လုကာ 3
3
ဗတ္တိဇံႏဆရာႏယောဟန်ဟော်ꩻတရာꩻ
(မတဲ ၃:၁–၁၂။ မာကု ၁:၁–၈။ ယောဟန် ၁:၁၉–၂၈)
1ဧကရာဇ်ခွန်တန် တိဗေရိအုပ်စိုꩻလꩻ တဆီငတ်ꩻနေင်ႏနဝ်ꩻ ခွန်ပုန္တိပိလတ် ထွာ ယုဒခွန်ခံႏတဲင် ခွန်ဟေရုဒ်နဝ်ꩻ ထွာ ကာလိလဲခမ်း ခွန်တွော့ꩻ ဝွေꩻအဖူးခို ဖိလိပ္ပုနဝ်ꩻ အဝ်ႏအုပ်စိုꩻ ဣတုရဲနယ်ႏစွဉ်ႏ တရာခေါနိနယ်ႏနဝ်ꩻသွူ။ လုသာနိနဝ်ꩻ အဝ်ႏအုပ်စိုꩻ အာဗိလဲင် နယ်ႏတဲင်၊ 2အန္နတွမ်ႏ ကယာဖနဝ်ꩻ အဝ်ႏထွာ ယဇ်ပရော ဟိတ်ခွန်တန်နဝ်ꩻသွူ။ အချိန်ႏနဝ်ꩻ ဗွေႏဘုရာꩻငဝ်း ဖျော်လွဉ် ဇာခရိပိုခို ယောဟန်ထျꩻ ကန္တာရတခြာကိုနဝ်ꩻသွူ။ 3နဝ်ꩻမꩻ ယောဟန် ဖျတ်ကာႏလွေꩻ ယော်ဒန် ထီခြောင်ဟံႏနယ်ႏ တနယ်ႏလွုမ်းတဲင် ဟော်ꩻဖေႏ၊ “သီကအဝ်ႏမာꩻ အပဲစ်ဖုံႏနဝ်ꩻ လꩻချာသွော့ ထာꩻကော့ꩻမာႏတွော့ꩻ ခံႏသွော့ ဗတ္တိဇံႏ ထီမင်္ဂလာႏ၊ နဝ်ꩻမꩻဗွေႏဘုရာꩻ အီႏအွဉ်ႏစွꩻ သီအပဲစ်ဖုံႏ” နုဲင်းနဝ်ꩻသွူ။
4 # ဟေသျာ ၄၀:၃–၅ (LXX)။ နုဲင်းပရောဖဲစ် ဟေသျာယ ကတဲမ်းသေꩻခါꩻ ပရောဖဲစ် ဟေသျာယ ကျမ်ꩻအုပ်ကို၊
“ပါꩻတဖြာꩻ အဝ်ႏခြောဝ်သော့ꩻ အငဝ်း ကန္တာရသုဲင်ꩻခြာကို၊
‘ထာဝရဘုရာꩻတာႏနဝ်ꩻ ဖျင်ရဲဉ်ꩻသေꩻမꩻသွော့ တဖူꩻတန်၊
ဝွေꩻဗွေႏ အီႏထောင်လွေꩻတာႏ တဖူꩻနဝ်ꩻ မာꩻစွဉ်ႏစွဉ်ႏဖေႏသွော့။
5ထာꩻခြောင်ႏဖုံႏ ကားကအဝ်ႏနဝ်ꩻ ထုမ်ဗွေဖေႏဗာႏ၊
ကောင်ပူႏပေႏဖုံႏ ကားကအဝ်ႏနဝ်ꩻ မာꩻတွောင်းဖေႏဗာႏ၊
တဖူꩻတကဲင်ႏဖုံႏနဝ်ꩻ အီႏမာꩻစွဉ်ႏဖေႏဗာႏတဲင်၊
တဖူꩻကျံꩻဖုံႏနဝ်ꩻ မာꩻချော်ꩻဖေႏဗာႏနဝ်ꩻသွူ။
6လိုꩻမျိုꩻဖုံႏ ကားကအဝ်ႏနဝ်ꩻ အီႏထီႏဗာႏ ဗွေႏဘုရာꩻ အထာꩻကယ်ႏတင်ႏ” နုဲင်းနဝ်ꩻသွူ။
7 #
မ ၁၂:၃၄၊ ၂၃:၃၃။ ကအီႏခံႏဗတ္တိဇံႏ ထီမင်္ဂလာႏ ယောဟန်ထျꩻနဝ်ꩻ လိုꩻစွိုꩻအာဖုံႏ ထန်ႏလွဉ်ထေ့ ဝွေꩻထျꩻနဝ်ꩻသွူ။ ဝွေꩻဒေါ့ꩻဖေႏ ဝွေꩻသီး၊ “သီရူးခွိုꩻဖုံႏ၊ ဖေႏကသျောင်ႏလဲ့ꩻလꩻ ဗွေႏဘုရာꩻ အွဉ်ႏစွꩻလွဉ် အပဲစ်တံႏ ထာꩻစီႏရင်ႏခရာႏနဝ်ꩻ ပါꩻမုဲင်ꩻ အွဉ်ႏဒေါ့ꩻနယ်သီဟောင်း။ 8#ယော ၈:၃၃။ သီအဝ်ႏမာꩻ အပဲစ်ဖုံႏ လꩻလဲဉ်း ထာꩻကော့ꩻမာႏကျောင်ꩻနဝ်ꩻ အီႏအွဉ်ႏနယ်ဖေႏဗာႏ တွမ်ႏထာꩻမာꩻ အကျင်ꩻဖုံႏသွူ။ အဗြာဟံ ထွာသီဖါဖြားနဝ်ꩻ တွမ်ႏရိုꩻချာမွိုန်းသီနမ်း။ ခွေဒေါ့ꩻနယ်သီ ဗွေႏဘုရာꩻနဝ်ꩻ ထူႏလုံးတူႏ ယိုဖုံႏတဲင် မာꩻထွာနွောင်ꩻ အဗြာဟံပိုလီꩻနဝ်ꩻသွူ။ 9#မ ၇:၁၉။ ခွါ ကအီႏခွဉ်းဝꩻအီ သေင်ႏမွူးနဝ်ꩻ အွဉ်ႏသေꩻမꩻလဲဥ်း အရွီးထျꩻနဝ်ꩻသွူ။ သေင်ႏစွုမ်ႏမွူး တရာႏတဝ်း အရာႏဟဝ်နဝ်ꩻ အီႏခွဉ်းဝꩻတဲင် နုဲင်ႏသော့ꩻ မေႏကိုနဝ်ꩻသွူ။
10လိုꩻဖုံႏရီဝွေꩻ၊ “ပေါ့ꩻနုဲင်းနဝ်ꩻနဝ်ꩻ နီအီႏမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။
11ဝွေꩻလဝ်းဖြေႏချာ၊ “ပါꩻမုဲင်ꩻဆဲင်ꩻ မဉ်ႏအဝ်ႏနီဖွူꩻတဲ့ တဖွူꩻနဝ်ꩻ ဖေႏထိုꩻသွော့ပါꩻ ဆဲင်ꩻ တအဲဉ်ထဝ်းသားတဲင် ပါꩻမုဲင်ꩻထာꩻအံႏ မဉ်ႏအဝ်ႏတဲ့ ဖဖေႏဗာႏဝင်ꩻ” နုဲင်းနဝ်ꩻသွူ။
12 #
လု ၇:၂၉။ ကအီႏခံႏ ဗတ္တိဇံႏနဝ်ꩻ အခွဉ်ႏကောက်သား ယင်ဟန်ႏ လွဉ်ထေ့တဲင် ဝွေꩻသီးရီဝွေꩻ၊ “ဆရာႏ၊ နီအီႏမာꩻဗာႏ နုဲင်းမုဲင်ꩻဟောင်း” နုဲင်းနဝ်ꩻသွူ။
13ဝွေꩻဒေါ့ꩻဖေႏ ဝွေꩻသီး၊ “နုဲင်းတရာꩻဥပဒေႏ အတွိုင်ꩻနဝ်ꩻ တွမ်ႏကောက်ထူႏ လွိုမွိုန်း” နုဲင်းနဝ်ꩻသွူ။
14စဲ့ꩻသားဖုံႏ ယင်ဟန်ႏတဲ့ ရီဝွေꩻ၊ “ တွိုႏနီဖုံႏဟာ၊ နီအီႏမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။ ပါꩻမုဲင်ꩻတဖြာꩻ ရွဉ်တဲ့ တွမ်ႏထူႏနွိုင်ႏထိုꩻမွိုန်း မဉ်ႏမွေးတဝ်း၊ ပါꩻမုဲင်ꩻတဖြာꩻတဲ့ တွမ်ႏထာꩻတမဲဉ်ႏတဝ်းနဝ်ꩻ စွဲꩻတရာꩻမွိုန်း၊ ကေႏနပ်ဗော့ꩻငါ သီကလꩻ လခꩻနဝ်ꩻငါဟုဲင်း” နုဲင်းနဝ်ꩻသွူ။
15လိုꩻဖုံႏနဝ်ꩻ အဝ်ႏမောင်ꩻသန်ငါႏ မေသျိယ ဖျော်လွဉ်ချိန်ႏ နဝ်ꩻမꩻ ယောဟန်နဝ်ꩻ ဝွေꩻသီးယူႏဒျာႏ အီႏထွာ မေသျိယနဝ်ꩻသွူ။ 16နဝ်ꩻမꩻ ယောဟန် ဒေါ့ꩻဖေႏဝွေꩻသီး ကားကအဝ်ႏ၊ “တွမ်ႏထီနဝ်ꩻ ခွေဖေႏသီ ဗတ္တိဇံႏမင်္ဂလာႏ၊ ကွဲႏတွော့ꩻ ပါꩻအဖြာꩻ ကအဝ်ႏကျွꩻလွဉ်ဒါႏနဝ်ꩻ တန်မျတ်ကယ်ꩻကခွေသွူ။ ခွေအီႏစေငါ ဝွေꩻဗွေႏ အခင်ႏဖါႏဖြွီꩻဖုံႏငါတဲ့ တထွိုက်တဝ်းသွူ။ ဝွေꩻဗွေႏနဝ်ꩻ အီႏဖေႏသီ ဗတ္တိဇံႏ ထီမင်္ဂလာႏ တွမ်ႏကြောင်းစင် ဝိညာဉ်ႏတောႏ တွမ်ႏမေႏနဝ်ꩻသွူ။ 17ဝွေꩻဗွေႏအဝီꩻဝင်း အဝ်ႏပါငီꩻစွဉ်ႏ ဝွေꩻဗွေႏတဲင် ဝွေꩻဗွေႏ အီႏဝင်းထန်ႏထိုꩻ ဗွူသိုႏတွော့ꩻ ဗွူဆꩻနဝ်ꩻ အီႏစုဗူႏ၊ အီႏသော့ꩻ ဝွေꩻဗွေႏ အတရွောင်ကိုသွူ။ ကွဲႏတွော့ꩻ ဗွူသိုႏနဝ်ꩻ ဝွေꩻဗွေႏအီႏလဲ့ꩻသော့ꩻ မေႏတဖေ့ဒါႏတဝ်း ခင်ႏလမ်းကို” နုဲင်းနဝ်ꩻသွူ။
18လိုꩻဖုံႏ ဖေႏကပြောင်ꩻကြုဲင်ꩻ ဝွေꩻသီး အထာꩻနယ်ꩻဖုံႏနဝ်ꩻ ယောဟန်ဟော်ꩻဖေႏ သတင်ꩻဟဝ် တွမ်ႏအနယ်ꩻလင်ဖုံႏတဲ့ အာငါႏသွူ။ 19#မ ၁၄:၃၊ ၄၊ မာ ၆:၁၇၊ ၁၈။ ပွိုးခွန်တန် ဟေရုဒ်နဝ်ꩻ တောႏလမ်း မင်္ဂလာႏထိုꩻတွမ်ႏ ဝွေꩻဖူးခိုမာ ဟေရောဒိနဝ်ꩻအတွက် စွဉ်ႏကမာꩻလဲဉ်းဒါႏ ထာꩻကုဲင်အလင်ဖုံႏ နဝ်ꩻအတွက် ယောဟန်နဝ်ꩻ ပဲစ်တင်ႏ ခွန်တန်ဟေရုဒ်သွူ။ 20နဝ်ꩻထွူ တွမ်ႏကအွဉ်ႏခံသော့ꩻ ယောဟန်ထောင်ႏကိုနဝ်ꩻ ခွန်တန်ဟေရုဒ် ကယိန်းမာꩻဟုဲင်းထဲင်း နဝ်ꩻသွူ။
ဗွေႏယေသျုခံႏဗတ္တိဇံႏထီမင်္ဂလာႏ
(မတဲ ၃:၁၃–၁၇၊ မာကု ၁:၉–၁၁)
21လိုꩻဖုံႏကားကအဝ်ႏ ခံႏဗတ္တိဇံႏ ထီမင်္ဂလာႏထွူ ဗွေႏယေသျုတဲ့ ခံႏဗတ္တိဇံႏ ထီမင်္ဂလာႏသွူ။ ဝွေꩻဗွေႏ အဝ်ႏဆုတောင်ꩻကျာꩻ ခမ်းထီမို့ꩻလောင်း ဗွောင်လွဉ်စွဉ်ႏတဲင်၊ 22#ကမ္ဘာႏ ၂၂:၂၊ သာ ၂:၇၊ ဟေသျာ ၄၂:၁၊ မ ၃:၁၇၊ မာ ၁:၁၁၊ လု ၉:၃၅။ ဝိညာဉ်ႏကြောင်းစင် ဗွိုန်နုဲင်း ဝါးလွီး တဗာႏနဝ်ꩻ ကျွꩻလင်ꩻလွဉ် ဝွေꩻဗွေႏလောင်းနဝ်ꩻသွူ။ အဝ်ႏခမ်းထီမို့ꩻလောင်း ငဝ်းသင်ႏလင်ꩻလွဉ်တစွိုး၊ “နာꩻနဝ်ꩻထွာ ခွေကရက်ငါႏ ခွေပိုခိုရင်ꩻ။ စွဉ်ႏနာꩻနဝ်ꩻ ခွေကျွိုက်နစ်သက်ငါႏ” နုဲင်းနဝ်ꩻသွူ။
ဗွေႏယေသျုမွိုးဖြားဖါဖြားသီးဖုံႏခွိုꩻရဲဉ်ႏ
(မတဲ ၁:၁–၁၇)
23ဗွေႏယေသျု ထွိုင်ႏမာꩻစ ဝွေꩻဗွေႏ အမုထာꩻမာꩻချိန်ႏ ဝွေꩻဗွေႏနဝ်ꩻ သက်လꩻ သွံဆီရပ်သွူ။ ဝွေꩻနဝ်ꩻထွာ ယောသပ်ပိုခို၊ နဝ်ꩻမꩻ လိုꩻဖုံႏနဝ် ထင်းဒျာႏ ယောသပ်နဝ်ꩻထွာ ဧလိပိုခို၊ 24ဧလိနဝ်ꩻထွာ မာတတ်ပိုခို၊ မာတတ်နဝ်ꩻထွာ လေဝိပိုခို၊ လေဝိနဝ်ꩻထွာ မာလခိပိုခို၊ မာလခိနဝ်ꩻထွာ ယန္နပိုခို၊ ယန္နနဝ်ꩻထွာ ယောသပ်ပိုခို၊ 25ယောသပ်နဝ်ꩻထွာ မတ္တတိယပိုခို၊ မတ္တတိယနဝ်ꩻထွာ အာမုတ်ပိုခို၊ အာမုတ်နဝ်ꩻထွာ နာဟုန်ပိုခို၊ နာဟုန်နဝ်ꩻထွာ ဧသလိပိုခို၊ ဧသလိနဝ်ꩻထွာ နတ်ကဲပိုခို၊ 26နတ်ကဲနဝ်ꩻထွာ မတ်ပိုခို၊ မတ်နဝ်ꩻထွာ မတ္တတိယပိုခို၊ မတ္တတိယနဝ်ꩻထွာ သေမိပိုခို၊ သေမိနဝ်ꩻထွာ ယောသပ်ပိုခို၊ ယောသပ်နဝ်ꩻထွာ ယောဒပိုခို၊ 27ယောဒနဝ်ꩻထွာ ယောအန္နပိုခို၊ ယောအန္နနဝ်ꩻထွာ ရေသပိုခို၊ ရေသနဝ်ꩻထွာ ဇေရုဗဗေလပိုခို၊ ဇေရုဗဗေလနဝ်ꩻထွာ သျာလတေလပိုခို၊ သျာလတေလနဝ်ꩻထွာ နေရိပိုခို၊ 28နေရိနဝ်ꩻထွာ မာလခိပိုခို၊ မာလခိနဝ်ꩻထွာ အဒ္ဒိပိုခို၊ အဒ္ဒိနဝ်ꩻထွာ ကောသံပိုခို၊ ကောသံနဝ်ꩻထွာ အီလမာဒံပိုခို၊ အီလမာဒံနဝ်ꩻထွာ ဧရပိုခို၊၊ 29ဧရနဝ်ꩻထွာ ယောသျုပိုခို၊ ယောသျုနဝ်ꩻထွာ အဲလိအာသာပိုခို၊ အဲလိအာသာနဝ်ꩻထွာ ယောရိမ်ပိုခို၊ ယောရိမ်နဝ်ꩻထွာ မာတတ်ပိုခို၊ မာတတ်နဝ်ꩻထွာ လေဝိပိုခို၊ 30လေဝိနဝ်ꩻထွာ သိမောင်ပိုခို၊ သိမောင်နဝ်ꩻထွာ ယုဒပိုခို၊ ယုဒနဝ်ꩻထွာ ယောသပ်ပိုခို၊ ယောသပ်နဝ်ꩻထွာ ယောနမ်ပိုခို၊ ယောနနမ်နဝ်ꩻထွာ ဧလျာကိမ်ပိုခို၊ 31ဧလျာကိမ်နဝ်ꩻထွာ မိလပိုခို၊ မိလနဝ်ꩻထွာ မဲနန်ပိုခို၊ မဲနန်နဝ်ꩻထွာ မတ္တတပိုခို၊ မတ္တတနဝ်ꩻထွာ နာတန်ပိုခို၊ နာတန်နဝ်ꩻထွာ ဒါဝိဒ်ပိုခို၊ 32ဒါဝိဒ်နဝ်ꩻထွာ ယေသဲပိုခို၊ ယေသဲနဝ်ꩻထွာ ဩဗဲက်ပိုခို၊ ဩဗဲက်နဝ်ꩻထွာ ဗောသပိုခို၊ ဗောသနဝ်ꩻထွာ သာလမုန်ပိုခို၊ သာလမုန်နဝ်ꩻထွာ နာသျုန်ပိုခို၊ 33နာသျုန်နဝ်ꩻထွာ အာမိနာဒပ်ပိုခို၊ အမိနာဒပ်နဝ်ꩻထွာ အဲက်မေင်ပိုခို၊ အဲက်မေင်နဝ်ꩻထွာ အာနိပိုခို၊ အာနိနဝ်ꩻထွာ ဟေဇရုန်ပိုခို၊ ဟေဇရုန်နဝ်ꩻထွာ ဖါရဲက်ပိုခို၊ ဖါရဲက်နဝ်ꩻထွာ ယုဒပိုခို၊ 34ယုဒနဝ်ꩻထွာ ယာကုပ်ပိုခို၊ ယာကုပ်နဝ်ꩻထွာ ဣသဲစ်ပိုခို၊ ဣသဲစ်နဝ်ꩻထွာ အဗြာဟံပိုခို၊ အဗြာဟံနဝ်ꩻထွာ တေရပိုခို၊ တေရနဝ်ꩻထွာ နာဟော်ပိုခို၊ 35နာဟော်နဝ်ꩻထွာ သေရောက်ပိုခို၊ သေရောက်နဝ်ꩻထွာ ရာဂေါပိုခို၊ ရာဂေါနဝ်ꩻထွာ ဖါလဲက်ပိုခို၊ ဖါလဲက်နဝ်ꩻထွာ အေဗာပိုခို၊ ဧဗာနဝ်ꩻထွာ သျေလပိုခို၊ 36သျေလနဝ်ꩻထွာ ကာဣနန်ပိုခို၊ ကာဣနန်နဝ်ꩻထွာ အာဖါသက်ပိုခို၊ အာဖါသက်နဝ်ꩻထွာ သျေမပိုခို၊ သျေမနဝ်ꩻထွာနောဧပိုခို၊ နောဧနဝ်ꩻထွာ လာမဲက်ပိုခို၊ 37လာမဲက်နဝ်ꩻထွာ မာတုသျာလပိုခို၊ မာတုသျာလနဝ်ꩻထွာ ဧနောက်ပိုခို၊ ဧနောက်နဝ်ꩻထွာ ယာရဲက်ပိုခို၊ ယာရဲက်နဝ်ꩻထွာ မာဟာလေလပိုခို၊ မာဟာလေလနဝ်ꩻထွာ ကာဣနန်ပိုခို၊ 38ကာဣနန်နဝ်ꩻထွာ ဧနုတ်ပိုခို၊ ဧနုတ်နဝ်ꩻထွာ သျေတပိုခို၊ သျေတနဝ်ꩻထွာ အာဒံပိုခို၊ အာဒံနဝ်ꩻထွာ ဗွေႏဘုရာꩻ ပိုခိုနဝ်ꩻသွူ။
ទើបបានជ្រើសរើសហើយ៖
လုကာ 3: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
