ရိမ့ၤ 2
2
ကဘၱာ်စဲာ်အတဲၤစံးရး
1မဲၤကနဳၤ, အဳအသီၣ်, နကမၱာ်နီၣ်သီပီၢ်ပွဲၤဝှးဝှါ, နကစံးရးဖးမ့ပၠၤဒဳၣ်, နတထဳးလှိဇၤနန့ၤနီး. နစံးရးဖးမ့ တဲၤ ဒဳၣ်, နစံးရးလၤက့ၤဓီနန့ၤ, မၤနဲၢ်, နတလၤဆါကဲၤပၠၤထဲၢ် နစံးရးတစီာ်နဳၤနီး. 2ဝၤသၱာ်ဟဲတပွဲးကဘၱာ်စဲာ်တစာ်ပၠၤအမဲၤအန့ၤအဘးကနဳၤ တစီာ်အမူၢ်ကါနီး. 3ပရၤဆါ ဘ့နစံးရးပၠၤအမဲၤကယဳၤ တစီာ် နဳၤကၱာ်နဲၤသဲန့ၤမဲၤတဲၤအယဳၤတစီာ်နဳၤဒဳၣ်, နကမဳၤမၱာ်နကလှိထာ်ဘဲာ် ကဘၱာ်စဲာ်အတဲၤစံးရးဧါ. 4မၱာ်နမဲၤကဲမဲအိးကဲၤ စတဲၤ ဝၱၤတဲၤ အဲးတစီာ် ကၱာ်စတဲၤခီးသးဒီဝၱၢ်သးဇဳၤတစီာ်နဳၤဧါ. မၱာ်နတသၱာ် ဟဲ ကဲၤကဘၱာ်စဲာ်အတဲၤခီးသးဒီနဲၤစာ်ဘိထဲၢ်နကဆးလၤပီၢ်နသးနဳၤနီးဧါ. 5ဒဳနသးဆးအကပၤယၤ လၤက့ၤအန့ၤနဳၤမၱာ် အမဲၤဓဳၤထာ်ကဘၱာ်စဲာ်အတဲၤသဲးထဲးနခဳး ဒဳစတဲၤစံးရးမူၤနံၤတနံၤနဳၤတခီထဲၢ်ကဘၱာ်စဲာ်အတဲၤစံးရးမူၤနံၤ ကလှၱထာ်ဖျီထာ်ကီနဳၤ. 6စကအံာ်က့ၤကီပၠၤတပွဲၤ တပွဲၤလၤဓူၢ် အစာ်ဘိစတဲၤဖၱးတဲၤမဲၤတးနံၤနဳၤ. 7ကယါပၠၤအမဲၤတဲၤဖၱးတဲၤမဲၤ အဝၱၤအအဲးအသဲာ်ယိ, ကၱာ်ဝၢ်လှဲးတဲၤဓီၤတဲၤသ့း, တဲၤဒဳတဲၤယးကၱာ် တဲၤအတသံဇၤနီး တပွဲၤနဳၤ, ကနံၤဘဲာ်ကိာ်တဲၤအီၣ်သမိလၤထူလၤပျဳၤ. 8ပၠၤထဲၢ်အလၤရူၢ်, အတဖၱးနံၤတဲၤတၱၢ်တဲၤမှးနီးကၱာ် လိၤကိာ်ကျဲးအတဘဲာ်နီးတစီာ်နဳၤ, ကဘၱာ်စဲာ်အတဲၤသဲးထဲး ကၱာ် တဲၤသးဓဳၤထာ် ကလၤဘဲာ်ကီစခဳး. 9တဲၤကဲတဲၤဗြိၤကၱာ် တဲၤဆဲး ညဲပီၤတီၤကဘဲာ်ကီစဲာ်တစီာ်နဳၤ, အအူဆူးမၱာ် ယူဒၤဖဳးတစီာ်, အလ့ၤကါ ကြံးခ်ဖဳးတစီာ်ပာ်ပာ်. 10ပရၤဆါ ကဘၱစဲာ်ကအံာ်လၤကီတဲၤတီၤ တဲၤသ့း, တဲၤဒဳတဲၤယးကၱာ်တဲၤစဳးတဲၤချံးဒဳပၠၤကိအပွဲၤထဲၢ်အမဲၤတဲၤ အဝၱၤအအဲးတစီာ်နဳၤ, ယူဒၤဖဳးအအူဆူး, အလ့ၤကါကြံးခ်ဖဳး တစီာ်နဳၤ. 11ဒဳစတဲၤစံးရးအပူၤနဳၤ, ကဘၱာ်စဲာ်တစာ်ပၠၤ အမူၢ်ကါတဗွဲနီး.
12ပွဲၤသူကူာ်ဖဳးအတအီၣ်စီၤမိၤၡ့အတဲၤမှဲးလၤ အကါလဲၢ်နီးကၱာ် အမဲၤတဲၤခီၣ်ဝဲၤတစီာ် ကကဲကလှဲမဲၢ်ကီ. ယူဒၤဖဳး အအီၣ်တဲၤမှဲးလၤအကါလဲၢ်ကၱာ် အမဲၤတဲၤခီၣ်ဝဲၤ တစီာ်အနံၤခံ တဲၤမှဲးလၤကစံးရးတပွဲးစဲာ်. 13တဘဲာ်ဒဳတဲၤဆီးခ့န့းတဲၤမှဲးလၤ အစဲနီး, မၱာ်တဲၤအီၣ်အံၤတဲၤမှဲးလၤကမဲၤဝၱၤမဲၤစါပၠၤဒဳကဘၱာ်စဲာ်အလှီမီၤ နဳၤ. 14ကဒီၣ်မီၢ်ကိာ် ပွဲၤသူကူာ်ဖဳး အတသၱာ်ဟဲတဲၤမှဲးလၤ တခးနီးမၱာ် အတဲၤကမဳၤဒီဆးစဲာ် အကမဲၤကိာ်ဘဲာ် တဲၤမှဲးလၤအကါ, မၱမၱာ်အတနံၤဘဲာ် တဲၤမှဲးလၤနီးတစီာ်နဳၤ, ဝၤဒီၣ်ဇၤတပွဲးစနံၤခံမၱာ်တဲၤမှဲးလၤ. 15စဲာ်တစီာ် ယိၢ်လၤကၱာ် ဒဲလၱၢ်ဇၤတပွဲးတဲၤမှဲးလၤအအီၣ်ဝှ့းလၤဒဳ စသးပူၤစာ်ဘိသဲသၱးနဳၤ, တဲၤ ထဲၢ်စတဲၤကမဳၤအသးသံနဳၤ. စဲာ်တစီာ်အနံၤခံ တဲၤဆးယီၤကၱာ်တဲၤ ဝဳၤအံာ်အီၣ်ထဲၢ်စသးအဳးပူၤတဲၤဒီၣ်ရှံက့ၤတစီာ်နဳၤ. 16ဒဳမူၤနံၤတနံၤ အစာ်ဘိ တဲၤသးလဳၢ်သးလၤအံာ်အဝၱၤအကဲယဒီထိးတစီာ် နဳၤ ကဘၱာ်စဲာ်ကစံးရးကီပၠၤအတဲၤကမဳၤအဟူၣ်အဇီၤတစီာ် ဒဳယ့ၣ်ရှူးခရၱာ်အပူၤနဳၤ.
ယူဒၤဖဳးတစီာ်ကၱာ်တဲၤမှဲးလၤ
17နဲၤဒီ, နဒီၣ်လၤနန့ၤယူဒၤဖဳးတပွဲၤ, နဆးရှံအံာ် တဲၤမှဲးလၤကၱာ် ဖၱးဓဳၤဖၱးမူၤအံာ် နဘၱာ်စဲာ်, 18နသၱာ်ဟဲ တပွဲးကဘၱာ်စဲာ်အတဲၤသးအဲးနံၤ, ကၱာ်အစာ်ဘိတဲၤမှဲးလၤအီၣ်အဓ့နဳၤ, ရိၤဒီဧဲၤတဲၤအဘဲာ်လီၢ်. 19နဘူၣ်လၤက့ၤ နန့ၤဒဳ နမၱာ် အကၢ်ဓူခံးတစီာ်အနံၤခံအသဲလ့ၤကျဲး, အအီၣ် တဲၤခံးကျဲတစီာ်အနံၤခံ တဲၤလှၱ, 20အကဓူၤနၤပါတစီာ်အနံၤခံအသိၣ်အံာ်သီအံာ်စဲာ်, အတသၱာ်အိးသၱာ်စဲာ်နီးတစီာ်အနံၤခံအသဲာ်အံာ်ဟူစဲာ်ဆရၣ်, နသၱာ်ဟဲတပွဲးထဲၢ် ဒဳတဲၤမှဲးလၤအပူၤနဳၤ တဲၤထၱနံၤကိၢ်နံၤကၱာ် တဲၤတၱၢ်တဲၤမှးအီၣ်ပ့အီၣ်ဇီၤတပွဲးလီၤ. 21နသဲာ်လှိတပွဲးပၠၤအလဝ့ၤ တစီာ်နဳၤ, ပရၤဆါ နတသဲာ်လှိလၤက့ၤမၤနန့ၤနီးနဲၢ်. နဒီထိး တပွဲးပၠၤ, “အၣ်ဟူၣ်မဲၤကဲမဲးတဲၤမဲး,” မၱာ်နအၣ်ဟူၣ်ကဲၤ တဲၤ ဧါ. 22နဒီၣ်, “မဲၤလၤသူးလၤကမဲာ်မဲးမဲး,” မၱာ်နလၤကမဲာ်ကဲၤဧါ. နစၱးပိးတဲၤယီၤတဲၤယၤ, မၱာ်နအါဝူၢ်အါသဖျဲး ပၠၤအဇရၢ်ဧါ. 23နပဲၢ်ဓဳၤပဲၢ်မူၤအံာ် နန့ၤဒဳ နအီၣ်အံာ် တဲၤမှဲးလၤအစဲ, ပရၤဆါ နခဲဘးယၢ်ဘးကၱာ်မဲၤသါဝၢ် ကဲၤ ကဘၱာ်စဲာ်ဧါ. 24အစာ်ဘိ စဲာ်စါထံဒီၣ်နဳၤ, “ဒဳသံယူဒၤ ဖဳး တစီာ်အခဳးအစဲ, ကဘၱာ်စဲာ်အမံၤစါထံ ဘဲာ်ဒီၣ်ကဲဒီၣ်အိး ကဲၤဒဳ ပွဲၤသူကူာ်ဖဳးတစီာ်အကျဲနဳၤ.”
25သံကအီၣ်အံာ်မၤတဲၤမှဲးလၤဒဳၣ်, တဲၤဝှိရကၱမၱာ်တဲၤအအဲး တမဳၤ, ပရၤဆါ, သံကခဲဘးမၤတဲၤမှဲးလၤဒဳၣ်, အတဇဲကၱာ်သံတခး တဲၤဝှိရကၱနီးလီၤ. 26ပၠၤတပွဲၤတခးနီၣ်သီတဲၤဝှိရကၱနီးနှီနူၤ, စကဆီးခ့န့းမၤတဲၤမှဲးလၤဒဳၣ်, အယၢ်သိးတပွဲးစနံၤဘဲာ်တဲၤဝှိရကၱလီၤတဘဲာ်နီးဧါ. 27မဲၤကနဳၤ အခဳးအစဲ, သံယူဒၤဖဳးတစီာ်ကခးဘဲာ်ကီပွဲၤသူကူာ်ဖဳးတစီာ်အတဲၤစံးရး, ဒဳသံတဲၤခးဘဲာ်ယၤဘဲာ်တဲၤမှဲးလၤထဲၢ် သံဝှ့းလၤစဲာ်အပူၤကၱာ် သံဘဲာ် တဲၤဝှိရကၱနှီနူၤလီၤ. မၤနဲၢ်စဲာ်တစီာ်တခးနီၣ်သီန့ၤဘၱစဲာ် တဲၤဝှိရကၱနီးနှီ နူၤ, စလိၤကိာ်ကဲၤတဲၤမှဲးလၤအကါ. 28ကမၱာ်မၤကနဳၤဒဳၣ်, ယူဒၤဖဳးနှဲးနှဲးတပွဲၤ ထဲၢ်အခးနံၤ တဲၤဝှိရကၱမၱာ်ပီၢ်ပွဲၤ. တမၱာ်ပၠၤတပွဲၤထဲၢ် အမၱာ်ယူဒၤဖဳးအလၱၢ်ထာ်တပီးခဳး ထဲၢ်အခးတဲၤဝှိရကၱဒဳအန့ဘၱစဲာ်လီၤနဳၤနီး. 29မၱာ်ယူဒၤ ဖဳး နှဲးနှဲးနဳၤ မၱာ်ယူဒၤဖဳးတပွဲၤထဲၢ် အဘဲာ်တဲၤဝှိရကၱဒဳသဳးကၱာ် သးကၱာ် အယဳၤမၱာ် ကဘၱာ်စဲာ်အသးစါထံအတဲၤမဲၤ, တဘဲာ်တဲၤမှဲးလၤထဲၢ် အဘဲာ်ဝှ့းလၤလီၤနီး. ပၠၤကယဳၤတပွဲၤနံၤဘဲာ်ကဘၱာ်စဲာ်အတဲၤကီးအံာ်ထါအံာ်, တဘဲာ်ဒဳပၠၤအအဲနဳၤနီး.
ទើបបានជ្រើសរើសហើយ៖
ရိမ့ၤ 2: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
