မာကု 13
13
ဗွေႏယေသျုဒေါ့ꩻဗိမာန်ႏတောႏကျောင်ꩻအီႏကုဲင်ပြင်ꩻလင်ꩻ
(မတဲ ၂၄:၁–၂။ လုကာ ၂၁:၅–၆)
1နုဲင်းဗွေႏယေသျု အဝ်ႏဗိမာန်ႏတောႏကျောင်ꩻ ထန်ႏလွေꩻချိန်ႏ ဝွေꩻဗွေႏတပဲ့တောႏ တဖြာꩻဒေါ့ꩻ၊ “ဆရာႏ ထွားမွိုင်၊ ကအဝ်ႏတယ်ႏဒါႏ လုံးတူႏတန်ဖုံႏနဝ်ꩻ ဟဝ်အံႏဖြာႏငါႏ” နုဲင်းနဝ်ꩻသွူ။
2ဗွေႏယေသျုလဝ်းချာ၊ “ကအဝ်ႏတယ်ႏတန်ဒါႏ ထာꩻယိုဖုံႏနဝ်ꩻ သီအဝ်ႏထီႏဒျာႏ မွေးတဝ်းဟောင်း။ ယိုကိုနဝ်ꩻ လုံးတူႏတတူႏငါတဲ့ အီႏတအဝ်ႏသော့ꩻတဝ်းဒွုမ် အခင်ႏလမ်းသွူ၊ လုံးစွုမ်ႏဖြုံႏ အီႏပြင်ꩻလင်ꩻထိုꩻဗာႏ” နုဲင်းနဝ်ꩻသွူ။
ထာꩻဒုက္ခဖုံႏတွမ်ႏထာꩻနစ်စက်ဖုံႏ
(မတဲ ၂၄:၃–၁၄။ လုကာ ၂၁:၇–၁၉)
3ဗွေႏယေသျု အဝ်ႏအုံလင်ꩻထာꩻ ကောင်သံလွေင်လောင်း အဝ်ႏခွယ်ႏတောႏလွေꩻ ဗိမာန်ႏတောႏကျောင်ꩻတဲင် ပေတရု၊ ယာကုပ်၊ ယောဟန်တွမ်ႏ အန္ဒြေသီး လွဉ်ထေ့တေ့ꩻ ဝွေꩻဗွေႏထျꩻနဝ်ꩻသွူ။ 4ဝွေꩻသီးဒေါ့ꩻ၊ “ထာꩻယိုဖုံႏ ကအီႏထွာလွဉ်ချိန်ႏနဝ်ꩻ ဒေါ့ꩻနယ်ဖေႏနီတွော့ꩻ ထာယိုဖုံႏကားကအဝ်ႏ ကအီႏထွာလွဉ်ချိန်ႏ ကအီႏ ထွာလွဉ်ထာꩻ နုဲင်းမုဲင်ꩻနဝ်ꩻ ဒေါ့ꩻနယ်ဖေႏနီမွိုင်” နုဲင်းနဝ်ꩻသွူ။
5ဗွေႏယေသျု ဒေါ့ꩻဖေႏဝွေꩻသီး၊ “ဖေႏနေး ပါꩻတဖြာꩻဖြာꩻတဲ့ ကလဲဉ်အံႏလꩻထိုꩻမွိုန်း သီနဝ်ꩻ အွဉ်ႏသတိꩻသွော့။ 6ကအီႏဒေါ့ꩻကေႏညာႏဖေႏ ခွေတာႏနဝ်ꩻ လိုꩻအာဖုံႏ အီႏလွဉ်တဲင်ရိုꩻ၊ ‘ခွေနဝ်ꩻ ဝွေꩻဗွေႏသွူ’ နုဲင်းနဝ်ꩻတဲင် ဝွေꩻသီး အီႏလဲဉ်အံႏလိုꩻဖုံႏ အာငါႏသွူ။ 7သီထွိုင်ႏဟွိုန် စဲ့ꩻတွိုက်ꩻပွယ်ꩻသတင်ꩻ အဗော့ꩻစွဉ်ႏ အညာꩻနဝ်ꩻ တွမ်ႏနမ်းခီမွိုန်း။ ထာꩻစားနဝ်ꩻဖုံႏနဝ်ꩻ အီႏထွာဗာႏဒျာႏရင်ꩻ။ ကွဲႏတွော့ꩻ အဓိပ္ပါယ်ႏနဝ်ꩻ ထွာမွူးနီꩻ အဆုဲင်ꩻသွတ်ꩻချိန်ႏ တတွိုႏလွဉ်တဝ်းဒွိုန်းသွူ။ 8ဒုံဖုံႏ တဒုံတွမ်ႏတဒုံ အီႏတွိုက်ꩻလို့ဝင်ꩻ၊ ခမ်းထီဖုံႏ တခမ်းတွမ်ႏတခမ်း အီႏတွိုက်ꩻလို့ဝင်ꩻသွူ။ ခင်ႏလမ်း စွုမ်ႏထွောင်းနဝ်ꩻ ဟံႏအီႏတသွိုး စွစ်ꩻစဲစ်ꩻတဲင် နဝ်ꩻကိုနဝ်ꩻ ထာꩻအံႏအွꩻ အီႏခြောလွဉ်သွူ။ ထာꩻယိုနဝ်ꩻ ထွာလွဉ် ဗွိုန်နုဲင်း ကအီႏလွူးလိုꩻပေႏ ဟို့ꩻကခြေ့ဒါႏ အရီးသွတ်ꩻ တလဲင်ႏနဝ်ꩻသွူ။
9 #
မ ၁၀:၁၇–၂၀၊ လု ၁၂:၁၁၊ ၁၂။ သီအွဉ်ႏသတိချာသွော့ သီနမ်းဟုဲင်း။ သီနဝ်ꩻ အီႏခံႏဗာႏ အဆွမ်ꩻတဲင် အီလွေꩻထိုꩻ တရာꩻရွုမ်ꩻကို သီနဝ်ꩻ အီႏခံႏဗာႏ တွဲႏသော့ꩻ တရာꩻစရွပ်ကိုသွူ။ ပွိုးခွေတာႏနဝ်ꩻ သီအီႏအုံထွိုင်ႏဗာႏ အစိုႏရ လိုꩻတန်ဖုံႏတွမ်ႏ ခွန်တန်ဆꩻငါ အီႏဒေါ့ꩻနယ်ဖေႏဗာႏ ဝွေꩻသီး သတင်ꩻဟဝ်နဝ်ꩻသွူ။ 10ကွဲႏတွော့ꩻ ခလားအဆုဲင်ꩻသွတ်ꩻ ကဖျော်လွဉ်နဝ်ꩻ သတင်ꩻဟဝ်နဝ်ꩻ အီႏဟော်ꩻဖေႏဗာႏ လိုꩻအမျိုꩻမျိုꩻဖုံႏ ကားကအဝ်ႏနဝ်ꩻသွူ။ 11ထွိုင်ႏဆွမ်ꩻထိုꩻ သီတွော့ꩻ ကဟဲ့ꩻလွေꩻထိုꩻ တရာꩻရွုမ်ꩻကိုချိန်ႏ သီအီႏလွေꩻဒေါ့ꩻဗာႏ တမုဲင်ꩻခရာႏနဝ်ꩻ တွမ်ႏနန်းခီရီးမွိုန်း၊ အချိန်ႏထွိုင်ႏ ဖျော်လွဉ်ချိန်ႏ အီႏဒေါ့ꩻဗာႏ တမုဲင်ꩻနဝ်ꩻ မဲ့ꩻဖေႏဒျာႏသီ။ ပွိုးငဝ်းဖုံႏ သီကဒေါ့ꩻနဝ်ꩻ အီႏထွာသီငဝ်းဒျာႏ တမွေးတဝ်း၊ ငဝ်းနဝ်ꩻဖုံႏနဝ်ꩻ အဝ်ႏ ကြောင်းစင် ဝိညာဉ်ႏတောႏထျꩻ လွဉ်ဒျာႏသွူ။ 12လိုꩻဖုံႏနဝ်ꩻ ဝွေꩻသီး တဖူးဝေးရင်ꩻဒျာႏ အီႏအပ်သီလို့ဝင်ꩻတဲင် ဖါဖုံႏနဝ်ꩻတဲ့ အီႏမာꩻဗွိုန်အပိုဖုံႏ ဗွိုန်နုဲင်းနဝ်ꩻ နေနေသွူ။ ပိုဖုံႏနဝ်ꩻ အီႏဆန်ချာ ဝွေꩻသီး မွိုးဖါဖုံႏတဲင် အီႏမာꩻသီထိုꩻ ဝွေꩻသီးနဝ်ꩻသွူ။ 13ကွပ်ပွိုး ခွေအတွက် လိုꩻစွုမ်ႏဖြာꩻနဝ်ꩻ အီႏလွꩻထီႏသီသွူ။ ထာꩻယွုမ်းကအဝ်ႏ ဗꩻတွိုႏအသွတ်ꩻသားနဝ်ꩻ အီႏလꩻ ထာꩻကယ်ႏတင်ႏသွူ။
ငမ်းသꩻပသို့ꩻခရာႏ
(မတဲ ၂၄:၁၅–၂၈။ လုကာ ၂၁:၂၀–၄၁)
14“‘ ငမ်းသꩻပသို့ꩻခရာႏ’ ကအုံထွိုင်ႏလူး ဝွေꩻတဟဝ်အုံထွိုက်တဝ်း ခင်ႏလမ်းကိုနဝ်ꩻ သီအီႏထီႏဗာႏ။” (လိတ်ဖတ်သားနဝ်ꩻ အွဉ်ႏသတိသွော့၊ ယိုအဓိပ္ပါယ်ႏနဝ်ꩻ သေနာႏသွော့။) “တွိုႏနဝ်ꩻ လိုꩻကအဝ်ႏသော့ꩻဒါႏ ယုဒခမ်းကိုနဝ်ꩻ ဖင်းညာꩻလွေꩻထိုꩻဗာႏ ကောင်ပူႏဖုံႏလောင်းနဝ်ꩻသွူ။ 15လိုꩻယင်ဟန်ႏ ကအဝ်ႏဒါႏ လမ်းသꩻလောင်းကီနဝ်ꩻ ဖင်းလင်ꩻလ လမ်းကိုတွော့ꩻ ကအီႏထူႏပါ ထာꩻခြိုꩻ တစွိုးစွိုးနဝ်ꩻ တွမ်ႏမာꩻလို့မွိုန်းတဝ်းအချိန်ႏ။ 16လိုꩻယင်ဟန်ႏ ကအဝ်ႏသော့ꩻဒါႏ ခြံကိုနဝ်ꩻ ဆဲင်ꩻတန်တဖွူꩻ တွက်တာႏ သဲင်ꩻချာဗာႏတဝ်း လမ်းနဝ်ꩻသွူ။ 17အနီꩻနဝ်ꩻယံꩻတွင်ꩻ လိုꩻမူႏအဝ်ႏနမ်းလောင်းသားဖုံႏတွမ်ႏ ပိုမွိုးနဲဉ်းသားဖုံႏတာႏနဝ်ꩻ ဟဝ်ငမ်းသꩻဗာႏငါႏ ခွိုင်းကားမုဲင်ꩻ။ 18ထာꩻစားယိုဖုံႏ ဖေႏကထွာလွဉ် မွိုန်း ထာꩻခွꩻလာနဝ်ꩻ ဆုတောင်ꩻထေ့သွော့ ဗွေႏဘုရာꩻထျꩻဟုဲင်း။ 19ထာꩻဒုက္ခ ကထွာလွဉ်ဟုဲင်းငါႏ အနီꩻနဝ်ꩻဖုံႏ ယံꩻတွင်ꩻနဝ်ꩻ တယ်ႏစွဉ်ႏ ဗွေႏဘုရာꩻ ကဖန်ဆင်ꩻမာꩻထွာလွဉ် ဟံႏတန်ချိန်ႏကာႏ ဗꩻတွိုႏစွဉ်ႏ အချိန်ႏယိုခါ မုဲင်ꩻခါတဲ့ တမော့ꩻဖိုတဝ်းဒွိုန်း နဝ်ꩻသွူ။ ဆုဲင်ꩻနဝ်ꩻတဲ့ အီႏထွာဗွိုန်နုဲင်းနဝ်ꩻ တအဲဉ်ထဝ်းသွူ။ 20ကွဲႏတွော့ꩻ အနီꩻနဝ်ꩻဖုံႏနဝ်ꩻ ထာဝရဘုရာꩻ အဝ်ႏမာꩻဆေ့ꩻဖေႏသွူ။ ဝွေꩻဗွေႏမဉ်ႏ တမာꩻဆေ့ꩻဖေႏတဝ်းနဝ်ꩻ ပါꩻမုဲင်ꩻတဖြာꩻတဲ့ အသက် အီႏတအဝ်ႏမွန်ကုဲင် နွောင်ꩻတဝ်းသွူ။ ကွဲႏတွော့ꩻ ပွိုးဝွေꩻဗွေႏ ကလွိုက်ခါꩻဒါႏ လိုꩻဖုံႏတွက်တာႏ အနီꩻနဝ်ꩻဖုံႏနဝ်ꩻ ဝွေꩻဗွေႏ အဝ်ႏမာꩻဆေ့ꩻဖေႏနဝ်ꩻသွူ။
21“နဝ်ꩻထွူ ပါꩻတဖြာꩻဖြာꩻ မဉ်ႏရိုꩻဖေႏသီ၊ ‘ထွားဟုဲင်း၊ မေသျိယနဝ်ꩻ အဝ်ႏယိုကို’၊ မဉ်ႏမွေးတဝ်း ‘ထွားဟုဲင်း၊ ဝွေꩻဗွေႏနဝ်ꩻ အဝ်ႏနဝ်ꩻကို၊’ နုဲင်းနဝ်ꩻနဝ်ꩻ တွမ်ႏယွုမ်းမွိုန်း။ 22ပွိုးမေသျိယ လိန်ႏလဲဉ်ဖုံႏတွမ်ႏ ပရောဖဲစ် လိန်ႏလဲဉ်ဖုံႏနဝ်ꩻ အီႏပေါႏလွဉ်နဝ်ꩻသွူ။ ဝွေꩻသီးအီႏမာꩻနယ် နိမိတ်လက္ခဏာႏတွမ်ႏ ဟဝ်အံႏဖြာႏခရာႏ ဖေႏနေး မဉ်ႏထွာနွောင်ꩻနဝ်ꩻ လိန်ႏလဲဉ်အီနွောင်ꩻ ဗွေႏဘုရာꩻ ကလွိုက်သေꩻခါꩻလဲဉ်းဒါႏ လိုꩻဖုံႏနဝ်ꩻသွူ။ 23အွဉ်ႏသတိꩻချာသွော့ သီနမ်း၊ ထာꩻယိုဖုံႏ ခလားကထွာလွဉ်ချိန်ႏနဝ်ꩻ ခွေအဝ်ႏဒေါ့ꩻနယ် ဖေႏရီးလဲဉ်းသီ။
လိုꩻပိုခိုအဝ်ႏကျွꩻလွဉ်
(မတဲ ၂၄:၂၉–၃၁။ လုကာ ၂၁:၂၅–၂၈)
24ထာꩻဒုက္ခမွူးနီꩻ နဝ်ꩻဖုံႏချိန်ႏ မဉ်ႏထွူ မွူးနဝ်ꩻ အီႏခေ့ꩻထိုꩻ၊ လာနဝ်ꩻ အီႏတရောင်ႏတဝ်းဒွုမ်၊ 25ဆာႏဖုံႏ အဝ်ႏခမ်းထီမို့ꩻလောင်း အီႏဟူႏလင်ꩻထိုꩻတဲင် တန်ꩻခိုꩻဖုံႏ ကအဝ်ႏသော့ꩻဒါႏ မို့ꩻလောင်းကိုနဝ်ꩻ ဝွေꩻသီး ကအဝ်ႏအခင်ႏလမ်းကိုနဝ်ꩻ အီႏဝါးခြုဲင်းထိုꩻသွူ။ 26နဝ်ꩻထွူ စွဉ်ႏတန်ꩻခိုꩻ တွမ်ႏဘွုန်ꩻသရေႏတန်ငါႏနဝ်ꩻ လိုꩻပိုခို အီႏပေါႏကျွꩻလွဉ်သော့ꩻ မို့ꩻအေႏကိုနဝ်ꩻသွူ။ 27ဝွေꩻဗွေႏ အီႏအွဉ်ႏစွꩻထန်ႏလွေꩻ တမန်ႏဖုံႏ ဟံႏတန်အစဲင်ႏ လစ်ꩻဖဲ့ꩻလစ်ꩻနားတွော့ꩻ အဝ်ႏဟံႏတန်အသွတ်ꩻ ခတဖဲ့ꩻ ဗꩻလွေꩻခꩻတဖဲ့ꩻနဝ်ꩻ အီႏစုဗူႏ ဗွေႏဘုရာꩻ ကလွိုက်ခါꩻဒါႏ လိုꩻဖုံႏသွူ။
သွဉ်ထူႏအီဖက်ꩻဒွိုႏဆꩻမွူး
(မတဲ ၂၄:၃၂–၃၅။ လုကာ ၂၁:၂၉–၃၃)
28“အွဉ်ႏသွော့ ဖက်ꩻဒွိုႏဆꩻမွူး သွဉ်ဖေႏသီ သွဉ်တန်ꩻတစွိုးဟုဲင်း။ ဖက်ꩻဒွိုႏဆꩻမွူး အပင်ဖုံႏ မဉ်ႏသွမ်ႏလွဉ်တွော့ꩻ အတတဲက်ꩻဆားဖုံႏ မဉ်ႏမွံꩻလွဉ်တဲင် အလာႏဖုံႏ ထန်ႏလွဉ်စနဝ်ꩻ ခမ်းသဲင်ချိန်ႏ ဗော့ꩻတွိုႏလွဉ်နဝ်ꩻ အီႏသေဗာႏနဝ်ꩻသွူ။ 29ဗွိုန်နုဲင်းနဝ်ꩻနေနေ သီထွိုင်ႏထီႏ ထာꩻယိုဖုံႏ ကအဝ်ႏထွာလွဉ်ချိန်ႏနဝ်ꩻ အချိန်ႏနဝ်ꩻ ဗော့ꩻလွဉ်ငါႏလဲဉ်းကျောင်ꩻ အဝ်ႏစလွဉ်လဲဉ်းနဝ်ꩻ သီအီႏသေဗာႏနဝ်ꩻသွူ။ 30တောင်ꩻသေꩻခါꩻသွော့ လိုꩻအသက် ကအဝ်ႏမွန်ထာꩻယိုခါ ခလားကသီလို့နဝ်ꩻ ထာꩻယိုဖုံႏ ကားကအဝ်ႏ အီႏထွာလွဉ်နဝ်ꩻ တောင်ꩻသေꩻခါꩻသွော့။ 31မို့ꩻစွဉ်ႏဟံႏတန် အီႏကုဲင်ထိုꩻစွဉ်ႏတဲ့ ခွေငဝ်းဖုံႏနဝ်ꩻ မုဲင်ꩻခါတဲ့ အီႏတကုဲင်ထိုꩻဗာႏတဝ်း နဝ်ꩻသွူ။
အနီꩻတဲ့နဝ်ꩻအချိန်ႏတဲ့နဝ်ꩻပါꩻမုဲင်ꩻတဖြာꩻတဲ့တသေတဝ်း
(မတဲ ၂၄:၃၆–၄၄)
32“ကွဲႏတွော့ꩻ အီႏလွဉ်ဒါႏ အနီꩻနဝ်ꩻ အချိန်ႏနားရီႏတဲ့နဝ်ꩻ ပါꩻမုဲင်ꩻတဖြာꩻတဲ့ တသေတဝ်း၊ မို့ꩻလောင်းတမန်ႏဖုံႏ တဲ့နဝ်ꩻ ပိုခိုတောႏ တဲ့နဝ်ꩻ တသေတဝ်း၊ သေဒျာႏ ဖါတောႏတပါꩻလွုမ်ꩻနဝ်ꩻသွူ။ 33ပွိုးကအီႏလွဉ် အချိန်ႏနဝ်ꩻ သီတသေတဝ်းနဝ်ꩻမꩻ အီႏအွဉ်ႏသတိဗာႏ၊ အီႏအွဉ်ႏ သွောင်သွောင်ဗာႏသွူ။ 34နဝ်ꩻနဝ်ꩻ ဗွိုန်နုဲင်းဒျာႏ လိုꩻတဖြာꩻ ထန်ႏလွေꩻတဖူꩻညာꩻတဲင် အွဉ်ႏကုဲင် အသွဉ်းဖုံႏ ဖေႏကထိန်ꩻထွား အလမ်း၊ အပ်ဖေႏတဖြာꩻစီႏ ထာꩻမာꩻထွူ ဒေါ့ꩻနယ်ဖေႏ တခါꩻပွေါးသား ဖေႏကအုံပွေါးထွား နဝ်ꩻသွူ။ 35တွိုႏနဝ်ꩻ ပွိုးတွော့ꩻ လမ်းဗွေႏ ကအီႏသဲင်ꩻလွဉ်ချိန်ႏနဝ်ꩻ အီႏထွာ မွူးဟာခိုႏနဲ့၊ မွူးကွို့ꩻနာꩻချိန်ႏနဲ့၊ ခလားထာꩻအီႏလေနဲ့၊ မွူးထန်ႏချိန်ႏနဲ့ သီတသေတဝ်း နဝ်ꩻမꩻ အွဉ်ႏသတိတဲင် အုံပွေါးသွော့။ 36ဝွေꩻမဉ်ႏသဲင်ꩻလွဉ်စွော့ꩻနဝ်ꩻ ဖေႏဝွေꩻကထီႏဗာႏမွိုန်း သီအဝ်ႏဗေင်ႏထာꩻ နဝ်ꩻသွူ။ 37နုဲင်းခွေကဒေါ့ꩻဖေႏလဲဉ်းသီ အတွိုင်ꩻနဝ်ꩻ ခွေဒေါ့ꩻဖေႏ လိုꩻဖုံႏကားကအဝ်ႏ အွဉ်ႏသတိꩻသွော့” နုဲင်းနဝ်ꩻသွူ။
ទើបបានជ្រើសរើសហើយ៖
မာကု 13: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.