LUKA 17
17
Zingsuv Bie Chekha
(Mat 18.6-7,21-22; Mar 9.42)
1Zingsuv ta a ziytuv tie kyihuo khata, “A pachiyna cuo hing a aw pari aa, cuorasala capa hmang a pacuosatuv ca bawchie ciemuopa tana a cuo. 2Hingpa haatiyta zaw pakhakha hing luo a papie sapa ca nama rue lie sacuo rienapa alungtung pathlie pata riyliy luo thaw pata cuo sala nama cuota a pha vie aa. 3#Mat 18.15 A raaring tie ung! Na uvnu kha a sue kieca pasiypa-ya tie, aa ngiepachiy kieca a ngiethe tie. 4Capa cawsaa ca ning kha ta na cunglie yi sariy sue sala, a yi sariy ta nama'a luo kha a vaw te, ‘I ngiepachiy,’ aca ta kieca a ngiethe tie,” a ta.
5Ziytuv tie ta Abyipa kha, “Ma zangna hing pale sa vie tie,” ama ta. 6Abyipa ta, “Uotuo hmung tie zangna nama hnyi kieca, hingpa puvlung kung hing, ‘A kya phie la riyliy lie hue vaa caby tie,’ ta ung la nama ri acaa ngie'a yi.
7“Niema hrawlie hing ahungma le thawna taata, acuolikie tuvkhiena taata atabala lie a vya chiypa nama sii kha, ‘Luo hing a vaw paluo la cabya lie a vya tu tie,’ a ta'a ung ciy? 8‘Zuosa kha vya pachie la, buohryi pasiypa kha a hryi la, sa i ning chung hne i dang chung kha na mangchiy la, cakhutaa cata ning la dang tie,’ ta'a va ung ca ma? 9Sii ca na changpa kha a tue nakawta alawna bie na hluo ma? 10Niema zaw cahaaca tana nama cuo ra, tue riypata aca changpa yi nama tue diy tiyta, ‘Kiema ca dutle lipa sii tana ma cuo; ma tue riypata a cuopa dyi khana ma tue,’ ta tie ung,” a ta.
Zingsuv Ta Caahminghmaa A Phyapa Pahraa A Patluo Sa Yi
11Zingsuv ca Jerusalem luo a si ning kha, Samaria hne Galilee alalalie khata a ziyle. 12Khy khy kha luo kha aa ngie ca caahminghmaa#17.12 Caahminghmaa tapa biesuo hing pasana phangphang tana zaw a cuo khu a phyapa cawsaa pahraa ta amaa vya taw. 13Luohlaa puo lie kha a daa yi te, “Zingsuv, Abyipa, malie ngiechi thi tie,” ta pata ama khi. 14#Tbr 14.1-32 Zingsuv ta iema kha a hmung tiy yi ta, “Cakuo ung la tluobyi tie kha vaa pamang sa tie ung,” a ta yi. Ama vaale pata ama pathe. 15Iema hrawlie pakha ta a tluopa kha aa hmung tiyta, kaa te Khazing kha ueryi paringsa pata a pathuosa. 16Zingsuv phyi thabaw lie kha a bu te Zingsuv kha alawna bie a hluo. Ama ca Samaria ming ta a cuo. 17Zingsuv ta, “Pahraa patluo sa pata cuo va yi ma? A hrangpa pacaky tie haw khaapaliema ama aw? 18Hingpa ruohrangpa paa hing ta li pata pakha hmuo vya kaa pata Khazing pathuosa vade yi?” a ta. 19Cakhutaata Zingsuv ta, “Thu la cakuo tie; na zangnapa na caa patluo sa,” a ta.
Khazing Pena Aa Vawna Kaw
(Mat 24.23-28,37-41)
20Luo kha ca Farasi tie ta Zingsuv kha khatiythuema Khazing pena ca a tlung aa ta pata ama hiehriy. Ama ta, “Khazing pena ca ming ta hmung khupa phang ta vya tlung'a vyi. 21Ahungtahmuo, ‘Mang tie, hingpa lie hing na a aw! acuolikie, ‘Huepa lie hue na a aw!’ ta'a va yi; hmisi ta ripa kieca, Khazing pena ca niema chungliena a aw,” a ta yi.
22Cakhutaata a ziytuv tie kha, “Niema ta cawsaa sacapaa ningcuo ning kha chuo nama hmung khing hringhruo raalaa pata nama hmung khu lina cuo kha aa vaw nguoluo. 23Niema kha, “Mang tie ung, huepa lie hue a aw hue! acuolikie, hingpa lie hing a aw hing!’ aca ta'a yi. Pya pata vaa lie ung ciy. 24Thinghlaa ca avuo kiy kha taata kiy kha te a khepahlipa haa kha tana Cawsaa Sacapaa ca ama ning thueta ca a cuo aa. 25Cuorasala a suokhana ta ama ca khuosa ta te-ang taa'a te ata chuo cawsaa tie hingta ama thaw taa aa. 26#Sah 6.5-8 Noah chuo ning haa khata Cawsaa Sacapaa chuo ning zaw kha a cuo ra aa. 27#Sah 7.6-24 Noah kha tiypalaw chung luo aa ngiena te ta, cawsaa zaw ca ning yi dang yi te, canung hne capaa zaw amaa chiy amaa hie. Cakhutaata tiypa-aa ca tlung te iema bangkhuo kha a para diy yi. 28#Sah 18.20—19.25 Cahaacata, Lot chuo ning zaw a cuo ra; ning yi dang yi te, zaa yi te ama calyi, ciy cyi yi te ing ama sa. 29Cuorasala Lot ta Sodom a pyase ning kha vuoruo taata myi hne ke kha khy saa ta za saa te ama palang ta a thie diy yi. 30Cawsaa Sacapaa aa luo thue ca cahaaca tana a cuo ra aa. 31#Mat 24.17-18; Mar 13.15-16 Capa ning thueta ca ing thlungkhuv cunglie a awpa ta ing chunglie a awpa chechiy la riypata cung khah se; cahaacata lu lie a awpa ta ing luo kaa khah se. 32#Sah 19.26 Lot napuvnung kha a thyi tie ung! 33#Mat 10.39; 16.25; Mar 8.35; Luk 9.24; Jhn 12.25 A hringna aa bangpa a khingpa tie ca ama hringna kha a sung'a yi te, a hringna a sungpa tie ca hringna kha ama hmung aa. 34Ica chang yi, capa zuo ningta ca iehmang suokha lie a ziehnepa cawsaa pahning lie kha pakha ca la pata cuo'a te, pakha ca thuse pata a cuo aa. 35Sung a suv hnepa canung pahning lie kha pakha ca la pata cuo'a te a hrangpa pakha ca thuse pata a cuo aa,” a ta. 36(“Lu lie a awpa cawsaa pahning lie kha pakha ca la pata cuo'a te pakha ca thuse pata a cuo aa,”)#17.36 Kuvtie caataw chekha tie lie ca tluo 36 hing aw vyi a ta. 37Cakhutaata, ama kha “Abyipa, Khaapaliema?” ta pata ama hiehriy. Zingsuv ta, “Saa thiypa a awna lie kha luotaa ta amaa hmyasuele aa” a ta.
ទើបបានជ្រើសរើសហើយ៖
LUKA 17: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
