လုကာ 11
11
ဗွေႏယေသျုသွဉ်သင်ဖေႏထာꩻဆုတောင်ꩻ
(မတဲ ၆:၉–၁၃။ ၇:၇–၁၁)
1တနီꩻသား ဗွေႏယေသျု အဝ်ႏဆုတောင်ꩻ ခင်ႏလမ်း တထွောင်းကိုနဝ်ꩻသွူ။ ဝွေꩻဗွေႏ ထွိုင်ႏအွဉ်ႏထွူ ထာꩻဆုတောင်ꩻချိန်ႏ ဝွေꩻဗွေႏ တပဲ့တောႏဖုံႏကို တဖြာꩻ ဒေါ့ꩻဖေႏဝွေꩻဗွေႏ၊ “ဗွေႏ၊ ဗွိုန်နုဲင်းယောဟန် ကသွဉ်ဖေႏ ဝွေꩻအတပဲ့ဖုံႏ အတွိုင်ꩻနဝ်ꩻ သွဉ်ဖေႏနီ ငဝ်းဆုတောင်ꩻမွိုင်” နုဲင်းနဝ်ꩻသွူ။
2ဗွေႏယေသျုဒေါ့ꩻဖေႏ ဝွေꩻသီး၊ “သီကဆုတောင်ꩻချိန်ႏနဝ်ꩻ ဆုတောင်ꩻသွော့ နုဲင်းယို။
‘အွိုးဖါဗွေႏ၊
နီဗွေႏ အမဉ်ꩻနာႏမ ကြောင်းစင်နဝ်ꩻ ယံဖေႏ ကရိုႏသေႏသွော့၊
နီဗွေႏခမ်းထီနဲင်ႏငံႏ ယံဖေႏကတယ်ႏလွဉ်။
3တနီꩻအတာႏ ကအဝ်ႏလိုႏဒါႏ ထာꩻအံႏနဝ်ꩻ ဖေႏသွော့နီ တနီထွူတနီꩻ။
4လိုꩻကမာꩻမာႏဒါႏ နီစွုမ်ႏဖြာꩻနဝ်ꩻ ပွိုးနီအွဉ်ႏစွꩻဖေႏလဲဉ်း နဝ်ꩻမꩻ
အွဉ်ႏစွꩻဖေႏသွော့ နီအပဲစ်ဖုံႏ၊
တွမ်ႏပသာလွေꩻမွိုန်းနီ ထာꩻစမ်ꩻထွား ယပ်ꩻခုဲင်ႏကို’” နုဲင်းနဝ်ꩻသွူ။
5ဗွေႏယေသျုဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “ရိုꩻခန်းသီကို ပါꩻတဖြာꩻနဝ်ꩻ မွူးကွို့ꩻနာꩻချိန်ႏ အီႏလွေꩻ အသွꩻတဖြာꩻ လမ်းတဲင်ဒေါ့ꩻ၊ ‘သွꩻ၊ ဖေႏလ ခွေတခိုး ပေါင်မုတ် သွံဖြုံႏငါႏမွိုင်။ 6ခွေသွꩻ တဖြာꩻနဝ်ꩻ ထန်ႏတဖူꩻ စဖျော်လွဉ် ခွေလမ်းတဲင် ဝွေꩻတာႏ ခွေအီႏဖေႏထာꩻအံႏ တစွိုးစွိုးအဲဉ်ထဝ်း’ နုဲင်းနဝ်ꩻသွူ။ 7နဝ်ꩻမꩻ ရိုꩻခန်းသီသွꩻ အဝ်ႏလမ်းကို လဝ်းချာ၊ ‘တွမ်ႏမာꩻသျွုတ်မွိုန်း ခွေဟုဲင်း။ တခါꩻနဝ်ꩻ ခတ်ꩻခါꩻလဲဉ်းတဲင် ခွေစွဉ်ႏခွေပိုဖုံႏ အဝ်ႏသော့ꩻလဲဉ်း ခင်ႏလမ်းဗေင်ႏကိုသွူ။ ခွေထွိုင်ႏတဲင် တဖေႏနွောင်ꩻတဝ်းနာꩻ တစွိုးစွိုး’ နုဲင်းနဝ်ꩻသွူ။ 8မွေးသွူ။ နဝ်ꩻထွူ ထွာထာꩻနုဲင်းမုဲင်ꩻဟောင်း။ ခွေဒေါ့ꩻဖေႏသီ၊ ကွပ်ပွိုးနာꩻနဝ်ꩻ ထွာဝွေꩻသွꩻဒျာႏနဝ်ꩻမꩻ နာꩻကကွီဒါႏနဝ်ꩻ ပေါႏဝွေꩻတထွိုင်ႏဖေႏတဝ်း၊ နာꩻတဝင်ꩻသꩻတဝ်းတဲင် အဝ်ႏကွီသွုပ်သွုပ်နဝ်ꩻမꩻ နာꩻကမဉ်လꩻဒါႏဖုံႏ ကားကအဝ်ႏနဝ်ꩻ ဝွေꩻအီႏထွိုင်ႏတဲင် အီႏဖေႏလို့နဝ်ꩻသွူ။
9နဝ်ꩻမꩻ ခွေရိုꩻဖေႏသီ ကွီသွော့ သီအီႏလက်ခံႏလꩻ၊ ထုမ်းသွော့ သီအီႏမော့ꩻ၊။ တဒေါက်ꩻသွော့ တခါꩻ အီႏဗွောင်ဖေႏသီသွူ။ 10ပွိုးလိုꩻကကွီနဝ်ꩻ အီႏလꩻတဲင် လိုꩻကထုမ်ႏနဝ်ꩻ အီႏမော့ꩻတွော့ꩻ ပါꩻကတဒေါက်ꩻဒါႏ တခါꩻ စွုမ်ႏဖြာꩻဖြာꩻနဝ်ꩻ အီႏဗွောင်ဖေႏသွူ။ 11သီအကို ပိုကွီထပေႏတွော့ꩻ ဖါကဖေႏတောဒါႏ ရူးနဝ်ꩻ အဝ်ႏနေ တဖြာꩻဖြာꩻဟောင်း။ 12မဉ်ႏတမွေးတဝ်း ဝွေꩻကွီ ဆျာဒီႏတွော့ꩻ သီဖေႏထိုꩻတောဝွေꩻ မီꩻငေါ်ꩻနဝ်ꩻ အဝ်ႏနေဟောင်း။ 13သီထွာ လိုꩻကုဲင်ဖုံႏမဉ်ႏတဲ့ သီပိုဖုံႏအတာႏနဝ်ꩻ ဖေႏဒျာႏ ထာꩻဟဝ်မျတ်နဝ်ꩻ သီအဝ်ႏသေ၊ နဝ်ꩻမꩻ လိုꩻကကွီဒါႏ ဝွေꩻဗွေႏထျꩻသားနဝ်ꩻ သီဖါကအဝ်ႏ ခမ်းထီမို့ꩻလောင်းကီနဝ်ꩻ ကယိန်းဖေႏလွိုသီ ကြောင်းစင် ဝိညာဉ်ႏတောႏ” နုဲင်းနဝ်ꩻသွူ။
ဗွေႏယေသျုတွမ်ႏဗေလဇေဗုလလူꩻကုဲင်
(မတဲ ၁၂:၂၂–၃၀။ မာကု ၃:၂၀–၂၇)
14ဗွေႏယေသျု ဝါးထန်ႏထိုꩻဖေႏ လူꩻကုဲင်တအာႏ ကမွို့ꩻဒါႏ ပါꩻတဖြာꩻတွော့ꩻ လူꩻကုဲင်ထွိုင်ႏထန်ႏ ထိုꩻချိန်ႏ ပါꩻခိုနဝ်ꩻ ဒေါ့ꩻစယင်းထာꩻသွူ။ လိုꩻဖုံႏနဝ်ꩻ အံႏဖြာႏငါႏသွူ။ 15#မ ၉:၃၄၊ ၁၀:၂၅။ ကွဲႏတွော့ꩻ လိုꩻယင်ဟန်ႏဖုံႏနဝ်ꩻဒေါ့ꩻ၊ “ဖေႏကဝါးထန်ႏနွောင်ꩻ လူꩻကုဲင်ဖုံႏ၊ ကဖေႏဒါႏ ဝွေꩻတန်ꩻခိုꩻနဝ်ꩻနဝ်ꩻ ထွာလူꩻကုဲင် အကဲႏအခေါင်ꩻ ဗေလဇေဗုလဒျာႏ” နုဲင်းနဝ်ꩻသွူ။
16 #
မ ၁၂:၃၈၊ ၁၆:၁၊ မာ ၈:၁၁။ လိုꩻလင်ဖုံႏနဝ်ꩻ မဉ်ဒေါင်ဒျာႏ ဗွေႏယေသျု၊ နဝ်ꩻမꩻ ဗွေႏဘုရာꩻ အဝ်ႏထောက်ခံႏ ဝွေꩻကျောင်ꩻ ဖေႏကမာꩻနယ် ထာꩻအံႏဖြာႏခရာႏ တစွိုးနဝ်ꩻ ဝွေꩻသီးကွီသွူ။ 17ကွဲႏတွော့ꩻ ဝွေꩻသီး ကအဝ်ႏယူႏ စဉ်ꩻစာꩻဒါႏနဝ်ꩻ ဗွေႏယေသျု အဝ်ႏသေ၊ နဝ်ꩻမꩻ ဝွေꩻဗွေႏဒေါ့ꩻဖေႏ ဝွေꩻသီး၊ “ခမ်းထီနဲင်ႏငံႏနဝ်ꩻ ခမ်းသား မဉ်ႏတတဲ့ꩻလို့တဝ်းဝင်ꩻ တစွိုꩻတွမ်ႏတစွိုꩻ မဉ်ႏတွိုက်ꩻချာ လို့ဝင်ꩻနဝ်ꩻ အီႏတညတဝ်း ကုဲင်လီထိုꩻဒျာႏသွူ။ တမွိုးဖါပိုစွိုꩻကို မဉ်ႏတတဲ့ꩻလို့တဝ်းဝင်ꩻ မဉ်ႏဆန်ဒျာႏလို့ဝင်ꩻနဝ်ꩻ အီႏကုဲင်လီထိုꩻဒျာႏသွူ။ 18နဝ်ꩻမꩻ စားတန်ခမ်းထီနဲင်ႏငံႏ တစွိုꩻစွဉ်ႏတစွိုꩻ မဉ်ႏတွိုက်ꩻချာ လို့ဝင်ꩻနဝ်ꩻ အဆုဲင်ꩻသွတ်ꩻ အီႏခံႏနွောင်ꩻ နုဲင်းမုဲင်ꩻဟောင်း။ ကွပ်ပွိုး ဗေလဇေဗုလ ဖေႏခွေ တန်ꩻခိုꩻနဝ်ꩻမꩻ ခွေဝါးထန်ႏနွောင်ꩻ လူꩻကုဲင်ဖုံႏ သီရိုꩻနုဲင်းနဝ်ꩻသွူ။ 19ခွေကဝါးထန်ႏ လူꩻကုဲင် မဉ်ႏထွာနုဲင်းယိုနဝ်ꩻ တွိုႏသီတပဲ့ဖုံႏ ကဝါးထန်ႏနွောင်ꩻဒါႏ လူꩻကုဲင်နဝ်ꩻ စွဉ်ႏပါꩻမုဲင်ꩻ တန်ꩻခိုꩻဟောင်း။ သီအဝ်ႏမာႏဒျာႏ ကျောင်ꩻနဝ်ꩻ သီနမ်းတပဲ့ဖုံႏ အဝ်ႏခံႏဖေႏ သက်သေႏသွူ။ 20နုဲင်းနဝ်ꩻ တမွေးတဝ်း၊ ခွေကဝါးထန်ႏ လူꩻကုဲင်ဖုံႏနဝ်ꩻ စွဉ်ႏဗွေႏဘုရာꩻ တန်ꩻခိုꩻဒျာႏနဝ်ꩻမꩻ ဗွေႏဘုရာꩻ အခမ်းထီနဲင်ႏငံႏ ဖျော်လွဉ်လဲဉ်း သီထျꩻကျောင်ꩻ ယိုနဝ်ꩻ ခံႏဖေႏသက်သေႏသွူ။
21“လိုꩻအာႏတလာတဖြာꩻ စွဉ်ႏဝွေꩻခြွိုင်းလက်နက်စွုမ်ႏ မဉ်ႏအုံပွေါးရံႏဟဝ် ဝွေꩻအလမ်းနဝ်ꩻ ဝွေꩻဥစ္စာႏဖုံႏ ကားကအဝ်ႏ အီႏလုမ်းဗဉ်ႏဒျာႏသွူ။ 22ကွဲႏတွော့ꩻ ပါꩻအာႏတလာလဲဉ်းဝွေꩻတဖြာꩻ ထွိုင်ႏတွိုက်ꩻထိုꩻဝွေꩻ ယားကုဲင်ထိုꩻဝွေꩻ၊ ထူႏလွေꩻညာꩻထိုꩻ ဝွေꩻကအာႏကွိုꩻဒါႏ ခြွိုင်းလက်နက်ဖုံႏ နဝ်ꩻတွော့ꩻ နုဲင်းဝွေꩻကသိမ်ꩻခါꩻလဲဉ်းဒါႏ ထာꩻခြိုꩻဖုံႏနဝ်ꩻ အီႏဖန်းဝေႏလို့ဝင်ꩻ နဝ်ꩻသွူ။
23 #
မာ ၉:၄၀။ “ပါꩻအဖြာꩻ တပါတဝ်း ခွေဖဲ့ꩻနဝ်ꩻ အဆန်ချာခွေသွူ။ ပါꩻအဖြာꩻ တစွဲကို စုဗူႏတဝ်း တွမ်ႏခွေနဝ်ꩻ ထွာဒျာႏ အမာꩻလီလာသား နဝ်ꩻသွူ။
လူꩻကုဲင်သဲင်ꩻမွို့ꩻချာဖျင်ယင်း
(မတဲ ၁၂:၄၃–၄၅)
24လူꩻကုဲင်ကအဝ်ႏ လိုꩻတဖြာꩻကို ထွိုင်ႏထန်ႏလွေꩻထိုꩻ ချိန်ႏနဝ်ꩻ ထောင်လွေꩻစွဉ်ႏ ထာꩻသဲင်ခြစ်ꩻ ခင်ႏလမ်း ထုမ်ႏအုံပဆား ခင်ႏလမ်းတထွောင်းသွူ။ ထုမ်ႏခင်ႏလမ်း တထွောင်း မဉ်ႏတမော့ꩻတဝ်းနဝ်ꩻ ရိုꩻချာအနမ်း၊ ‘ခွေအီႏသဲင်ꩻချာဒျာႏ ခွေလမ်း’ နုဲင်းနဝ်ꩻသွူ။ 25နဝ်ꩻမꩻ သဲင်ꩻချာတဲင် ထီႏအလမ်း ဖွစ်ꩻဖျိုးကြောင်း သေꩻခါꩻလို့လဲဉ်းနဝ်ꩻသွူ။ 26တွိုႏနဝ်ꩻ ထန်ႏလွေꩻတဲင် ဟဲ့ꩻလွဉ်စွဉ်ႏ လူꩻကုဲင်ကယ်ꩻကဝွေꩻ အလင်နွတ်ꩻဗာႏတဲင် ဝွေꩻသီး လွဉ်အုံစွဉ်ႏ နဝ်ꩻကိုသွူ။ နဝ်ꩻမꩻ လူꩻကမွို့ꩻဒါႏလိုꩻနဝ်ꩻ အဆုဲင်ꩻသွတ်ꩻ ယိန်းဟုဲင်း ကယ်ꩻစွဉ်ႏ အရီးခါ” နုဲင်းနဝ်ꩻသွူ။
မင်္ဂလာႏအစဲစ်အမဲဉ်ႏ
27ဗွေႏယေသျု ထွိုင်ႏဒေါ့ꩻဖေႏ နုဲင်းယိုထွူနဝ်ꩻ ပါꩻမူႏတဖြာꩻ အဝ်ႏလိုꩻစွိုꩻဖုံႏအကို ဒေါ့ꩻထန်ႏဖေႏ ဝွေꩻဗွေႏ၊ “ပါꩻမူႏကလွူး နီဗွေႏတွော့ꩻ ကဝွတ်ပတ် အွဉ်ႏနဲဉ်းဗာႏဒါႏ နီဗွေႏနဝ်ꩻ မင်္ဂလာႏအဝ်ႏငါႏ” နုဲင်းနဝ်ꩻသွူ။
28ကွဲႏတွော့ꩻ ဗွေႏယေသျုလဝ်းချာ၊၊ “လိုꩻကဟွိုန် ဗွေႏဘုရာꩻ ငဝ်းဖုံႏတွော့ꩻ ကလွောက်ꩻနာႏသားဖုံႏနဝ် မင်္ဂလာႏကယိန်းအဝ်ႏ” နုဲင်းနဝ်ꩻသွူ။
ကွီဖေႏကအွဥ်ႏနယ်နိမိတ်လက္ခဏာႏ
(မတဲ ၁၂:၃၈–၄၂)
29 #
မ ၁၆:၄၊ မာ ၈:၁၂။ လိုꩻစွိုꩻဖုံႏ ကအဝ်ႏခူဒါႏ ဝွေꩻဗွေႏချိန်ႏ ဝွေꩻဗွေႏဒေါ့ꩻဖေႏ၊ “လိုꩻဖုံႏဟန်ႏနီꩻယို မွိုက်ကုဲင်ငါႏ ခွိုင်းကားမုဲင်ꩻ၊ ဝွေꩻသီးနဝ်ꩻ ကွီဒျာႏ နိမိတ်လက္ခဏာႏ တစွိုးသွူ။ ကွဲႏတွော့ꩻ ပေါႏလွိုသွူ ယောန နိမိတ်လက္ခဏာႏနဝ်ꩻ အီႏဖေႏဝွေꩻသီးခရာႏ အလင်အဲဉ်ထဝ်းသွူ။ 30#ယောန ၃:၄။ ဗွိုန်နုဲင်းနဝ်ꩻနေနေ လိုꩻဝေင်ꩻနိနေဝေ ဝေင်ꩻသားဖုံႏတာႏ ပရောဖဲစ် ယောနနဝ်ꩻထွာ နိမိတ်လက္ခဏာႏ တစွိုးသွူ။ နဝ်ꩻမꩻ လိုꩻပိုခိုနဝ်ꩻ အီႏထွာဗာႏ လိုꩻဟန်ႏနီꩻယိုတာႏ နိမိတ်လက္ခဏာႏ တစွိုးသွူ။ 31#၁ရာႏ ၁၀:၁–၁၀၊ ၂ရာႏချုပ် ၉:၁–၁၂။ ဖေႏကဟွိုန်နာႏဗာႏ ခွန်တန်သောလမုန် ထာꩻသွဉ်သင် ပညာႏငဝ်းနဝ်ꩻ ကွပ်ပွိုး ဝွေꩻမူႏအဝ်ႏ အခမ်းထီ ထန်ႏလွေꩻညာꩻ တဖူꩻတလီးလွုမ်းနဝ်ꩻသွူ။ ခွေဒေါ့ꩻဖေႏသီ အမွေးအမဲဉ်ႏ တန်မျတ်ကယ်ꩻက သောလမုန်နဝ်ꩻ အဝ်ႏယိုကိုသွူ။ နဝ်ꩻမꩻ ထာꩻစီႏရင်ႏမွူးနီꩻနဝ်ꩻ၊ သျေဗခမ်းခွန်မူႏ အီႏအုံထွိုင်ႏတဲင် စွဲꩻတရာꩻ လိုꩻဟန်ႏနီꩻယိုဖုံႏသွူ။ 32#ယောန ၃:၅။ ကွပ်ပွိုး ဝေင်ꩻနိနေဝေသားဖုံႏ ဝွေꩻသီး ထွိုင်ႏဟွိုန် ယောနဟော်ꩻတရာꩻနဝ်ꩻ ဝွေꩻသီး အဝ်ႏမာꩻအပဲစ်ဖုံႏ လꩻချာထာꩻကော့ꩻမာႏသွူ။ ခွေဒေါ့ꩻဖေႏသီ အမွေးအမဲဉ်ႏ၊ ကတန်မျတ်ကယ်ꩻက ယောနနဝ်ꩻ အဝ်ႏယိုကိုသွူ။ ထာꩻစီႏရင်ႏ မွူးနီꩻနဝ်ꩻ လိုꩻဝေင်ꩻနိနေဝေသားဖုံႏ အီႏအုံထွိုင်ႏ စွဲꩻတရာꩻသီနဝ်ꩻသွူ။
နမ်းခန္ဓာႏထာꩻလေ
(မတဲ ၅:၁၅။ ၆:၂၂–၂၃)
33“ပါꩻမုဲင်ꩻတဖြာꩻနဝ်ꩻ တဲစ်ꩻမေႏတေန်ꩻတွော့ꩻ တအွဉ်ႏဗဉ်ႏဗꩻထိုꩻတဝ်း မဉ်ႏတမွေးတဝ်း အွဉ်ႏတခြို့ꩻတဝ်း ခြောင်းဆꩻလသွူ။ ကွပ်စွဉ်ႏမာꩻ နုဲင်းနဝ်ꩻနဝ်ꩻ အွဉ်ႏဒျာႏ မေႏတေန်ꩻထွန်ႏလောင်း၊ လိုꩻဖုံႏကလွဉ်သော့ꩻနဝ်ꩻ ဖေႏနေးကထီႏဗာႏ ထာꩻလေနဝ်ꩻသွူ။ 34နမ်းခန္ဓာႏအတာႏ သီမဲ့ဖုံႏနဝ်ꩻ ဗွိုန်နုဲင်း မေႏတေန်ꩻသွူ။ သီမဲ့ဖုံႏ မဉ်ႏစဲင်းချိန်ႏနဝ်ꩻ၊ သီရုပ်ခန္ဓာႏ တဗာႏလွုမ်း အဝ်ႏဗွေစွဉ်ႏ ထာꩻလေသွူ။ ကွဲႏတွော့ꩻ သီမဲ့ဖုံႏ မဉ်ႏတဟဝ်တဝ်းချိန်ႏနဝ်ꩻ သီနမ်းခန္ဓာႏ တဗာႏလွုမ်း အီႏခေ့ꩻကရစ်ꩻသွူ။ 35တွိုႏနဝ်ꩻ ထာꩻလေ ကအဝ်ႏသော့ꩻဒါႏ သီအကို ဖေႏကခေ့ꩻထိုꩻမွိုန်းနဝ်ꩻ မာꩻဖေႏဟဝ်ဟဝ်သွော့။ 36သီနမ်းခန္ဓာႏ တဗာႏလွုမ်း မဉ်ႏအဝ်ႏဗွေသော့ꩻစွဉ်ႏ ထာꩻလေနဝ်ꩻ ထာꩻခေ့ꩻ တထွောင်းထွောင်း အဲဉ်ထဝ်းတွော့ꩻ ဗွိုန်နုဲင်း မေႏတေန်ꩻတဖြုံႏ အရောင်ႏ ကတောင်ႏသီလောင်း” နုဲင်းနဝ်ꩻသွူ။
ဗွေႏယေသျုစီႏရင်ႏပဲစ်တင်ႏဖါရိသဲဖုံႏတွမ်ႏကျမ်ꩻဒါႏဆရာႏဖုံႏ
(မတဲ၂၃:၁–၃၆။ မာကု ၁၂:၃၈–၄၀)
37ဗွေႏယေသျု ထွိုင်ႏအွဉ်ႏထွူ ထာꩻဒေါ့ꩻချိန်ႏ ဖေႏကအံႏငီꩻ စွဉ်ႏဝွေꩻနဝ်ꩻ ဖါရိသဲတဖြာꩻ ဖစ်ဟဲ့ꩻဝွေꩻဗွေႏသွူ။ နဝ်ꩻမꩻ ဝွေꩻဗွေႏလွေꩻတဲင် အီႏအံႏငီꩻ ထာꩻအံႏနဝ်ꩻ အုံလင်ꩻစွဉ်ႏနဝ်ꩻသွူ။ 38ခလားကအံႏ ထာꩻအံႏချိန်ႏ ဗွေႏယေသျု တဟွာႏတဝ်းစူနဝ်ꩻ ဖါရိသဲ ထွိုင်ႏသေထွꩻနဝ်ꩻ ဝွေꩻအံႏဖြာႏငါႏသွူ။။ 39နဝ်ꩻမꩻ ဗွေႏဘုရာꩻ ဒေါ့ꩻဖေႏဝွေꩻ “ပေါ့ꩻနုဲင်းနဝ်ꩻနဝ်ꩻ ယိုခါ သီဖါရိသဲဖုံႏနဝ်ꩻ မာꩻကြောင်းစင်ဒျာႏ တကောက်ꩻတွမ်ႏ ဝန်ႏဖုံႏအထန်ႏဖဲ့ꩻ၊ ကွဲႏတွော့ꩻ သီသꩻကိုနဝ်ꩻ အဝ်ႏဗွေသော့ꩻဒျာႏ ထာꩻမွိုက် ကျံꩻကြမ်ꩻတွမ်ႏ ထာꩻကုဲင်ဖုံႏသွူ။ 40လိုꩻမွိုက်ဟွေး၊ ဗွေႏဘုရာꩻ ကဖန်ဆင်ꩻ မာꩻထွာလွဉ်ဒါႏ အထန်ႏဖဲ့ꩻနဝ်ꩻ အကိုဖဲ့ꩻနဝ်ꩻတဲ့ ဖန်ဆင်ꩻမာꩻထွာပါ တမွေးတဝ်းဟောင်း။ 41ကွဲႏတွော့ꩻ နုဲင်းထာꩻကအဝ်ႏသော့ꩻဒါႏ သီတကောက်ꩻကိုဖုံႏတွမ်ႏ ဝန်ႏတောင်ꩻ အကိုဖုံႏနဝ်ꩻ ဖေႏထိုꩻသွော့ လိုꩻကေန်ꩻခြောဖုံႏ၊ နဝ်ꩻမꩻ သီအတာႏ ထာꩻကားကအဝ်ႏ အီႏကြောင်းစင်လွဉ်သွူ။
42 #
ဝိ ၂၇:၃၀။ “ဖါရိသဲဖုံႏ၊ သီတာႏ ဟဝ်ငမ်းသꩻ အမင်္ဂလာႏ အဝ်ႏငါႏ ခွိုင်းကားမုဲင်ꩻ၊ ကထွာဒါႏ ရာႏသီႏအလꩻ တသီႏမွူးပေႏဖုံႏ၊ အိန်ခြိမ်ꩻမွူး၊ သီယာမွူးဖုံႏ၊ ဆီပွန်းတပွန်းနဝ်ꩻ သီဖေႏဗွေႏဘုရာꩻ၊ ကွဲႏတွော့ꩻ ထာꩻတရာꩻစွဉ်ႏ ထာရက်ဗွေႏဘုရာꩻနဝ်ꩻ တအဲဉ်ထဝ်းသွူ။ ယိုဖုံႏနဝ်ꩻ သီဟဝ်ကံကျင်ꩻ၊ အလင်ဖုံႏနဝ်ꩻတဲ့ ဟဝ်အွဉ်ႏကုဲင်ထိုꩻတဝ်းသွူ။
43“ဖါရိသဲဖုံႏ၊ သီတာႏဟဝ်ငမ်းသꩻ အမင်္ဂလာႏ အဝ်ႏငါႏ ခွိုင်းကားမုဲင်ꩻ၊ ကဖျင်ရဲဉ်ꩻခါꩻဖေႏဒါႏ ခင်ႏလမ်းအုံလင်ꩻ တရာꩻစရွပ်ကိုစွဉ်ႏ ထာꩻရိုႏသေႏ ကနုတ်ဆက်ဒါႏ ဆေꩻတန်ꩻခါႏကိုနဝ်ꩻ သီကျွိုက်နစ်သက်ငါႏသွူ။ 44သီအတာႏ ဟဝ်ငမ်းသꩻ အမင်္ဂလာꩻအဝ်ႏငါႏ ခွိုင်းကားမုဲင်ꩻ၊ သီနဝ်ꩻ ဗွိုန်နုဲင်းဒျာႏ တတဲမ်းမတ်ခါꩻတဝ်း သဲင်ႏခဲင်ꩻအောင်၊ လိုꩻဖုံႏတသေတဝ်းတွော့ꩻ အဝ်ႏထောင်လွေꩻလူးဒါႏ အအောင်လောင်းသွူ။
45ကျမ်ꩻဒါႏဆရာႏဖုံႏကို တဖြာꩻဒေါ့ꩻဖေႏ ဝွေꩻဗွေႏ၊ “ဆရာႏ၊ နာꩻကရိုꩻဒါႏ နုဲင်းယိုနဝ်ꩻ နာꩻဒေါ့ꩻစောက်ꩻကာꩻ ပါဒျာႏနီသွူ။
46ဗွေႏယေသျုလဝ်းချာ၊ “ကျမ်ꩻဒါႏဆရာႏဖုံႏ၊ သီနဝ်ꩻတဲ့ ဟဝ်ငမ်းသꩻ အမင်္ဂလာႏ အဝ်ႏငါႏ ခွိုင်းကားမုဲင်ꩻ၊ တခြိုꩻထွူႏ အီႏတောလွေꩻ ယပ်ꩻခုဲင်ႏငါႏနဝ်ꩻ သီအွဉ်ႏဒင်ႏဖေႏ လိုꩻဖုံႏငင်းလောင်း၊ ကွဲႏတွော့ꩻ ကအီႏစွဲကို ဝွေꩻသီး ကတောလွေꩻ တခြိုꩻထွူႏနဝ်ꩻ သီနမ်း စွဉ်ႏစူနုန်ငါတဲ့ တခွိုင်းတဝ်းသွူ။ 47သီတာႏ ဟဝ်ငမ်းသꩻ အမင်္ဂလာꩻ အဝ်ႏငါႏ ခွိုင်းကားမုဲင်ꩻ၊ သီမွိုးဖြား ဖါဖြားသီးစိုး ကမာꩻသီလဲဉ်းဒါႏ ပရောဖဲစ်ဖုံႏ အသဲင်ႏခဲင်ꩻအောင်နဝ်ꩻ သီမာꩻဟဝ်ဖေႏမွေးစွဉ်ႏ မုတ်အောင်ဖုံႏသွူ။ 48နုဲင်း သီမွိုးဖြား ဖါဖြားသီးကမာꩻနဝ်ꩻ သီသဘော်ꩻတူႏတဲင် သီနမ်းနဝ်ꩻတဲ့ အဝ်ႏပဲစ်မာႏ ဒျာႏသွူ။ ဝွေꩻသီး မာꩻသီ ပရောဖဲစ်ဖုံႏတဲင် သီနဝ်ꩻတယ်ႏဖေႏ ဝွေꩻသီး အသဲင်ႏခဲင်ꩻ မုတ်အောင်ဖုံႏနဝ်ꩻသွူ။ 49ပွိုးအကျောင်ꩻခရာႏ နုဲင်းယိုနဝ်ꩻမꩻ ဗွေႏဘုရာꩻ ဉာဏ်ႏတောႏနဝ်ꩻ မိန်းဖေႏ၊ “ခွေအီႏအွဉ်ႏစွꩻလွေꩻဖေႏ ဝွေꩻသီး ပရောဖဲစ်ဖုံႏတွမ်ႏ တရာꩻဟော်ꩻသားဖုံႏသွူ။ ယင်ဟန်ႏသားဖုံႏနဝ်ꩻ ဝွေꩻသီး အီႏမာꩻသီတဲင် အလင်ဖုံႏနဝ်ꩻ ဝွေꩻသီး အီႏနစ်စက်နဝ်ꩻသွူ။။ 50နဝ်ꩻမꩻ တယ်ႏစွဉ်ႏ ကဖန်ဆင်ꩻ မာꩻထွာလွဉ် ဟံႏတန်ခါကား ပွိုးကမာꩻသီထိုꩻဒါႏ ပရောဖဲစ်ဖုံႏ ကားကအဝ်ႏအတာႏ လိုꩻခေတ်ယိုခါဖုံႏနဝ်ꩻ အီႏခံႏဗာႏ အပဲစ်တံႏသွူ။ 51#ကမ္ဘာႏ ၄:၈၊ ၂ရာႏချုပ် ၂၄:၂၀၊ ၂၁။ တယ်ႏစွဉ်ႏ ကမာꩻသီထိုꩻဒါႏ အာဗေလ၊ ဗꩻတွိုႏလွေꩻစွဉ်ႏ ကမာꩻသီထိုꩻဒါႏ ဇာခရိ ယဇ်ပလ္လင်ႏတွမ်ႏ ကြောင်းစင် ခင်ႏလမ်းခါႏနဝ်ꩻသွူ။ မွေးသွူ၊ ခွေဒေါ့ꩻဖေႏသီ၊ နဝ်ꩻဖုံႏ ကားကအဝ်ႏအတာႏ လိုꩻခေတ်ယိုခါဖုံႏနဝ်ꩻ အီႏခံႏဗာႏ အပဲစ်တံႏသွူ။
52“ကျမ်ꩻဒါႏဆရာႏဖုံႏ၊ သီတာႏ ဟဝ်ငမ်းသꩻ အမင်္ဂလာႏ အဝ်ႏငါႏ ခွိုင်းကားမုဲင်ꩻ၊ ကအီႏဗွောင်အီ ထာꩻသေထာꩻဒါႏ ဉာဏ်ႏပညာႏ လမ်းတခါꩻသော်နဝ်ꩻ သီအဝ်ႏခွုမ်သေꩻခါꩻဒျာႏသွူ။ သီနမ်းတဲ့ တနွို့သော့ꩻတဝ်းတဲင် လိုꩻကကျိုꩻစာꩻ နွို့သော့ꩻသားဖုံႏ နဝ်ꩻတဲ့ သီရဲဆီꩻခါꩻဒျာႏသွူ။
53ဗွေႏယေသျု အဝ်ႏခင်ႏလမ်းနဝ်ꩻ ထွိုင်ႏထန်ႏလွေꩻထိုꩻချိန်ႏ၊ ကျမ်ꩻဒါႏဆရာႏဖုံႏတွမ်ႏ ဖါရိသဲဖုံႏနဝ်ꩻ ဝွေႏဖန်ႏသန်မွေးစွဉ်ႏ ဝွေꩻဗွေႏတဲင် ပွိုင်းဝွို့တွမ်ႏ ကရီဒါႏ ဝွေꩻဗွေႏငဝ်းရီနဝ်ꩻ အခရာႏဖုံႏ အာငါႏနဝ်ꩻသွူ။ 54အဝ်ႏကျိုꩻစာꩻ အီႏဒေါင် ဝွေꩻဗွေႏတွော့ꩻ အဝ်ႏကျိုꩻစာꩻဆွမ်ꩻ ဝွေꩻဗွေႏ ငဝ်းမာႏ တစွိုးစွိုးသွူ။
ទើបបានជ្រើសរើសហើយ៖
လုကာ 11: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
