ရောမ နိဒါန်း
နိဒါန်း
ပေါလု ကအီႏလွေꩻလယ်ႏ ရောမဝေင်ꩻ အစီႏအစဲဉ်ႏ ကအဝ်ႏအတွိုင်ꩻ နုဲင်းဖျင်ရဲင်ꩻသေꩻခါꩻ အနေႏတွော့ꩻ ပေါလု တဲမ်းထေ့လွေꩻဖေႏဗာႏ ရောမဝေင်ꩻ အသေန်းတောႏလိတ်သွူ။ ဝွေꩻကရေႏရွယ်ႏခါꩻနဝ်ꩻ ထွာဝွေꩻအီႏမာꩻ ထာꩻမာꩻ တွမ်ႏခရစ်ယာန်ႏဖုံႏ ကအဝ်ႏနဝ်ꩻကို တဆင်ႏပေႏတဲင် တွမ်ႏဝွေꩻသီး ထာꩻစွဲကမ်းနဝ်ꩻ အီႏလွေꩻမာꩻ သာႏသနာႏထာꩻမာꩻ သပေင်ခမ်းကို အတွက်သွူ။ ဝွေꩻကတဲမ်း လိတ်ယိုနဝ်ꩻ နုဲင်းဝွေꩻကသေနာႏ ကခံႏထူႏလဲဉ်းဒါႏ ခရစ်ယာန်ႏ ထာꩻယွုမ်းချက်ခရာႏစွဉ်ႏ ခရစ်ယာန်ႏဘဝ ကအီႏကံကျင်ꩻ မာꩻလွဉ်ꩻဗာႏ နုဲင်းမုဲင်ꩻခရာႏဖုံႏနဝ်ꩻ သျင်ꩻနယ်ဖေႏသွူ။ ကဆဲင်ႏဒါႏ ပေါလုကဒေါ့ꩻဒါႏ တရာꩻဖုံႏအကို ကျမ်ꩻအုပ်ယိုနဝ်ꩻထွာ ဝွေꩻဒေါ့ꩻ အစွုံႏလင်ႏသွတ်ꩻသွူ။ ပေါလုတဲမ်း နုတ်ဆက်လွေꩻဖေႏ ရောမအသေန်းတောႏ လိုꩻဖုံႏထွူ ဝွေꩻဆုတောင်ꩻဖေႏဒျာႏ ဝွေꩻသီးတာႏကျောင်ꩻနဝ်ꩻ ဒေါ့ꩻနယ်ဖေႏ ဝွေꩻသီး၊ ပေါလုဒေါ့ꩻဖေႏ ဝွေꩻကတဲမ်းဗာႏ လိတ်ယို အဓိကအချက်နဝ်ꩻ၊ “သတင်ꩻဟဝ်နဝ်ꩻ ဖေါႏနယ်ဖေႏ ဗွေႏဘုရာꩻနဝ်ꩻ လိုꩻဖုံႏ ဖေႏကဆွုပ်ဆံႏမဲဉ်ႏ တွမ်ႏဝွေꩻဗွေႏနမ်း ကိုယ်ႏတဲင်ႏတဲင် နဝ်ꩻနဝ်ꩻထွာဒျာႏယွုမ်း အဝ်ႏအစ ဗꩻတွိုႏလွေꩻ အသွတ်ꩻ” နုဲင်းနဝ်ꩻသွူ။ (၁:၁၇)
နဝ်ꩻထွူ ပေါလု သျင်ꩻနယ်ဖေႏ လုဲင်းထဲင်းယင်း အဓိကအချက် ခရာႏဖုံႏသွူ။ လိုꩻဖုံႏကားကအဝ်ႏ ပါစွဉ်ႏ ဂျူးလိုꩻမျိုꩻဖုံႏတွမ်ႏ လိုꩻမျိုꩻလင်ဖုံႏနဝ်ꩻ ပွိုးတွော့ꩻ လိုꩻဖုံႏကားကအဝ်ႏနဝ်ꩻ အဝ်ႏသော့ꩻထိုꩻလဲဉ်း အပဲစ်တန်ꩻခိုꩻ ဆꩻလအတွက် အဝ်ႏလိုႏ စွို့ꩻစွဉ်ႏတောႏတွမ်ႏ ဗွေႏဘုရာꩻသွူ။ စွဉ်ႏထာꩻယွုမ်း ဗွေႏယေသျု ခရစ်တောႏနဝ်ꩻမꩻ လိုꩻဖုံႏနဝ်ꩻ လꩻနွောင်ꩻ ထာꩻစွို့ꩻစွဉ်ႏ ဗွေႏဘုရာꩻထျꩻနဝ်ꩻသွူ။ ပေါလု ဒေါ့ꩻစဲင်းဖေႏထဲင်းယင်း အုံငီꩻအဝ်ႏရဝ်း တလွောင်ႏတဗူႏချင်ႏတွမ်ႏ ဗွေႏခရစ်တောႏတဲင် နဝ်ꩻနဝ်ꩻ လꩻဘဝတသာတွော့ꩻ ဆွုပ်ဆံႏမဲဉ်ႏစွဉ်ႏ ဗွေႏဘုရာꩻ နဝ်ꩻသွူ။ လိုꩻကယွုမ်းသားဖုံႏနဝ်ꩻ လꩻလဲဉ်း ထာꩻငိမ်ꩻချမ်ꩻသာႏ တွမ်ႏဗွေႏဘုရာꩻတွော့ꩻ အပဲစ်တွမ်ႏ ထာꩻသီတန်ꩻခိုꩻ ဆꩻလနဝ်ꩻ စွဉ်ႏဗွေႏဘုရာꩻ ဝိညာဉ်ႏတောႏတန်ꩻခိုꩻ အွဉ်ႏစွꩻလွစ်ကင်ꩻဖေႏသွူ။ အခန်ꩻတန်(၅-ဂ) ပေါလုနဝ်ꩻ ဒေါ့ꩻအုံကွံဖေႏပါ ဗွေႏဘုရာꩻ ပညတ်ကျမ်ꩻ ထာꩻအင်းရွယ်ႏချက်တွမ်ႏ ဗွေႏဘုရာꩻ အဝိညာဉ်ႏတောႏ တန်ꩻခိုꩻ ကအဝ်ႏသော့ꩻဒါႏ လိုꩻယွုမ်းသားဖုံႏ ဘဝကိုဖုံႏ နဝ်ꩻသွူ။ နဝ်ꩻထွူ လိုꩻဖုံႏ ကားကအဝ်ႏတာႏ ဗွေႏဘုရာꩻ အကျံႏတောႏအဝ်ႏ နဝ်ꩻမꩻ ဂျူးလိုꩻမျိုꩻတွမ်ႏ လိုꩻမျိုꩻလင်ဖုံႏ အုံအဝ်ႏပါဝင်ႏသော့ꩻ နုဲင်းမုဲင်ꩻခရာႏနဝ်ꩻ တမန်ႏတောႏ သျင်ꩻနယ်ဖေႏ တွမ်ႏငဝ်းရီသွူ။
ဝွေꩻအွဉ်ႏသွတ်ꩻအီ ဂျူးဖုံႏကပယ်ႏထိုꩻဗာႏ ဗွေႏခရစ်တောႏနဝ်ꩻ ပွိုးတွော့ꩻ လိုꩻမျိုꩻလင်ဖုံႏ ကားကအဝ်ႏနဝ်ꩻ တွမ်ႏဗွေႏယေသျု ခရစ်တောႏတဲင် ဖေႏကစံႏစာꩻငီꩻဗာႏ ဗွေႏဘုရာꩻ ကေꩻဇူꩻတောႏတဲင် ဂျူးလိုꩻမျိုꩻဖုံႏနဝ်ꩻ အီႏတပယ်ႏ သေႏသေႏထိုꩻတဝ်း ဗွေႏယေသျုနဝ်ꩻ ဝွေꩻအဝ်ႏယွုမ်းနဝ်ꩻသွူ။ အဆုဲင်ꩻသွတ်ꩻ ပေါလုတဲမ်း ခရစ်ယာန်ႏဖုံႏဘဝ အီႏအုံအဝ်ႏ ကံကျင်ꩻဗာႏ နုဲင်းမုဲင်ꩻခရာႏ၊ အရေႏတန်သွတ်ꩻနဝ်ꩻ အီႏဒေါ့ꩻရီ ဒေါ့ꩻတောႏဗာႏ တွမ်ႏလိုꩻလင်ဖုံႏနဝ်ꩻ အီႏအွဉ်ႏဗာႏ မေတ္တာႏနုဲင်းမုဲင်ꩻ ခရာႏကျောင်ꩻ ဒင်ႏနယ်နဝ်ꩻသွူ။ ဝွေꩻကဒင်ႏနယ်ဗာႏ အဓိကအချက် အစားနုဲင်းနဝ်ꩻဖုံႏနဝ်ꩻ ကမာꩻဒါႏ ဗွေႏဘုရာꩻ အမုတောႏ ထာꩻမာꩻခရာႏ၊ ခမ်းထီနဲင်ႏငံႏတောႏ တွမ်ႏ တဖြာꩻစွဉ်ႏ တဖြာꩻလောင်း၊ ခရစ်ယာန်ႏဖုံႏ တာႏဝွန်ႏဝွတ္တရာꩻ ခရာႏတွမ်ႏ ဩတ္တပ္ပသꩻ ပျဿနာႏ ငဝ်းရီခရာႏနဝ်ꩻသွူ။ စွဉ်ႏတဖြာꩻစီႏ ငဝ်းသတင်ꩻ တွမ်ႏငဝ်း ကအုပ်ꩻထင်ႏဒါႏ ဗွေႏဘုရာꩻ ငဝ်းဖုံႏနဝ်ꩻ ဝွေꩻအွဉ်ႏထွူအီ လိတ်တဲမ်းနဝ်ꩻသွူ။
အကျောင်ꩻခရာႏအအဲဉ်ႏ
နိဒါန်းတွမ်ႏအဓိကအချက် (၁:၁–၁၇)
လိုꩻတဟံႏတန်လွုမ်းနဝ်ꩻအဝ်ႏလိုႏထာꩻကယ်ႏတင်ႏ (၁:၁၈—၃:၂၀)
ဗွေႏဘုရာꩻအထာꩻကယ်ႏတင်ႏနယ်ꩻ (၃:၂၁—၄:၂၅)
တွမ်ႏဗွေႏခရစ်တောႏကလꩻဒါႏဘဝတသာ (၅:၁—၈:၃၉)
ဣသရေးလိုꩻမျိုꩻဖုံႏအကိုဗွေႏဘုရာꩻအကျံႏတောႏ (၉:၁—၁၁:၃၆)
ခရစ်ယာန်ႏအကံအကျင်ꩻ (၁၂:၁—၁၅:၁၃)
အွဉ်ႏသွတ်ꩻခန်ꩻတွမ်ႏကနုတ်ဆက်ဒါႏတဖြာꩻစီႏဖုံႏ (၁၅:၁၄—၁၆:၂၇)
ទើបបានជ្រើសរើសហើយ៖
ရောမ နိဒါန်း: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.