သဓဳဖဳး 1
1
သးစါထံအတဲၤအၣ်မါခးအံာ်
1အဳသီၣ်ဖံလူး—
လှ့စဲာ်အအူဆူးတဘဲာ် အပူၤယဒီဆးထဳ သံ ကယါယ့ၣ်ရှူးမဲၤကဲၤ တဲၤကၱာ်သိၣ်အံာ်သီအံာ် တဲၤတစီာ်အဝၱၤအကဲလှ့အကါထၱးနဳၤ, 2ကၱာ်ထိဓဳၤမူၤနံၤတနံၤထဲၢ်စဘဲာ်ဖၱးထာ်က့ၤဒဳမီၢ်ခဳးတစီာ် နဳၤ, ဒဳသးစါထံ အပူၤစအံာ်လၤကဲၤသဓဳဖဳးထဲၢ်စရိၤ ထာ်ကဲၤတဲၤမှဲးလၤတစီာ်နဳၤ. 3စခးတဲၤသံကၱာ် ထာ်ပဳၤက့ၤဝှါအလ့ၤကါ, စပီၤထာ်ထၱးလၢ်ဝၤ အီၣ်အဲ ပျာ်ကၱာ်ဒီဆးကဲၤလၢ်ဝၤ ကဘၱာ်စဲာ်အထံအက့ၤ အဝၱၤ အကဲဒဳအနံၤ လွံၢ်ရှံ, အသဲလွံၢ်ရှံအဓၢ်ပူၤ, ကၱာ်ဒဲလၱၢ် ထာ်အီၣ်သမိဝ့ၤတပွဲးနဳၤ. 4ကၱာ်ဒီဘ့စအီၣ်ယံၢ် ပျဳၤလၢ်ဝၤအခၠၱးနဳၤ, စထူးလၤမှဲးလၤလၢ်ဝၤတစီာ်, “ဟဲးပၢ်ပီၢ်မဲးယရူၤၡလ့ၣ်အူးမဲး, အီၣ်ဆိဧိၢ်အံာ် ဘၱာ်စဲာ်ပာ်အတဲၤ အဳလါဖျးလၤအကအံာ်သံ, ထဲၢ်သံ သၱာ်ဟဲဘဲာ်ဒဳယလီၤမီၤပူၤတစီာ်နဳၤ. 5စီၤယိၤဟၣ်ဖဳးစူသံကၱာ်ထံ, မၱာ်သံနဳၤ, တအီၣ်ယၱၢ်နံၤအီၣ်ယၱၢ်သဲ နီး, သံကဘဲာ်ဖဳးစူအံာ်ကီသးစါထံ,” စဒီၣ်လၢ်ဝၤတစီာ်ဓဳၤ.
ဘၱာ်စဲာ်ယ့ၣ်ရှူးက့ၤထာ်ဒဳမီၢ်ခဳး
6မဲၤကနဳၤပၠၤအလ့ၤလၤတ့ၢ်ပျဳာ်လၢ်ဝၤတစီာ်ဒီၣ်ကဲၤစဲာ်, “အဳ ဘၱာ်စဲာ်, ခဳနူၤယဳၤနကအံာ်က့ၤ အံၣ်စရ့လးဖဳးစထံစက့ၤဧါ.”
7မၱာ်စဒီၣ်က့ၤလၢ်ဝၤတစီာ်, “ဒဳအပာ်အဖျူအသရ့ာ်အပူၤ, စပ့ၤလၤအခၠၱးအကျၤစာ်တဲၢ်နဳၤ, သံသၱာ်ဟဲအခွဲးတအီၣ်နီး. 8ပရၤ ဆါဘ့ သးစါထံကလၤထၱးသံတပျာ်နဳၤ, သံကနံၤဘဲာ် တပွဲး အဖျူအသရ့ာ်ကၱာ်သံကခးကီယနံၤခံသဲသၱးဒဳ ယရူၤၡလ့ၣ်အူး, ကၱာ်ယူဒၤက့ၤသဒဲ က့ၤကၱာ်ရှၤမရၱ, ထိဓဳၤလၢ်ခဳးကူဓူၤနဳၤ,” စဒီၣ်လၢ်ဝၤဓဳၤ. 9ဘ့စဒီၣ်ဝှါကနဳၤ, စဘဲာ်ဇၢ်ထာ်ကဲၤဒဳလၢ်ဝၤ တစီာ်အမူၢ်ကါ အလှီမီၢ်ကၱာ်တဲၢ် တဘဳာ်လၤကၢ်ဘံာ်ကဲၤစဲာ်.
10ကၱာ်ဒီဘ့စဲာ်တစီာ် စာ်တကြၱၢ်နၱၢ်သဗ့ဒဳ မီၢ်ခဳးလဲၢ်နဳၤ, စာ် ပီၢ်, ပၠၤအကိအသီးရှံာ်ဒဳအဘိး သါ တရှံးကၠံၢ်ပွဲၤဆီထဳးအီၣ်စဇၤဝၤ, ကၱာ်စဒီၣ် လၢ်ဝၤ တစီာ်, 11“အဳပၠၤကၤလံၤလဲဖဳးတစီာ်, သံစာ် မၤဒဳမီၢ်ခဳးလဲၢ်နဳၤနဲၢ်. ယ့ၣ်ရှူးထဲၢ်အဘဲာ်ဇၢ်ထာ်သံဝံၢ် သံဒဳမီၢ်ခဳးလဲၢ်တပွဲၤယဳၤကလၤကီတပျာ်ပ့ၤ မဲၤအစာ် ဘိစက့ၤထာ်ကဲၤယဳၤနဳၤ,” စဒီၣ်လၢ် ဝၤတစီာ်ဓဳၤ.
စီၤမးသံဘဲာ်ရိၤထာ်
12မဲၤဝှါစဲာ်တစီာ်အီၣ်ဒဳသဳာ်ဇၤယံၤခီးလီခဳး ကၱာ်က့ၤကဲၤဒဳယရူၤၡလ့ၣ်အူးထဲၢ်အအီၣ် ယၱၤလှဲး လၢ်ဝၤအမံးလးကျါမဲနဳၤ. 13ဘ့ စဓဳၤ နံၢ်က့ၤဝှါ အူးပူၤနဳၤ, စထာ်ကဲၤဒဳရှံၣ်အကီၢ်ထာ်တတီၤထဲၢ် အအီၣ်မၱာ်စီၤပ့းတရူး, စီၤယိၤဟၣ်, စီၤယၤကိာ်, စီၤအၣ်ဒရ့း, စီၤဖံလံးပူး, စီၤသိၤမါ, စီၤဘၢ်သလီးမဲ, စီၤမးသဲ, စီၤယၤကိာ်စီၤအၤလဖဲအဖဳး, ကၱာ် အဘဲာ် လီၢ်အထံအက့ၤစီၤၡံမိၣ်, ကၱာ်စီၤယူဒၤ စီၤယၤကိာ် အဖဳးနဳၤ. 14စဲာ်တစီာ်လၤတ့ၢ်ယံၢ်ပျဳာ်လၢ်ဝၤတယွဲၤတယွဲၤကၱာ်သဘူၣ်သဘဲကဲၤ ဒဳသးတမဲလီၤအပူၤ, ပျဳာ်ပျဳာ်ကၱာ်အမံၤမှူးတစီာ်, နီၢ်မၤရၱ, ယ့ၣ် ရှူး အမဳၤနဳၤကၱာ်စသဲပူၤသဲဝ့ၤတစီာ်နဳၤ.
15တအီၣ်ယၱၢ်နံၤအီၣ်ယၱၢ်သဲနီး, ပၠၤအဘူၣ်တဲၤတစီာ်လၤ တ့ၢ်ပျဳာ်လှဲးလၢ်ဝၤ, ပၠၤအပွဲၤအီၣ် တကယဲၤကၠံၢ်ရှံ. စီၤပ့းတရူးဝဲၢ်ဆီ ထဳးကၱာ်ဒီၣ်, 16“သဲပူၤသဲဝ့ၤတစီာ်, စဲာ်စါထံကဘဲာ်ပ့ထာ်ဇီၤ ထာ် ဘဲာ် အစာ်ဘိသးစါထံယၱၢ်ဘဲာ်ကဲၤဒဳ စီၤဒၤဝံး အလီၤမီၤပူၤအဘဲာ်ကၠးစီၤ ယူဒၤ, အလ့ၤအံာ်ဟူကဲၤ ပၠၤအကဖီးယ့ၣ်ရှူးတစီာ်ကျဲးနဳၤ. 17စဲာ် မၱာ်အနံၤဘဲာ်ကိာ်ဝၤကါ အကမဲၤဘၱာ်စဲာ်အတဲၤဖၱးတဲၤမဲၤတပွဲၤနဳၤ.”
( 18ဟိထဲၢ်စမဲၤနံၤဒဳတဲၤမဲၤအကၱကဲာ်အပူၤနဳၤ, စပွၱၤဝှါလၢ် ခဳးတကျးဝးဒဳၣ်, စလၤခူးဆီး လၤကဳာ်ကၱာ်သံကဲၤဘ့အပူၤနဳၤ. စဖူဗဳၤထဲ ဖးကဲၤကၱာ် စပွ့ၢ်စဖူထဲးလွဲၢ်လၤလှီးလဳၢ်ကဲၤနဳၤ. 19ယရူၤၡလ့ၣ် အူးဖဳးလဳစါစဲးသၱာ်ဟဲကိာ်ထိကၱာ် ပၠၤထါ လၢ်ခဳးအနဳၤအမံၤ, “အၤက့းလဒၤမါ” အထာ်ပဳၤထာ်ဘါမၱာ် “တဲၤသွံၣ်အလၢ်ခဳး.”)
20“အဝှ့းလၤကဲၤဒဳစဲာ်ထါထာ်အံာ်အပူၤနဳၤ,
စရှံၣ်စဖါကမၱာ်ဒီဧဲၤတဲၤသူးတစူးအလ့ၤ,
ကၱာ်ပၠၤကတအီၣ်ဒီဧဲၤဒဳနဳၤတဗွဲနီး.”
အဝှ့းလၤကိာ်ဝ့ၤ
“ကၱာ်စတဲၤဖၱးတဲၤမဲၤနဳၤ,
ပၠၤအလဝ့ၤကဖၱးဒီဧဲၤ.”
21-22“မဲၤကနဳၤ, ဝၤဘဲာ်ရိၤထာ်ပၠၤထဲၢ်အကခးပျဳာ်ဘဲာ်ဝၤ သဲသၱးဒဳယ့ၣ်ရှူးအတဲၤထာ်ပဳၤက့ၤအနံၤခံနဳၤ. စကဘဲာ်မၱာ်ပၠၤထဲၢ်ဘ့ဘၱာ် စဲာ်ယ့ၣ်ရှူးဟဲးထာ် ဟဲးလၤဝ့ၤဝၤခဳးဝၤကျဲ, ကဳၤထာ်လှ့စီၤယိၤဟၣ်ဖဳးစူ ထံအမူၤနံၤ, ထိဓဳၤလၤစက့ၤထာ်မီၢ်ခဳးနဳၤ, ဒဳပၠၤတစီာ်ယဳၤအကျဲ, အအီၣ် ကိာ်ဝၤကါတပွဲၤလီၤ,” စဒီၣ်ကဲၤဓဳၤ.
23မဲၤဝှါ စပၤထာ်ကဲၤအမံၤကၠံၢ်ပွဲၤ, စီၤယိၤသးထဲၢ်ပၠၤယဳၤအမံၤစီၤဘၢ်စဘါ, (ထဲၢ်ပၠၤယဳၤကိာ်အမံၤ စီၤယူစတူး) ကၱာ်စီၤမးသံ. 24စဲာ်တစီာ်သဘဲထာ်ကၱာ်ဒီၣ်, “အဳဘၱာ်စဲာ် ထဲၢ်အသၱာ်ဟဲ ပၠၤလဳစါစဲး အသး, ဒဲလၱၢ်ထာ်ပီၢ်အယဳၤကၠံၢ်ပွဲၤအကျဲ, နရိၤထာ်ကဲၤ 25အကမဲၤနတဲၤမဲၤဒဳ အပျဲၢ် အဘီၣ်တစီာ်အကျဲ, စီၤယူဒၤ, ထဲၢ်အဟဲးပၢ်ကၱာ် လ့ၤကဲၤဒဳအလ့ၤအကျဲးတပွဲၤအပျိၤနဳၤ,” စဒီၣ်ကဲၤတစီာ်ဓဳၤ. 26စဲာ်တစီာ်ဘဳာ်မဲကၱာ် အလၤဓ့ၢ် ကဲၤစီၤမးသံအလီၤ, ကၱာ်စဘဲာ်လဲၢ်ပျဳာ် ကဲၤ အပျဲၢ်အဘီၣ် ရှံးတပွဲၤအကျဲနဳၤ.
ទើបបានជ្រើសរើសហើយ៖
သဓဳဖဳး 1: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
