LUCUOTUV 1
1
Thlaapa Pathe Pi Riypata Biekuona
1Duepa Theofilas, caa-uv taapa lie kha Zingsuv ta a tuepa hne a pacuvna kaw bangkhuo kha a hruothu taata 2vuoruo luo a kiena te ta i cape. Capa ca aa tlawpa lucuotuv tie kha Thlaapa Pathe ta a pacuv khutaa yi ta a cuo. 3A thiy khutaata ning sawliy chung iema'a lie kha a luo te, a hring pakhaa tapa kha i khu li riypata yi hluvpuv paluo sa te Khazing pena kaw kha a ri. 4#Luk 24.49 Iema'a lie a aw#1.4 Ning ning khata iema kha, Jerusalem pyase li pata Paa biekuona kha ama huo riypata bie a pi yi. Ama ta, “Kama'a taata nama thyipa bie ca hing haa hing tana a cuo; 5#Mat 3.11; Mar 1.8; Luk 3.16; Jhn 1.33 Johan ca tiy tana tiynawna aca pi yi, cuorasala niema ca ataning taa hingta a ru li pata Thlaapa Pathe ta tiynawpa nama cuo aa,” a ta yi.
Zingsuv Vuoruo Luo Kiena
6Caacuonakawta Zingsuv hne lucuotuv tie ca amaa hmya pakhaw tiyta, “Abyipa, ata hing Israel ming'a luo pena na pi pakhaana cuo ta a cuo ma?” ta pata ama hiehriy.
7Zingsuv ta, “I Paa ta ama ri ta a tuepa ning hne cuo kha niema nama pachang a hu vyi. 8#Mat 28.19; Mar 16.15; Luk 24.47,48 Cuorasala Thlaapa Pathe nama cung luo a tlung tiyta cahrana hmung'a ung cate, Jerusalem khypuv, Judea, Samaria hne chuelyi dena te ta i pachangkhyituv nama cuo aa,” a ta yi. 9#Mar 16.19; Luk 24.50,51 Capa bie a ri khu pahne ta ama ming hmung pata lathawpa cuo te amyi ta vya pakhuo te hmung khu va tli yi.
10Cahaacata a kielepa kha avuo luo angchiy yi te ama mang nguoluo pata caw ruopa a tuepa avuoming pahning amaa thaalie sungkha ta amaa vya daa. 11Iema ta, “Galilee cawsaa zaw, khaapama namaa daa luota vuoruo luo ca nama mang nguoluo? Niema'a taata vuoruo luo lathawpa Zingsuv ca nama hmungpa dadang haa khata aa vaw pakhaa aa,” a ta yi.
Judas A Thletuvpa Matthias
12Cakhutaata lucuotuv tie ca Jerusalem taata me che dyi aa hlapa, Olif tluo taata Jerusalem luo kha ama vya kaa. 13#Mat 10.2-4; Mar 3.16-19; Luk 6.14-16 Khypuv chung luo ama vya pha tiyta ama aw tawnapa a cung khuo luo kha amaa ngie. Piter, hne Johan, Jeim, hne Andru, Filip hne Thomas, Bartholomew hne Matthai, Alfeas sacapaa Jeim, Phangcuokhyituv Simon hne Jeim sacapaa Judas ta ama cuo. 14Ama bangkhuo ta thlaachuo riypata ata hne ata tah a taw yi te capa lie ca canung tie, Zingsuv nung Mary hne Zingsuv nuta zaw kha ama aw ra.
15Capa ning ca zangtuv zaw#1.15 Gk uvnu zaw (ama bangkhuo ta zakha pakiy hraw) hrawlie kha Piter ca a daa te, 16“Viesaa zaw,#1.16 Gk Cawsaa zaw, uvta nuta zaw Zingsuv a patuvpa tie luochiytuv ta a cuopa Judas kaw hne aa patuv pata David hmuo pata Thlaapa Pathe ta a za rilupa Caapathe bie ca a tling riypata a cuo. 17Ama ca hing Khazing re lie hing hrievu pipa a cuo nakawta kiema hrawlie pasuvpuo pata a cuo,” a ta.
18 #
Mat 27.3-8
(Ama ta hmang pha lipa a tuena taata a hmungpa tuokaa khata lu suokha calyi te, capa lu lie ca aa bungkali pata tla te a riy a ke nakawta a chungriy bangkhuo ta a pya diy. 19Capa kaw ca Jerusalem lie a awpa bangkhuo ta pachang yi te iema ryi ta capa lu ca Hakeldama ama ta, a siyluo ca, ‘Thiyse Lu,’ tana ta a cuo.)
20 #
Slm 69.25;
Slm 109.8
“Salm caa-uv chunglieta,
‘A ing ca hri sala,
a chunglie a aw riypa caking yi se';
cakhutaata,
‘A re kha cawsaa hrangpa ta a thle se,'
ta pata aa cape.
21 #
Mat 3.16; Mar 1.9; Luk 3.21;
Mar 16.19; Luk 24.51 Caacuonakawta Johan tiynawna taata ma Byipaapa Zingsuv kiema'a taata lapa a cuona te, kiema'a lie a ngie te pya te a aw chung bangkhuo, 22kiema'a lie a aw rapa pakha ca kiema hneta Zingsuv thupakhaana pachangkhyituv a cuo ra hrahring na a hu,” a ta. 23Caacuonakawta, cawsaa pahning Barsabbas ama tapa Josef, Justas zaw ama tapuopa hne Matthias ming kha ama chiykhyi. 24Thlaachuo yi te, “Abyipa, nama ca cawsaa pathiypalung bangkhuo na pachang. 25Judas ta a cu riypa hmang luo a sisepa, hingpa Khazing re hrie riypa hne lucuotuv cuo riypa hing iema pahning lie hingta ahungma naa tlaw tapa kha za paluo sa tie,” ama ta. 26Cakhutaata vyisung amaa da ca Matthias ta a hmung nakawta ama ca lucuotuv hlyikha lie kha pahlawpuo pata a cuo.
ទើបបានជ្រើសរើសហើយ៖
LUCUOTUV 1: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
