တမန်ႏတောႏ 28
28
တွိုႏလွေꩻမေလိတကြွန်
1နီထွိုင်ႏလွစ်ထန်ႏ လုမ်းဗဉ်ႏလꩻ ဖင်ႏလောင်းချိန်ႏ ကြွန်နဝ်ꩻနဝ်ꩻ ဝင်ꩻဟဲ့ꩻ မေလိတကျောင်ꩻ နီသေဗာ။သွူ။ 2လိုꩻဇာႏတိ ကြွန်လောင်းသား နဝ်ꩻကိုဖုံႏနဝ်ꩻ ကျိုႏဆွုမ်ႏဟဝ်မွေး နေးစွဉ်ႏနီသွူ။ ခမ်းလော့စတဲင် ထာꩻခွꩻငါႏနဝ်ꩻသွူ။ နဝ်ꩻမꩻ ဝွေꩻသီးအူဖေႏ နီမေႏတဲင် ရပ်ကျိုႏဆွုမ်ႏနီ ကာအဝ်ႏနဝ်ꩻသွူ။ 3ပေါလုနဝ်ꩻ ထူႏသိုႏတလွောင်ႏတဲင် သိုႏဖုံႏအဝ်ႏသော့ꩻ မေႏကိုချိန်ႏ မေႏလျားတဲင် ရူးတဗာႏ ထန်ႏလွဉ်တွော့ꩻ ပေါက်ꩻစွဉ်ႏ ဝွေꩻစူꩻသွူ။ 4လိုꩻဇာႏတိ နဝ်ꩻကိုသားထီႏ ရူးအဝ်ႏပြောက်လူး ပေါလုစူနဝ်ꩻ တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ၊ “ပါꩻခိုယိုနဝ်ꩻ ထွာလိုꩻမာꩻသီ ဝင်ꩻအသက်သား တဖြာꩻဒျာႏ။ လဲင်ꩻသျောင်ႏလွစ်လꩻ ပင်ႏလယ်ႏ စွဉ်ႏတဲ့ အကံႏကျမ္မာႏနဝ်ꩻ အီႏတဖေႏတဝ်း ဝွေꩻအသက်မွန်” နုဲင်းနဝ်ꩻသွူ။ 5ကွဲႏတွော့ꩻ ပေါလုနဝ်ꩻ ဝီထဲ့လင်ꩻရူး မေႏပြုန်ႏကိုတဲင် တဆာတဝ်း တစိꩻစိꩻနဝ်ꩻသွူ။ 6ဝွေꩻသီး အဝ်ႏအုံပွေါးထွားဝွေꩻနဝ်ꩻ အီႏယော့ꩻလွဉ် မဉ်ႏတမွေးတဝ်း အီႏဝꩻလင်ꩻစွော့ꩻတဲင် သီထိုꩻနဝ်ꩻသွူ။ ကွဲႏတွော့ꩻ အဝ်ႏပွေါးထွားနုဲင်းနဝ်ꩻ ညတန်စွဉ်ႏတဲ့ ထီႏဒျာႏဝွေꩻ တထွာလွဉ်တဝ်း တမုဲင်ꩻမုဲင်ꩻသွူ။ ဝွေꩻသီးသꩻ ပြောင်ꩻလွဉ်တဲင်ဒေါ့ꩻ၊ ‘ဝွေꩻယိုနဝ်ꩻထွာ လူꩻဘုရာꩻတန်ဒျာႏ’ နုဲင်းနဝ်ꩻသွူ။
7တပေါ့ꩻညာꩻတဝ်းစွဉ်ႏ ခင်ႏလမ်းနဝ်ꩻကိုနဝ်ꩻ ကြွန်လိုꩻတန်မဉ်ꩻ ပုဗလိ ကပဲင်ႏဒါႏခြံ နဝ်ꩻအဝ်ႏ၊ ဝွေꩻနဝ်ꩻ လက္ခံႏဟဝ် မွေးနေးစွဉ်ႏနီတဲင် လွူးဖေႏအံႏ ဖေႏအွꩻဟဝ် နီ သွံနီꩻလွုမ်းသွူ။ 8ပုဗလိအဖါနဝ်ꩻ အဝ်ႏဆော့နမ်းလျား၊ ဟို့ꩻအဲင်ႏ အဝ်ႏသော့ꩻ ခင်ႏလမ်းဗေင်ႏကိုတဲင်၊ ပေါလုနွို့သော့ꩻ ဝွေꩻအခန်ꩻကို စူအွဉ်ႏဒင်ႏ ဝွေꩻအလောင်းတွော့ꩻ ဆုတောင်ꩻဖေႏတဲင် လုမ်ꩻလာꩻဟဝ်ဖေႏ ဝွေꩻနဝ်ꩻသွူ။ 9ထွိုင်ႏထွာထာꩻနုဲင်းယို လိုꩻဆာအလင်ဖုံႏ အဝ်ႏကြွန်လောင်းနဝ်ꩻ လွဉ်ပေါလုထျꩻတဲင် ပေါလု မာꩻဟဝ်မာꩻရေꩻ ဖေႏလို့စွဉ်ႏ ဝွေꩻသီး ထာꩻဆာဖုံႏသွူ။ 10ဝွေꩻသီးဖေႏနီ လက်ဆောင်ႏ အာငါႏတဲင် နီထွိုင်ႏထန်ႏလွေꩻချိန်ႏ နဝ်ꩻတဲ့ တဖူꩻလောင်း နီကအဝ်ႏလိုႏဒါႏ တရိပ်ဖုံႏနဝ်ꩻတဲ့ ဝွေꩻသီးဒင်ႏဖေႏစွဉ်ႏ သင်္ဘောꩻလောင်းသွူ။
အဝ်ႏမေလိတကြွန်လွေꩻထိုꩻရောမ
11ညသွံလာထွူ နီထုမ်းသင်္ဘောꩻ တဆွိုင်ꩻ မဉ်ꩻကဟဲ့ꩻဒါႏ လူꩻမဲရွာနဝ်ꩻတွော့ꩻ အဝ်ႏဝေင်ꩻ အလဲက်သန်းဒီးယား လွဉ်တဲင် အဝ်ႏအုံခိုႏ ကြွန်နဝ်ꩻအလောင်း ထာꩻခွꩻလာသွူ။ 12နီဖျော်တွိုႏသော့ꩻ ဝေင်ꩻသုရကုတ်တဲင် အုံနဝ်ꩻကိုသွံနီꩻသွူ။ 13အဝ်ႏဝေင်ꩻနဝ်ꩻ နီထုမ်းသွုပ် သင်္ဘောꩻတဲင် ဖျော်လွေꩻစွဉ်ႏ ဝေင်ꩻရေဂျုန်နဝ်ꩻသွူ။ ဆုဲင်ꩻတနီꩻ တလီꩻနဝ်ꩻ အဝ်ႏဆꩻနဝ်ဖဲ့ꩻ ထွာႏလွဉ်စတဲင် နီနီꩻအကို နီဖျော်လွဉ်စွဉ်ႏ ဝေင်ꩻပေါတယောလိ နဝ်ꩻသွူ။ 14နဝ်ꩻကိုနဝ်ꩻ နီမော့ꩻ လိုꩻယွုမ်းသားဖုံႏ ယင်ဟန်ႏတဲင် ဖေႏကအုံငီꩻ စွဉ်ႏဝွေꩻသီး တပတ်နွတ်ꩻနီꩻနဝ်ꩻ တောင်ꩻပြန်ႏနီသွူ။ နဝ်ꩻမꩻ နီလွဉ်သော့ꩻ ဝေင်ꩻရောမကိုသွူ။ 15လိုꩻယွုမ်းသားဖုံႏ ကအဝ်ႏရောမခမ်းကိုနဝ်ꩻ ဟွိုန်နီခရာႏတဲင် အဝ်ႏအညာꩻ နုဲင်းဝေင်ꩻအပ္ပိဆေꩻတွမ်ႏ အဝ်ႏထဉ်ႏကတည်ꩻဒါႏ လမ်းသွံဖြုံႏနဝ်ꩻ လွဉ်တဲင် မောခွဲဆွုမ်ႏစွဉ်ႏ နီနဝ်ꩻသွူ။ ပေါလုထွိုင်ႏထီႏ ဝွေꩻသီးချိန်ႏ ဝွေꩻအုပ်ꩻထင်ႏ ဗွေႏဘုရာꩻ ဂွုဏ်ႏတောႏတဲင် သꩻအာႏတလာလွဉ် မွေးနေးစွဉ်ႏသွူ။
အဝ်ႏသော့ꩻရောမဝေင်ꩻကို
16နီ ထွိုင်ႏဖျော်လွဉ်သော့ꩻ ရောမဝေင်ꩻကိုနဝ်ꩻ ပေါလုလꩻ အခွင်ꩻသာႏ ဝွေꩻနမ်းအုံငီꩻဗာႏစွဉ်ႏ စဲ့ꩻကောပွေါးရံႏသား တဖြာꩻနဝ်ꩻသွူ။
17ဖျော်လွဉ်ထွူ လꩻသွံနီꩻ ဖေႏကမာꩻအုံကွံနဝ်ꩻ ပေါလုဖစ်ဟဲ့ꩻ ရပ်ရာႏဒေႏသခံႏ ဂျူးခေါင်းဆောင် လိုꩻတန်ဖုံႏသွူ။ ဝွေꩻသီး ထွိုင်ႏစုဗူႏ လို့ဝင်ꩻချိန်ႏ ပေါလုဒေါ့ꩻဖေႏဝွေꩻသီး၊ “ခွေသွꩻ ဣသရေး လိုꩻမျိုꩻဖုံႏ၊ ခွေသွဉ်းနဝ်ꩻ နီလိုꩻမျိုꩻဖုံႏတဲ့နဝ်ꩻ၊ နီမွိုးဖြားဖါဖြားသီး ဖုံႏ အထွုံꩻစံႏ ဓလေ့ဖုံႏတဲ့နဝ်ꩻ ခွေတဆန်ချာ တောႏလန်ႏတဝ်း တစွိုးစွိုးစွဉ်ႏတဲ့ ခွေအဝ်ႏထွာဗာႏ ထောင်ႏသားတဖြာꩻ ဝေင်ꩻယေရု သလမ်ႏကိုတဲင် အပ်သော့ꩻဖေႏ ရောမစူကိုသွူ။ 18စဲစ်ဆေꩻထွားခွေ ထွိုင်ႏထွူချိန်ႏ ခွေကအီႏထွိုက်စွဉ်ႏ ထာꩻသီတံႏနဝ်ꩻ ခွေတမာꩻမာႏဗာႏတဝ်း တစွိုးစွိုးအတွက် ပွိုးဝွေꩻသီးထီႏ နဝ်ꩻမꩻ ရောမဖုံႏ မဉ်အွဉ်ႏစွꩻလွစ်ခွေသွူ။ 19#တ ၂၅:၁၁။ ကွဲႏတွော့ꩻ ဂျူးလိုꩻမျိုꩻဖုံႏ ကဆန်ချာခွေ နုဲင်းယိုချိန်ႏနဝ်ꩻ အဝ်ႏမာꩻနွောင်ꩻနွိုင်ႏ ခွေနဝ်ꩻမ ခွေခံႏထူႏဗာႏ အယူႏခံႏ ဧကရာဇ်ခွန်တန် ထျꩻသွူ။ ထွာစွဉ်ႏနုဲင်းနဝ်ꩻ စွဉ်ႏတဲ့ ခွေတစွဲꩻတရာꩻ ချာတဝ်း ခွေလိုꩻမျိုꩻဖုံႏသွူ။ 20ကွပ်နုဲင်းနဝ်ꩻမꩻ ခွေကွီမော့ꩻသီတွော့ꩻ ဒေါ့ꩻနယ်ဖေႏ သီနဝ်ꩻသွူ။ နုဲင်းကထွာလွဉ်ဗာႏ ကိစ္စတစွိုးယိုနဝ်ꩻ ပွိုးဒျာႏ ဗွေႏအပါꩻ ဣသရေး လိုꩻမျိုꩻဖုံႏ ကအဝ်ႏမောင်ꩻဒါႏ ဝွေꩻဗွေႏနဝ်ꩻအတွက် ခွေအဝ်ႏ ခံႏဗာႏအစွိုင် စွဉ်ႏပသီႏချင်ꩻ နုဲင်းယို” နုဲင်းနဝ်ꩻသွူ။
21ဝွေꩻသီးဒေါ့ꩻဖေႏပေါလု၊ “ပွိုင်းဝွို့တွမ်ႏ နာꩻခရာႏနဝ်ꩻ ဂျူးလိုꩻမျိုꩻဖုံႏထျꩻ လိတ်တစောင်ႏစောင်ႏတဲ့ နီတလက္ခံႏလꩻဗာႏတဝ်း၊ နီဂျူးလိုꩻမျိုꩻဖုံႏ ကအဝ်ႏနဝ်ꩻကိုလွဉ်နဝ်ꩻ သတင်ꩻတစိꩻ တဲ့နဝ်ꩻ နာꩻခရာႏ အကုဲင်တစွိုးငါ တဲ့နဝ်ꩻ တဒေါ့ꩻတဝ်းသွူ။ 22ကွဲႏတွော့ꩻ ခင်ႏလမ်းမုဲင်ꩻကို တယဝ်း လိုꩻဖုံႏ အဝ်ႏဒေါ့ꩻဆန်ချာ ကဆဲင်ႏဒါႏနာꩻအစွိုꩻ ဘာႏသာႏယိုနဝ်ꩻ ပွိုးနီအဝ်ႏသေ နဝ်ꩻမꩻ နာꩻအယူႏဝါႏဒနဝ်ꩻ နီမဉ်ဟွိုန်” နုဲင်းနဝ်ꩻသွူ။
23နဝ်ꩻမꩻ ဝွေꩻသီးစွဉ်ႏ ပေါလုနဝ်ꩻ ထွော့နေးမွူးနီꩻခဉ်ꩻ တနီꩻတဲင် အနီꩻနဝ်ꩻ ဝွေꩻသီး အဖြာꩻအာငါႏ လွဉ်ထေ့စွဉ်ႏ ပေါလု ကအဝ်ႏအုံဒါႏ ခင်ႏလမ်းနဝ်ꩻသွူ။ တယ်ႏစွဉ်ႏ မွူးရဝ်ꩻခိုႏ ဗꩻတွိုႏစွဉ်ႏ ထာꩻခေ့ꩻ ပွိုင်းဝွို့တွမ်ႏ ဗွေႏဘုရာꩻခမ်းထီ နဲင်ႏငံႏတောႏ တရာꩻတွမ်ႏ အဝ်ႏမောသျေ ပညတ်ကျမ်ꩻတွမ်ႏ ပရောဖဲစ်ဖုံႏ ကတဲမ်းခါꩻဒါႏ ကျမ်ꩻချက်ကို ကတွမ်ထူႏခါꩻဒါႏ ဗွေႏယေသျုခရာႏနဝ်ꩻ ဖေႏဝွေꩻသီး ကယွုမ်းလက္ခံႏ ဝွေꩻကျိုꩻစာꩻ သျင်ꩻနယ်ဖေႏ ဝွေꩻသီးသွူ။ 24ဝွေꩻသီးကို ယင်ဟန်ႏသားနဝ်ꩻ ယွုမ်းလက္ခံႏ ဝွေꩻငဝ်း စွဉ်ႏတဲ့ အလင်ဖုံႏနဝ်ꩻ တယွုမ်းလက္ခံႏတဝ်းနဝ်ꩻသွူ။ 25နဝ်ꩻမꩻ ဝွေꩻသီး အချင်ꩻချင်ꩻ သဘော်ꩻတူႏလို့ဒွုမ်ဝင်ꩻတဲင် ထန်ႏလွေꩻထိုꩻစွဉ်ႏသွူ။ ပေါလု ဒေါ့ꩻဖေႏငဝ်း နုဲင်းယိုတစွိုးထွူ၊ “ကြောင်းစင် ဝိညာဉ်ႏတောႏနဝ်ꩻ စွဉ်ႏပရောဖဲစ် ဟေသျာယ ကဒေါ့ꩻဖေႏဒါႏ သီမွိုးဖြား ဖါဖြားသီးဖုံႏနဝ်ꩻ ဟဝ်ငါႏခွိုင်းကားမုဲင်ꩻ။ 26#ဟေသျာ ၆:၉၊၁၀ (LXX)။ ပွိုးဝွေꩻဒေါ့ꩻ၊
‘လွေꩻတဲင် ရိုꩻဖေႏသွော့ လိုꩻစားယိုဖုံႏဟုဲင်း။
သီနဝ်ꩻ နာႏနဝ်ꩻအဝ်ႏနာႏဒျာႏ၊ ကွဲႏတွော့ꩻ အီႏတသေနာႏတဝ်းသွူ။
သီနဝ်ꩻ ထွားနဝ်ꩻ အဝ်ႏထွားဒျာႏ၊ ကွဲႏတွော့ꩻ အီႏတထီႏတဝ်း။
27ကွပ်ပွိုး လိုꩻဖုံႏစားယိုနဝ်ꩻ ဉာဏ်ႏထွိုင်ꩻငါႏတဲင်၊
ဝွေꩻသီး အဝ်ႏပေ့ꩻခါꩻဒျာႏ အနားဖုံႏတွော့ꩻ၊
အဝ်ႏပေ့ꩻခါꩻဒျာႏ ဝွေꩻသီးမဲ့ဖုံႏ အတွက်သွူ။
မဉ်ႏတထွာတဝ်း နုဲင်းနဝ်ꩻနဝ်ꩻ ဝွေꩻသီးမဲ့ဖုံႏ အီႏထီႏဒျာႏ၊
ဝွေꩻသီးနားဖုံႏ အီႏဟွိုန်ဒျာႏ၊
ဝွေꩻသီးသဖုံႏ အီႏသေနာႏဒျာႏတဲင်၊
ဝွေꩻသီး အီႏသဲင်ꩻထေ့ချာဒျာႏ ခွေထျꩻ၊ ဗွေႏဘုရာꩻရိုꩻ၊
ခွေအီႏလုမ်ꩻလာꩻဟဝ်ဖေႏ ဝွေꩻသီး၊’” နုဲင်းနဝ်ꩻသွူ။
28တဲင်ပေါလု အွဉ်ႏသွတ်ꩻ တရာꩻ၊ “နဝ်ꩻထွူ ဗွေႏဘုရာꩻ ထာꩻကယ်ႏတင်ႏ တရာꩻ ဝွေꩻသီး ဖေႏကဟွိုန်ဗာႏနဝ်ꩻ အဝ်ႏပသာထေ့ဖေႏလဲဉ်း လိုꩻမျိုꩻလင်ဖုံႏထျꩻနဝ်ꩻ သီအီႏသေဗာႏ” နုဲင်းနဝ်ꩻသွူ။ 29ပေါလုဒေါ့ꩻနုဲင်းယိုထွူ ဂျူးလိုꩻမျိုꩻဖုံႏအကို အချင်ꩻချင်ꩻ ထေင်ကျမ်ꩻ မွေးစွဉ်ႏဝင်ꩻတွော့ꩻ ထန်ႏထိုꩻစွဉ်ႏဖုံႏသွူ။
30ပေါလု အုံသော့ꩻဒျာႏ ဝွေꩻကခတ်ꩻအုံဒါႏ လမ်းနဝ်ꩻ အကို နီနေင်ႏလွုမ်းတဲင် လိုꩻကလွဉ်မော့ꩻခွဲဒါႏဝွေꩻ ကားကအဝ်ႏနဝ်ꩻ ဝွေꩻရပ် ကျိုႏဆွုမ်ႏသွူ။ 31ပွိုင်းဝွို့တွမ်ႏ ဗွေႏဘုရာꩻခမ်းထီ နဲင်ႏငံႏတောႏခရာႏနဝ်ꩻ ဝွေꩻဟော်ꩻတဲင် ဗွေႏယေသျု ခရစ်တောႏခရာႏနဝ်ꩻ စွဉ်ႏထာꩻသꩻရုဲင်း တွမ်ႏလွစ်နမ်းစူꩻသꩻလꩻနဝ်ꩻ သွဉ်သင်ဖေႏစွဉ်ႏသွူ။
ទើបបានជ្រើសរើសហើយ៖
တမန်ႏတောႏ 28: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
