LUKA 19
19
Zingsuv Hne Zakie
1Zingsuv ca Jeriko khychung kha cahraw te a sile. 2Capa lie ca ngukhyituv byi lepa, a hnyirungsapa Zakie ama tapa kha a aw. 3Zingsuv kha ahungma ta pata hmung aa zue, cuorasala ama ca cawsaa dang pachangpa ta cuo te cawsaazaapuv ta ama pakhuo nakawta hmung khu vyi. 4Caacuonakawta cawsaazaapuv hmieluo kha a ruo te Zingsuv hmung riypata saikamor kung kha a kie. 5Zingsuv ta capa hmang luo a vya chiy tiyta kya angchiy te, “Zakie, a catli pata za cung tie, tahematapakieca ataning hing na ing liena ica tlung aa,” a ta. 6Caacuonakawta a catli pata za cung te alawna hneta Zingsuv kha a ing lie ca aa patlung sa. 7A hmungpa bangkhuo ca a cie patlaw yi te, “Hingpa paa hing a suepa ing lie tlung riypa tana a vaa,” ama ta. 8Zakie ta a daa te Abyipa kyihuo khata, “Mang tie, Abyipa, i hnyipa khingkhuo hing a siypasapa tie na i pi'a yi; cawsaa pakha hmung riypa kha dung angte i la pathlyi kieca, le paliy ta i pi pakhaa'a yi,” a ta. 9Cakhutaata Zingsuv ta, “Ataning hingpa ing lie hing khuona a tlung mangtli, tahematapakieca hingpa paa zaw hing Abraham sacapaa tana a cuo ra. 10#Mat 18.11 Cawsaa Sacapaa ca a viepa huv riypa hne khuo riypa tana aa vaw,” a ta.
Tuokaa Pakhingpuona
(Mat 25.14-30)
11 #
Mat 25.14-30
Capa bie ama naathlie nguoluo ning kha, Zingsuv ta pazue te pakhingpuona suokha a chang yi, tahematapakieca ama ca Jerusalem kha pha'a nang tli te Khazing pena ca a vya tlung paluo'a tli ta pata ama rue. 12Caacuonakawta ama ta, “Byi pakha ca ruo luohlaapuv luo kha si pata siepahruo a cuo khutaata ing luo vya kaa riypata aa ting. 13A sii pahraa kha ku yi te pound#19.13 Hingpa lie pound phiehraa a tapa mina phiehraa ca kuliy re a hriepa pakha thla thung thavie hne aa khingpa tana a cuo phiehraa a pi khutaa yi ta, ‘I vya kaa hluo li sung za pali tie ung,’ a ta yi. 14Cuorasala a ruo ming khata ama kha hue yi te, ‘Hingpa paa hingta malie a uv riypa khing vapuv,’ ta pata biephyatuv kha ama pathlie.
15Capa paa ca siepahruo ta a cuo khutaata a vya kaa. Tuokaa a pipa a sii tie kha sung palina taata khazaa ma ama hmung tapa a pachang khing nakawta a paku sa yi. 16A pakhanapa paa kha hmieluo vya pya te, ‘Abyipa ina pipa ciy tuokaa pound suohraa khata amie tuokaa pound suohraa i hmung,’ a ta. 17Ama ta, ‘A pha, sii phapa tana na cuo! Hmang cawta kawlie zang tluo aa tlapa na cuo nakawta khypuv khy hraa kha uv tie,’ a ta. 18A pahningnapa paa kha a vaw te, ‘Abyipa, na tuokaa kha tana a mie tuokaa pound suopangaa i hmung,’ a ta. 19Capa paa kyihuo cata, ‘Nama zaw khypuv khy pangaa uv tie,’ a ta.
20Cakhutaata, a hrangpa pakha kha a vaw te, ‘Abyipa, na tuokaa ca hingpa lie hing na a aw; pavya ta cataw angte na i chi, 21tahematapakieca nama ca cawsaa tateta-iepa ta na cuo; na huopa a cuo lipa kha la cate ciy na cyi lina lie sa a hriepa na cuo nakawta ica ciy,’ a ta. 22Ama ta, ‘Sii chiepa, na bie mamaapa tana na bie ica ripa aa. A tateta-iepa i cuopa hne i huopa a cuo lipa kha la angte, ciy i cyi lina lie sa i hriepa zaw kha ina pachang ciy cuo va ma? 23Caacuokieca, khaapanakawma i tuokaa hing bank lie chi li pata na aw? Cahaacata za chi la ca i vya kaa tiyta i tuokaa kha amie hneta i hmung riypata a cuo,’ a ta.
24A thaalie a daapa tie kha, ‘Tuokaa kha ama'a taa hingta la ung la tuokaa pound suohraa a hnyipa paa kha pi tie ung,’ a ta yi. 25(Iema ta, ‘Abyipa ama ca tuokaa pound suohraa a hnyi tlipa kha!’ ama ta.) 26#Mat 13.12; Mar 4.25; Luk 8.18 Ama ta, ‘Ica chang yi, A hnyipa tie bangkhuo kha a hluv vie ta pipa cuo'a yi te, cuorasala khaapahmuo a hnyi lipa tie kha ama hnyi tlakuopa kha hmuo lapa pata ama cuo aa. 27Cuorasala ama siepahruo cuo riypata naa khing lipa i carie tie kha hingpa luo hing a vawkhyi ung la i hmielie hing thie tie ung,’” a ta.
Zingsuv Rungnaasa Pata Jerusalem Luo Aa Ngie
(Mat 21.1-11; Mar 11.1-11; Jhn 12.12-19)
28Zingsuv ca hingpa bie a ri khutaata ama hmieluo ta Jerusalem luo kha a si.
29Olif tluo ama tapa hmang, Bethfeih hne Bethani khy athaa luo ama phapa khata, a ziytuv pahning kha hmieluo pathlielu yi te, 30“Nama hmieluo lie a awpa khy luo kha vaa ung la, khy chung luo nama vaa ngiepa khata amaa khang buo li liepa laataata aa hre thluopa kha nama hmung aa. Pathluo ung la hingpa luo hing a vya chiy tie ung. 31Pakhakha ta, ‘Khaapanakawma nama pathluo,’ aca ta kie yi ca, ‘Abyipa na a hu,’ nama ta aa,” a ta yi. 32Caacuonakawta a pathliepa tie ca si yi te a changpa haa yi khata ama va hmung. 33Laataata kha ama pathluo nguoluo pata, a ziy a cuopa tie ta iema kha, “Khaapanakawma nama pathluo?” ama ta. 34Iema ta, “Abyipa na a hu,” ama ta. 35Cakhutaata Zingsuv'a luo kha a vya chiyle yi te, ama pang kha a ke lie ama padie khutaata Zingsuv ca ama pakhang sa. 36Laa aa khanglenapa luopuv lie kha cawsaa ta ama pang kha ama phaale. 37Olif Tluo taata za cungbungnapa luopuv a va pha'a nangcaw khata a ziytuv cawsaa bangkhuo ca ama hmungpa, a tuepa kharuehaa hmang kawlie khata Khazing ama pathuosa, palungtluona hne khuopuv ta khi yi te,
38 #
Slm 118.26
“Abyipa ming ta a vawpa ca
thluechiypa tana a cuo!
Vuoruo lie thlaalungna aw sala,
aa suo cepa vuoruo lie khiy
rungnaana aw mang sue!” ama ta.
39Cawsaazaapuv hraw taata Farasi tie chekha ta Zingsuv kha, “Saya, caa ziytuv tie hing padie sa tie yi,” ama ta. 40Zingsuv ta, “Ica chang yi, iema hing ama die kieca alung zaw hingna a khi'a yi,” a ta.
Zingsuv Ta Jerusalem A Caa
41Khypuv ca vaa ngie hryly te a hmung tiyta caa te, 42“Ataning diena cuota tuepa hmang hing pachang the la ca! Cuorasala capa hmang zaw ca na ming hmungna taata nu pata ama cuo. 43Na carie tie ta aca cadung diyna te ta riekhuocaaca kha ca sasue'a yi te aca khaakhuona cuo hne a kuo bangkhuo taata aca vya cadena yi cuo ca aa vaw aa. 44Khazing ta aca vya pariena cuo kha pachang li pata naa pa-aw sa nakawta, nama hne na saata zaw kha alyi hne ca cariepuo'a yi te naa lung zaw suokha cunglie a hrangpa suokha hmuo aa pacangcang pata thuse'a va yi,” a ta.
Zingsuv Ta Biena-ing A Pathe
(Mat 21.12-17; Mar 11.15-19; Jhn 2.13-22)
45Cakhutaata Zingsuv ca Biena-ing chung luo kha a ngie te chechiy a zaapa tie kha aa cade diy yi. 46#Isa 56.7; Jer 7.11 Cakhutaata, “Caapathe chunglieta,
‘Kama ing ca thlaachuona ing tana a cuo aa,’ a ta;
cuorasala niema ta aparuvpa tie
a chuona hmang ta nama tue,” a ta yi.
47 #
Luk 21.37
Zingsuv ca ningting ta biena-ing lie kha a pacuv yi. Tluobyi lepa tie, phungbie saya tie hne uvthyi tie ta ama thiena riypa luo kha ama huv byalya; 48cuorasala cawsaa bangkhuo ta a bie suokha hmuo pahlyi khing lipa yi ta ama naathlie nakawta thie khuna luopuv hmung va yi.
ទើបបានជ្រើសរើសហើយ៖
LUKA 19: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
