သဓဳဖဳး 7
7
စီၤစတ့ဖၤအတဲၤဒီထိးဒီတလဲၤ
1ပၠၤလှူၣ်တဲၤအဓဳၤအခဳးဒီၣ်ကဲၤကယဳၤ, “တဲၤအယဳၤတစီာ် မၱာ်ကနဳၤဟဳဧါ.”
2စီၤစတ့ဖၤဒီၣ်ရှံက့ၤ, “သဲပူၤသဲဝ့ၤမဳၤစဲဖဲဓဳၤတစီာ်, ဆီးခ့န့း ပီၢ်. တဲၤဓီၤတဲၤသ့းအဘၱာ်စဲာ်ပီၤထာ်ထၱးကဲၤဝၤပာ် စီၤအၤဘြၤဟၣ်ဘ့ စအီၣ်ဝ့ၤက့ၤမ့းစပတၤမံအပူၤနဳၤ, တချူကၱာ် စလ့ၤထဳးလၤအီၣ်လၤဒဳအူး ဃၤရၣ်နှၱနီးနဳၤ, စဒီၣ်လၢ်ဝၤကယဳၤ, 3‘ဟဲးထာ်ကဲပီၢ်ဒဳထံက့ၤအပူၤကၱာ်နခွံနသလဲတစီာ်အကျဲ, ကၱာ်လ့ၤနံၢ်ပီၢ်ဒဳထံက့ၤထဲၢ်ယကဒဲလၱၢ် နဲၤတက့ၤနဳၤ,’ စဒီၣ်ကဲၤ လၢ်ဝၤဓဳၤ. 4စဟဲးထာ်ဖျီးမံဝှါက့ၤက့ၤ စ့းအပူၤဒဳၣ်, စလ့ၤထဳး လၤအီၣ်လၤကဲၤဒဳ ဃၤရၣ်အပူၤနဳၤ. ဒဳနဳၤစပာ်သံ ဝှါ ကဘၱာ်စဲာ် လ့ၤဘဲလါကကဲၤစဲာ်ဒဳထံက့ၤထဲၢ်သံအီၣ်ကဲၤခဳနူၤယဳၤတက့ၤအပူၤ နဳၤ. 5ကဘၱာ်စဲာ်တအံာ်ကဲၤစဲာ်တဲၤထီတဲၤလၤတမံနီး, ပွ့း လၢ်ခဳးတပျ့ၤတထဲနှီနူၤ စတအံာ်ကဲၤလၢ်ဝၤနီး, ပရၤဆါ စအၣ်မါ ခး အံာ်လၢ်ဝၤကၱာ် စဖဳးစလံၤတစီာ်လၢ်ခဳးသဒဲထံသဒဲက့ၤဒဳး လှ့ စဖဳးတအီၣ်လၤတပွဲနှၱနီးနဳၤလီၤ. 6ကၱာ်ဒီကဘၱာ်စဲာ်ဒီၣ်ကဲၤ, ‘စခွံစသလဲ ကလ့ၤအီၣ်တၱတမဲဘဲာ်ကီဒဳထံက့ၤအလဝ့ၤအပူၤကၱာ် ပၠၤတစီာ်ကမဲၤယဳၤ မဲၤလဲၢ်ကီစဲာ်တစီာ်အဒ့ာ်လွံၢ်ကယဲၤအဓၢ်ပူၤ. 7ဝှါယကစံးရးကီ ထံက့ၤထဲၢ်အစဳကျဳၤကၠၱၢ်ကျဳၤစဲာ်တစီာ် တက့ၤ နဳၤ. အနဳၤဝှါဒဳၣ်, စဲာ်တစီာ် ကဟဲးထာ်ကဲကီဒဳက့ၤအနဳၤတဘဲာ် အပူၤကၱာ်သဘူၣ်ထာ်သဘဲထာ်ကီ ယဲၤဘ့တဲၤလ့ၤအယဳၤ,’ ကဘၱာ်စဲာ်ဒီၣ်ကဲၤစဲာ်ဓဳၤ. 8အလ့ၤကါ ကဘၱာ်စဲာ်မဲၤပျဳာ်ကဲၤစဲာ် တဲၤလၤကျၤအဘဲာ်ကၠးတဲၤဝှိရကၱအဖ့းခံနဳၤ ကၱာ်စဖဳးစီၤအံၤစဲး အီၣ်လၤဝှါ အနံၤလွံၢ်သိးတနံၤနဳၤ စဝှိရကၱကဲၤလၢ်ဝၤ အဖ့းခံ, စီၤအံၤစဲးအီၣ်လၤကဲၤစီၤယၤကိာ်ထဲၢ်အမၱာ်ဝၤခွံဖဳးရှံးကၠံၢ်ပွဲၤ အပာ်နဳၤ.
9“ဒဳတဲၤသးကျးအခဳးအစဲ, စသဲပူၤဝ့ၤတစီာ်ဆဲအၣ်ကဲၤ စီၤ ယိၤသးဒဳအဲးကူပတူးအက့ၤပူၤနဳၤ. ပရၤဆါကဘၱာ်စဲာ် အီၣ် ကိာ်စကါ. 10စမဲၤလှိထာ်လၢ်ဝၤဒဳ တဲၤပၤတဲၤဆဲ အကျဲ ကၱာ် စအံာ်လၤကဲၤ လၢ်ဝၤတဲၤဇၤတဲၤပျၤဒဳက့ၤအဲးကူပတူးအဆးဖြး ဖၤရိၤအလှီမီၢ်နဳၤ, ကၱာ် စလဲၢ်ထာ်ကဲၤလၢ်ဝၤအစာ်အံာ်အူအံာ် စထံစက့ၤကၱာ်စရှံၣ်စဖါ. 11ဘ့နဳၤအဆဳအခဲတဲၤဝံၢ်သိ အီၣ် ထာ်ကဲၤဒဳက့ၤအဲးကူပတူး, က့ၤကနၤဧၣ်အပူၤတကွၢ်လဲၢ်ဒဳး. အလ့ၤအံာ်တဲၤပၤတဲၤဆဲအဓဳၤအမူၤ, ကၱာ်ဝၤ ပာ်တစီာ်တဝၢ်လှဲးဇၤ ကဲၤတဲၤအၣ်တလါနီး. 12မၱာ်ဘ့စီၤယၤကိာ် သၱာ်ဟဲဘဲာ် ဘူၣ် ဟူအီၣ်ဒဳ အဲးကူပတူးအထံအက့ၤအပူၤနဳၤဒဳၣ်, စသဓဳ လ့ၤကဲၤ ဖံဖူတစီာ် အူဆူးတပျာ်. 13ကၱာ်ဘ့စဲာ်တစီာ်လ့ၤ ကၠံၢ်ပျာ် တပျာ်နဳၤစီၤယိၤသးအံာ်သၱာ်ဟဲကဲၤစဲာ် စသဲပူၤသဲဝ့ၤတစီာ်စမၱာ် ပီၢ်ပွဲၤ နဳၤ. ကၱာ်အဲးကူပတူးအဆးဖြး ဖၤရိၤသၱာ်ဟဲဘဲာ်ကဲၤ စဲာ်တကမူၤဖဳးနဳၤ. 14စီၤယိၤသးမှဲးလ့ၤကဲၤစပာ် စီၤယၤကိာ်ကၱာ် စခွံစသလဲ လဳ စါစဲး, လဳစါစဲးစအီၣ်ကဲၤသါသိးတရှံယဲၢ်ပွဲၤ. 15ကၱာ်ဒီ စီၤယၤကိာ် လၤကဲၤဒဳအဲးကူပတူးအက့ၤပူၤနဳၤ, အလ့ၤကါစဲာ်ကၱာ် ဝၤပာ်တစီာ်သံလဳၢ် ကဲၤ. 16ပၠၤက့ၤအံာ်စဲာ်တစီာ်အစဳးကၱာ် ဘူလါကဲၤဒဳအူးရှက့ၣ်အလူၢ်ခဳးပူၤ, ထဲၢ်စီၤအၤဘြၤဟၣ်ပွၱၤထၱး ရှက့ၣ်အူးဖဳးစီၤဃမိၢ်အဖဳးအီၣ် စအံာ်ဘဲာ်အပွၱၤဝှိအဘ့ာ်ပွ့တမံၤ တကျးဝးနဳၤ.
17“အစာ်ဘိကဘၱာ်စဲာ်အၣ်မါခးအံာ်ကဲၤစီၤအၤဘြၤဟၣ် အခၠၱးဘဲာ်ဘိးထၱးနဳၤ, ပၠၤတစီာ်လၤကွါလၤယၢ်ဆိးကဲၤဒဳက့ၤ အဲးကူပတူး အပူၤနဳၤ. 18ဝှါဒဳၣ် ဆးဖြး အတသၱာ်ဟဲကဲၤ စီၤယိၤသးအဝၱၤအကဲတမံနီးတပွဲၤအူအံာ်ဘဲာ်ကဲၤက့ၤအဲးကူ ပတူး. 19စသးတကွ့ၤ ကဲၤဝၤခွံဝၤသလဲအခဳးကၱာ်မဲၤနဳၤ အၣ်ပဲၤကဲၤဝၤဖံဝၤဖူတစီာ်ပွ့အကဝှ့ဖျီး မံအပံၤစဖဳး အဖဲးလၤသဲတစီာ်စာ်ဘိထဲၢ် စကတအီၣ်ပီၢ်ပၠၤနီးနဳၤ. 20ဘ့နဳၤစီၤမိၤၡ့ အီၣ်လၤကဲၤကၱာ်ကဘၱာ်စဲာ်ဘဲာ်သးကဲၤစဲာ်, စဘဲာ် ဘဳာ်အံာ်ကဲၤဒဳစမဳၤစပာ်အရှံၣ်ပူၤသဳလှဲအဓၢ်ပူၤ. 21ထိမၱာ် စဘဲာ် ဝှ့ဖျီးမံနဳၤ, ဖၤရိၤအဖဳးမူၤဘဳာ်အံာ်ဓဳၤထာ်ကဲၤစဲာ်အစာ်ဘိစဖဳး အနှဲးနဳၤ. 22စီၤမိၤၡ့ဘဲာ်သဲာ်လှိအံာ်ကဲၤအဲးကူပတူးဖဳး အတဲၤ ဇၤတဲၤပျၤ ကိမဳၤမဳၤ, ကၱာ်ဒီစဓဳၤယၤမၤတံၤကဲၤဒဳစတဲၤယၱၢ်ဘဲာ် တတီၤအပူၤကၱာ်စတဲၤဖၱးတဲၤမဲၤအကျဲနဳၤ.
23“ဘ့စဘးအဒ့ာ်လွံၢ်ရှံနဳၤ, စလ့ၤစာ်ဟူၣ်ကဲၤစသဲပူၤဝ့ၤ အံၣ် စရ့လးဖဳးတစီာ်နဳၤ. 24ဘ့ စစာ်ထၱးကဲၤအံၣ်စရ့လး ဖဳးတပွဲၤဘဲာ် မဲၤယဳၤမဲၤလဲၢ်ဒဳၣ်, စဝဳၤအံာ်လၢ်ဝၤထိစမဲၤသံနံၤ ကဲၤအဲးကူပတူးဖဳး တပွဲၤနဳၤ. 25စီၤမိၤၡ့ကမဳၤမၱာ် စသဲပူၤဝ့ၤ တစီာ်သၱာ်ဟဲထဳထဲၢ်ကဘၱာ်စဲာ်သးအဲးမဲၤလှိထာ်က့ၤစဲာ်တစီာ်ဒဳ စစူးခီၤပူၤနဳၤ, မၱာ်စဲာ်တစီာ်တသၱာ် ဟဲကဲၤကနဳၤနီး. 26အလ့ၤ ကါတနံၤ, စလ့ၤစာ်ထၱးကဲၤစဲာ်တဇဲၢ် လီၤလၤမဲၤထၱးမဲၤပဳၤလၢ်ဝၤ ဒဳၣ်, စသးအဲးမဲၤနံၤလၢ်ဝၤတဲၤစဳးတဲၤချံးအခဳးအစဲ, စဒီၣ်ကဲၤ လၢ်ဝၤ, ‘အဳပၠၤတစီာ်, သံမၱာ်သဲပူၤသဲဝ့ၤလီၤ. မၱာ် သံ မဲၤက့မဲၤပြိၤ မၤလၢ်ဝၤနဲၢ်’ စဒီၣ်လၢ်ဝၤတစီာ်ဓဳၤ. 27အမဲၤ တဲၤ အတဘဲာ် ကျဲးနီးတပွဲၤ ဆးဖျီးမံဝှါစဲာ်, စဒီၣ်လၢ်ဝၤ, ‘ပီၢ်ပွဲၤလဲၢ် ထာ်နဲၤ အအူ အံာ်ဝၤခဳးကၱာ်အစံးရးတဲၤပွဲၤ.’ 28‘နသးအဲးမဲၤသံ ကဒီ ယဲၤ အစာ်ဘိနမဲၤသံအဲးကူပတူးဖဳးမဳဟဲးတပွဲၤနဳၤဧါ’ စဒီၣ်လၢ်ဝၤ ဓဳၤ. 29ဘ့စီၤမိၤၡ့ သၱာ်ဟဲတဲၤယၱၢ်ဘဲာ်အယဳၤဒဳၣ်, စွဲးဖျီးကၱာ် လ့ၤ အီၣ်ဟူၣ်ကဲၤဒဳမံးဒယၣ်အက့ၤနဳၤ တဒဳးတဆးထိစဖဳးထာ်ကဲၤကၠံၢ်ပွဲၤ နဳၤ.
30“အဒ့ာ်လွံၢ်ရှံဝှါ ဒဳစံၤနါခီးလီခဳးနဳၤ, မီၢ်ခဳးပွဲၤဇဳၤတပွဲၤ ပီာ်ထာ်ထၱး ကဲၤစဲာ်ဒဳမှၱးအပျၱၤပူၤ, ဇီၤဇွံၤကျဲနဳၤ. 31ဘ့စီၤမိၤၡ့ စာ်ထၱး တဲၤအယဳၤဒဳၣ်, စထဲးတမိၢ်တမှါကၱာ်လ့ၤစာ်ဘိးထၱးကဲၤ, ဘ့နဳၤ ကဘၱာ်စဲာ် အလ့ၢ်သဲာ် ထာ်ကၱာ်ဒီၣ်ကဲၤစဲာ်, 32‘ယမၱာ် နပာ်တစီာ်အဘၱာ်စဲာ်, အၤဘြၤဟၣ်အဘၱာ်စဲာ်, စီၤအံၤစဲးအဘၱာ်စဲာ်, စီၤယၤကိာ်အဘၱာ်’ စဲာ်ဒီၣ်လၢ်ဝၤဓဳၤ. စီၤမိၤၡ့ကနၢ်ကၱာ်စတစာ်ဘူၣ် ကဲၤလၢ်ဝၤနီး. 33မဲၤ ဝှါကဘၱာ်စဲာ် ဒီၣ် ကဲၤစဲာ်, ‘ကီးလၤ ဓ့ၢ်ပီၢ်နခးတကီး, မၤနဲၢ်နဆီထဳး အီၣ်အလ့ၤမၱာ်လၢ်ခဳးအစါထံ. 34ယစာ်ထၱးလဳထဳယပၠၤတစီာ်ခး ဘဲာ်တဲၤမဲၤယဳၤမဲၤလဲၢ် ဒဳ အဲးကူပတူးအက့ၤပူၤနဳၤ. ယသၱာ်ဟဲဘဲာ် ထဳ စတဲၤကအဳကယၢ် ကၱာ်ဒီယလၤထဳစာ်ဘိထဲၢ်ယကမဲၤလှိထာ်က့ၤ စဲာ်တစီာ် နဳၤ. ခူနူၤ ယဳၤလ့ၤပီၢ်, ယကသဓဳလ့ၤနဲၤဒဳအဲးကူပတူးအက့ၤပူၤ နဳၤ,’ စဒီၣ် လၢ်ဝၤဓဳၤ.
35“စီၤမိၤၡ့မၱာ်ပၠၤတပွဲၤထဲၢ်အံၣ်စရ့လး ဖဳးတစီာ်လဲၢ်ဆီတခွံ ကဲၤစဲာ်ဘ့စဒီၣ်လၢ်ဝၤ, ‘ပီၢ်ပွဲၤလဲၢ်ထာ်နဲၤအအူအံာ်တဲၤကၱာ် အကစံးရး တဲၤဝၤခဳးပွဲၤ,’ အခၠၱးနဳၤ. မၱာ်ကဘၱာ်စဲာ်သဓဳလၤကဲၤစဲာ် အကအူအံာ် ကၱာ်မဲၤလှိထာ်က့ၤတဲၤဒဳမီၢ်ခဳးပွဲၤဇဳၤအပီၤထာ်ထၱးစဲာ်ဇီၤဇွံၤ ကျဲတပွဲၤအတဲၤမဲၤ ဇဳၤနဳၤ. 36စီၤမိၤၡ့မၱာ်အမဲၤတဲၤ စီးကျၱးစီးရှဲ ဒဳအဲကူပတူး အက့ၤ, ဒဳပဲာ်လဲာ်လၱၤ အပူၤကၱာ် ဒဳလဳၤသံမံးဇ့ၤခဳး အဒ့ာ်လွံၢ်ရှံအပူၤကၱာ် အယဳၤ ဟဲးထာ်ကဲအံာ်အံၣ်စရ့လးဖဳးတစီာ် ဒဳအဲးကူပတးအပူၤတပွဲၤနဳၤ. 37အယဳၤမၱာ် စီၤမိၤၡ့ထဲၢ် အဒီၣ် ကဲၤအံၣ်စရ့လးဖဳးတစီာ်, ‘ဘၱာ် စဲာ်ယွၤကရိၤထာ်ကီဒဳသံကျဲ ဝံတပွဲၤထဲၢ်သံကဆီးခ့န့းကီစလ့ၢ်နဳၤ.’ 38အယဳၤမၱာ် စီၤမိၤၡ့ထဲၢ်အအီၣ်ပျဳာ်အံာ်စရ့လးဖဳးဒဳလဳၤသံမံးဇ့ၤ ခဳးတပွဲၤနဳၤ, စအီၣ်ဘ့နဳၤပျဳာ်ပျဳာ်ကၱာ်ဝၤဖံဝၤဖူ, မီၢ်ခဳးပွဲၤဇဳၤယၱၢ်ဘဲာ်ထၱး ကဲၤစဲာ်ဒဳ စံၤနါအခီးလီခဳးကၱာ်စမၱာ်ကဲၤအဖၱးနံၤ တဲၤအံာ်လၤနံၤဝၤတဲၤ အီၣ်သမိအတဲၤယၱၢ် ဘဲာ်တစီာ်နဳၤ.
39“ပရၤဆါဝၤဖံဝၤဖူတစီာ်တဆီးခ့န့းစလ့ၢ်နီး, မၱာ်စဆးဖျီး မံလၢ်ဝၤဒဳစသးပူၤနဳၤ. စက့ၤဘးကဲၤဒဳအဲးကူပတူးက့ၤပူၤနဳၤ. 40စဲာ်တစီာ်ဒီၣ်ကဲၤစီၤအၤဟရိၣ်, ‘မဲၤနံၤပီၢ်ဝၤကဘၱာ်စဲာ်တစီာ်အကသဲ လ့ၤဝၤနဳၤ. မၱာ်စီၤမိၤၡ့ ထဲၢ်အဟဲးထာ်အံာ်ဟူကဲၤဝၤအဲးကူပတူး က့ၤတပွဲၤနဳၤ, တၤဖၱထာ်ကဲၤစဲာ်နဲၢ်နဳၤဝၤတသၱာ်ဟဲကဲၤနီး,’ နဳၤ. 41အလ့ၤ ကါစဘီာ်ထာ်ဝှါဗဳၤဖဳးတဒဳ အယီၤ, စလှူၣ်ထာ်အံာ် ကဲၤလၢ်ဝၤထဲၢ်စစူးခွး နဳၤကၱာ်ခးပွဲခးလၤကဲၤ. 42မဲၤကနဳၤဒဳၣ်, ကဘၱာ်စဲာ်ဒးတဒူးချဳအန့ၤ ကၱာ်စဲာ်တစီာ်, ကၱာ်အံာ်လၤစဲာ် အကသဘဲမီၢ်ခဳးအဆဲၣ်အဖီတစီာ် အစာ် ဘိဝံတစီာ်ဝှ့းလၤတီၤလီၤကဲၤ,
‘အဳအံၣ်စရ့လးဖဳးတစီာ်, သံလှူၣ်ထာ်တဲၤဖဳးတဲၤဝ့ၤတစီာ်
ဘ့သံအီၣ်ဒဳလဳၤသံမံးဇ့ၤခဳးအဒ့ာ်လွံၢ်ရှံအဓၢ်ပူၤနဳၤ,
မၱာ်အတဘဲာ်တပွဲးယနံၤခံနီး.
43သံဟဲးယးအံာ်မၤ မိၤလးအရှံၣ်ဖဳး,
ကၱာ်သံဘၱာ်စဲာ်အယီၤရၣ်ဖၣ်အဆဲၣ်,
တဲၤယီၤတဲၤယၤတစီာ်နဳၤကၱာ် သဘဲထာ်အံာ်မၤနဲၢ်.
ကၱာ်ဒီယကလ့ၤအံာ်ဟူကီသံဒဳဘၤဘူၤလိၣ်အက့ၤအချဳနဳၤ,’ ကဘၱာ်စဲာ်ဒီၣ်ကဲၤစဲာ်တစီာ်ဓဳၤ.
44“ဝၤဖံဝၤဖူတစီာ် အီၣ်အံာ်ကဲၤ သဲသၱးအရှံၣ်ဖဳးဒဳ လဳၤသံ မံးဇ့ၤခဳးနဳၤ. အဘဲာ်ပြးထာ် အစာ်ဘိကဘၱာ်စဲာ်ဒီဆးကဲၤစီၤမိၤၡ့ အသရ့ ကၱာ်အစာ်ဘိ စကဲာ်ထၱးကဲၤအဟိအယီၤအဓ့နဳၤ. 45ဝၤဖံဝၤဖူတစီာ်ဖၱးနံၤဝှါရှံၣ်ဖဳး, စယးလ့ၤနံၢ် ကဲၤထံက့ၤဝၤအီၣ် လၤခဳနူၤယဳၤတက့ၤ အပူၤ, ဒဳစီၤယိၤရှူအလဲၤသၱာ်ခဲနဳၤ. ကဘၱာ်စဲာ် မှီး ဖျီးမံတပွဲး ပွဲၤသူကူာ် ဖဳးတစီာ်ဒဳဝၤဖံဝၤဖူအလှီမီၢ်နဳၤ. ကၱာ်ရှံၣ်ဖဳးတဝၤအီၣ်ဝ့ၤထိဓဳၤလၤ စီၤဒၤ ဝံးအလဲၤသၱာ်ခဲနဳၤ. 46ကဘၱာ်စဲာ်ဘဲာ်သးကဲၤစဲာ်ဒဳၣ်, စတၤကဲၤကဘၱာ်စဲာ်စာ်ဘိထဲၢ် စကဝၢ်လှဲးနံၤပီၢ်စီၤယၤကိာ်အဘၱာ်စဲာ်အနံၤခံအလ့ၤ အကျဲးတဓဲ. 47မၱာ်စီၤရှလိၤမိၤပြးနံၤကဲၤကဘၱာ်စဲာ်အနံၤခံရှံၣ် တဝၤ.
48“နီၣ်သီနှီနူၤ, ကဘၱာ်စဲာ်အထာ်ယၱၤ ကဓူၤတအီၣ်ဒဳရှံၣ် ထဲၢ်ပၠၤပြးအံာ်အစူခီးနဳၤနီး, အစာ်ဘိဝံဒီၣ်,
49‘မီၢ်ခဳးမၱာ်ယနၤ,
လၢ်ခဳးမၱာ်ယခးပီၢ်လၤ.
နကပြးယနံၤခံရှံၣ်တၤနဲၢ်.
ယတဲၤဆီဓူၢ်ဆီးဒဲအလ့ၤမၱာ်ပီၢ်တၤနဲၢ်.
50တဲၤအယဳၤမၱာ်လဳယစူးခွးလီၤတဘဲာ်နီၤဧါ.’
51“သံအကီၢ်မှးကၱာ်အသးဆးအခွံ, သံထာ်ခဳးကါနဲၤနီၤကဲၤ သးစါထံအစာ်ဘိသံဖံသံဖူမဲၤကဲၤနဳၤ. 52ဒဳဝံတစီာ် အကျဲ, သံဖံ သံဖူတမဲၤဆဲးညဲကၱာ်မဲၤသံကဲၤနီးအီၣ်တပွဲၤပွဲၤဧါ. အဒီ ဆးတီၤလီၤအတၱၢ်အမှးတပွဲၤအတဲၤလ့ၤလၤတစီာ်မၱာ်မၱာ်စမဲၤသံ ကဲၤကဲၤ. ကၱာ်ခဳနူၤ ယဳၤသံသဲန့ၤဟိလါကၱာ်မဲၤသံကဲၤစဲာ်. 53သံနံၤဘဲာ်ထဳမီၢ်ခဳးပွဲၤဇဳၤ အတဲၤအံာ်လၤထဲၢ်, ‘တဲၤမှဲးလၤနဳၤ,’ မၱာ်သံတအီၣ်အံာ်ကဲၤနီး” စဒီဆး ကဲၤလၢ်ဝၤတစီာ်ဓဳၤ.
စီၤစတ့ဖၤဘဲာ်ဝှ့သံ
54ဘ့ပၠၤတစီာ်သၱာ်ဟဲဘဲာ်တဲၤအယဳၤဒဳၣ်, မဲၤအစာ်ဘိ စသး ဘဲာ်ထၱးဘဲာ်ဒဳကဲၤနဳၤ, စအ့းတံၤသိအ့းတံၤသဲကဲၤစီာ်စတ့ဖၤဒဳတဲၤ သဲး ထဲးကီၤရဲၤအပူၤနဳၤ. 55ပရၤဆါစီၤစတ့ဖၤ အီၣ်ပ့ထာ်ကဲၤ သးစါ ထံ, စစာ်ထာ်ဒဳ မီၢ်ခဳးနဳၤကၱာ်စစာ်ထၱးကဲၤကဘၱာ်စဲာ် အတီၤ အသ့း ကၱာ် ယ့ၣ်ရှူးဆီထဳးအီၣ်ဒဳကဘၱာ်စဲာ်အစူးတထွဲးတခီနဳၤ. 56ကၱာ်စဒီၣ် ကဲၤ, “စာ်ပီၢ်, မီၢ်ခဳးအီၣ်ကဲၤအဘါထာ်ကၱာ်ယစာ် ထၱး ပၠၤအဖဳးဆီထဳး အီၣ်ဒဳကဘၱစဲာ်အစူးတထွဲးတခီနဳၤ,” စဒီၣ်ဓဳၤ.
57မၱာ်စဲာ်တစီာ်ကဲာ်ဧဳၤထာ်ဆိးတကျဲး, ဆီတအိဘံာ်ဝှါ အနံၤ ကူၤဒဳၣ်, လှီဝဲၢ်ကဲၤစလီၤတစီာ်. 58စစွံးထာ်ဖျီးဝှါ လၢ်ဝၤဒဳ အူးအချဳဒဳၣ်, ဝှ့သံကဲၤစဲာ်ကၱာ်လဳၤ. ပၠၤအဝှ့သံစီၤစတ့ဖၤ တစီာ်ပူးလၤအရှံာ်ဒဳချဳ ဒဳအဘီာ်လီးဖဳးအမံၤမၱာ်စီၤစီလူးတပွဲၤအခၣ် ထၱးနဳၤ. 59ဘ့ပၠၤဝှ့စဲာ် လဳၤနဳၤ, စီၤစတ့ဖၤသဘဲထာ် ကၱာ်ဒီၣ် ကဲၤ, “အဳဘၱာ်စဲာ်ယ့ၣ်ရှူး, ဖၱးပီၢ် ယသးတကၱာ်,” စဒီၣ်ကဲၤဓဳၤ. 60အလ့ၤကါ စလၤခူးဓဳၤနှဳလါ, စထဳထာ်စလ့ၢ်ကၱာ်စဒီၣ်, “အဳဘၱာ်စဲာ်, ဖၱးပီၢ်မဲးစဲာ်တစီာ်အခဳးတဲၤကမဲာ်မဲး” စဒီၣ်ဝှါဒဳၣ် စက့ၤဖျီးသံကဲၤ.
ទើបបានជ្រើសរើសហើយ៖
သဓဳဖဳး 7: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
