လုကာ 2
2
ဗွေႏယေသျုလွူးဖွာꩻလွဉ်
(မတဲ ၁:၁၈–၂၅)
1အချိန်ႏနဝ်ꩻ ဖေႏနေးကထူႏ ထာꩻလွုက်ꩻစရင်ꩻ ရောမခမ်း တခမ်းလွုမ်းနဝ်ꩻ ဧကရာဇ်ခွန်တန် ဩဂတ်သတတ် ဖေႏအမိန်း နဝ်ꩻသွူ။ 2ကထူႏဒါႏ ထာꩻလွုက်ꩻစရင်ꩻ အရီးသွတ်ꩻလဲင်ႏယိုနဝ်ꩻ ကုရေနိ အဝ်ႏထွာ သီးရီးယာခမ်း ခွန်ခံႏချိန်ႏနဝ်ꩻသွူ။ 3တွိုႏနဝ်ꩻ လိုꩻစွုမ်ႏဖြာꩻ နမ်းကိုယ်ႏတဲင်ႏ သဲင်ꩻဒင်ႏချာဗာႏ မဉ်ꩻစရင်ꩻ ဝွေꩻအဇာႏတိဝေင်ꩻ ပငါပရာꩻဖုံႏသွူ။
4ယောသပ် အဝ်ႏကာလိလဲခမ်းကို ဝေင်ꩻနာဇရဲစ်၊ လွေꩻယုဒခမ်း ဝေင်ꩻဗဲက်လဟဲမ် ခွန်တန်ဒါဝိဒ် ဇာႏတိခင်ႏလမ်းနဝ်ꩻသွူ။ ပွိုးတွော့ꩻ ယောသပ်အဝ်ႏထွာ ဒါဝိဒ်ပိုလီꩻစွိုးခွိုꩻ အတွက် ဝွေꩻလွေꩻ နဝ်ꩻကိုသွူ။ 5ဝွေꩻလွေꩻဒင်ႏ မဉ်ꩻစရင်ꩻတွမ်ႏ မာရိ အကအွဉ်ႏဂတိလဲဉ်း အီႏတောႏလမ်းဒါႏ စွဉ်ႏဝွေꩻနဝ်ꩻသွူ။ ဝွေꩻမူႏနဝ်ꩻ အဝ်ႏနမ်းလောင်းလဲဉ်းတဲင်၊ 6ဝွေꩻသီးအဝ်ႏသော့ꩻ ဝေင်ꩻဗဲက်လဟဲမ် ကိုကျာꩻ ပွိုးဝွေꩻမူႏ ကအီႏလွူးပိုနဝ်ꩻ အချိန်ႏတွိုႏလဲဉ်းသွူ။ 7ဝွေꩻမူႏလွူး ဝွေꩻမူႏပိုခိုတခိုႏ၊ လွမ်တွမ်ႏဗီတဲင်၊ နဝ်ꩻကိုနဝ်ꩻ ပွိုးဝွေꩻသီး အုံပွိုင်းသော့ꩻတာႏ ခင်ႏလမ်းအဲဉ်ထဝ်း နဝ်ꩻမꩻ အွဉ်ႏဗေင်ႏသော့ꩻဗာႏ ဖိုးဆာႏတခြောင် တဖြုံႏကိုနဝ်ꩻသွူ။
သွိုꩻတီသားဖုံႏတွမ်ႏမို့ꩻလောင်းတမန်ႏဖုံႏ
8ခင်ႏလမ်းနဝ်ꩻကို မွူးကွို့ꩻနာꩻချိန်ႏ သွိုꩻတီသား ယင်ဟန်ႏနဝ်ꩻ အုံပဆား ထာꩻပြင်ႏကိုတဲင် အဝ်ႏပွေါးထွား အသွိုꩻဖုံႏသွူ။ 9ထာဝရဘုရာꩻ မို့ꩻလောင်းတမန်ႏတပါꩻ ပေါႏလွဉ် ဝွေꩻသီးထျꩻတဲင် ထာဝရဘုရာꩻ ဘွုန်ꩻသရေႏတောႏ တောင်ႏလေလူးစွဉ်ႏ ဝွေꩻသီးလောင်းနဝ်ꩻသွူ။ ဝွေꩻသီးသꩻဝꩻ ငမ်းသꩻမွေးနေးစွဉ်ႏ၊ 10ကွဲႏတွော့ꩻ မို့ꩻလောင်းတမန်ႏ ဒေါ့ꩻဖေႏဝွေꩻသီး၊ “တွမ်ႏငမ်းသꩻမွိုန်း။ ခွေထျꩻ လိုꩻဖုံႏကားကအဝ်ႏ ဖေႏနေးကလꩻ ထာꩻသꩻဟဝ် သꩻရေꩻနဝ်ꩻ သီတာႏ ခွေအီလွဉ်ဖေႏဒျာႏ သတင်ꩻဟဝ်ယိုနဝ်ꩻသွူ။ 11ဟန်ႏနီꩻယို ဒါဝိဒ်ဝေင်ꩻကို သီထာꩻကယ်ႏတင်ႏဗွေႏ ခရစ်တောႏ လွူးဖွာꩻလွဉ်လဲဉ်း၊ 12ထာꩻယို သီအီႏသေဗာႏ နုဲင်းမုဲင်ꩻနဝ်ꩻ၊ သီအီႏထီႏဗာႏ လိုꩻပေႏတဖြာꩻ လွမ်တွမ်ႏဗီတဲင် အဝ်ႏဗေင်ႏထာꩻ ဖိုးဆာႏတခြောင် တဖြုံႏကို” နုဲင်းနဝ်ꩻသွူ။
13တလဲင်ႏချင်ႏ မို့ꩻလောင်းတမန်ႏ စဲ့ꩻတပ်တန်တတပ် စွဉ်ႏမို့ꩻလောင်းတမန်ႏဖုံႏ ပေါႏလွဉ်တဲင် ရွစ်အုပ်ꩻထင်ႏ ဗွေႏဘုရာꩻရိုꩻ၊
14“ဗွေႏဘုရာꩻ ဘွုန်ꩻသရေႏ ယံကတောင်ႏလေသော့ꩻ မို့ꩻလောင်း အထိုသွတ်ꩻကိုတွော့ꩻ
လိုꩻဝွေꩻဗွေႏ ကနစ်သက်ဒါႏဖုံႏ ဟံႏလောင်းနဝ်ꩻ ငိမ်ꩻချမ်ꩻသွော့” နုဲင်းနဝ်ꩻသွူ။
15မို့ꩻလောင်းတမန်ႏဖုံႏ အဝ်ႏဝွေꩻသီးထျꩻ ထွိုင်ႏထန်ႏလွေꩻညာꩻ သဲင်ꩻချာထိုꩻ မို့ꩻလောင်းကီကိုချိန်ႏ သွိုꩻတီသားဖုံႏနဝ်ꩻ တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ၊ “နီအွဉ်ဝင်ꩻ လွေꩻတွမ် ဝေင်ꩻဗဲက်လဟဲမ်တဲင် ထွားတွမ် ထာꩻကထွာလွဉ် နုဲင်းထာဝရဘုရာꩻ ကဒေါ့ꩻနယ် ဖေႏလဲဉ်းဒါႏနီနဝ်ꩻနယ်” နုဲင်းနဝ်ꩻသွူ။
16နဝ်ꩻမꩻ ဝွေꩻသီး ထန်ႏလွေꩻမွိုင်တဲင် မော့ꩻစွဉ်ႏ မာရိတွမ်ႏ ယောသပ်တွော့ꩻ ထီႏဗာႏလိုꩻပေႏ အဝ်ႏဗေင်ႏထာꩻ ဖိုးဆာႏတခြောင်ကိုနဝ်ꩻသွူ။ 17သွိုꩻတီသားဖုံႏ ထွိုင်ႏထီႏဝွေꩻနဝ်ꩻ နုဲင်းမို့ꩻလောင်းတမန်ႏ ကဒေါ့ꩻနယ်ဖေႏလဲဉ်းဒါႏ လိုꩻပေႏခရာႏနဝ်ꩻ သွိုꩻတီသားဖုံႏ ဒေါ့ꩻနယ်ဖေႏ ဝွေꩻသီးသွူ။ 18နုဲင်းသွိုꩻတီသားဖုံႏ ကဒေါ့ꩻနယ် လိုꩻကဟွိုန်ဗာႏသား ကားကအဝ်ႏနဝ်ꩻ အံႏဖြာႏငါႏနဝ်ꩻသွူ။ 19ထာꩻယိုဖုံႏ ကားကအဝ်ႏခရာႏနဝ်ꩻ မာရိယူႏလꩻချာတဲင် ယူႏစဉ်ꩻစာꩻယော့စွဉ်ႏ နဝ်ꩻဖုံႏခရာႏသွူ။ 20နုဲင်းမို့ꩻလောင်းတမန်ႏ ကဒေါ့ꩻနယ်လဲဉ်း ဝွေꩻသီးအတွိုင်ꩻ သွိုꩻတီသားဖုံႏနဝ်ꩻ ပွိုးဝွေꩻသီး ဟွိုန်ဗာႏလဲဉ်းတွမ်ႏ ထီႏဗာႏလဲဉ်းနဝ်ꩻမꩻ ဝွေꩻသီး ရွစ်အုပ်ꩻ ဗွေႏဘုရာꩻ ဂွုဏ်ႏတောႏတဲင် သဲင်ꩻချာစွဉ်ႏနဝ်ꩻသွူ။
ဖန်ဟဲ့ꩻဖေႏအမဉ်ꩻယေသျု
21 #
ဝိ ၁၂:၃၊
လု ၁:၃၁။ တပတ်ထွိုင်ႏလဲဉ်း ကအီႏသွို့ꩻဖေႏ လိုꩻပေႏအင်္ဂါႏနာပီ မင်္ဂလာႏချိန်ႏ ဖျော်လွဉ်တဲင် ဝွေꩻနဝ်ꩻ ဖန်ဟဲ့ꩻဖေႏအမဉ်ꩻ ယေသျု၊ အမဉ်ꩻနဝ်ꩻနဝ်ꩻ မို့ꩻလောင်းတမန်ႏ ဖေႏခါꩻလဲဉ်း ခလားဝွေꩻကတယ်ႏ သန္ဓေႏခါကာႏသွူ။
ဆယ်ꩻကပ်ဗွေႏယေသျုဗိမာန်ႏတောႏကျောင်ꩻကို
22 #
ဝိ ၁၂:၆–၈။ နုဲင်းမောသျေ ကပညတ် သေꩻခါꩻအတွိုင်ꩻနဝ်ꩻ ပွိုးယောသပ်တွမ်ႏ မာရိ အီႏမာꩻကြောင်းစင် ဖေႏဗာႏပွယ်ꩻ အချိန်ႏ ဖျော်လွဉ်လဲဉ်းနဝ်ꩻသွူ။ နဝ်ꩻမꩻ ဖေႏကဆယ်ꩻကပ် လိုꩻပေႏ ထာဝရဘုရာꩻထျꩻ လိုꩻပေႏနဝ်ꩻ ဝွေꩻသီးဟဲ့ꩻလွေꩻ ဝေင်ꩻယေရုသလမ်ႏ၊ 23#ထလ ၁၃:၂၊ ၁၂။ နုဲင်းထာဝရဘုရာꩻ ပညတ်ကျမ်ꩻကို ကတဲမ်းသေꩻအတွိုင်ꩻ၊ “ကလွူးလွဉ်ဒါႏ ပိုခိုတခိုႏ စွုမ်ႏဖြာꩻနဝ်ꩻ အီႏဆယ်ꩻကပ်ထေ့ဗာႏ ထာဝရဘုရာꩻ” နုဲင်းနဝ်ꩻသွူ။ 24နုဲင်းထာဝရဘုရာꩻ ပညတ်ကျမ်ꩻကို ကကွီဒါႏ အတွိုင်ꩻ ကအီႏပူႏဇောႏ ဝါးလွီးနီဗာႏ မဉ်ႏတမွေးတဝ်း ဝါးကွူနီဗာႏနဝ်ꩻ ဝွေꩻသီး ထန်ႏလွေꩻစွဉ်ႏနဝ်ꩻသွူ။
25အချိန်ႏနဝ်ꩻ လိုꩻတဖြာꩻ မဉ်ꩻသျုမောင်နဝ်ꩻ အဝ်ႏအုံသော့ꩻ ဝေင်ꩻယေရုသလမ်ႏသွူ။ ဝွေꩻနဝ်ꩻထွာ လိုꩻဟဝ်တဖြာꩻ လိုꩻငမ်းသꩻ ဗွေႏဘုရာꩻတဲင် ဣသရေး လိုꩻမျိုꩻဖုံႏတာႏ ကအီႏလꩻ ထာꩻကယ်ႏတင်ႏနဝ်ꩻ အဝ်ႏမောင်ꩻ အုံပွေါးနဝ်ꩻသွူ။ ကြောင်းစင် ဝိညာဉ်ႏတောႏ အဝ်ႏငီꩻစွဉ်ႏဝွေꩻတဲင်၊ 26ဝွေꩻလꩻသေꩻခါꩻလဲဉ်း ထာဝရဘုရာꩻ ကအွဉ်ႏဂတိခါꩻဒါႏ ခလားဝွေꩻကသီ ဝွေꩻအီႏထီႏဗာႏ မေသျိယနဝ်ꩻသွူ။ 27ဝိညာဉ်ႏတောႏ အွဉ်သျုမောင်လွေꩻသော့ꩻ ဗိမာန်ႏတောႏ ကျောင်ꩻကို နဝ်ꩻသွူ။ မွိုးဖါဖုံႏ ထွိုင်ႏဟဲ့ꩻလွဉ် လိုꩻပေႏ ဗွေႏယေသျု ဗိမာန်ႏတောႏ ကျောင်ꩻကို အီႏမာꩻဖေႏ ဝွေꩻဗွေႏတာႏ နုဲင်းပညတ်ကျမ်ꩻ ကကွီအတွိုင်ꩻနဝ်ꩻ၊ 28သျုမောင်ယွော့လိုꩻပေႏ ဝွေꩻစူဗောင်လောင်းတဲင် အုပ်ꩻထင်ႏစွဉ်ႏ ဗွေႏဘုရာꩻ ကေꩻဇူꩻတောႏနဝ်ꩻသွူ။
29“အွိုးထာဝရဘုရာꩻ၊ ယိုခါ နီဗွေႏ အွဉ်ႏတီႏလဲဉ်းသွူ နီဗွေႏ ဂတိတောႏတဲင်၊
နီဗွေႏသွဉ်းနဝ်ꩻ ယံဖေႏ နီဗွေႏအွဉ်ႏလွေꩻ ငိမ်ꩻချမ်ꩻခွꩻသꩻသွော့။
30စွဉ်ႏခွေနမ်းမဲ့ဖုံႏနဝ်ꩻ ခွေထီႏဗာႏလဲဉ်း နီဗွေႏထာꩻကယ်ႏတင်ႏ၊
31ကရေႏရွယ်ႏ သေꩻခါꩻဒါႏ လိုꩻဖုံႏ ကားကအဝ်ႏတာႏနဝ်ꩻ နီဗွေႏ ဖျင်ရဲဉ်ꩻ သေꩻမꩻလဲဉ်း။
32 # ဟေသျာ ၄၂:၆၊ ၄၉:၆၊ ၅၂:၁၀။ ထာꩻလေယိုနဝ်ꩻ ဖေါႏနယ်ဖေႏ လိုꩻမျိုꩻလင်ဖုံႏ နီဗွေႏ အလိုႏတောႏတဲင်၊
အီလွဉ်ဖေႏ နီဗွေႏဣသရေး လိုꩻမျိုꩻဖုံႏ ဘွုန်ꩻသရေႏ” နုဲင်းနဝ်ꩻသွူ။
33နုဲင်းသျုမောင် ကဒေါ့ꩻဒါႏ ပွိုင်းဝွို့တွမ်ႏ ဝွေꩻခရာႏနဝ်ꩻ လိုꩻပေႏ အမွိုးဖါဖုံႏ အံႏဖြာႏငါႏနဝ်ꩻသွူ။ 34သျုမောင် ဖေႏဝွေꩻသီး မင်္ဂလာႏတဲင် ဒေါ့ꩻဖေႏမာရိ၊ ဝွေꩻဗွေႏအမွိုး၊ “ကအီႏယာႏကုဲင်တာႏတွမ်ႏ ကအီႏကယ်ႏ ဣသရေး လိုꩻမျိုꩻဖုံႏတာႏနဝ်ꩻ ဗွေႏဘုရာꩻ လွိုက်သေꩻခါꩻလဲဉ်း လိုꩻပေႏယိုနဝ်ꩻသွူ။ ဝွေꩻနဝ်ꩻအီႏထွာ ဗွေႏဘုရာꩻနိမိတ် လက္ခဏာႏတစွိုး အီႏဒေါ့ꩻဆန် လိုꩻအာဖုံႏနဝ်ꩻသွူ။ 35နဝ်ꩻမꩻ ဖေါႏနယ် ဝွေꩻသီး ထာꩻယူႏစဉ်ꩻစာꩻတေ့ꩻဖုံႏ စွဉ်ႏအထာꩻသꩻပေႏနဝ်ꩻ ဗွိုန်နုဲင်း နꩻထင်တဗာႏ အီႏဖꩻထိုꩻ ဝွေꩻသီးသꩻရာႏနဝ်ꩻသွူ။
36-37 #
ဟော်ꩻ ၈:၄၊ ၅။ နဝ်ꩻကိုနဝ်ꩻ အာသျာစွိုးခွိုꩻကို ဖန်နွေလပိုမူႏ ပရောဖဲစ်မူႏ သက်တန် မဲမုဲင်းမူႏ မဉ်ꩻအန္န အဝ်ႏတဖြာꩻ၊ ဝွေꩻမူႏနဝ်ꩻ တောႏလမ်းထွူ အုံငီꩻဗာႏ တွမ်ႏအဝါꩻ နွတ်ꩻနေင်ႏလွုမ်ꩻတဲင် ယိုခါ သက်လꩻလဲဉ်း သွစ်ꩻဆီလစ်ꩻနေင်ႏ နဝ်ꩻသွူ။ ဝွေꩻမူႏနဝ်ꩻ မုဲင်ꩻခါတဲ့ တဖထန်ႏထိုꩻတဝ်း ဗိမာန်ႏတောႏကျောင်ꩻတဲင် နီꩻနီꩻနာꩻနာꩻ ဝွေꩻမူႏ အဝ်ႏဝုဲင်ႏကိုꩻကွယ်ႏဒျာႏ ဗွေႏဘုရာꩻ၊ သျောင်ႏကံဒျာႏ ထာꩻအံႏတွော့ꩻ အဝ်ႏဆုတောင်ꩻဒျာႏ ဘုရာꩻနဝ်ꩻသွူ။ 38အချိန်ႏနားရီႏနဝ်ꩻစွဉ်ႏ ဝွေꩻမူႏဖျော်လွဉ်တွော့ꩻ အုပ်ꩻထင်ႏ ဗွေႏဘုရာꩻ ကေꩻဇူꩻတောႏတဲင် လိုꩻကအဝ်ႏမောင်ꩻဒါႏ ဗွေႏဘုရာꩻ အွဉ်ႏစွꩻလွစ်ဖေႏ ဝေင်ꩻယေရုသလမ်ႏသားဖုံႏ ကားကအဝ်ႏနဝ်ꩻ ဒေါ့ꩻနယ်ဖေႏစွဉ်ႏ လိုꩻပေႏခရာႏနဝ်ꩻသွူ။
သဲင်ꩻချာဝေင်ꩻနာဇရဲစ်
39 #
မ ၂:၂၃။ နုဲင်းထာဝရဘုရာꩻ ပညတ်ကျမ်ꩻကို အလိုႏတောႏ ကအဝ်ႏအတွိုင်ꩻ ယောသပ်တွမ်ႏမာရိ ထွိုင်ႏမာꩻလို့ ကားကအဝ်ႏနဝ်ꩻ ဝွေꩻသီးသဲင်ꩻချာ အဇာႏတိ ကာလိလဲခမ်း ဝေင်ꩻနာဇရဲစ်ကိုသွူ။ 40လိုꩻပေႏနဝ်ꩻ တန်လွဉ်တဲင် အာႏတလာလွဉ်တွော့ꩻ ဝွေꩻနဝ်ꩻ အဝ်ႏဗွေတွမ်ႏ ဉာဏ်ႏပညာႏတဲင် ဗွေႏဘုရာꩻ မင်္ဂလာႏဖုံႏနဝ်ꩻ အဝ်ႏဝွေꩻအလောင်းသွူ။
လိုꩻပေႏဗွေႏယေသျုအဝ်ႏသော့ꩻဗိမာန်ႏတောႏကျောင်ꩻကို
41 #
ထလ ၁၂:၁–၂၇၊ ဟော်ꩻ ၁၆:၁–၈။ ပွယ်ꩻပတ္တခါ စွုမ်ႏနေင်ႏ ဗွေႏယေသျုမွိုးဖါနဝ်ꩻ အဝ်ႏလွေꩻ ဝေင်ꩻယေရုသလမ်ႏသွူ။ 42ဗွေႏယေသျု သက်ထွိုင်ႏလꩻ တဆီနီနေင်ႏနဝ်ꩻ ဝွေꩻသီးလွေꩻပွယ်ꩻ နုဲင်းကအဝ်ႏလွေꩻ သေႏသေႏဒါႏနဝ်ꩻသွူ။ 43ပွယ်ꩻထွိုင်ႏထွူနဝ်ꩻ ဝွေꩻသီး သဲင်ꩻချာအလမ်း၊ ကွဲႏတွော့ꩻ လိုꩻပေႏဗွေႏ ယေသျုနဝ်ꩻ အုံကုဲင်သော့ꩻဒျာႏ ဝေင်ꩻယေရုသလမ်ႏကိုနဝ်ꩻသွူ။ ယိုခရာႏနဝ်ꩻ ဝွေꩻဗွေႏအမွိုးဖုံႏ တသေတဝ်းသွူ။ 44ဝွေꩻသီးထင်းဒျာႏ ဝွေꩻ အဝ်ႏငီꩻတွမ်ႏ အသွꩻစွိုꩻ၊ နဝ်ꩻမꩻ ဝွေꩻသီးလွေꩻတဖူꩻ တနီꩻမွူးထွူတဲင် ထုမ်ႏထွားစ ဝွေꩻဗွေႏ ဝွေꩻသီးဖူးဝေး တွမ်ႏအသွꩻဖုံႏကိုနဝ်ꩻသွူ။ 45ဝွေꩻသီး တမော့ꩻတဝ်း ဝွေꩻဗွေႏ၊ နဝ်ꩻမꩻ ဝွေꩻသီး သဲင်ꩻချာ ဝေင်ꩻယေရုသလမ်ႏ ထုမ်ႏထွားချာယင်း ဝွေꩻဗွေႏနဝ်ꩻသွူ။ 46ထွိုင်ႏလꩻသွံနီꩻကို ဝွေꩻသီးမော့ꩻဝွေꩻဗွေႏ အဝ်ႏသော့ꩻ ဗိမာန်ႏတောႏ ကျောင်ꩻကို အဝ်ႏအုံလင်ꩻငီꩻတွမ်ႏ ဂျူးကျမ်ꩻဒါႏဆရာႏဖုံႏတဲင် အဝ်ႏနာႏဝွေꩻသီးတရာꩻ၊ အဝ်ႏရီရွောင် အုံကွံတွမ်ႏ ဝွေꩻသီးသွူ။ 47တွမ်ႏဉာဏ်ႏပညာႏ ဝွေꩻဗွေႏ ကဖြေႏချာဒါႏဖုံႏနဝ်ꩻ လိုꩻကဟွိုန်ဗာႏသားဖုံႏ ကားကအဝ်ႏ အံႏဖြာႏငါႏသွူ။ 48အမွိုးဖါဖုံႏ ထွိုင်ႏထီႏဝွေꩻနဝ်ꩻ အံႏဖြာႏငါႏတဲင် ဝွေꩻဗွေႏအမွိုး ဒေါ့ꩻဖေႏဝွေꩻ၊ “ပိုခို၊ ပွိုးတမုဲင်ꩻ နာꩻမာꩻဗာႏတွိုႏနီ နုဲင်းယိုဟောင်း၊ သီဖါတွမ်ႏခွေနဝ်ꩻ သꩻဝꩻနန်းခီငါႏတဲင် အဝ်ႏကျိုꩻစာꩻထုမ်ႏနာꩻ” နုဲင်းနဝ်ꩻသွူ။
49ဝွေꩻဗွေႏ လဝ်းချာဝွေꩻသီး၊ “ပွိုးတမုဲင်ꩻ သီထုမ်ႏဗာႏတွိုႏ ခွေဟောင်း၊ ခွေအဝ်ႏသော့ꩻဒျာႏ ခွေဖါလမ်းကိုနဝ်ꩻ သီတသေတဝ်းနဲ့ဟောင်း” နုဲင်းနဝ်ꩻသွူ။ 50ကွဲႏတွော့ꩻ ဝွေꩻဗွေႏငဝ်းဖြေႏနဝ်ꩻ ဝွေꩻသီး တသေနာႏတဝ်းသွူ။
51နဝ်ꩻမꩻ ဗွေႏယေသျု သဲင်ꩻချာငီꩻ စွဉ်ႏဝွေꩻသီး ဝေင်ꩻနာဇရဲစ်တဲင် နဝ်ꩻကို ဝွေꩻဗွေႏ အဝ်ႏလွောက်ꩻနာႏဒျာႏ ဝွေꩻသီးငဝ်းနဝ်ꩻသွူ။ အမွိုးထွိုင်ႏဟွိုန် ယိုခရာႏဖုံႏ ကားကအဝ်ႏနဝ်ꩻ မတ်တောင်ꩻသေꩻခါꩻ သꩻကိုနဝ်ꩻသွူ။ 52#၁သျာ ၂:၂၆၊ ပညာႏ ၃:၄။ ဗွေႏယေသျုနဝ်ꩻ အနမ်းခန္ဓာႏတွမ်ႏ ဉာဏ်ႏပညာႏ နီစွိုးလွုမ်း တန်လွဉ်တဲင် လꩻမဲ့ငါ ဗွေႏဘုရာꩻတွမ်ႏ လိုꩻဖုံႏဆꩻငါနဝ်ꩻသွူ။
ទើបបានជ្រើសរើសហើយ៖
လုကာ 2: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
