LUKA 20
20
Zingsuv Nawhnyina
(Mat 21.23-27; Mar 11.27-33)
1Ning kha ca Zingsuv ta Biena-ing chunglie cawsaa kha pacuv yi te thuophaa a ri nguoluo ning kha, tluobyi lepa tie, phungbie saya tie hne uvthyi tie kha a vaw yi te, 2“Malie chang tie, hingpa hmang zaw hing khaapa nawhnyina tama na tue? Ahungma hingpa nawhnyina hing caa pi?” ama ta. 3Zingsuv ta, “Kama zaw bie suokha ca hiehriy'a yi angte na chang tie ung: 4Johan tiynawna hing vuoruo taata ma, acuolikie cawsaapa'a taata ma?” a ta yi. 5Iema'a na iema kha a rue pakhaw yi te, “'Vuoruo taata,’ ta se pala, ‘Khaapanakawma nama zang va?’ malie a ta aa. 6‘Cawsaapa'a taata,’ ta se pala, cawsa bangkhuo ta alung ta malie ama vaa aa; tahematapakieca iema ta Johan ca profet ta pata ama zang,” amaa ta. 7Caacuonakawta, khaapa taata ma aa vaw tapa pachang vapuv, ama ta. 8Zingsuv ta iema kha, “Kama zaw khaapa nawhnyina tama hingpa hmang zaw hing i tue tapa kha ca chang ra'a va yi ang,” a ta yi.
Rehrietuv Pha Lipa Tie Pakhingpuona
(Mat 21.33-46; Mar 12.1-12)
9 #
Isa 5.1
Zingsuv ta cawsaa kha hingpa pakhingpuona hing a chang yi: “Cawsaa pakha ta mingsuv diedung tue te, rehrietuv tie kha pahlie yi te cuo pasiypuv chung ruo hrang luo khy a tlaw. 10Mingsuv lu tiy aa de tiyta, rehrietuv tie'a luo kha a cuvu la riypata a sii pakha a pathlie. Cuorasala rehrietuv tie ta ama kha tuv yi te a kuv cahri pata ama pathlie. 11Cakhutaata a sii hrangpa pakha kha a pathlie; capa paa zaw ca rehrietuv tie ta tuv yi te nangzaahmiechi pata ama tue khutaata a kuv cahri pata ama pathlie. 12Cakhutaata a sii pathungnapa kha a pathlie ngiethie; rehrietuv tie ca ta capa paa zaw ca hmaa a phyana te ta tuv yi te khungthing luo ama thaw. 13Cakhutaata mingsuv diedung a hnyituvpa ca ta, ‘Tuokhaatama i tue aa? I duepa i sacapaa hingna i pathlie aa, ama hing ca ama hmiezaa ngiethie aa,’ a ta. 14Cuorasala rehrietuv tie ta ama kha ama hmung tiyta, pakha hne pakha kha, ‘Ama hingna a rucutuv ta a cuo; thie'a ung puv, cakiedyina a ru hing kiema huopa ta a cuo aa,’ amaa ta. 15Caacuonakawta diedung khungthing luo kha thaw yi te ama thie. Cakhutaata mingsuv diedung a hnyituvpa ta rehrietuv tie kha tuokhaa tana a tue thlu'a mang yi nama ta ma? 16A vaw'a te capa rehrietuv tie ca thie'a yi te diedung kha a hrangpa tie a pi'a yi,” a ta. Capa ca ama thyi tiyta, “Cuo hrue thi khah se!” ama ta. 17#Slm 118.22 Cuorasala Zingsuv ta iema kha mang yi te, A cuo kie, “Caapathe chunglieta:
‘Ing satuv tie ta ama thawpa alung ca,
ingkiylung tana aa li,'
a tapa hing a siyluo khaapatama a cuo?
18Ahunghmuo cuose hingpa alung cunglie a tlapa ca kyipatlaa'a yi te capa alung ta a tlasuepa tie ca ama zapatlaa diy aa,” a ta.
19Phungbie saya tie hne tluobyi lepa tie ta kiema na malie a tapake tapa kha ama pachang tiyta, Zingsuv kha patuv paluopa ama khing, cuorasala cawsaa kha ama ciy.
Ngukhyi Pina Kaw Biehiehriyna
(Mat 22.15-22; Mar 12.13-17)
20Caacuonakawta ama kha mangpathliy yi te a bie mamaapa ta kalaa khu riypa hne naw a hnyituv muokiy byi kuv chung luo kha bie ripa riypata phakhyi khuna riypata cawsaa phapa haata a pa-aw sapa ngiepatlietuv tie kha ama pathlie. 21Iema ca ta Zingsuv kha, “Saya, na ripa hne na pacuvna hing aa hmuo ta pata ma pachang, cawsaa pahlyipale vaciy, biehmisipa haata Khazing khingna kha na pacuv yi. 22Rom siepahruo'a luo ngukhyi pipa hing ma phungbie ta a pa-aw ma, a thlu ma?” ama ta. 23Cuorasala Zingsuv ta ama zyatena kha a pachang nakawta, 24“Ngu tuokaa phiekha na pahmung tie ung. Ahung hmiechang hne ahung ming ma a taa?” a ta yi. Iema ta, “Siepahruo hmiechang hne siepahruo ming,” ama ta. 25Zingsuv ta, “Caacuokieca siepahruo huopa ca siepahruo kha pi ung la Khazing huopa ca Khazing kha pi tie ung,” a ta yi. 26Cahaacata cawsaazaapuv hmielie kha a bie ripa ta patuv khu va yi; bie a paliepa yi kha ama nang ta uo te a dieta tah ama aw.
Thiyna Taata Thupakhaana Kaw Biehiehriyna
(Mat 22.23-33; Mar 12.18-27)
27 #
Lct 23.8
Thiyna taata thupakhaana aw vyi a tapa Sadusi ming chekha ca Zingsuv'a luo kha a vaw yi te bie ama hiehriy. 28#Pbp 25.5 “Saya, Moses ta malie a capepa siypa ca, cawsaa pakha ta saata hnyi li pata a napuv kha a thiyse biephung kieca, nunghlyinung kha a uvnu pakha ta a hlaw'a te a thiypa a uvnu cuo khata saata ama sapa aa. 29Uvnu pasariy aw yi te, a pakhanapa paa ca napuv chiy te saata hnyi li pata a thiy. 30Cakhutaata a pahningnapa paa hne 31a pathungnapa paa ta a hlaw yi te, cahaacata ama pasariy yalya ta saata sa li pata ama thiy diy. 32A hnangcaw ce ta cawsaanung zaw ca a thiy ra. 33Caacuonakawta thupakhaana ning thueta capa cawsaanung ca ahung napuv tama a cuo aa? Tahematapakieca ama pasariy ta ama kha amaa zaa hlaw kaluo,” ama ta.
34Zingsuv ta iema kha, “Ata chuo capaa hne canung ca amaa chiy amaa hie; 35cuorasala a vaw riypa chuo lieta hring riypata aa tla tapa tie hne thiyna taata pathu pakhaapa tie ca a chiy a hie'a va tli yi. 36Iema ca thiy khu'a va tli yi, tahematapakieca avuoming haata cuo'a yi te thupakhaana saata ama cuo nakawta Khazing saata tana ama cuo aa. 37#Pya 3.6 A kuo nguoluopa ruohraw kaw a capepa lieta Abyipa kha ‘Abraham Khazing, Isak Khazing, hne Jakob Khazing ta te Moses ta a ripa kha a thiypa tie ca hringna luo pathu pakhaa pata na ama cuo tapa kha a paluo sapa tana a cuo, a ta. 38Ama ca a hringpa tie Khazing ta cuo te a thiypa tie Khazing ta cuo vyi; tahematapakieca cawsaa bangkhuo ca ama'a lie a hringpa selaw tana ama cuo,” a ta. 39Phungbie saya tie chekha ta, “Saya, na bieripa ca a pha ciemuo!” ama ta. 40Tahematapakieca ama kha bie hiehriy vie nguo va tli yi.
David Sacapaa Kaw Biehiehriyna
(Mat 22.41-46; Mar 12.35-37)
41Cakhutaata Zingsuv ta iema kha, “Tuokhaatama Messiah#20.41 Khrih ca David sacapaa tana a cuo, ama ta the? 42#Slm 110.1 David hrahring ta Salm caa-uv chunglie,
“Abyipa ta i Byipaapa kha,
43‘Na carie tie kha na phyipazaa rawlie
chaapuo riypata i tue hluo li yi,
i cacuoluo kuo hingta a tu tie, a tapa kha,’ a ta.
44David ta Abyipa a ta kieca tuokhaatama Messiah ca ama sacapaa ta a cuo the aa?” a ta.
Phungbie Saya Tie Kha A Raaringna A Pi Yi
(Mat 23.1-36; Mar 12.38-40)
45Cawsaa bangkhuo thyi pata ziytuv tie kha, 46“Phungbie saya tie kha a raaring tie ung, iema ca buohryi pasiypa a hryi pata a khiele khingpa, chadawtluo lieta cawsaa ta pa-uvsathyina hne bie amaa chang riypa kha a tlechuopa, hne apungna-ing thude pha cepa lie hne pyi chunglie pa-uvsathyina hmang lieta a tupa kha a tlechuopa tana ama cuo; 47Nunghlyi tie ing kha chuv yi te mang aa ngiena riypata a pasiysa ta thlaa ama chuo. A ruv viepa duotena na ama ang aa,” a ta.
ទើបបានជ្រើសរើសហើយ៖
LUKA 20: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
