SAHRUOTHUNA 22
22
Isak Ta Hriykhungrina A Tue Riypata Nawpina
1 #
Heb 11.17-19
Cakhutaa cata Khazing ta Abraham ca a dyapasya. “Abraham,” ta te a ku. Abraham ta, “Hingpa lie hingna i aw,” a ta. 2#2Chr 3.1 Khazing ta, “Na duesapa na sacapaa pakha dyipa Isak kha la lah Moriah ruo luo kha si tie. Capa lie ica pahmung sapa tluo lie kha Isak ca myirue panaana ta na pihluo tie,” a ta. 3Caacuonakawta Abraham ca mawdiy ta thu te, laa kedie kha padie te a changtaapa pahning hne Isak hne khata amaa tha. Myirue panaana tuena riypata thing a hluopaale te Khazing ta a pahmung sapa luohlaa luo kha ama si. 4Ning thungnapa lieta Abraham ta capa hmang ca luohlaa taata ava hmung. 5Abraham ta a changtaapa tie kyihuo khata, “Laa hne hingta hingpa lie hing za aw tie ung, satliepa hne kama hing huepa luo hue abiena va tue'a pate niema'a luo ma vya kaa pakhaa aa,” a ta yi. 6Abraham ca myirue panaana tuena riypa thing kha a sacapaa Isak kha paphya sale te ama ca myi hne cizung kha aa cyile. Ama pahning cata ama cakuo hnele. 7Isak ta a paa Abraham kyihuo cata, “I paa,” ta pata a ku. Abraham ta, “Khaapama i sacapaa,” a ta. Isak ta, “Myi hne thing ca ama aw, cuorasala myirue panaana pihluo riypata tuv haw khaapaliema a aw?” a ta. 8Abraham ta, “Myirue panaana riypa tuv ca Khazing na malie a parawpa aa,” a ta. Cahaacata ama pahning cata ama cakuo hnele pakhaa.
9 #
Jei 2.21
Khazing ta a pahmung sapa hmang luo ama chiy tiyta, Abraham ta bienatluophie kha sa te thing kha a cahaw. A sacapaa Isak kha ciypaki te bienatluophie thing cunglie ca a pahlaa. 10Cakhutaa cata Abraham ca a sacapaa thiena riypata cizung kha aa la. 11Cuorasala Abyipa avuoming ta vuoruo taata, “Abraham, Abraham,” ta te a za ku. Abraham ta, “Hingpa lie hingna i aw,” a ta. 12Avuoming ca ta, “Haatiypa cunglie na kuv pathlie pata khaapahmuo tue khah. Tahematapakieca na sacapaa pakha dyi na hnyi tlakuopa kha i cuota pahya li pata na aw li nakawta Khazing na ciyzaa tapa kha ica pachang,” a ta. 13Cakhutaata Abraham ta hmiehmie a pase ca zungriy lie a kiy a kalaapa tuvtungpa kha a hmung. Va patuv te a sacapaa cuopa ta myirue panaana ta a pihluo. 14Caacuonakawta Abraham ta capa hmang ca, “Jehovah Jireh,” a ta. Caacuonakawta ata chuo te hingta, “Abyipa tluo lie ca Abyipa na a paraw aa,” ama ta.
15 Abyipa avuoming ta vuoruo taata Abraham kha a yihningnapa ta u te, 16#Heb 6.13-14 “Abyipa ta, Kama hne kama bie i kuo, tahematapakieca sacapaa pakhata dyi na hnyipa kha i cuota pahya li pata aw li pata ina pi tli ciy. 17#Heb 11.12 Thluechiy ica pi hrahring aa. Na samingsahlaa ca avuo lie aasiy zaa hne riyliy ngiekuo lie viehnang zaa i pata sa aa. Na samingsahlaa tie ta ama carie tie khy chiypakaa kha ama uv aa. 18#Lct 3.25 Na samingsahlaa tie thue hingta alyi cunglie mingphang bangkhuo ta thluechiy ama hmung aa. Tahematapakieca i ueryi khana ina naathlie ciy,” a ta. 19Caacuonakawta Abraham ca a changtaapa tie'a luo kha kaa te, a tha yi te Beer-sheba luo kha ama si pakhaw; Abraham ca Beer-sheba lie ca a aw.
Nahor Saata Zaw
20Cakhutaa cata, “Na uvnu Nahor napuvnung Milkah na saata zaw a sa yi,” ta pata ama chang. 21Sacapaa uvthyi Uz, a nuta Bus, Aram paa Kemuel, 22Khesed, Hazo, Pildash, Jidlaf hne Bethuel zaw ta ama cuo. 23(Bethuel ca Rebekah paa khata a cuo). Milkah ta Abraham uvnu Nahor kha hingpa sacapaa pacari hing a sapa. 24Ca hlyitaw taata a nungthangnung Reumah ta Tebah, Gaham, Tahash, hne Maakah kha a sa yi.
ទើបបានជ្រើសរើសហើយ៖
SAHRUOTHUNA 22: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.