1 An Korinti 2
2
Ba̱sda̱n Wa̱a̱'a Ka̱risti a̱n k'kan
1Hyaarene, am hatoin baa no, a̱m ta ve̱ce̱ no rihic ze̱sk c Na'Sil a̱n la̱a̱ma̱n lalko alla versa̱ c'nocurimu da. 2Rema̱n am latin baa no, a̱m kink a̱n de̱bc ri az a ta̱'m ba̱s rihi hyan da, a za Ka̱risti un na edgin a̱n k'kan, u uk da. 3A̱m nokko baa no u'we̱d u uki, a v'gel na, zap-zap ta̱m hwe̱di.#2:3 Go̱t ta̱m: YCCo 18:9. 4A̱m ta ema no la̱a̱s a d'ba̱s a̱n s'ver alla c'le̱e̱mse̱n da. I bat Hora̱md Na'Sil ta̱d kwesa we̱sa̱m da̱. 5Bat ta̱m batma̱n ba̱ta̱d no da̱n soott baan we̱sa̱m Na'Sila̱, za a̱n vers neta̱nrima da.
Vers Na'Sila̱
6C el la ca̱n em lalksa̱ s'ver baa an ko̱grin a̱n s'gaba. Za la versa̱n copun yanda̱ha̱n alla vers go̱mgo̱mnan copun yanda̱ha̱n sa̱n-sa̱n vaak rin ka̱ka̱l da. 7I walgc Na'Sil ca̱n lain m'ze̱se̱. Walgca̱n na lain na ze̱ske̱, a̱c rein nu'vato. Sila walgk rihica̱ ha̱n de̱ha̱nzo az c soot gwink cinna daava̱n lo a̱n na em copun yanda̱ha̱n da. 8Go̱mgo̱mnan copun yanda̱ha̱n kwe̱ a ta tak a̱n nap da̱n walgc Na'Sil ca̱ha̱n da. Aa nap be̱, lawabe̱ a ta edg Ka̱risti, ka k'gwin a̱n k'kan, a hwaa da. 9I ho̱da̱na̱n i retin a'ge̱ne̱,#2:9 Go̱t ta̱m: Isa 64:4.
“Rihica̱n Sila we̱lge̱in an ta to̱n na̱,
is ta tak u'he̱n da.
Conc ta tak u'hong da.
I ta tak ta̱m a̱n uv a̱n de̱bc noc da.”
10Hora̱md Na'Sil kwesaka la na rihica̱ ha̱n kwe̱. Rema̱n Hora̱md Na'Sil el da̱n be̱tk c'rihi kwe̱. A rihic Na'Sil a̱n ca̱ m'nii, ca̱n zain ca̱n ne̱pe̱ be̱ da. 11Iwe̱ a̱n tu nap de̱bc noco, a za hora̱md nocun lo da? I ho̱d da̱n. Noc za un tu nap rihic Na'Sil da, a za Hora̱md Na'Sil da. 12Hora̱mda̱n na kabine, za da̱n rwa̱in baan copun yanda̱ha̱n da. I Hora̱mda̱n rwa̱in baa Na'Sila̱. I bat nan nap rihica̱n Sila nesain na m'ho̱so̱.
13Rihica̱ c ve̱ce̱in no, ca ve̱ce̱ no a̱n gomca̱n versa̱ c'nocurimu rein sa̱n la̱a̱sa̱ da. I rema̱n na emt a'yomk a̱n gomc Hora̱md Na'Sila̱, na la̱a̱sta̱ ga̱uma̱n rihica̱ d'hormo. 14Kan zattin Hora̱md Na'Sil da, a tu kab rihica̱n rwa̱in lanma̱n Hora̱md Na'Sil da. Rema̱n i rihica̱ m'kip baa ru. A tu la̱a̱ a̱n nap ta̱m ca̱ da. Rema̱n i a̱n Hora̱md Na'Sil a̱n nan pamasta ca̱. 15Kan ciin Hora̱md Na'Sila̱, tu la̱a̱ a̱n kekk u ke̱e̱se̱ kooye̱ rihiya, unwa la, baa kan tu kekk u ke̱e̱se̱ o. 16“Iwe̱ a̱n napin de̱bc Na'Sil u biiti na̱ s'lana?” Na ci la de̱bc Ka̱risti.
ទើបបានជ្រើសរើសហើយ៖
1 An Korinti 2: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019