1 An Korinti 1
1
D'Po̱o̱sso̱
1I mi Bulus, un Sila po̱gin u soot k'comta̱v Ye̱so Ka̱risti rema̱n to̱nu na̱. I mi a̱n ge̱nvoin no taka̱llaka̱ hna. Sostanis hyanna cinna el a̱n po̱o̱so̱m no. 2Nwaa an gabs Na'Sil an rein a̱n le̱in Korinti, Sila le̱gk no rem Ka̱risti Ye̱so. A po̱gk ta̱m no a̱n soot an zattin ri d'reb da, d'kut a neta̱n kwe̱ an rein ta po̱g a̱n dind Kan buu cinna Ye̱so Ka̱risti koope̱. Kan reina̱n go̱mc na̱, a kan go̱mc cinnan ta̱ma̱.#1:2 Go̱t ta̱m: YCCo 18:1.
3A'Sil Ceta cinna a Kanubu Ye̱so Ka̱ristin ne̱e̱ no u'pusu a la̱ta̱m c'de̱b ne̱.
Pusuuna̱n Ye̱so tu ne̱e̱
4A̱m el ta̱'m bo̱m A'Sil male rema̱n pusuuna̱n Sila emain no an retina̱n gabs Ye̱so Ka̱risti. 5An gabtin Ye̱so, Sila emaka no u'pusu s'goo-s'goo, kooye̱ kabva. A ne̱e̱k ta̱m no la̱a̱m s'lalk s kasi a kooye̱ goon napsa na. 6I kwesaka az rina̱n c ve̱ce̱in no kwe̱ in tanin Ye̱so, i m'ga̱u, rem na he̱nk ca̱ baa no.
7Rema̱n taanlo, a̱n ta rob ho̱sma̱n we̱sma̱n emka̱lla̱m c'rihi ma̱n Hora̱md Na'Sil da̱n ne̱e̱ da, an retina̱n saka̱m nu'con a̱n vaakam Ye̱so Ka̱risti, Kan Go̱mca̱n Kooye̱. 8Sila ta swidi no a̱ra̱mca̱n gaba̱m Ye̱so caam d'be̱se̱. I bat ta̱n kum d'le̱g hweda̱n Ye̱so Ka̱risti, Kan Go̱mca̱n Kooye̱, tu gedata na lalko. 9Sila nan po̱gin no a̱n em d'sa̱ma̱nc a Waav na̱ Ye̱so Ka̱risti Kan buu cinna, i kan gigma̱n lalko.
A s'gab he̱e̱kke̱
10Hyaarene, a̱m el a̱n kona̱m no a̱n dind Ye̱so Ka̱risti, Kan Go̱mca̱n Kooye̱, soot na k'nwa̱a̱ k'da̱nka̱, a rihi wankse la hid no da. Lag ta̱m keka̱b no a ke̱e̱se̱u non soot ri da̱nka̱. 11Hyaarene, an buu Kuluwi zek a̱m az a̱n el a̱n s'lan a̱n nwaana̱n nwaa na.
12A̱m vatk taanlo rema̱n ahyan baa no el na̱m'ze, “Mi iu Bulus.” Uhyan ze, “Mi iu Appo̱llos.” Uhyan ze, “Mi iu Bitrus.” Uhyan ze, “Mi bo̱ iu Ka̱risti.”#1:12 Go̱t ta̱m: YCCo 18:24. 13I Ka̱ristin i'il a̱n reine? I Bulus a̱n na edgin a̱n k'kan na hwaa rem no? Alla bo̱ kaa i a̱n dind Bulus a̱n na ematain no baptisma?
14A̱m bo̱mk A'Sil az ai retin i Kirisbus na Gayus a̱n c'taa a̱m emain baptisma, a̱m ta ema ta̱m uhyan da.#1:14 Go̱t ta̱m: YCCo 18:8; 19:29; ARom 16:23. 15Rema̱n taanlo, noc za un tu ze az na emaka o baptisma a̱n dind ri da. 16A̱m bakaska az a̱m emaka ta̱m an buu Istifanus baptisma. A za na̱nna da, i ta em a̱m az a̱m emaka ta̱m noc hyan baptisma da.#1:16 Go̱t ta̱m: 1Kor 16:15. 17Ka̱risti ta coma m rema̱n emma̱n baptisma da. I a̱m emt ba̱sda̱n kasi lalko. Za a̱n la̱a̱m c'nocurimu da, rema̱n a wa̱a̱'a Ye̱so a̱n cona k'kan soot la rin ka̱ka̱l da.
Ka̱risti we̱sa̱m Na'Sila̱
18Ba̱sda̱n az nan kum d'gwa̱a̱ma̱ rema̱n na edgk Ye̱so a̱n cona k'kan u uku, i m'kip baa an yangine. Baa cinna an na gwa̱in la, na napk az i we̱sa̱m Na'Sila̱. 19Rema̱n lalks Na'Sil zek az,#1:19 Go̱t ta̱m: Isa 29:14.
“Ta̱'m yangs an rein nu'he̱n az a ci s'vere.
Ta̱'m he̱lkse̱ ta̱m la̱a̱m la̱a̱gni.”
20I pe̱ha̱n bo̱ kaa a s'vere? I pe̱ha̱n an la̱a̱sa̱m na giiras Mosa? I pe̱ha̱n ta̱m an be̱tka̱m c'rihi an ta̱ma̱? Sila kwesaka az versa̱n copun yanda̱ha̱n i m'kipi.#1:20 Go̱t ta̱m: Ayu 12; YCCo 17; Isa 19; YCCo 12.
21A'Sil a̱n vers na̱, a ta lag an copun yanda̱ha̱n nap na̱ rema̱n versa̱ c'nocurimu da. I emk A'Sil d'ke̱m a gwa̱a̱ an batin d'ba̱t a kabk kasi lalk Ye̱so u'na̱n na bisiin na̱. Ahyan zek la az kasi lalkune, i m'kipi. 22Yahude̱n to̱nk az na kwesa na̱ rihica̱n sipa̱m na'nwa̱a̱. An zain Yahude̱n da el la ba̱na̱ a̱n hob az na ve̱ce̱ na̱ a̱n versa̱ c'nocurimu.
23Cwan la, c ba̱sk az na edgk Ka̱risti a̱n k'kan, u uku. I sootk ri d'pa̱gisi baa Yahude̱ne̱. An zain Yahude̱n da ta̱ma̱, a zek az i m'kipi. 24Baa an Sila po̱gin la ba̱na̱ a kumk d'gwa̱a̱ma̱, Yahude̱n a an zain Yahude̱n da, Ka̱risti i we̱sa̱m Na'Sila̱, a vers Na'Sil na̱. 25Rema̱n kipa̱m Na'Sil hatk vers neta̱nrima. Kalkma̱n we̱sa̱m Na'Sil ta̱ma̱, a̱m hatk we̱sa̱m neta̱nrima.
26Hyaarene, bakasa na ho̱da̱na̱n a̱n latin daava̱n Sila po̱gto̱in no. Za nwaa kwe̱ a̱n neta̱n rein ta he̱nt s'ver da. Za nwaa kwe̱ a̱n ciin c'bo̱o̱ da. Za nwaa kwe̱ a̱n na matin a̱n buu c'go̱m da. 27I rihica̱ m'kip ca̱n copun yanda̱ha̱n la ca̱n Sila dagin a ne̱e̱t a s'ver m'e̱n. Sila dagk ta̱m rihica̱n kalin m'we̱s a ne̱e̱t a m'we̱s m'e̱n. 28Sila dagk rihic kalk ca̱n copun yanda̱ha̱n a rihica̱n na ginine, ta̱m a rihica̱n zain da, rema̱n na vaaksa rihica̱n reine, rihica̱n ka̱ka̱la̱.
29Sila em-em taanl rem a noc em la m'lo̱g a̱n hwic na̱ da. 30I rem Na'Sil a̱n na retin a Ka̱risti. Ka̱risti a̱n rein vers Na'Sil baa cinna, un de̱le̱in na gela̱v Na'Sila̱. Un vaaksain na an zattin ri d'reb da. Un to̱vin ta̱m na. 31Rema̱n taanlo, i ho̱da̱na̱n i retin a'ge̱ne̱, “Lag koowe̱ a̱n tu em c'ka̱ndi, u em c'ka̱ndi a̱n Kan Go̱mca̱n Kooye̱.”#1:31 Go̱t ta̱m: Je̱r 9:24.
ទើបបានជ្រើសរើសហើយ៖
1 An Korinti 1: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019