LUKA 2
2
Zingsuv Puvna Kaw
(Mat 1.18-25)
1Capa cuo ning ca Siepahruo Awkastas ta Rom uvna ruo chung bangkhuo lie cawsaa mingluv ri riypata naw a papya. 2Capa mingluv rina ca a yikhanapa mingluv rina ta cuo te Kuirinias kha Siria ruo uvtuv a cuo ningta a cuo. 3Cawsaa bangkhuo ca mingluv rina lie ming khung riypata ama khy cyicuo luo kha ama si. 4Josef zaw Galilee pe Nazareth khy taata Siepahruo David khypuv, Judea pe Bethlehem khy luo kha a si. Tahematapakieca ama ca David ciypathla ta a cuo nakawta a cuo. 5A pahaa ciepa hne nu hnyi riypata a mangkhuo nguoluopa Mary hne khata mingluv rina lie ming khung riypata ama si. 6Bethlehem lie ama aw ning khata nu aw tiy a ta. 7Sahrangta, sacapaata ca sa te pang ta a pahlaw khutaata cue hraky chunglie kha a pazie, tahematapakieca khyche banglaa lie kha iema cuota hmang aw va tli.
Tuvkhietuv Tie Hne Avuoming
8Capa hrawlie ca, ruo chunglie kha zuo ta ama tuvrung mangchiy yi te ruo lie a ripa tuvkhietuv tie ama aw. 9Abyipa avuoming pakha iema'a lie kha a luo te, Abyipa rungnaana ca ama cahriylie a za khe nakawta ama ciy hringhruo. 10Cuorasala avuoming ta iema kha, “Ciy khah ung; cawsaa bangkhuo cuota palungtluona lepuv a cuopa thuophaa na ica za phya yi: 11Ataning hing David khy chunglie niema caa khuotuv Abyipa Messiah#2.11 Khrih ca a puv tli! 12Hingpa hing niema cuota pamangsana ta a cuo aa: Haaseta pakha ca pang ta pahlaw'a yi te cue hraky chunglie ama paziepa kha nama hmung aa,” a ta. 13Sungkhabala ta vuoruo riekaphuv lepuv ca avuoming hneta zaa luo yi te Khazing kha hlaa ta ama pathuosa.
14“Aa suo cepa vuoruo lie khiy
Khazing ca pathuosa pata cuo mang sue;
A duepa zaw awnapa alyi lie hing
thlaalungna aw mang sue!” ama ta.
15Avuoming ta thuse yi te vuoruo luo ama kaa tiyta, tuvkhietuv tie ca pakha hne pakha kha, “Bethlehem luo kha vaa ung sala, hing a cuo nguoluopa hmang, Abyipa ta malie a changpa hing va mang'a ung puv,” amaa ta. 16Caacuonakawta si pahraa yi te Mary hne Josef hne cue hraky lie ama pathlingpa haaseta kha ama va hmung. 17Ama hmung tiyta, haaseta kaw avuoming ta a ripa kha iema ca ama chang. 18Tuvkhietuv tie ta ama ripa a thyipa bangkhuo ca ama kharue a haasa. 19Cuorasala Mary ca capa bie bangkhuo kha a palung chunglie khung te a rue syalya pari. 20Tuvkhietuv tie ca kaa yi te, avuoming ta ama changpa dala haata ama hmungpa hne ama thyipa kawlie kha Khazing ca ama pathuosa.
Zingsuv Ca Ming Ama Paphya
21 #
Tbr 12.3;
Luk 1.31
Ning cari khutaata, haaseta vangdaw te tiy a ta ning kha, a nung ta a phya hluo taata avuoming ta ama za ri ciepa ming, Zingsuv tapa kha ama paphya.
Zingsuv Biena-ing Luo Ama Chiykhyi
22 #
Tbr 12.6-8
Moses phungbie haata a pathesana cuo kha a vya tling tiyta, haatiypa ca Abyipa hmiekung luo chiykhyi riypata Jerusalem luo kha ama sikhyi. 23#Pya 13.2,12 (Abyipa phungbie caa-uv chunglie, “Nama sahrang, capaasaata bangkhuo kha Abyipa'a luo na nama pi aa”), ta pata aa cape. 24Abyipa phungbie lie a ripa haata, thuvruv sahning acuolikie valale sahning ta hriykhung a rina tue riypata ama sipa ta a cuo.
25Khapa cuo ning kha cawsaa pakha, a ming Simeon ama tapa kha Jerusalem khy lie a za aw. Ama ca cawsaa aa dangpa, Khazing a ciyzaapa, Israel ming khuona hmung riypa cuo kha a huo nguoluopa cuo te, Thlaapa Pathe ta a awpuopa ta a cuo. 26Thlaapa Pathe ta Abyipa Messiah na hmung hluo li thiy'a vaciy a ta. 27Thlaapa ta a chiy te Simeon ca Biena-ing chung luo kha aa ngie. Phungbie haata tuepa riypata a nung hne a paa ta Zingsuv kha Biena-ing luo amaa ngiekhyi ca, 28Simeon ta haatiypa ca a paw te Khazing kha a pathuosa,
29“Abyipa, ataning hing na changtaapa#2.29 Gk sii ca
na biekuona haata,
hnaanguota tah i hringna na pakhung sa tli,
30tahematapakieca i ming ta
na khuona kha i hmung tli.
31Mingphang bangkhuo hmiekunglie
na tingtuopa khuona ca,
32 #
Isa 42.6; 49.6; 52.10 Jentail ming bangkhuo cuota
na khingna a paluosatuv khena hne
na cawsaa Israel ming rungnaana
a phyatuv tana a cuo,” a ta.
33A nung hne a paa ca haatiypa kaw a ripa kha ama thyi tiyta ama kharue a haa hringhruo. 34Cakhutaata Simeon ta thluechiy pi yi te a nung Mary kyihuo khata, “Hingpa haatiypa hing Israel ming chunglie a hluvpuv a maa liena riypa hne ama thuna riypata Khazing ta lieriy a uopuopa tana a cuo. Ama ca Khazing'a taata a zuvpa pahmungsana hne 35cawsaa hluvpuv ta ama palung chunglie ama ruepa aa luona riypata a cuo aa, cakhutaata zueziy ta na palung kha aca daw aa,” a ta.
36Capa ning ca Asher phang Fanuel sacanung, profet nung Anna zaw kha a za aw ra. Ama ca nungpuvsa tli te, a navaapa hne amaa hlaw khutaata kung sariy chung dyi khy za sahne yi te, 37kung sawcari kung paliy te a nunghlyi pata a cuo. Biena-ing kha thuse buo li pata chung hne zuo ta Khazing kha abie te sa uv te thlaa a chuo. 38Capa cuota ning caci cata vya chiy te, Khazing kha pathuosa te Khazing ta Jerusalem aa thla riypa a huopa tie bangkhuo'a lie kha haatiypa kaw ca a ri.
Nazareth Luo Ama Kaa
39 #
Mat 2.23
Abyipa phungbie ta tue riypa a tapa bangkhuo kha ama patlung khutaata Galilee pe, ama khy Nazareth luo kha ama kaa. 40Haatiy ca kya lethaw te a kya cahra; singna hne bi te Khazing'a taata hmiephaa a hmung.
Biena-ing Chunglie Haatiy Zingsuv
41 #
Pya 12.1-27; Pbp 16.1-8 A nung hne a paa ca kung tating ta Lawsena Pyi ning kha Jerusalem luo ama tlaw taw. 42Zingsuv kung hraa hlyihning a ta ning kha ama tue tawpa haata pyi luo ca ama tlaw pakhaa. 43Pyi kha chuo te ing luo ama kaa tiyta, haatiypa Zingsuv ca Jerusalem lie a ngaa siy te a nung hne a paa ta pachang va yi. 44Zaapuv hrawlie na a kya si rale ta pata ama rue nakawta ning kha chung ama kya si. Cakhutaa dyi cata ama tieriy hne ama viesaa hrawlie kha ama huv. 45Ama hmung li taata ama kha huv riypata Jerusalem luo ama kaa. 46Ning thung khutaata Biena-ing chunglie ama hmung. Pacuvtuv tie hrawlie kha a tu te ama bie kha naathlie te bie zaw a za hiehriy nguoluo yi. 47A bie a thyipa bangkhuo ca a singzya hne bie a paliezya yi kha ama nang ta a uosa. 48A nung hne a paa ca ama hmung tiyta ama nang ta uosa te, a nung ta, “I saa, khaapanakawma hing haa hingta malie na tue? Mang tie, na paa hne kama ca ma palung rie thyisa pata muo maca huv ta,” a ta. 49Ama ta iema kyihuo khata, “Khaapanakawma ina huv ung ciy? I Paa ing lie ca i aw riypata a cuopa kha pachang va ung ca ma?” a ta yi. 50Cuorasala khaapama a ri tapa kha pachang va yi. 51Cakhutaata Zingsuv ca iema hne khata Nazareth luo za kaa te ama ri a ngiesa pata a aw. A nung ca hing hmang bangkhuo hing a palung chunglie a pari diy.
52 #
1Sam 2.26; Ptb 3.4 Zingsuv ca singna hne lethawle te Khazing hne cawsaa hmielie kha hmiephaa a hmung.
ទើបបានជ្រើសរើសហើយ៖
LUKA 2: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
