LUKA 16
16
A Zyatepa Chechiy Tluotlatuv
1Cakhutaata Zingsuv ta ziytuv tie kha, “A hnyirungpa pakha za aw te tluotlatuv pakha a hnyi. Capa tluotlatuv cana na tuokaa kha a cuo lipa lie a hmuo ta pata ama chang. 2Caacuonakawta ama ca ku te, ‘Na kaw i thyipa hing tuokhaatama a cuo? Na rehriena cazing kha a tlingsa pata na pi tie, tahematapakieca nama ca i tluotlatuv cuo khu'a va tli ciy,’ a ta. 3Tluotlatuv ca ta ama hne ama kha, ‘Tuokhaatama i tue aa? I byipaapa ta i re taata ina papya'a tli. Alyi ta i chie khu'a va, malie a hie chaw riypa cata i nang a zaa. 4Tluotlatuv taata ina papya tiyta cawsaa ta ama ing lie ina pa-aw sa khing riypa yi ta khaapama i tue aa tapa kha bie i chi na a hu,’ a ta. 5Caacuonakawta a byipaapa'a lie lyibuo a awkhyipa tie kha pakha hnang pakha ta ku yi te, a pakhanapa paa kha, ‘I byipaapa kha khazaa ma naa uo?’ a ta. 6Ama ta, ‘Olif chiytiy pung zakha,’ ta pata a palie. Tluotlatuv ca ta, ‘Na cazing kha va la, a catlisa pata a tu la sawngaa ta pare tie,’ a ta. 7Cakhutaata a hrangpa pakha kha, ‘Nama haw khazaa ma naa uo?’ a ta. ‘Jungsacuochuo tuo zakha,’ ta pata a palie. ‘Tluotlatuv ca ta, ‘Na cazing kha va la lah sawcari ta pare tie,’ a ta. 8Aa dang lipa tluotlatuv ca singvaasa pata hmang a tue nakawta a byipaapa ta a pathuosa; tahematapakieca ata chuo cawsaa zaw hing ama hmang tuenapa kawlie ca khena chunglie a awpa tie laata ama singvaa vie,” a ta. 9Caacuonakawta ica chang yi, chuelyi suethiy a chuo tiyta chuozaa ta aa hmangpa ing lie cuhluopa nama cuona riypata chuelyi suethiy hing hmuo ung la viesaa a tue tie ung.
10“Chechiy cawta lie zang tluo aa tlapa ca chechiy lepa lie zaw zang tluo aa tla ra; chechiy cawta kawlie zang tluo aa tla li kieca chechiy lepa kawlie zaw zang tluo a tla'a vyi. 11Chuelyi sue patungpatiena kawlieta zang tluo namaa tla li kieca tuokhaatama hnyirungna hmisi ca pi pata nama cuo khu aa? 12Malie chechiy cunglie hmuo zang tluo namaa tla li kieca tuokhaatama niema huo a cuopa chechiy ca aca pi khing'a yi. 13#Mat 6.24 Changtaapa pakha ca a byi pahning re kha hrie khu'a vyi; pakha kha hue'a te a hrangpa pakha kha a due aa, pakha'a lie kha zang tluo aa tlasa pata aw'a te pakha kha siysaa ri li pata a aw aa. Khazing re hne hnyirungna re kha hrie pakhe khu'a va ung ciy,” a ta yi.
Phungbie Hne Khazing Pena
(Mat 11.12-13; 5.31-32; Mar 10.11-12)
14Capa bangkhuo ca tuokaa a khingsapa Farasi tie ta ama thyi tiyta, Zingsuv kha ama pahnyisue. 15Caacuonakawta Zingsuv ta, “Niema hing malie minghmungna lie ca a dang hruo namaa cuo; cuorasala Khazing ta nama pathiypalung kha aca pachang yi; tahematapakieca cawsaa ta muosung ciemuo pata ama ruepa ca Khazing hmiekunglieta duvsamakhie aa chiypa tana a cuo.
16 #
Mat 11.12,13 “Moses phungbie hne profet tie capepa caa zaw ca tiynawtuv Johan chuo te cuo kha tana a cuo; capa cuo ning taa cata Khazing pena thuophaa ca phu pata cuo te, cawsaa ting ta pena chung luo kha amaa ngie chuv patlaw. 17#Mat 5.18 Cuorasala phungbie chunglie a caw cepa caasuo suokhata hmuo a viepa laata alyi hne avuo rapa na a na vie aa.
18 #
Mat 5.32; 1Kor 7.10,11 “Ahunghmuo a napuv kha ma te canung hrangpa hne a hlawpa ca nungvaathingsuena a tuepa tana a cuo; cahaacata a navaapa hne a chepa canung a hlawpa zaw nungvaathingsuena a tuepa tana a cuo.
A Hnyirungpa Paa Hne Lazaru Kaw
19“Luo kha ca a hnyirungpa cawsaa pakha aw te, a ciycaapa hne cawthang phapa cawsie muo ruvpa kha a tue te ningtating ta tuokaa a hluvsa pachuo pata pyi a tue taw. 20Lazaru ama tapa a siypasapa, a pangpa bangkhuo hmaa ta a buvpa paa ca 21a cabya taata a tlapa kha a haa'a angte i riy a bi aa tapa hnabiesyina hneta a hnyirungpa paa chiypakaa lie kha laa te, uv kha a vaw te a hmaa kha ama vya pali taw. 22“Siypasapa paa ca thiy te avuoming ta Abraham hne aw riypata ama sikhyi. A hnyirungpa paa zaw kha thiy te ama paby. 23Hell chunglie riethyina a ang nguoluo pata cungluo kha a kya mang ca luohlaapuv taata Abraham hne aa thaalieta#16.23 Gk cacunghnaa chunglie Lazaru kha a kya hmung yi. 24Khuosa ta u te, ‘I paa Abraham, ngie na chi thi tie. Lazaru kha za pathlie thi la a kuv daw kha tiy luo naw sala i palyi lie hing na za pathlasue se, tahematapakieca hingpa myi chunglie hing i rie na a thyituv tli,’ a ta. 25Cuorasala Abraham ta, ‘I sacapaa, na hring chunglie kha phana hmung tli cate, cahaacata Lazaru ta a pha lipa a cu. Cuorasala ata hing ca ama ca hingpa lie hing a nuosa pata aw te, nama ca ruvnaana na ang. 26Ca hlyitaw taata maa lalalie hing ryihue a thuvsapa aw te, hingpa taata namaa'a luo a vya chiy khingpa zaw vya chiy khu lipa yi ta, nama'a taata kiema'a luo zaw a vaw khu aw vyi,’ a ta. 27A hnyirungpa paa ta, ‘I paa, Lazaru kha i paa ing luo pathlie thi tie, 28tahematapakieca uvnu papangaa hnyi yi angte iema chuo, hingpa te-angna luo hing ama vya chiy ra li riypata a raaringna va pi thi yi se,’ a ta. 29Abraham ta, ‘Na uvnu zaw ta Moses hne profet tie ama hnyi; iema bie khana ama naathlie riypata a cuo,’ a ta. 30A hnyirungpa paa ca ta, ‘Cuo vyi, i paa Abraham; thiyna taata pakhakha ta iema'a luo kha a vaa kieca ama suena kha amaa ngiepachiy aa,’ a ta. 31Abraham ta, ‘Moses hne profet tie bie kha amaa ngie li kieca cawsaa pakhakha thiyna taata a thu pakhaa zaw ta zang hlyi'a va yi,’” a ta.
ទើបបានជ្រើសរើសហើយ៖
LUKA 16: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
