ယိၤဟၣ် 14
14
ယ့ၣ်ရှူးမၱာ်ကျဲးအလ့ၤဒဳဘၱာ်စဲာ်ပာ်အီၣ်
1“ဘဲာ်ၡဳဘဲာ်မၤပီၢ်မဲးကၱာ် အဳးသဳးအဳးသး ပီၢ်မဲး. ဘူၣ်က့ၤ နဲၢ်က့ၤကဘၱာ်စဲာ်ကၱာ်ဘူၣ်က့ၤနဲၢ်က့ၤ ပီၢ်ယဲၤ. 2ဒဳယပာ်အရှံၣ် ပူၤနဳၤ, ရှံၣ်အီပူၤ အီၣ်အဲးအီးအီးဒဳး, ကၱာ်ယကလ့ၤပြးနှဲးတီၤလီၤကီ အလ့ၤအကျဲးသံနံၤခံ. အကတမၱာ်မၤကနဳၤနီးဒဳၣ်, ယကတဒီဆးတပွဲးသံနီး. 3ယကလ့ၤပြး တီၤလီၤဝှါ သံလ့ၤသံကျဲးဒဳၣ်, ယကက့ၤဘးကီတပျာ် ပ့ၤကၱာ်ယကက့ၤအံာ်ကီသံဒဳယအီၣ်နဳၤ, စာ်ဘိထဲၢ် ယအီၣ် အလ့ၤ အသရ့သံကအီၣ်ကိာ်ဘဲာ်ပီၢ်နဳၤ. 4သံသၱာ်ဟဲတပွဲးကျဲးအသဲလ့ၤ တဲၤအလ့ၤထဲၢ်ယလ့ၤ ကဲၤနဳၤ,” စဒီၣ်လၢ်ဝၤတစီာ်ဓဳၤ.
5စီၤသိၤမါဒီၣ်စဲာ်, “ဘၱာ်စဲာ်, ဝၤတသၱာ်ဟဲ နလ့ၤဒီၣ်လဲၢ် နဳၤ နီး, ကၱာ်ဝၤကသၱာ်ဟဲဇၤဒီကျဲးအလ့ၤ ဓဳၤဒဳနဳၤစာ်တဲၢ်,” စဒဲလၢ်ဝၤဓဳၤ.
6ယ့ၣ်ရှူးဒီၣ်က့ၤစဲာ်, “ယမၱာ်ကျဲး, တဲၤ တၱၢ်တဲၤမှး, ကၱာ်တဲၤ သမိလီၤ. မၱတမၱာ်ဒဳယဲၤနီၤနဳၤ, ပၠၤတဓဳၤထၱးအပာ်တဗွဲနီး.” 7စဒီၣ် လၢ်ဝၤတစီာ်, “ခဳနူၤယဳၤသံသၱာ်ဟဲထဳယဲၤ, ကၱာ်သံကသၱာ်ဟဲတပွဲး အပာ်, ကၱာ်ခဳနူၤယဳၤဖျီအလှီမီၢ်သံသၱာ်ဟဲထဳတပွဲးစဲာ်, ကၱာ်စာ်ထၱးထဳတပွဲး စဲာ်.”
8စီၤဖံလံးပူးဒီၣ်က့ၤစဲာ်, “ဘၱာ်စဲာ်, ဒဲလၱၢ် ပီၢ်ဝၤအပာ်ကၱာ်အဘဲာ်နံၤပီၤနံၤထဳတပွဲးဝၤနံၤခံ,” စဒီၣ်လၢ်ဝၤဓဳၤ.
9ယ့ၣ်ရှူးဒီၣ်က့ၤစဲာ်, “စီၤဖံလံးပူး, ယအီၣ်ကိာ်သံကါအီၣ် ယၱၢ်ကဲၤ, သံတသၱာ်ဟဲယဲၤ နှၱနီးဧါ.” ပၠၤအစာ်ထၱးယဲၤတပွဲၤနဳၤစစာ်ထၱး ထဳအပာ်. ဒဲလၱၢ်ပီၢ်ဝၤအပာ်နကဒီၣ်ဇၤဒီဓဳၤစာ်တဲၢ်. 10ယအီၣ် ဒဳ အပာ်အပူၤကၱာ်အပာ်အီၣ်ဒဳယပူၤနဳၤ, နတဘူၣ်ကဲၤနီးဧါ. တဲၤယၱၢ်ဘဲာ် ယဒီၣ်သံတစီာ်နဳၤ, တဘဲာ် ယဒီၣ်ဓီယဖျူယသရ့ာ်အပူၤနီး. မၱာ်အပာ်အအီၣ်ဒဳ ယပူၤတပွဲၤအဖျူအသရ့ာ်တခီ. အမဲၤတဲၤမဲၤမၱာ်စဲာ်. 11ဘူၣ်ပီၢ်ယအီၣ်ဒဳအပာ်အပူၤ, ကၱာ်အပာ်အီၣ် ဒဳယပူၤနဳၤ, မၱတမၱာ်နီး ဘူၣ် ပီၢ်ယတဲၤဖၱးတဲၤမဲၤတစီာ် နဳၤ. 12ယဒီဆးသံအတၱၢ်အမှး, ပၠၤအဘူၣ်ယဲၤ တပွဲၤနဳၤ, တဲၤမဲၤထဲၢ်ယမဲၤနဳၤစကမဲၤတပွဲး. အဘဲာ်ဟဳ. စကမဲၤကီဘၱာ်စဲာ်အမူၤဒဳၣ်ချဳ, မၤနဲၢ် ယကလ့ၤဒဳအပာ်အီၣ်နဳၤ. 13ကယါသံတၤတဲၤ ဒဳယမံၤအပူၤတစီာ်နဳၤ, ယကမဲၤနံၤကီသံ စာ်ဘိထဲၢ် အပာ်အတီၤအသ့းကဘဲာ်ဒဲလၱၢ်ထာ်ပီၢ်ဒဳအဖဳးအီၣ် နဳၤ. 14သံကတၤယဲၤတဲၤတမံၤမံၤဒဳယမံၤ အပူၤနဳၤ, ယကမဲၤတပွဲး.
သးစါထံအတဲၤအဳလါဖျးလၤ
15“သံကဘဲာ်လီၢ်ဘ့ာ်မ့ယဲၤဒဳၣ်, အီၣ်အံာ် ပီၢ်ယတဲၤမှဲးလၤ. 16ယကတၤကီအပာ်, ကၱာ်စကအံာ်လၤကီသံအမဲၤ ဇဳၤတဲၤအလဝ့ၤတပွဲၤ, ကၱာ်အကအီၣ်ကိာ်သဲာ်ယိကီသံကါ. 17စဲာ်မၱာ် သးစါ ထံထဲၢ်အဒဲလၱၢ်ကဘၱာ်စဲာ်အတဲၤတၱၢ်တဲၤမှးနဳၤ. လၢ်ခဳးတနံၤဘဲာ်ဇၤစဲာ်နီး, မၤနဲၢ်ဒဳၣ်အတစာ်ထၱးစဲာ်နီး ကၱာ်အတသၱာ်ဟဲစဲာ်နီးနီး. ပရၤဆါဒဳၣ်, သံ သၱာ်ဟဲ တပွဲးစဲာ်, မၤနဲၢ်ဒဳၣ်, စအီၣ်ကိာ်သံကါကၱာ်စအီၣ်ဒဳ သံပူၤနဳၤ.
18“ယတလဲၢ်ဖဳးဆဲးသံနီး. ယကက့ၤထၱး ဝ့ၤသံ. 19အကအီၣ်တဒဳးဖဳးပ့ၤ ကၱာ်လၢ်ခဳးတစာ်ထၱးပ့ၤယဲၤနီး, ပရၤဆါသံကစာ် ထၱးတပွဲးယဲၤ. မၱာ်ယအီၣ်သမိအခဳးအစဲ, သံကအီၣ်သမိကီ. 20ဘ့အနဳၤတနံၤနဳၤ, သံကသၱာ်ဟဲကီယအီၣ်ဒဳယပာ် အပူၤ, ကၱာ်သံအီၣ်ဒဳ ယပူၤ, ကၱာ်ယအီၣ်ဒဳသံပူၤနဳၤ.
21“ပၠၤထဲၢ်အဖၱးနံၤယတဲၤမှဲးလၤကၱာ်အအီၣ်အံာ်စဲာ်တပွဲၤ နဳၤ, စမၱာ်အဘဲာ်လီၢ်ယဲၤ. မၱာ်အဘဲာ်လီၢ်ယဲၤတပွဲၤနဳၤ, အပာ်ကဘဲာ် လီၢ်ကီစဲာ်, ယကဘဲာ်လီၢ်ကီစဲာ်ကၱာ်ယကဒဲလၱၢ်စဲာ်ယန့ၤ,” စဒီၣ်လၢ်ဝၤ ဓဳၤ.
22စီၤယူဒၤ, (တဘဲာ်စီၤယူဒၤအံၣ်စကၤ ရံၤအိာ်နီး) ဒီၣ်စဲာ်, “ဘၱာ်စဲာ်, နဘဲာ်ဒဲလၱၢ်ထာ်တပွဲး နန့ၤဒဳဝၤအီၣ်နဳၤ, မၱာ်နတဒဲ လၱၢ်ထာ်မၤနန့ၤဒဳလၢ်ခဳးနဳၤ နီးနဲၢ်,” စဒဲလၢ်ဝၤဓဳၤ.
23ယ့ၣ်ရှူးဒီၣ်ရှံက့ၤစဲာ်, “ဘ့ာ်မ့ ပၠၤတပွဲၤ ပွဲၤကဘဲာ်လီၢ်ယဲၤ နဳၤ, စကအီၣ်အံာ်တပွဲးယတဲၤယၱၢ် ဘဲာ်. ယပာ်ကဘဲာ်လီၢ်ကီစဲာ်ကၱာ်ဝၤ ကလ့ၤထၱးစဲာ် ကၱာ်အီၣ်ကိာ်ကီစကါ. 24ပၠၤအတဘဲာ်လီၢ် ယဲၤနီး တပွဲၤနဳၤ, တအီၣ်အံာ်ယတဲၤယၱၢ်ဘဲာ်နီး. မၱာ် တဲၤယၱၢ်ဘဲာ် သံသၱာ်ဟဲထဳ တစီာ်နဳၤ, တဘဲာ်ယအဲနီး, မၱာ်ယပာ်အသဓဳလ့ၤယဲၤတပွဲၤနဳၤအဲ,” စဒီၣ် လၢ်ဝၤဓဳၤ.
25“ယဒီဆးထဳသံတဲၤအယဳၤတစီာ် ဘ့ယအီၣ်ကိာ်ဝ့ၤသံကါ နဳၤ. 26အမဲၤဇဳၤတဲၤ, သးစါထံ ထဲၢ်အပာ်ကသဓဳလ့ၤဒဳယမံၤအပူၤတပွဲၤ, ကလ့ၤသိၣ်အံာ်သီအံာ်လဳကီသံကၱာ် စကမဲၤကမဳၤ ထာ်နံၤကီ သံကယါယဒီဆးထဳသံတစီာ်နဳၤ.
27“ယလဲၢ်လၤနံၤသံတဲၤယံၢ်တဲၤဒွါ, ယတဲၤယံၢ်တဲၤဒွါယအံာ်လၤသံလီၤ. ယအံာ်သံတဘဲာ်အစာ်ဘိ လၢ်ခဳးအံာ်လၤသံနီး. ဘဲာ်ရှဳ ဘဲာ်မၤ ပီၢ်မဲး. ရှံးဆါပီၢ်မဲး. 28သံသၱာ်ဟဲထဳယဒီဆး သံထဲၢ်, ‘ယကဟဲးဖျီးမံကၱာ်ယကက့ၤထၱးသံ,’ နဳၤ. သံကဘဲာ်လီၢ်မၤယဲၤဒဳၣ်, သံ ကသးကနၢ်အံာ်တပွဲးထဲၢ်ယလ့ၤဒဳအပာ်အီၣ်နဳၤ. မၤနဲၢ်ဒဳၣ်, အပာ်မၱာ် အဓဳၤလံယဲၤ. 29ကၱာ်ခဳနူၤယဳၤ, ယဒီဆးသံ, သရိကၱာ်တဲၤဖၱထာ်နှၱ နီးနဳၤ, စာ်ဘိထဲၢ်သံကဘူၣ် ပီၢ် ဘ့တဲၤဖၱထာ်အခၠၱးနဳၤ. 30တဘဲာ် ယကယၱၢ်ဘဲာ် ထၱးအီၣ်အဲးအီးအီးပ့ၤသံနီး, မၤနဲၢ်ဒဳၣ်, လၢ်ခဳး အဆးဖြး ဓဳၤလ့ၤထဳ. စစိသလဲတအီၣ်ယခဳးတမံနီး. 31ပရၤဆါစလ့ၤစာ်ဘိ ထဲၢ်လၢ်ခဳးကသၱာ်ဟဲ ပီၢ်ယဘဲာ်လီၢ်အပာ် ကၱာ်ယမဲၤတဲၤထဲၢ် အပာ်မှဲး လၤ ယဲၤတစီာ်နဳၤ.
“ဝဲၢ်ထဳး, ကဟဲးထာ်ကဲၤဘ့ယဳၤ,” စဒီၣ်လၢ်ဝၤ ဓဳၤ.
ទើបបានជ្រើសរើសហើយ៖
ယိၤဟၣ် 14: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
