ရိမ့ၤ 1
1
1ယဲၤ, စီၤပီလူး, ယ့ၣ်ရှူးခရၱာ် အဇိၤဖဳးကၱာ် အပျဲၢ်အဘီၣ်, ထဲၢ်ကဘၱာ်စဲာ်ရိၤထာ်ကဲၤကၱာ်ယဳၤကဲၤ အကဒီထိးစတဲၤသးလဳၢ်သးလၤ အံာ်အဝၱၤအကဲတပွဲၤဝှ့းနံၤသံစဲာ်ပရဳအယဳၤ.
2အစာ်ဘိအဘဲာ်ဝှ့းလၤစဲာ်စါထံအပူၤနဳၤ, ကဘၱာ်စဲာ်အၣ် မါခးအံာ်တီၤလီၤကဲၤတဲၤဝၱၤတဲၤကဲအမီၤအမၤလှ့အခၣ်ထၱးခၣ်ဘီဒဳဝံ တစီာ်အလီၤမီၤပူၤနဳၤ, 3အဘဲာ်ကၠးစဖဳး, ဝၤဘၱာ်စဲာ်ယ့ၣ်ရှူးခရၱာ်, ထဲၢ်အဖၱးနံၤကဲၤပၠၤအဖ့းအဟၱး, စအီၣ်လၤကဲၤဒဳ စီၤဒၤဝံးအခွံသလဲ အပူၤတပွဲၤအဝၱၤအကဲနဳၤ. 4မၱာ်ကဘၱာ်စဲာ်အတဲၤဝၱၤတဲၤစါအပူၤ, စဘဲာ်မဲၤသၱာ်ဟဲကဲၤ ကဘၱာ်စဲာ်အဖဳးကၱာ် တဲၤထာ်ပဳၤက့ၤတဲၤသံအကျဲဒဳ စတဲၤခဳးတဲၤအါဓဳၢ်အပူၤနဳၤ, စဲာ်မၱးယ့ၣ်ရှူးခရၱာ်, ဝၤဘၱာ်စဲာ်လီၤ. 5ဒဳစအီၣ်နဳၤ, ယနံၤဘဲာ်ကဲၤတဲၤလှူၣ်တဲၤတါကၱာ် အပျဲၢ်အဘီၣ် အတဲၤဘဲာ်သဓဳခရၱာ် အနံၤခံ, စာ်ဘိထဲၢ်အကဒီၣ်အူဒီဆးပၠၤခွံဖဳး လဳစါစဲာ်ဒဳအကီၤပူၤကၱာ် ကဆီးခ့န့ၤပီၢ်လၤဝၤနဳၤ. 6သံကဘၱာ်စဲာ်အဖဳးအလံၤ အအီၣ်ရဳမ့ၤအူးပူၤ တစီးမၱာ်မၱာ်, သံဘဲာ်ယဳၤကဲၤ ယ့ၣ်ရှူး ခရၱာ်အပွဲၤ.
7ဒဳတဲၤယဳၤအခဳးအစဲယဝှ့းနံၤသံအအီၣ်ဒဳရိမ့ၤအူးပူၤ လဳစါစဲး ထဲၢ်ဘၱာ်စဲာ်ဘဲာ်လီၢ်ယဲၤကၱာ်ယဳၤကဲၤအစာ်ဘိစပၠၤစါထံတစီာ်နဳၤ.
ဝၤပာ်ကဘၱာ်စဲာ်ကၱာ် ဝၤဘၱာ်စဲာ်ယ့ၣ်ရှူးခရၱာ် ကအံာ်လၤဒီဧဲၤသံတဲၤ လှူၣ်တဲၤတါကၱာ်တဲၤမီၤတဲၤမၤ.
တဲၤဒီၣ်လှူၣ်ဒီၣ်တါ အတဲၤသဘဲ
8အအူးဆူး, ယဒီၣ်လှူၣ်ဒီၣ်တါကဘၱာ်စဲာ်ဒဳ ယ့ၣ်ရှူးခရၱာ်အမံၤအပူၤ သံလဳစါစဲးအနံၤခံ, ဒဳသံတဲၤဘူၣ်ထဲၢ် လၢ်ခဳးသဒဲဘဲာ်ပီၢ်အံာ်တဓဲအခဳးအစဲနဳၤ. 9မၤနဲၢ်ဒဳၣ် ကဘၱာ်စဲာ်ထဲၢ်ယခးဇိၤလဳသဳးလဳသးတပွဲၤမၱာ်ယသဲသၱး, ထဲၢ်ယဒီၣ်အူဒီဆး စဖဳးတဲၤသးလဳၢ်သးလၤအံာ်အဝၱၤ အကဲ နဳၤ. ကဘၱာ်စဲာ်သၱာ်ဟဲတပွဲးထဲၢ် ဘ့ယသဘဲထာ်ကိအပျာ် ယကမဳၤထာ်နံၤတပွဲးသံကိအပွဲၤလီၤနဳၤ. 10ယတၤထာ်တပွဲး ကဘၱစဲာ်အတဲၤသးအဲးနံၤကအီၣ်ပီၢ်ထဲၢ်ယကဓဳၤထၱးသံဘ့ ယတဲၤလ့ၤ အကူဓူၤလါနဳၤ. 11မၤနဲၢ်ဒဳၣ်, ယသအဲးစာ်ထၱးဆိးကဲၤသံစာ်ဘိ ထဲၢ်ယကအံာ်လၤနံၤပီၢ်သံ သဳးသးအတဲၤဟိးဝၱၤ ကၱာ် ကအံာ်ခဳးအံာ်အါ ပီၢ်သံနဳၤ. 12ယသအဲးဒီၣ်မၱာ် ဝၤကဘဲာ်မဲၤမီၤမဲၤမၤလှဲးဒီဧဲၤလၢ်ဝၤ ဒဳတဲၤဘူၣ်ထဲၢ်အအီၣ်ဒဳ သံကၱာ်ယဲၤအစၱးအထွဲးတဓဲအပူၤနဳၤ.
13အဳသဲပူၤဝ့ၤတစီာ်, ယသးအဲးနံၤသံသၱာ်ဟဲထဲၢ် ယပဲၢ်ထာ်ယသး အကလ့ၤထၱးသံတဒဳးဖဳးဖဳး, အကမဲၤနံၤပီၢ်သံတဲၤတမဳၤမဳၤနှီနူၤ, တဲၤအမဲၤဒၱာ်ဒါအီၣ်ထာ်သဲာ်ယိကဲၤတမဳၤတမဳၤ. မၱာ်ဒဳယဆးရှံအံာ်ယတဲၤဖၱးတဲၤမဲၤအဖီအသဲာ်ကအီၣ်သံကျဲ အစာ်ဘိအအီၣ်ကဲၤဒဳပွဲၤသူခဳးဖဳးတစီာ်အကျဲနဳၤ. 14မၤနဲၢ်, ယတဲၤဖၱးတဲၤမဲၤအီၣ်ကြံးခ်ဖဳးတစီာ်အခဳးကၱာ်ထံလ့ၤက့ၤယၱၤဖဳး တစီာ်အခဳးခဳး, ပၠၤ အဇၤ အပျၤတစီာ်အခဳးကၱာ် အတဇၤတပျၤနီးတစီာ်အခဳးခဳး. 15အယဳၤအခဳးအစဲ, ယသးအဲးလ့ၤအံာ်သံတဲၤသးလဳၢ်သးလၤအံာ် အဝၱၤအကဲ ဒဳရိမ့ၤအူးပူၤနဳၤ.
တဲၤသးလဳၢ်သးလၤအံာ်အဝၱၤအကဲအစိသလဲ
16ယတသါဝၢ်အံၤတဲၤသးလဳၢ်သးလၤအံာ် အဝၱၤအကဲနီး. စမၱာ်ကဘၱာ်စဲာ်အစိသလဲအမဲၢ်လှိထာ်က့ၤလဳပၠၤအတဲၤဘူၣ်အီၣ်တစီာ် နဳၤ. ယူဒၤဖဳးတစီာ်မၱာ်အအူဆူးကၱာ် ကြံးခ်ဖဳးတစီာ်ပာ်ပာ်. 17မၤနဲၢ်ဒဳၣ်, စမၱာ်အဒဲလၱၤဝၤ ကဘၱာ်စဲာ်အတဲၤတၱၢ်တဲၤမှး, ထဲၢ်အကါထၱး ဓဳၤဒဳအကဓူၤနဳၤ. အစာ်ဘိစဲာ်စါထံဒီၣ်, ပၠၤအတၱၢ်အမှးကအီၣ်သမိကိးဒဳ တဲၤဘူၣ်အပူၤနဳၤ.
ပၠၤလၢ်ခဳးဖဳးအတဲၤခီၣ်ဝဲၢ်ခီၣ်ခး
18ကဘၱာ်စဲာ်အတဲၤသဲးထဲးဘဲာ်ဒဲလၱၢ်ထာ်ကဲၤဒဳမီၢ်ခဳး, ပၠၤထဲၢ်အလဲၢ်ဟူၣ် တဲၤတၱၢ်တဲၤမှးဒဳ အတဲၤသဘူၣ်သဘဲ တအီၣ်နီး, ကၱာ်အတဲၤကၱကဲာ်မဲၤလှီအကျဲတစီာ်အခဳးနဳၤ. 19မၤနဲၢ်ဒဳၣ်, စာ်ဘိထဲၢ် ပၠၤကသၱာ်ဟဲပီၢ်စဲာ်နဳၤ ကဘၱာ်စဲာ်ဒဲလၱၢ်ထာ်အန့ၤဒဳလၢ်ဝၤတစီာ်အလှီမီၢ်ဒဳတဲၤလှၱတဲၤပျာ်အပူၤ. ကနဳၤအခဳးအစဲ ကဘၱာ်စဲာ် စံးရးကဲၤ စဲာ်တစီာ်. 20လှ့ကဘၱာ်စဲာ် ဘီာ်လၤလၢ်ခဳးလီၤနဳၤ, စစဳစသလဲ လၤထူလၤပျဳၤ ကၱာ်စတဲၤ ဘၱာ်စဲာ်နဳၤကတစာ်ထၱးဇၤနီၣ်သီနီးနှီနဳၤ, ဒဳကတဲၤသၱာ်ဟဲအပူၤ ကစာ်ထၱးဇၤတပွဲးဒဳ စတဲၤဘဲာ်ဘီာ်လၤ တစီာ်အကျဲနဳၤ. မဲၤကနဳၤဒဳၣ်, ပၠၤအယဳၤတစီာ်နဳၤ တဲၤတဘါပျဲးဇၤစဲာ်နီး. 21စဲာ်တစီာ် သၱာ်ဟဲကဘၱာ်စဲာ်, ပရၤဆါစတပဲၢ်တီၤပဲၢ်သ့း ကၱာ် ဒီၣ်လှူၣ်ဒီၣ်တါကဘၱာ်စဲာ်နီး, မၱာ်စတဲၤကမဳၤကမၢ် ကဲာ်ထာ်အနှးနှါ နှးနှါ, ကၱာ်စသးဝှံဝှးအီၣ်ခံးသရူဒဳၣ်လီၤ. 22စဲာ်တစီာ်ဒီၣ်လၤစန့ၤအတဲၤသၱာ်ဒဳၣ်သၱာ်ဟဲအီၣ်, ပရၤဆါ စဲာ်မၱာ် အကဓူၤနၤပါတစီာ်လီၤ. 23စဲာ်တစီာ်ဘါချဲးအံာ် ကဘၱာ်စဲာ်အဓီၤအသ့းအတသံဇၤနီးကၱာ်ပၠၤအဟိအကလဲ အသံဇၤ, အနှးနှါလီၤတစီာ်နဳၤ, မဲၤအစာ်ဘိထဳၣ်ဖဳး, တဲၤဖဳး တဲၤဝ့ၤအခၣ်ခီၣ်အီၣ်လွံၢ်ခီ, ကၱာ်အဟဲးစိးကျိလၢ်ခဳး တစီာ်အကလဲၤနဳၤ.
24မဲၤကနဳၤ အခဳးအစဲ, ကဘၱာ်စဲာ် ပၢ်လၤတ့ၢ်စဲာ် တစီာ် ဒဳ စတဲၤဖၱးတဲၤမဲၤ အခဳးရဳးခးရးတစီာ်အကျဲ ထဲၢ်စမဲၤယူၢ်လၤကါကဲး စန့ၤတစီာ်နဳၤ. 25မၤနဲၢ် စဘါချဲးအံာ်ကဲၤ ကဘၱာ်စဲာ် အတဲၤတၱၢ်တဲၤမှးကၱာ် တဲၤလှီးလှၱလှီးပျဲး, ကၱာ်ဒီစသဘူၣ်သဘဲကဲၤ တဲၤအီၣ်ဘီာ်လၤတစီာ်ဒဳ အဘီာ်လၤတဲၤတပွဲၤအလ့ၤနဳၤ, ကဘၱာ်စဲာ် ဘဲာ်ဟိးဝၱၤ လၤထူလၤပျဳၤ. အၤမ့ၣ်.
26မဲၤကနဳၤ အခဳးအစဲ, ကဘၱာ်စဲာ် ပၢ်လၤတ့ၢ် စဲာ်တစီာ်ဒဳ စတဲၤဖၱးတဲၤမဲၤအခဳးရဳးခးရးတစီာ်အပူၤ. အမံၤမှူး သမဲတစီာ် မဲၤစၱးအၱစိးအိအန့ၤဒဳတဲၤအီၣ်ဖဳးအီၣ်ဝၤအကျဲ. 27စာ်ဘိကနဳၤ အခီ, အမံၤခဳဟဲးပၢ်တဲၤအီၣ်ယံၢ်အမံၤမှူးအနူၤအဒီကၱာ် အမံၤခဳကၱာ် အမံၤခဳလၤသူးလၤကမဲာ်လၢ်ဝၤဒဳၣ်, စဆိးစလှဲမၱာ်တပွဲး တဲၤသါဝၢ်ကၱာ် တဲၤစံးရးအတးကၱာ်စဲာ်လီၤနဳၤ.
28မၤနဲၢ်ဒဳၣ်, ပၠၤအယဳၤတစီာ် တသးအဲးစာ်ထၱး တဲၤ သၱာ်ဟဲ ကဘၱာ်စဲာ်မၱာ်တဲၤသၱာ်ဟဲအလ့ၢ်ဓူၢ်နီးအခဳးအစဲ, ကဘၱာ်စဲာ်ပၢ်လၤဓ့ၢ်စဲာ်တစီာ်ဒဳစတဲၤသခဳးအပူၤ, ကၱာ် စတဲၤဖၱးတဲၤမဲၤအခဳးရဳးခးရးအပူၤနဳၤ. 29စဲာ်တစီာ် လၤပြူးနံၢ်ကဲၤဒဳတဲၤကဲတဲၤအိး, တဲၤသဳတဲၤအၱးအမဳအမဳၤ, တဲၤကၱကဲာ်မဲၤလှီ, တဲၤသးအဲးနံၤဓဳၤ, သဲးဗူနူၤအံာ်ကဲၤတဲၤသးကျး, တဲၤမဲၤသံအၣ်ဆဲ, တဲၤမဲၤထၱးမဲၤပဳၤ, တဲၤအါဝူၢ်အါသဖျဲး, တဲၤလှီးလှၱလှီးပျဲာ် တဲၤထဲးကဲထဲးအိးအတဲၤမဲၤတစီာ်အပူၤနဳၤ. 30စဲာ်တစီာ် ဒီၣ်မ့ၢ်ဆ့းပွဲးလှဲးလၢ်ဝၤ, ဒီၣ်ကဲဒီၣ်အိးလၢ်ဝၤလီၤ. စဲာ်မၱာ်အတဝဲၢ်ကဘၱာ်စဲာ်နီး, အတဲၤဒဳတဲၤယးတအီၣ်နီး, အယၱၢ်ဘဲာ်ထာ်ယၱၤသွံး, အီၣ်ပ့ထာ်ကၱာ်တဲၤခီၣ်ဝဲၤခီၣ်ခး, အထာ်ဒ့ဒီၣ်မဳၤပာ်, 31အတဲၤကမဳၤကမၢ်တအီၣ်နီး, တဲၤဒဳတဲၤယး, တဲၤဘဲာ်လီၢ်သီၣ်ကျဲကၱာ် တဲၤခီၣ်ဝဲၤမှီးဘဲာ်တအီၣ်နီးတစီာ်နဳၤ. 32စသၱာ်ဟဲ တပွဲးကဘၱာ်စဲာ်အတဲၤမှဲးလၤ, မၱာ်အမဲၤတဲၤအယဳၤတစီာ်နဳၤ စတးနံၤတဲၤသံ. မဲၤနီၣ်သီနှီနူၤ, စဲာ်တစီာ်မဲၤတပွဲးလီၤ. အဇၱၢ်ဒဳၣ်ချဳမၱာ် စအံာ်ခဳးအံာ်အါပၠၤအကမဲၤကနဳၤနဳၤ.
ទើបបានជ្រើសរើសហើយ៖
ရိမ့ၤ 1: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
