus, Nikano, Timo, Paminas, a Nikolawus kan Antiyo̱k ne, un vaakin a̱n d'Yahude̱. 6A noktta bo̱ na̱ baa c'comtne. Comta̱nc dwedata bo̱ na̱ c'koma, a cepkka ta̱m na̱.
7Lalks Na'Sil sudk a̱n ba̱rg hwe̱di d'kala. A s'gab sudk a̱n ma̱ca̱m a̱n le̱in Urisalima. Go̱mna d'ka̱b a Na'Sil ta̱m hwe̱di a batk d'ba̱t a emk s'gaba.
Na sipk Istifanus
8Sila emaka la Istifanus u'pusu. A ne̱e̱k o ta̱m m'we̱s hwe̱di u emka̱lk damra rihica̱n sipa̱m na'nwa̱a̱, a c'he̱ta̱n baa netna. 9Lans gudga̱z baa an ka̱bda̱n kargad Yahude̱n da̱n nan po̱g, ka̱nk an na batain na̱m'cok a Istifanus ne. I Yahude̱n lanma̱n Serane, Alegzandriya d'kut a ke̱e̱ca̱n Silisiya a Asiya na. 10Hora̱md Na'Sil ne̱e̱k la Istifanus s'ver hwe̱di. Au iga̱mtini, a ta la̱a̱ a̱n het o a̱n s'lan da. 11A so̱vt bo̱ neta̱n m'ze̱s az a ze, “C hongk Istifanus a̱n ela̱vsoc Mosa, a A'Sil na̱.”
12I zo̱bga̱vsko̱ hwenga̱nc Yahude̱n a an la̱a̱sa̱m na s'giira, a haka a sipk o. A savk ta̱m o baa ka̱nk an gedma̱n lalko. 13A kumt bo̱ neta̱n az a ke̱m o a̱n c'ko̱l a ze, “Kooye̱ hweda, a̱rm uha̱n el tu ela̱vso buuk Na'Sil ka̱ha̱n ka̱n zattin ri d'reb da, a giiras Mosa na. 14Ca̱ hongk o na̱m'ze az, Ye̱so kan Nazarat tu he̱e̱k baada̱ ha̱n u vodasa ta̱m rina̱n na gaadin baa Mosa.” 15An lain a'soot kwe̱ baan ka̱nk an gedma̱n lalko, aa ke̱e̱te̱in Istifanus isa̱, a he̱nk cu'a ru ho̱da̱n cu'a k'comta̱v Na'Sila̱.
ទើបបានជ្រើសរើសហើយ៖
Yomka C'Comtne 6: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
