JOHAN 16
16
1“Namaa lie pathlyi li riypata hingpa bie hing ica chang yi. 2Apungna-ing taata aca papya'a yi. Niema caa thiepa tie ta ama tuepa hing Khazing re na i hrie ta pata ama ruena cuo a vya pha aa. 3I Paa cuose kama cuose malie ama pachang li nakawta hing haa hingta nama cunglie ama tue aa. 4Capa cuo ca a vya pha tiyta niema ta ica za chang pacie tlipa yi kha namaa thyi pakhaa riypata hingpa bie hing ica chang yi.
Thlaapa Pathe Rehriena
“Niema'a lie i za aw thluo nakaw khata hingpa bie hing a hruothu taata ca za chang va yi ang. 5Cuorasala ata hing ca naa pathlietuv'a luo kha i si'a tli; cuorasala ahungtahmuo, ‘Khaapa luo ma na si aa?’ ta pata na hiehriy va ung ciy. 6Cuorasala ica chang tiy yi ta nama ngie a chi hringhruo. 7Cadyiseca biehmisi tana ica chang yi: i sipa hing niema phana cuo tana a cuo, i si li kieca Byatuv#16.7 byatuv hing niema'a luo a vaw the'a vyi; cuorasala i si kieca, kama ta niema'a luo kha i za pathlie aa. 8Ama kha aa vaw tiyta, chuelyi ming'a lie kha suena kawlie, adangna kawlie hne bieripana kawlieta ama ruenazya aa hmuo lina kaw kha a siesa pata a pachang sa'a yi: 9suena kawlie ama ruenazya a hmuo vyi, tahematapakieca kama ina zang li nakaw yi ta a cuo. 10Adangna kawlie ama ruenazya a hmuo vyi, tahematapakieca Paa'a luo si'a angte ina hmung li tli'a nakaw yi ta a cuo. 11Bieripana kawlie ama ruenazya a hmuo vyi, tahematapakieca chuelyi uvtuv byi hing suebie ripa tlipa ta a cuo nakawta a cuo.
12“Niema ica chang riypa yi a hluvsa i hnyi kalie, cuorasala ata hingta ca a cake khu the'a va ung ciy. 13Biehmisipa Thlaapa aa vaw tiyta niema kha biehmisipa luo a caa chiy'a yi; ama ri ta khaapahmuo ri'a vyi, cuorasala a thyipa bangkhuo kha ri'a te a vaw riypa hmang kaw zaw kha niema'a lie a pathyi sa aa. 14Kama i ripa bie kha la'a te aca pathyi sa'a nakaw yi ta kama kha rungnaana ina pi aa. 15Paa hnyipa bangkhuo ca kama huopa tana ama cuo diy. Caacuonakawta kama i ripa bie kha la'a te na niema kha aca pathyi sa'a yi, i ta pata a cuo.
Ngiechina Ca Palungtluona Ta Aa Li Aa
16“Kha cuo a ta hluota kama kha na hmung'a va tli ung ciy, cuo pachangta khutaata ina hmung pakhaa'a ung ciy,” a ta. 17Cakhutaata ama a ziytuv tie chekha ta pakha hne pakha kha, “Kha cuo a ta hluota kama kha na hmung'a va tli ung ciy, cuo pachangta khutaata ina hmung pakhaa ung ciy, tahematapakieca Paa'a luo na i si aa,” a tapa hing khaapama a ri khingna ta a cuo aa amaa ta. 18Iema ta, “'Kha cuo a ta hluota,’ a tapa hing khaapama a ri khingpa a cuo aa? Khaapa kaw ma a ri tapa kha pachang vapuv,” amaa ta. 19Ama ama hiehriy khingpa kha Zingsuv ta pachang te, “Kha cuo a ta hluota kama kha na hmung'a va tli ung ciy, cuo pachangta khutaata ina hmung pakhaa ung ciy,” i ta tiyta khaapama i ri khing tapa khana namaa rue cuo va ma? 20Biehmisi tana ica chang yi, niema ca caa'a ung cate namaa ngiy aa, cuorasala chuelyi ca a palung a tluo aa; niema ca nama ngie chi'a te, cuorasala nama ngiechina ca palungtluona ta aa li aa. 21Canung ca nu a pazi tiyta pasana a ang, tahematapakieca a cuo a tling nakawta a cuo. Cuorasala nu a za aw tiyta, chuelyi luo nuta thaapa pakha a za puv nakawta a palung tluo te a te-angna bangkhuo ca a maw pakhaa diy. 22Caacuonakawta ata hing ca nama ngie a chi, cuorasala ca hmung pakhaa'a yi angte nama palung a tluo hringhruo aa, capa nama palungtluona ca ahungtahmuo ca chuv khu'a va yi. 23Capa ning thueta ca kama kha khaapahmuo na hiehriy'a va ung ciy. Biehmisi tana ica chang yi, Kama ming ta nama hiepa mekaa ca Paa ta aca pi'a yi. 24Ata tepa hingta ca i ming ta khaapahmuo hie va ung ciy. Hie ung la nama hmung aa; cahaacata nama palungtluona kha aa ky aa.
Ziytuv Tie Cuota Thlaalungna
25“Hingpa bangkhuo hing pahmungsana bie hmuo angte ica chang yi. Cuorasala i Paa kaw kha pahmungsana bie hmuo li pata siepaalaa khata ica changna yi cuo kha aa vaw aa. 26Capa ning a vya pha tiyta niema ta i ming ta nama hie aa. Niema cuopa tana kama ta Paa'a luo kha ica hiepa'a yi ica tapa yi ta cuo vyi. 27Kama kha na due ung cate Khazing'a taata#16.27 Kuvtie caataw chekha tie lie ca Paa'a taata a ta i vawpa kha nama zang nakawta Paa hrahring ta niema kha aca due yi. 28Kama ca Paa'a taata chuelyi luo hing i vaw; chuelyi taa hingta i Paa'a luo i kaa pakhaa aa,” a ta.
29A ziytuv tie ta, “A cuo, ata hing ca pahmungsana hmuo li pata a siesa pata malie na chang. 30Nama ca hmangting bangkhuo a pachangpa na cuopa kha pachang pate, ahungtahmuo khaapahmuo hiehriy a hu va tli ciy; capa ca ta Khazing'a taata a vawpa na cuopa kha malie a pazang sa,” ama ta. 31Zingsuv ta, “Ata ca i na zang ung ca ma? 32Nama palang ta ca chepatlaa diy'a yi te, nama ing cyicuo ta a diy'a ung cate kama dyi ta ina thusena ung ciy cuo kha a vaw nguoluo te ata hing a vya tlung tli. Cuorasala i Paa kha kama'a lie a aw nakawta kama dyi hmisi ta ca cuo va ang. 33Kama chunglie thlaalungna nama hmung the riypata hingpa bie hing ica chang yi. Chuelyi lie hing ca hrisaana nama ang aa. Cuorasala nama riepha se; chuelyi ca i te tli,” a ta.
ទើបបានជ្រើសរើសហើយ៖
JOHAN 16: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
