မာကု 14
14
ကျံႏမာꩻသီတေ့ꩻဗွေႏယေသျု
(မတဲ ၂၆:၁–၅။ လုကာ ၂၂:၁–၂။ ယောဟန် ၁၁:၄၅–၅၃)
1 #
ထလ ၁၂:၁–၂၇။ ယိုခါနဝ်ꩻ ထွာပွယ်ꩻပတ္တခါတွမ်ႏ အံႏတခိုး တမီႏတပါတဝ်း ခလားကတွိုႏ နီနီꩻနဝ်ꩻသွူ။ ယဇ်ပရောဟိတ် တန်ဖုံႏတွမ်ႏ ကျမ်ꩻဒါႏဆရာႏဖုံႏနဝ်ꩻ အဝ်ႏအညာꩻထွား အီႏဆွမ်ꩻတေ့ꩻ ဗွေႏယေသျုတွော့ꩻ အီႏမာꩻသီ ဝွေꩻဗွေႏနဝ်ꩻ အဝ်ႏထုမ်ႏအနယ်ꩻသွူ။ 2“ဝွေꩻသီးဒေါ့ꩻ၊ “ပွယ်ꩻကျာꩻနဝ်ꩻ နီမာꩻဗာႏတဝ်း မဉ်ႏမွေးတဝ်းမဲ့ꩻ လိုꩻဖုံႏအီႏရောင် သျွုတ်တရေင်ထာꩻ” နုဲင်းနဝ်ꩻသွူ။
တွမ်ႏနမ်းမန်ꩻဟွမ်ဆျာꩻလူးဖေႏဗွေႏယေသျုဒုံဗေတနိကို
(မတဲ ၂၆:၆–၁၃။ ယောဟန် ၁၂:၁–၈)
3 #
လု ၇:၃၇၊ ၃၈။ ဗွေႏယေသျု အဝ်ႏဒုံဗေတနိကို ပါꩻခိုတဖြာꩻ ကအဝ်ႏခံႏစာꩻဗာႏ အတွက်ရောႏဂါႏသား သိမုန်အလမ်း နဝ်ꩻသွူ။ ဗွေႏယေသျု အဝ်ႏအံႏထာꩻအံႏကျာꩻနဝ်ꩻ ပါꩻမူႏတဖြာꩻ ပါတွမ်ႏ လုံးဗွာကောင်ႏ တဖြုံႏ ကအဝ်ႏသော့ꩻဗွေစွဉ်ႏ နာဒု နမ်းမန်ဟွမ်စဲစ်၊ အငိုꩻတန်ငါႏနဝ်ꩻ နွို့လွဉ်နဝ်ꩻသွူ။ ဝွေꩻမူႏမာꩻပꩻ အကောင်ႏတဲင် နမ်းမန်ꩻဟွမ်နဝ်ꩻ ဆျာꩻလူႏ ဗွေႏယေသျု ကတူႏနဝ်ꩻသွူ။ 4လိုꩻဖုံႏကအဝ်ႏဒါႏ နဝ်ꩻကိုသား ယင်ဟန်ႏနဝ်ꩻ သꩻလျားလွဉ်ထာꩻတဲင် ဒေါ့ꩻဖေႏလို့ဝင်ꩻ တဖြာꩻတွမ်ႏတဖြာꩻ၊ “ပွိုးတမုဲင်ꩻ မာꩻသွုမ်ꩻထိုꩻဗာႏတွိုႏ နမ်းမန်ꩻဟွမ် နုဲင်းနဝ်ꩻဟောင်း။ 5မဉ်ႏစာထိုꩻ နမ်းမန်ဟွမ်နဝ်ꩻ လꩻနွောင်ꩻရွဉ်ယာႏ သွံစွဲလွိုတဲင် ရွဉ်ယိုဖေႏထိုꩻ လိုꩻကေန်ꩻခြောနဝ်ꩻ ကယိန်းဟဝ်” နုဲင်းနဝ်ꩻတဲင် ဝွေꩻသီး ပဲစ်ဒင်ႏမွေးစွဉ်ႏ ဝွေꩻမူႏနဝ်ꩻသွူ။
6ကွဲႏတွော့ꩻ ဗွေႏယေသျုဒေါ့ꩻ၊ “အွဉ်ႏဗော့ꩻဝွေꩻမူႏ နုဲင်းနဝ်ꩻဟုဲင်း။ ပွိုးတမုဲင်ꩻ ပဲစ်ဒင်ႏဗာႏတွိုႏ ဝွေꩻမူႏ၊ ခွေတာႏနဝ်ꩻ ဝွေꩻမူႏ အဝ်ႏမာꩻလဲဉ်း ထာꩻဟဝ်တွမ်ႏ ထာꩻတရေꩻနဝ်ꩻသွူ။ 7#ဟော်ꩻ ၁၅:၁၁။ သီအီႏအဝ်ႏငီꩻ သေႏသေႏစွဉ်ႏ လိုꩻကေန်ꩻခြောဖုံႏတဲင် အချိန်ႏမုဲင်ꩻတယဝ်း သီမဉ်ႏမဉ်စွဲကို ဝွေꩻသီးနဝ်ꩻ စွဲကိုနွောင်ꩻ ဝွေꩻသီးသွူ။ ကွဲႏတွော့ꩻ သီအီႏတအဝ်ႏငီꩻ သေႏသေႏတဝ်း တွမ်ႏခွေနဝ်ꩻသွူ။ 8နုဲင်းဝွေꩻမူႏ ကမာꩻနွောင်ꩻနဝ်ꩻ ဝွေꩻမူႏမာꩻလဲဉ်းသွူ။ ဝွေꩻမူႏ ကဆျာꩻလူးဒါႏ ခွေနမ်းခန္ဓာႏလောင်းနဝ်ꩻ ကအီႏသင်္ဂြိုဟ်ႏတာႏ ဖျင်ရဲဉ်ꩻ ရီးလဲဉ်းနဝ်ꩻသွူ။ 9ယိုခါ ခွေဒေါ့ꩻဖေႏသီ အမွေး၊ ခင်ႏလမ်းမုဲင်ꩻကိုတယဝ်း ကအဝ်ႏဟော်ꩻဒါႏ သတင်ꩻဟဝ် တဟံႏတန်လွုမ်း၊ နုဲင်းဝွေꩻမူႏ ကမာꩻလဲဉ်းဒါႏဖုံႏနဝ်ꩻ ယူႏလꩻတွော့ꩻ အီႏဒေါ့ꩻနယ်ဗာႏ ဝွေꩻမူႏခရာႏ” နုဲင်းနဝ်ꩻသွူ။
သစ္စာႏအီႏဖေါက်ဗွေႏယေသျုနဝ်ꩻယုဒသဘော်ꩻတူႏ
(မတဲ ၂၆:၁၄–၁၆။ လုကာ ၂၂:၃–၆)
10နဝ်ꩻထွူ တပဲ့တောႏ တဆီနီပါꩻကိုတပါꩻ ကထွာယုဒ သျာကရုတ်နဝ်ꩻ သစ္စာႏဖေါက် ဗွေႏယေသျုတွော့ꩻ အီႏအပ်ဖေႏ ဝွေꩻသီးစူကိုနဝ်ꩻ ထန်ႏလွေꩻထေ့ ယဇ်ပရောဟိတ် တန်ဖုံႏထျꩻသွူ။ 11နုဲင်းယုဒသျာကရုတ် ကဒေါ့ꩻ ဝွေꩻသီးထွိုင်ႏဟွိုန်နဝ်ꩻ သꩻဟဝ်ငါႏတဲင် အီႏဖေႏဝွေꩻရွဉ်နဝ်ꩻ အွဉ်ႏဂတိစွဉ်ႏနဝ်ꩻသွူ။ နဝ်ꩻမꩻ ဖေႏကအပ်သော့ꩻ ဗွေႏယေသျု ဝွေꩻသီးစူကိုနဝ်ꩻ ယုဒအဝ်ႏထုမ်ႏထွား အဆင်ႏရော့ꩻနဝ်ꩻသွူ။
ဗွေႏယေသျုတွမ်ႏဝွေꩻဗွေႏတပဲ့တောႏဖုံႏအံႏငီꩻဝင်ꩻပတ္တခါထာꩻအံႏ
(မတဲ ၂၆:၁၇–၂၅။ လုကာ ၂၂:၇–၁၄။ ယောဟန် ၁၃:၂၁–၃၀)
12ပွယ်ꩻအံႏဗာႏ တခိုးတမီႏ တပါဗာႏတဝ်း အရီးသွတ်ꩻနီꩻ၊ ပွယ်ꩻပတ္တခါ ထာꩻအံႏတာႏ ကအဝ်ႏမာꩻသီဗာႏ သွိုꩻဖုံႏနီꩻနဝ်ꩻ ဗွေႏယေသျု တပဲ့တောႏဖုံႏ ရီဝွေꩻဗွေႏ၊ “နီဗွေႏ မဉ်အွဉ်ႏနီလွေꩻ ဖျင်ရဲဉ်ꩻသေꩻမꩻ နီဗွေႏတာႏ ပွယ်ꩻပတ္တခါ ထာꩻအံႏ ခင်ႏလမ်းမုဲင်ꩻကိုဟောင်း” နုဲင်းနဝ်ꩻသွူ။
13နဝ်ꩻထွူ ဗွေႏယေသျု အွဉ်ႏစွꩻလွေꩻ ဝွေꩻသီးအကို ဝင်ꩻနီ စွဉ်ႏငဝ်းထွန်ႏနုဲင်းယို၊ “နွို့လွေꩻ ဝေင်ꩻသူꩻတွော့ꩻ ပါꩻခိုတဖြာꩻ အဝ်ႏထမ်ႏ ထီဖွိုင်ꩻအဲင်ႏ တဖြုံႏနဝ်ꩻ အီႏမော့ꩻခွဲသီသွူ။ သဲင်ꩻလွဉ်ꩻသွော့ဝွေꩻ၊ 14ဝွေꩻကနွို့သော့ꩻဒါႏ လမ်းကိုနဝ်ꩻ ရိုꩻဖေႏသွော့ လမ်းဗွေႏ၊ ‘ဆရာႏရိုꩻ၊ ခွေတပဲ့တောႏဖုံႏတွမ်ႏ ခွေအီႏအံႏဗာႏ ပွယ်ꩻပတ္တခါ ခင်ႏလမ်းအခန်ꩻနဝ်ꩻ အဝ်ႏမုဲင်ꩻကိုဟောင်း’ နုဲင်းနဝ်ꩻထွူ။ 15နဝ်ꩻထွူ ဝွေꩻအီႏအွဉ်ႏနယ်သီ အခန်ꩻလုဲင်းတခန်ꩻ၊ အထပ်ကီတဲင် နီတာႏနဝ်ꩻ သီအီႏဖျင်ရဲဉ်ꩻ သေꩻမꩻလို့ဗာႏ နဝ်ꩻကို” နုဲင်းနဝ်ꩻသွူ။
16တပဲ့တောႏဖုံႏ ထန်ႏတွော့ꩻ လွေꩻထိုꩻဝေင်ꩻတဲင် နုဲင်းဗွေႏယေသျု ကဒေါ့ꩻနယ်ဖေႏလဲဉ်း ဝွေꩻသီးအတွိုင်ꩻနဝ်ꩻ ထီႏစွဉ်ႏနဝ်ꩻမꩻ ဝွေꩻသီး ဖျင်ရဲဉ်ꩻသေꩻမꩻ ပတ္တခါ ထာꩻအံႏဖုံႏနဝ်ꩻသွူ။
17မွူးထွိုင်ႏဟာနဝ်ꩻ ဗွေႏယေသျုစွဉ်ႏ အပဲ့တောႏ တဆီနီဖြာꩻ ဖျော်လွဉ်နဝ်ꩻသွူ။ 18#သာ ၄၁:၉။ ဝွေꩻသီးအဝ်ႏအံႏ ထာꩻအံႏခွုံႏလောင်းကျာꩻနဝ်ꩻ ဗွေႏယေသျုဒေါ့ꩻဖေႏ၊ “ခွေအွဉ်ႏဒေါ့ꩻနယ်သီ သီအကို ပါꩻအဖြာꩻ ကအံႏငီꩻဒါႏ စွဉ်ႏခွေနဝ်ꩻ သစ္စာႏအီႏဖေါက်ခွေ” နုဲင်းနဝ်ꩻသွူ။
19တပဲ့တောႏဖုံႏနဝ်ꩻ သꩻကုဲင်တဲင် ရီစစွဉ်ႏဝွေꩻဗွေႏ တဖြာꩻထွူတဖြာꩻ၊ “အမဲဉ်ႏနဝ်ꩻ နီဗွေႏမဉ်ဒေါ့ꩻခွေသွဉ်း တမွေးတဝ်း ကရိုꩻ၊ မွေးနေဗွေႏ၊” နုဲင်းနဝ်ꩻသွူ။
20ဗွေႏယေသျုလဝ်းချာ၊ “နဝ်ꩻနဝ်ꩻ အီႏထွာဒျာႏ သီတဆီနီꩻဖြာꩻကို တဖြာꩻ ပါꩻအဖြာꩻ အကစုပ်ꩻသော့ꩻငီꩻဒါႏ တခိုး ခွေဝန်ႏကိုနဝ်ꩻသွူ။ 21နုဲင်းလိတ်ကျမ်ꩻ ကရိုꩻဒါႏ ဝွေꩻအီႏသီဗာႏ အတွိုင်ꩻနဝ်ꩻ လိုꩻပိုခိုနဝ်ꩻ အီႏသီဗာႏနဝ်ꩻသွူ။ ကွဲႏတွော့ꩻ ပါꩻသစ္စာႏ ကအီႏဖေါက်ဒါႏ လိုꩻပိုခိုတာႏနဝ်ꩻ ဟဝ်ငမ်းသꩻငါႏ ခွိုင်းကားမုဲင်ꩻ။ ပါꩻခိုနဝ်ꩻ တွက်တာႏ မုဲင်ꩻခါတဲ့ ဝွေꩻမဉ်ႏ တလွူးလွဉ်တဝ်းနဝ်ꩻ ကယိန်းဟဝ်” နုဲင်းနဝ်ꩻသွူ။
ထာဝရဘုရာꩻပွယ်ꩻတောႏ
(မတဲ ၂၆:၂၆–၃၀။ လုကာ ၂၂:၁၄–၂၀။ ၁ကော ၁၁:၂၃–၂၅)
22ဝွေꩻသီးအဝ်ႏအံႏ ထာꩻအံႏကျာꩻ ဗွေႏယေသျု ထူႏတခိုးတခဝ် အုပ်ꩻထင်ႏကေꩻဇူꩻတောႏ အဲ့ꩻတခိုးတဲင် တခိုးနဝ်ꩻ ဖေႏဝွေꩻဗွေႏ တပဲ့တောႏဖုံႏသွူ။ ဝွေꩻဗွေႏဒေါ့ꩻ “ယိုနဝ်ꩻ ထွာခွေရုပ်ခန္ဓာႏ၊ အံႏဟုဲင်း” နုဲင်းနဝ်ꩻသွူ။
23နဝ်ꩻထွူ ဗွေႏယေသျု ထူႏတကောက်ꩻ တဖြုံႏတွော့ꩻ အုပ်ꩻထင်ႏ ဗွေႏဘုရာꩻ ကေꩻဇူꩻတောႏတဲင် ဖေႏဝွေꩻသီးတွော့ꩻ ဝွေꩻသီး ကားကအဝ်ႏ အွꩻစွဉ်ႏသွူ။ 24#ထလ ၂၄:၈၊ ယေ ၃၁:၃၁–၃၄။ ဗွေႏယေသျုဒေါ့ꩻ၊ “ယိုနဝ်ꩻထွာ ခွေအသွီႏ ကထောက်ꩻဖေႏဒါႏ လိုꩻအာငါႏဖုံႏတာႏ၊ ခွေသွီႏ ကတောက်ꩻဖေႏဒါႏ ဗွေႏဘုရာꩻ အပဋိညာဉ်ႏ စွုမ်ႏတံꩻဆိပ်နဝ်ꩻသွူ။ 25ခွေဒေါ့ꩻဖေႏသီ ဗꩻတွိုႏစွဉ်ႏ အနီꩻ ခွေကအွꩻ ဝုဲင်တသာ ဗွေႏဘုရာꩻ ခမ်းထီကိုနဝ်ꩻ ဝုဲင်ယို မုဲင်ꩻခါတဲ့ ခွေအီႏအွꩻထဲင်း ဗာႏတဝ်းဒွုမ်” နုဲင်းနဝ်ꩻသွူ။
26နဝ်ꩻထွူ ဝွေꩻသီးရွစ် ဓမ္မငဝ်းသꩻချင်ꩻ တပုဒ်တဲင် ထန်ႏလွေꩻထိုꩻစွဉ်ႏ ကောင်သံလွေင်နဝ်ꩻသွူ။
ပေတရုအီႏပယ်ႏနဝ်ꩻဗွေႏယေသျုဟော်ꩻခါꩻရီး
(မတဲ ၂၆:၃၁–၃၅။ လုကာ ၂၂:၃၁–၃၄။ ယောဟန် ၁၃:၃၆–၃၈)
27 #
ဇာ ၁၃:၇။ ဗွေႏယေသျု ဒေါ့ꩻဖေႏဝွေꩻသီး၊ “သီကားကအဝ်ႏနဝ်ꩻ အီႏအွဉ်ႏကုဲင်ထိုꩻ ခွေတဲင် အီႏဖင်းညာꩻထိုꩻလို့၊ ပွိုးလိတ်ကျမ်ꩻနဝ်ꩻရိုꩻ၊ ‘ဗွေႏဘုရာꩻ အီႏမာꩻသီထိုꩻ သွိုꩻတီသားတဲင် သွိုꩻဖုံႏနဝ်ꩻ အီႏလီလာထိုꩻလို့’ နုဲင်းနဝ်ꩻသွူ။ 28#မ ၂၈:၁၆။ ကွဲႏတွော့ꩻ ခွေအဝ်ႏထာꩻသီကို ထွိုင်ႏမွန်လွဉ်ထွူ ခွေအီႏလွေꩻရီးသီ ကာလိလဲခမ်း” နုဲင်းနဝ်ꩻသွူ။
29ပေတရုလဝ်းချာ၊ “ကအဝ်ႏကုဲင်ဒါႏ လိုꩻဖုံႏ ကားကအဝ်ႏနဝ်ꩻ လဲင်ꩻအွဉ်ႏကုဲင်ထိုꩻစွဉ်ႏ နီဗွေႏတဲ့ ခွေနဝ်ꩻ မုဲင်ꩻခါတဲ့ အီႏတအွဉ်ႏကုဲင်ထိုꩻတဝ်း နီဗွေႏ” နုဲင်းနဝ်ꩻသွူ။
30ဗွေႏယေသျု ဒေါ့ꩻဖေႏပေတရု၊ “ခွေဒေါ့ꩻဖေႏနာꩻ ဟန်ႏနာꩻယို ခလားဆျာထီး ကအူႏနီလဲင်ႏ နာꩻအီႏရိုꩻ နာꩻတသေꩻငါꩻတဝ်းခွေ သွံလဲင်ႏ” နုဲင်းနဝ်ꩻသွူ။
31ပေတရု ကယိန်းဒေါ့ꩻခြေင်းထဲင်း၊ “ခွေမဉ်ႏလဲင်ꩻသီငီꩻနေး နီဗွေႏစွဉ်ႏတဲ့ မုဲင်ꩻခါတဲ့ ခွေအီႏတရိုꩻတဝ်း နုဲင်းနဝ်ꩻ” နုဲင်းနဝ်ꩻတဲင်၊
တပဲ့တောႏ အလင်ဖုံႏ ကားကအဝ်ႏနဝ်ꩻတဲ့ ဒေါ့ꩻဗွိုန်နုဲင်းနဝ်ꩻ နေနေသွူ။
ဗွေႏယေသျုဆုတောင်ꩻဂေတသျေမန်ဥယျာဉ်ႏကို
(မတဲ ၂၆:၃၆–၄၆။ လုကာ ၂၂:၃၉–၄၆)
32ဝွေꩻသီးဖျော်လွဉ် ခင်ႏလမ်းတထွောင်း ကဟဲ့ꩻဒါႏ ဂေတသျေမန်တဲင် ဗွေႏယေသျုဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “ခွေအဝ်ႏဆုတောင်ꩻကျာꩻနဝ်ꩻ အုံလင်ꩻသွော့ ယိုကိုဟုဲင်း” နုဲင်းနဝ်ꩻသွူ။ 33ဝွေꩻဗွေႏ ဟဲ့ꩻလွေꩻပါစွဉ်ႏ ပေတရု၊ ယာကုပ် တွမ်ႏယောဟန်နဝ်ꩻသွူ။ ထာꩻသꩻခိုးလျားတွမ်ႏ ထာꩻဆာဝေႏဒနာႏနဝ်ꩻ ဖျော်လွဉ်လူးစွဉ်ႏ ဝွေꩻဗွေႏလောင်းတဲင်၊ 34ဝွေꩻဗွေႏ ဒေါ့ꩻဖေႏဝွေꩻသီး၊ ခွေသꩻကို သꩻပေႏသန်ငါႏလွဉ်ꩻ နဝ်ꩻမꩻ ခွေသꩻ အီႏပꩻဖွန်ႏထိုꩻနေးသွူ။ အုံယိုကိုတဲင် အုံပွေါးသွော့” နုဲင်းနဝ်ꩻသွူ။
35ဝွေꩻဗွေႏ လွေꩻငါထဲင်းတစိꩻ ဝွေꩻဗွေႏ အွပ်ꩻလင်ꩻဟံႏလောင်းတဲင် ဆုတောင်ꩻ မဉ်ႏထွာနွောင်ꩻနဝ်ꩻ ဝွေꩻဗွေႏ တမဉ်ဖျတ်ကာႏလွေꩻတဝ်း ထာꩻဒုက္ခချိန်ႏ ကာႏလနဝ်ꩻသွူ။ 36ဝွေꩻဗွေႏဆုတောင်ꩻ၊ “ဖါတောႏ၊ ခွေဖါဗွေႏ၊ နီဗွေႏတာႏ ထာꩻကားကအဝ်ႏနဝ်ꩻ ထွာနွောင်ꩻဒျာႏသွူ။ ထာꩻဒုက္ခတကောက်ꩻ ကအဝ်ႏခွေထျꩻယိုနဝ်ꩻ ထူႏညာꩻထိုꩻ ဖေႏဗဲင်းမွိုင်။ ကွဲႏတွော့ꩻ ဖေႏကထွာမွိုန်း ခွေအလိုႏ၊ ဖေႏကထွာသွော့ နုဲင်းနီဗွေႏ အလိုႏတောႏ” နုဲင်းနဝ်ꩻသွူ။
37နဝ်ꩻထွူ ဝွေꩻဗွေႏ ခွယ်သဲင်ꩻချာတဲင် ထီႏဗာႏ တပဲ့တောႏဝင်ꩻသွံ အဝ်ႏဗေင်ႏအွီႏထာꩻနဝ်ꩻသွူ။ ဝွေꩻဗွေႏ ဒေါ့ꩻဖေႏပေတရု၊ “သိမုန် နာꩻနဝ်ꩻ အဝ်ႏဗေင်ႏအွီႏ ဒျာႏကထာꩻဟောင်း။ နာꩻအုံထွိုင်ႏငါ တနာႏရီႏငါတဲ့ တနွောင်ꩻတဝ်းဒွုမ်ဟောင်း” နုဲင်းနဝ်ꩻသွူ။ 38တဲင်ဝွေꩻဗွေႏ ဒေါ့ꩻဖေႏဝွေꩻသီး၊ “ဖေႏသီ ကထဲ့သော့ꩻထိုꩻမွိုန်း ထာꩻသွေꩻကုဲင်ကိုနဝ်ꩻ အွဉ်ႏသတိ အုံပွေါးတဲင် ဆုတောင်ꩻသွော့။ ဝိညာဉ်ႏအာႏ အဝ်ႏစွဉ်ႏတဲ့ သွီႏယာႏနဝ်ꩻ အာႏဆေ့ꩻငါႏ” နုဲင်းနဝ်ꩻသွူ။
39ဝွေꩻဗွေႏ လွေꩻငါထဲင်းယင်း တလဲင်ႏတဲင် ဆုတောင်ꩻငဝ်း ဗွိုန်နုဲင်းနဝ်ꩻနေနေသွူ။ 40နဝ်ꩻထွူ ဝွေꩻဗွေႏ သဲင်ꩻထေ့ချာ တပဲ့တောႏဖုံႏ တဲင်ထီႏဗာႏ ဝွေꩻသီး အဝ်ႏဗေင်ႏအွီႏဒျာႏ ထာꩻဖုံႏသွူ။ ဝွေꩻသီး အဲ့ꩻအမဲ့ဖုံႏငါတဲ့ တနွောင်ꩻတဝ်းဖုံႏသွူ။ တဲင်ဝွေꩻသီး အီႏဒေါ့ꩻဖေႏ ဝွေꩻဗွေႏနုဲင်းမုဲင်ꩻတဲ့ တသေတဝ်းသွူ။
41ဝွေꩻဗွေႏ သဲင်ꩻလွဉ်ချာ ထွိုင်ႏဗွေ သွံလဲင်ႏချိန်ႏနဝ်ꩻ ဝွေꩻဗွေႏ ဒေါ့ꩻဖေႏဝွေꩻသီး၊ “သီ အဝ်ႏဗေင်ႏအွီႏနေကတဲင် အဝ်ႏအုံပဆား နေကဟောင်း၊ အွဉ်ႏထွူခန်းဟုဲင်း၊ အချိန်ႏတွိုႏလဲဉ်း။ ထွားမွိုင်၊ ယိုခါ လိုꩻပိုခိုနဝ်ꩻ အီႏအပ်သော့ꩻဖေႏ အပဲစ်တန်ꩻခိုꩻသား စူကိုနဝ်ꩻ အချိန်ႏတွိုႏလဲဉ်း။ 42ထွိုင်ႏဟုဲင်း၊ နီလွေꩻတွမ်။ ထွားဟုဲင်း၊ ပါꩻယိုနဝ်ꩻထွာ လိုꩻသစ္စာႏဖေါက်ခွေ” နုဲင်းနဝ်ꩻသွူ။
ဆွမ်ꩻဗွေႏယေသျု
(မတဲ ၂၆:၄၇–၅၆။ လုကာ ၂၂:၄၇–၅၃။ ယောဟန် ၁၈:၃–၁၂)
43ဗွေႏယေသျု အဝ်ႏဒေါ့ꩻနေကထာꩻချိန်ႏ တပဲ့တောႏ တဆီနီဖြာꩻကိုတဖြာꩻ ကထွာယုဒနဝ်ꩻ ဖျော်လွဉ်သွူ။ ဝွေꩻနဝ်ꩻ ပါလွဉ်စွဉ်ႏ လိုꩻစွိုꩻတစွိုꩻ စူခွုမ်လက်နက်သား ပါစွဉ်ႏနꩻဖုံႏ ဗင်ဖုံႏတွော့ꩻ ထွာဒျာႏ ယဇ်ပရောဟိတ်တန်ဖုံႏ၊ ကျမ်ꩻဒါႏဆရာႏဖုံႏတွမ်ႏ လိုꩻတန်ဖုံႏ ကအွဉ်ႏစွꩻလွဉ် လိုꩻဖုံႏနဝ်ꩻသွူ။ 44သစ္စာႏဖေါက်နဝ်ꩻ ဖေႏလိုꩻစွိုꩻဖုံႏ အမတ်လက္ခဏာႏတစွိုး၊ “ပါꩻခို ခွေကနို့ꩻဒါႏနဝ်ꩻ ထွာသီကမဉ်လꩻဒါႏ အဖြာꩻနဝ်ꩻသွူ။ ဆွမ်ꩻဝွေꩻတဲင် စွဉ်ႏစဲ့ꩻပွေါးရံႏသားဖုံႏနဝ်ꩻ ဟဲ့ꩻလွေꩻညာꩻထိုꩻခန်းဟုဲင်း” နုဲင်းနဝ်ꩻသွူ။
45ယုဒထွိုင်ႏဖျော် တလဲင်ႏချင်ႏ ဝွေꩻလွေꩻထေ့စွဉ်ႏ ဗွေႏယေသျုထျꩻ တဲင်ဒေါ့ꩻ၊ “ဆရာႏ” နုဲင်းနဝ်ꩻတဲင် နို့ꩻစွဉ်ႏဝွေꩻဗွေႏနဝ်ꩻသွူ။ 46နဝ်ꩻမꩻ ဝွေꩻသီးဆွမ်ꩻစွဉ်ႏ ဗွေႏယေသျုတဲင် စွိုင်စွဉ်ႏ ဝွေꩻဗွေႏနဝ်ꩻသွူ။ 47ကွဲႏတွော့ꩻ ပါꩻအဖြာꩻ ကအဝ်ႏအုံထွိုင်ႏထာꩻ နဝ်ꩻကိုနဝ်ꩻ ဗဲ့ꩻအနꩻတဲင် ဗက်ꩻစွဉ်ႏ ယဇ်ပရောဟိတ် အသွဉ်းတဖြာꩻတွော့ꩻ ဝွေꩻနားလာႏ တပစ်ꩻထိုꩻစွဉ်ႏနဝ်ꩻသွူ။ 48နဝ်ꩻထွူ ဗွေႏယေသျု ဒေါ့ꩻထန်ႏတဲင် ဒေါ့ꩻဖေႏဝွေꩻသီး၊ “ကအီႏဆွမ်ꩻခွေနဝ်ꩻ သီအီလွဉ်ဗာႏစွဉ်ႏနꩻ စွဉ်ႏဗင်ဖုံႏ ခွေနဝ်ꩻနုဲင်းစွဉ်ႏ အဝ်ႏထွာ အမုပဲစ်သားတဖြာꩻ နုဲင်းမုဲင်ꩻဟောင်း။ 49#လု ၁၉:၄၇၊ ၂၁:၃၇။ တနီꩻထွူတနီꩻ ခွေအဝ်ႏသွဉ်သင် သော့ꩻဖေႏ ဗိမာန်ႏတောႏကျောင်ꩻ ကိုနဝ်ꩻ သီတဆွမ်ꩻတဝ်းခွေသွူ။ ကွဲႏတွော့ꩻ လိတ်ကျမ်ꩻနဝ်ꩻ အီႏဗွေမဲဉ်ႏလွဉ်ဗာႏ” နုဲင်းနဝ်ꩻသွူ။
50နဝ်ꩻထွူ တပဲ့တောႏဖုံႏ ကားကအဝ်ႏ အွဉ်ႏကုဲင် ဝွေꩻဗွေႏတဲင် ဖင်းညာꩻထိုꩻစွဉ်ႏသွူ။
51လိုꩻခိုယွဲတဖြာꩻ အဝ်ႏကွဉ်ကꩻ ပိတ်ယာႏချော်ꩻနဝ်ꩻ အဝ်ႏထွောင်လွဉ်ꩻ ဗွေႏယေသျုသွူ။ ဝွေꩻသီး ကျံႏဆွမ်ꩻထိုꩻဝွေꩻ၊ 52ကွဲႏတွော့ꩻ၊ ဝွေꩻအွဉ်ႏကုဲင်ထိုꩻ အခွမ်ꩻလာꩻတဲင် ဖင်းတလီꩻညာꩻထိုꩻစွဉ်ႏသွူ။
ဗွေႏယေသျုတွိုႏဖျော်လွေꩻကောင်စီလိုꩻတန်စွိုꩻဆꩻငါ
(မတဲ ၂၆:၅၇–၆၈။ လုကာ ၂၂:၅၄–၅၅၊ ၆၃-၇၁။ ယောဟန် ၁၈:၁၃၊ ၁၄၊ ၁၉-၂၄)
53နဝ်ꩻထွူ ဗွေႏယေသျုနဝ်ꩻ ဟဲ့ꩻလွေꩻထိုꩻ ယဇ်ပရောဟိတ်ခွန် အလမ်း၊ နဝ်ꩻကို ယဇ်ပရောဟိတ်တန်ဖုံႏ ကားကအဝ်ႏ၊ လိုꩻတန်ဖုံႏတွမ်ႏ ကျမ်ꩻဒါႏဆရာႏဖုံႏ ကားကအဝ်ႏ အဝ်ႏစုဗူႏလို့ဝင်ꩻနဝ်ꩻသွူ။ 54ပေတရုနဝ်ꩻ အဝ်ႏထောင်လွဉ်ꩻ ညာꩻနေးတဲင် နွို့လွေꩻသော့ꩻ ယဇ်ပရောဟိတ်ခွန် အလမ်းဝဲင်ꩻနဝ်ꩻသွူ။ နဝ်ꩻကို ဝွေꩻအုံလင်ꩻငီꩻစွဉ်ႏ စဲ့ꩻပွေါးသားဖုံႏ အဝ်ႏအုံစို့ꩻမေႏနဝ်ꩻသွူ။ 55ဖေႏနေး ကမာꩻသီလꩻ ဗွေႏယေသျုနဝ်ꩻ ယဇ်ပရောဟိတ် တန်ဖုံႏတွမ်ႏ ကောင်စီလိုꩻတန် တစွိုꩻလွုမ်းနဝ်ꩻ အဝ်ႏထုမ်ႏ သက်သေႏ ယင်ဟန်ႏ။ ကွဲႏတွော့ꩻ ဝွေꩻသီး ထုမ်ႏမော့ꩻနွောင်ꩻတဝ်း တစိꩻစိꩻသွူ။ 56သက်သေႏ ကဒေါ့ꩻဆန်ချာဒါႏ ဗွေႏယေသျုနဝ်ꩻ အာငါႏစွဉ်ႏတဲ့ ဝွေꩻသီး သက်သေႏနဝ်ꩻ အထျꩻအနာ တငီႏလို့တဝ်းဝင်ꩻဖုံႏသွူ။
57နဝ်ꩻထွူ လိုꩻခိုယင်ဟန်ႏ အဝ်ႏအုံထွိုင်ႏတဲင် ဒေါ့ꩻဆန်လိန်ႏလဲဉ် ဗွေႏယေသျု နုဲင်းယိုသွူ။ 58#ယော ၂:၁၉။ “နီဟွိုန်ဝွေꩻရိုꩻ၊ ‘ လိုꩻကအဝ်ႏမာꩻဒါႏ ဗိမာန်ႏတောႏကျောင်ꩻယိုနဝ်ꩻ ခွေအီႏမာꩻပြင်ꩻလင်ꩻတဲင် သွံနီꩻထွူ တွမ်ႏလိုꩻစူ တမာꩻဗာႏနေးတဝ်းနဝ်ꩻ ခွေအီႏတယ်ႏ ဗိမာန်ႏတောႏကျောင်ꩻ တဖြုံႏ’” နုဲင်းနဝ်ꩻသွူ။ 59ကွဲႏတွော့ꩻ ဝွေꩻသီး လဲင်ꩻစွဲꩻတရာꩻ နုဲင်းနဝ်ꩻစွဉ်ႏတဲ့ ဝွေꩻသီးသက်သေႏ ထျꩻနာ တညီႏလို့တဝ်းဝင်ꩻနဝ်ꩻသွူ။
60ယဇ်ပရောဟိတ်ခွန် အုံထွိုင်ႏ ဝွေꩻသီးကားကအဝ်ႏ ဆꩻငါတဲင် ရီဗွေႏယေသျု၊ “ဝွေꩻသီး ကစွဲꩻတရာꩻနာꩻနဝ်ꩻ နာꩻတလဝ်းချာတဝ်း ဝွေꩻသီး နုဲင်းမုဲင်ꩻဟောင်း” နုဲင်းနဝ်ꩻသွူ။
61ကွဲႏတွော့ꩻ ဗွေႏယေသျု အုံဒျာႏတေ့ꩻတေ့ꩻတဲင် တဒေါ့ꩻချာတဝ်း တငွါငွါနဝ်ꩻသွူ။ ယဇ်ပရောဟိတ်ခွန် ရီဖျင်ဝွေꩻဗွေႏတလဲင်ႏ၊ “နာꩻနဝ်ꩻထွာ မေသျိယ မင်္ဂလာႏကအဝ်ႏငါႏ ဗွေႏဘုရာꩻပိုခို မွေးနေဟောင်း” နုဲင်းနဝ်ꩻသွူ။
62 #
ဒံ ၇:၁၃။ ဗွေႏယေသျုလဝ်းချာ၊ “မွေးခွေသွူ၊ နုဲင်းနဝ်ꩻတဲင် လိုꩻပိုခိုနဝ်ꩻ အုံလင်ꩻ အနန္တတန်ꩻခိုꩻ စူထွေဖဲ့ꩻတဲင် အဝ်ႏခမ်းထီမို့ꩻလောင်း ထုမ်းမို့ꩻအေႏ အဝ်ႏကျွꩻလွဉ်ထာꩻနဝ်ꩻ သီအီႏထီႏဗာႏ” နုဲင်းနဝ်ꩻသွူ။
63ယဇ်ပရောဟိတ်ခွန်နဝ်ꩻ အဲ့ꩻသဲ့ ဝွေꩻဆဲင်ꩻယွုံးတန်တဲင်ဒေါ့ꩻ၊ “နီအဝ်ႏလိုႏထဲင်းတဝ်းဒွုမ် သက်သေႏတစွိုးစွိုး။ 64#ဝိ ၂၄:၁၆။ ဝွေꩻပဲစ်မာႏလဲဉ်း ဗွေႏဘုရာꩻနဝ်ꩻ သီအဝ်ႏဟွိုန်လဲဉ်းဒျာႏ။ သီနဝ်ꩻ အီႏဆွုံꩻဖျတ် နုဲင်းမုဲင်ꩻဟောင်း” နုဲင်းနဝ်ꩻသွူ။
ဝွေꩻသီး ကားကအဝ်ႏ ထောက်ꩻခံႏ ဆန်ချာစွဉ်ႏ ဝွေꩻဗွေႏနဝ်ꩻသွူ။ ဝွေꩻနဝ်ꩻ အပဲစ်အဝ်ႏတဲင် အီႏဖေႏထွိုက် ထာꩻသီတံႏနဝ်ꩻသွူ။
65ဝွေꩻသီး ယင်ဟန်ႏနဝ်ꩻ စတဲင် ပထိုလူး ဗွေႏယေသျုတဲင် ဝွေꩻသီး ပေ့ꩻဝွေꩻဗွေႏ မဲ့တွော့ꩻ တွဲႏစွဉ်ႏ ဝွေꩻဗွေႏသွူ။ ဝွေꩻသီးဒေါ့ꩻ၊ “ပါꩻမုဲင်ꩻတွဲႏနာꩻနဝ်ꩻ ထင်းဟုဲင်း” နုဲင်းနဝ်ꩻသွူ။ တဲင်စဲ့ꩻပွေါးရံႏသားဖုံႏ ဟဲ့ꩻဝွေꩻဗွေႏတဲင် တဗꩻဝွေꩻဗွေႏနဝ်ꩻသွူ။
ပေတရုပယ်ႏထိုꩻဗွေႏယေသျု
(မတဲ ၂၆:၆၉–၇၅။ လုကာ ၂၂:၅၆–၆၂။ ယောဟန် ၁၈:၁၅–၁၈၊၂၅-၂၇)
66ပေတရု အဝ်ႏအုံလင်ꩻသော့ꩻနေက လမ်းပတ္တဝွိုင်ꩻကိုချိန်ႏ ယဇ်ပရောဟိတ်ခွန် အသွဉ်းမူႏ လွဉ်ဗော့ꩻဝွေꩻထျꩻတဲင်၊ 67ဝွေꩻမူႏထွိုင်ႏထီႏ ပေတရု အဝ်ႏအုံစို့ꩻမေႏနဝ်ꩻ ဝွေꩻမူႏထွားစဲင်း ဝွေꩻတဲင်ဒေါ့ꩻ၊ “နာꩻနဝ်ꩻတဲ့ အဝ်ႏငီꩻစွဉ်ႏ နာဇရဲစ်ဝေင်ꩻသား ယေသျု ၊” နုဲင်းနဝ်ꩻသွူ။
68ကွဲႏတွော့ꩻ ဝွေꩻထေင်ချာ၊ “ခွေတသေတဝ်း၊ နာꩻအဝ်ႏဒေါ့ꩻ တမုဲင်ꩻခရာႏနဝ်ꩻ ခွေတသေနာႏတဝ်း” ဝွေꩻလဝ်းချာ နုဲင်းနဝ်ꩻတဲင် ထန်ႏလွေꩻစွဉ်ႏ ထာꩻငွါနဝ်ꩻသွူ။ နဝ်ꩻထွူ တလဲင်ႏချင်ႏ ဆျာထီးအူႏစွဉ်ႏနဝ်ꩻသွူ။
69သွဉ်းမူႏတဖြာꩻ ထီႏဝွေꩻအဝ်ႏနဝ်ꩻကိုတဲင် ဒေါ့ꩻဖေႏဖျင် ပါꩻက အဝ်ႏအုံထွိုင်ႏထာꩻ နဝ်ꩻကိုဖုံႏ၊ “ဝွေꩻနဝ်ꩻထွာဒျာႏ ဝွေꩻသီးစွိုꩻကို တဖြာꩻ” နုဲင်းနဝ်ꩻသွူ။ 70ကွဲႏတွော့ꩻ ပေတရု ထေင်ချာဖျင်ယင်း တလဲင်ႏသွူ။
တညတဝ်း ပါꩻကအဝ်ႏအုံထွိုင်ႏထာꩻ အထျꩻနဝ်ꩻ စွဲꩻတရာꩻဖျင် ပေတရု၊ “နာꩻနဝ်ꩻထွာနွောင်ꩻ ဝွေꩻသီးစွိုꩻကို တဖြာꩻ၊ နာꩻထေင်ချာနီ တလꩻတဝ်း ပွိုးတွော့ꩻ နာꩻနဝ်ꩻတဲ့အဝ်ႏ ကာလိလဲခမ်း လွဉ်ဒျာႏအတွက်သွူ။
71နဝ်ꩻထွူ ပေတရုဒေါ့ꩻ၊ “ခွေကအဝ်ႏဒေါ့ꩻဒါႏ ငဝ်းနဝ်ꩻ အမဲဉ်ႏဒျာႏကျောင်ꩻ ခွေခံႏကဉ်ႏစာႏဗွိုန်ႏဒျာႏ၊ ခွေဒေါ့ꩻထာꩻ မဉ်ႏတမွေးတဝ်းနဝ်ꩻ ယံဖေႏဗွေႏဘုရာꩻ ကဖေႏတံႏသွော့ခွေ။ ပါနဝ်ꩻ နာꩻအဝ်ႏဒေါ့ꩻ တမုဲင်ꩻခရာႏနဝ်ꩻ ခွေတသေနာႏတဝ်း” နုဲင်းနဝ်ꩻသွူ။
72နဝ်ꩻထွူ တလဲင်ႏချင်ႏ ဆျာထီးအူႏဖျင် ဒုတိယလဲင်ႏတဲင် ပေတရုနဝ်ꩻ ယူႏလꩻချာယင်း ဗွေႏယေသျု ကအဝ်ႏဒေါ့ꩻ ဖေႏလဲဉ်းဒါႏဝွေꩻ၊ “ခလားဆျာထီးကအူႏ နီလဲင်ႏနဝ်ꩻ နာꩻအီႏရိုꩻဒျာႏ နာꩻတသေငါꩻတဝ်းခွေ သွံလဲင်ႏ” နုဲင်းနဝ်ꩻတဲင် ဝွေꩻဖြွို့ပနဲဉ်ႏလင်ꩻတွော့ꩻ ငွိုးအွီႏစွဉ်ႏထာꩻနဝ်ꩻသွူ။
ទើបបានជ្រើសរើសហើយ៖
မာကု 14: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.