SAHRUOTHUNA 23
23
Sarah Thiyna Hne Pabyna
1Sarah ca kung zakha sawsariy hring te, 2Kiriath-arba (Hebron zaw ama tapa) khy lie kha a thiy. Abraham ta Sarah ca caa te a muochie a sa. 3Abraham ca a napuvnung riyy taa cata a kya daa te, Hit ming kyihuo khata, 4#Heb 11.9,13; Lct 7.16 Kama ca niema hrawlie khyche hne ruohrang ming tana i cuo; a thiypa i napuvnung i pabyna riypata alyi a baata na zaa tie ung,” a ta. 5Hit ming ca ta Abraham kha, 6“I byipaapa, malie naathlie tie, nama ca kiema hrawlie hing a lesyipa byi tana na cuo. Na khing cepa thluo kha a tlaw la na napuvnung ca paby tie; kiema chungtaata ahung hingta hmuo na napuvnung pabyna riypata thluo a pahya lipa aw'a vapuv,” ama ta. 7Abraham ca a daa te, capa ruo cawsaa ta a cuopa Hit ming hmiekunglie kha a bung te, 8“Na naathlie thi tie ung, i napuvnung riyy kha hingpa lie hing i pabypa inaa khingkhyi kie ungca ca, Zohar sacapaa Efron kha, 9a lu kielieta a awpa Makpelah lungkhue kha ina pi riypata paa na kiepa tie ung. Niema zaw hmiekunglie kha a muo bangkhuo ca pi ang sala a pabyna hmang i hnyi riypata thluo ca na pi se,” a ta. 10Capa ning ca Efron ca Hit ming hrawlie kha a tu te, capa khy hukaa lie a tupa Hit ming thyipa cata, 11“Cuo vyi, i byipaapa, na naathlie tie; i lu kha ca pi angte a chunglieta a awpa lungkhue zaw kha ica pi; i cawsaa zaw hmiekunglie hrahring hing tana ica pi, naa thiypa ca paby tie,” a ta. 12Cakhutaata Abraham ca capa ruo ming hmiekunglie ca a bung te, 13cawsaa bangkhuo thyi pata Efron kha, “Na naathlie thi tie, i napuvnung kha i paby the riypata alyi muo hing ca pi'a angte na cuhluo thi tie,” a ta. 14Efron ta Abraham kha palie te, 15“I byipaapa, na naathlie tie; alyi baata hing ngu tuokaa zapaliy muo dyina a cuo, nama hne kama alalalieta khaapa tluo hmuo cuo vyi, na napuvnung ca paby thluo tie,” a ta. 16Abraham ta Efron ripa ca a palung tling te, Hit ming thyi pata Efron a ripa ngu tuokaa zapaliy kha sung a palipa tie ama pathliepa haa khata pathlie te Efron ca a pi.
17Cahaacata Mamre ningchiyluo kuo ta a awpa Makpelah lie Efron lu ca, a lu hne a chunglie a awpa lungkhue hne thingkungpa zaw bangkhuo hne, 18khypuv thlake a hmyana hmang luo a vya chiypa Hit ming hmiekunglie kha Abraham ca pi pata a cuo. 19Cakhutaa cata Abraham ta a napuvnung Sarah ca Kanaan ruo, Mamre hne aa hmiepachawpa Makpelah (Hebron zaw ama tapa) lie, lu chunglie a awpa lungkhue lie kha a paby. 20Cahaacata Hit ming ta Abraham ca lu hne a chunglie a awpa lungkhue kha thluo hmang ta a hnyi riypata ama pi.
ទើបបានជ្រើសរើសហើយ៖
SAHRUOTHUNA 23: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.