လုကာ 10
10
ဗွေႏယေသျုအွဉ်ႏစွꩻထန်ႏလွေꩻလိုꩻနွတ်ꩻဆီနီဖြာꩻ
1နဝ်ꩻထွူ ဗွေႏဘုရာꩻလွိုက် လိုꩻခိုလင် ၇၂ ဖြာꩻတဲင် အွဉ်ႏထန်ႏဝွေꩻသီး ဝင်ꩻနီတစွိုꩻ ဖေႏကထန်ႏလွေꩻရီး ဝွေꩻဗွေႏဝေင်ꩻ စွုမ်ႏဝေင်ꩻတွမ်ႏ ဝွေꩻဗွေႏနမ်း ကအီႏကျွꩻလွေꩻဒါႏ ခင်ႏလမ်း ဖုံႏနဝ်ꩻသွူ။ 2#မ ၉:၃၇၊၃၈။ ဝွေꩻဗွေႏ ဒေါ့ꩻဖေႏ ဝွေꩻသီး၊ “အဝ်ႏလိုႏရဲ့ဒါႏဗွူ ခင်ႏလမ်းနဝ်ꩻ အဝ်ႏအာငါႏ၊ ကွဲႏတွော့ꩻ ကောရဲ့ စုသိမ်ꩻသားဖုံႏနဝ်ꩻ အဝ်ႏဆေ့ꩻငါႏသွူ။ ပွိုးနဝ်ꩻမꩻ ဖေႏနေးဝွေꩻဗွေႏ ကအွဉ်ႏစွꩻလွဉ် ကောရဲ့သိမ်ꩻသားဖုံႏ ဝွေꩻဗွေႏ အခြံကိုနဝ်ꩻ ဆုတောင်ꩻထင်ႏသွော့ ခြံဗွေႏ။ 3#မ ၁၀:၁၆။ လွေꩻသွော့၊ ဗွိုန်နုဲင်း သွိုꩻဖုံႏ ကအဝ်ႏထွီႏမီꩻဖုံႏကိုနဝ်ꩻ ခွေအဝ်ႏအွဉ်ႏစွꩻလွေꩻ သီသွူ။ 4#မ ၁၀:၇–၁၄၊ မာ ၆:၈–၁၁၊ လု ၉:၃–၅။ တွမ်ႏထူႏလွေꩻမွိုန်း တောင်ပဲင်း၊ တောင်းပွိုလား၊ စွဉ်ႏခင်ႏဖါႏဆုပ်ꩻဟုဲင်း။ တဖူꩻလောင်းနဝ်ꩻ တွမ်ႏအုံထွိုင်ႏ နုတ်ဆက်မွိုန်း ပါꩻတဖြာꩻဖြာꩻဟုဲင်း။ 5သီကနွို့လွေꩻသော့ꩻဒါႏ လမ်းတဖြုံႏကို အချိန်ႏမုဲင်ꩻတယဝ်း အရီးသွတ်ꩻ ရိုꩻဖေႏသွော့၊ ‘ထာꩻငိမ်ꩻချမ်ꩻသာႏ ယံကအဝ်ႏငီꩻ တွမ်ႏလမ်းယို’ နုဲင်းနဝ်ꩻတဲင်၊ 6လမ်းနဝ်ꩻ ပါꩻအဖြာꩻ မဉ်ႏအုံအဝ်ႏငိမ်ꩻချမ်ꩻ ရက်ပဲင်ꩻဒျာႏဝင်ꩻနဝ်ꩻ သီကအဝ်ႏနုတ်ဆက်ဒါႏ ထာꩻငိမ်ꩻချမ်ꩻသာႏ ငဝ်းနဝ်ꩻ အဝ်ႏငီꩻ ပုဂ္ဂိုလ်ႏအဖြာꩻနဝ်ꩻ လောင်းသွူ။ မဉ်ႏတမွေးတဝ်း သီကအဝ်ႏနုတ်ဆက်ဒါႏ ထာꩻငိမ်ꩻချမ်ꩻသာႏ ငဝ်းနဝ်ꩻ သဲင်ꩻချာဒျာႏ သီထျꩻသွူ။ 7#၂ကော ၉:၁၄၊ ၁တိ ၅:၁၈။ အုံသော့ꩻစွူစွူဗော့ꩻ လမ်းအဖြုံႏနဝ်ꩻတဲင် အံႏအွꩻဗော့ꩻဒျာႏ နုဲင်းဝွေꩻသီး ကဖေႏအံႏဒါႏသီ၊ ပွိုးထာꩻမာꩻသားဖုံႏ တာႏနဝ်ꩻ အီႏဖေႏဗာႏ ဝွေꩻသီး ထာꩻမာꩻခနဝ်ꩻသွူ။ တွမ်ႏခြုဲင်းအုံ တောထိုꩻမွိုန်း တလမ်းထွူ တလမ်းဟုဲင်း။ 8သီကနွို့သော့ꩻဒါႏ ဝေင်ꩻတဖြုံႏကိုချိန်ႏ ကကျိုႏရပ်ဆွုမ်ႏဒါႏသီနဝ်ꩻ အံႏသွော့ နုဲင်းဝွေꩻသီး ကအွဉ်ႏလင်ꩻဖေႏ သီဆꩻငါနဝ်ꩻဟုဲင်း။ 9လိုꩻဆာဖုံႏ ကအဝ်ႏသော့ꩻ ဝေင်ꩻကိုနဝ်ꩻ လုမ်ꩻလာꩻ မာꩻဟဝ်ဖေႏသွော့၊ တဲင်ရိုꩻဖေႏသွော့ လိုꩻနဝ်ꩻကို၊ ‘ဗွေႏဘုရာꩻ ခမ်းထီနဲင်ႏငံႏ အဝ်ႏကျွꩻလွဉ် ဗော့ꩻလဲဉ်းသီ’ နုဲင်းနဝ်ꩻဟုဲင်း။ 10#တ ၁၃:၅၁။ ကွဲႏတွော့ꩻ ကလွေꩻနွို့သော့ꩻဒါႏ ဝေင်ꩻတဖြုံႏကိုတဲင် တရပ်ကျိုႏဆွုမ်ႏတဝ်း သီချိန်ႏနဝ်ꩻ ထန်ႏတဖူꩻလောင်းတွော့ꩻ ရိုꩻသွော့၊ 11‘ဟံႏဖွန်ႏကအဝ်ႏ သီဝေင်ꩻကို ကဗွို့ꩻဒါႏ နီခင်ႏနဝ်ꩻ နီအီႏတဒေါက်ꩻထန်ႏ ဖေႏကဆန်ချာသီ။ ကွဲႏတွော့ꩻ ဗွေႏဘုရာꩻခမ်းထီ ကျွꩻလွဉ် ဗော့ꩻလဲဉ်းသွူ သီနဝ်ꩻ ယူႏလꩻချာသွော့’ နုဲင်းနဝ်ꩻဟုဲင်း။ 12#ကမ္ဘာႏ ၁၉:၂၄–၂၈၊ မ ၁၁:၂၄၊ မ ၁၀:၁၅။ ခွေဒေါ့ꩻဖေႏသီ အမွေးအမဲဉ်ႏ၊ ထာꩻစီႏရင်ႏမွူးနီꩻ ဗွေႏဘုရာꩻ အီႏအွဉ်ႏနယ် ထာꩻသꩻညင်ꩻ ဝေင်ꩻသောဒုံလောင်းနဝ်ꩻ အီႏလွိုကယ်ꩻက ဝေင်ꩻနဝ်ꩻသွူ။
ထာꩻယွုမ်းအဲဉ်ထဝ်းဝေင်ꩻဖုံႏ
(မတဲ ၁၁:၂၀–၂၄)
13 # ဟေသျာ ၂၃:၁–၁၈၊ ဧသ ၂၆:၁—၂၈:၂၆၊ ယောလ ၃:၄–၈၊ အာ ၁:၉၊၁၀၊ ဇာ ၉:၂–၄။ “အွိုး၊ ဝေင်ꩻခေါရာဇိန်၊ နာꩻတာႏ ဟဝ်ငမ်းခရာႏ အမင်္ဂလာႏ အီႏတန်ငါႏ ခွိုင်းကားမုဲင်ꩻ။ အွိုးဝေင်ꩻဗဲက်သဲဒ၊ နာꩻနဝ်ꩻတဲ့ ဟဝ်ငမ်းခရာႏ အမင်္ဂလာႏတန်ငါႏ ခွိုင်းကားမုဲင်ꩻ၊ နုဲင်းကမာꩻနယ် ဖေႏလဲဉ်းဒါႏသီ ဟဝ်အံႏဖြာႏခရာႏ နိမိတ်လက္ခဏာႏဖုံႏ မဉ်ႏမာꩻနယ်ဒျာႏတွမ် ဝေင်ꩻတုရုကိုတွမ်ႏ ဝေင်ꩻသိဒုန်ကိုနဝ်ꩻ လိုꩻနဝ်ꩻကိုဖုံႏ အုံလင်ꩻဖါႏကို ကꩻခွမ်ꩻလာꩻ တခီယာႏတွော့ꩻ တွမ်ႏဖါႏ ဖြေ့ꩻလူးချာ ဝွေꩻသီး ကတူႏလောင်း အီႏအွဉ်ႏနယ် ဝွေꩻသီး ကအဝ်ႏမာꩻဒါႏ အပဲစ်ဖုံႏ လꩻလဲဉ်း ထာꩻကော့ꩻမာႏကျောင်ꩻနဝ်ꩻ ညငါႏလဲဉ်းသွူ။ 14ထာꩻစီႏရင်ႏ မွူးနီꩻနဝ်ꩻ ဗွေႏဘုရာꩻ အီႏအွဉ်ႏနယ် ကရုဏာႏ ထာꩻသꩻညင်ꩻ ဝေင်ꩻတုရုတွမ်ႏ ဝေင်ꩻသိဒုန်လောင်းနဝ်ꩻ လွိုကယ်ꩻလဲဉ်းကသီ၊။ 15#ဟေသျာ ၁၄:၁၃–၁၅။ တဲင်အွိုး ဝေင်ꩻကပေရနောင်၊ မဉ်ႏနုဲင်းသီတာႏနဝ်ꩻ သီမဉ်မျောက်ပင်ႏ ထင်ႏထိုချာဒျာႏ သီနမ်း လဲင်ꩻဗꩻတွိုႏစွဉ်ႏ မို့ꩻနဲ့ဟောင်း။ သီနဝ်ꩻ အီႏခံႏဗာႏ လွဉ်းလင်ꩻလ ငါးရုဲင်ꩻကို” နုဲင်းနဝ်ꩻသွူ။
16 #
မ ၁၀:၄၀၊ မာ ၉:၃၇၊ လု ၉:၄၈၊ ယော ၁၃:၂၀။ ဗွေႏယေသျု ဒေါ့ꩻဖေႏ ဝွေꩻတပဲ့တောႏဖုံႏ၊ “ပါꩻမုဲင်ꩻနာႏ သီငဝ်းတဲ့ နာႏလဲဉ်း ခွေငဝ်းတဲင် ပါꩻမုဲင်ꩻပယ်ႏထိုꩻ သီတဲ့ ပယ်ႏထိုꩻခွေသွူ။ ပါꩻမုဲင်ꩻပယ်ႏ ခွေတဲ့ ပယ်ႏပါလဲဉ်း ဗွေႏအပါꩻ ကအွဉ်ႏစွꩻလွဉ်ခွေ” နုဲင်းနဝ်ꩻသွူ။
လိုꩻနွတ်ꩻဆီနီဖြာꩻသဲင်ꩻလွဉ်ချာ
17လိုꩻနွတ်ꩻဆီနီဖြာꩻနဝ်ꩻ သꩻဟဝ်သꩻရေꩻ မွေးနေးစွဉ်ႏတွော့ꩻ သဲင်ꩻလွဉ်ချာသွူ။ ဝွေꩻသီးဒေါ့ꩻ၊ “ဗွေႏ၊ စွဉ်ႏနီဗွေႏ အမဉ်ꩻနာႏမတွော့ꩻ နီမိန်းဖေႏ လူꩻကုဲင်ဖုံႏချိန်ႏနဝ်ꩻ ဝွေꩻသီး လဲင်ꩻနာႏစွဉ်ႏ နီငဝ်းဖုံႏ” နုဲင်းနဝ်ꩻသွူ။
18ဗွေႏယေသျု လဝ်းချာဝွေꩻသီး၊ “ခွေထီႏလဲဉ်း စာႏတန်ႏဖုံႏ အဝ်ႏခမ်းထီမို့ꩻလောင်း ထဲ့လင်ꩻဗွိုန်နုဲင်း တျာႏလိက်ꩻနဝ်ꩻသွူ။ 19#သာ ၉၁:၁၃။ နာႏရောင်သွော့၊ ဖေႏနေး သီကထောင်လွေꩻလူး ရူးဖုံႏတွမ်ႏ စောင်းဗင်ဖုံႏလောင်းတွော့ꩻ ဖေႏကအောင်ႏနွောင်ꩻလို့ ရန်ႏသူႏတန်ꩻခိုꩻနဝ်ꩻ ခွေဖေႏလဲဉ်းသွူသီ ဩဇာႏအာႏဏာႏတဲင် အီႏတမာꩻဆာ ထိုꩻဗာႏတဝ်း သီသွူ။ 20ကွဲႏတွော့ꩻ ကွပ်ပွိုး လူꩻကုဲင်ဖုံႏ နာႏသီငဝ်း နဝ်ꩻမꩻ သꩻတွမ်ႏပျောႏမွိုန်း။ ကွပ်ပွိုး သီမဉ်ꩻစရင်ꩻ တဲမ်းသော့ꩻခါꩻလဲဉ်း ခမ်းထီမို့ꩻလောင်းကို နဝ်ꩻအတွက် သꩻကယိန်း ပျောႏသွင်ႏသွော့” နုဲင်းနဝ်ꩻသွူ။
ဗွေႏယေသျုသꩻပျောႏသွင်ႏ
(မတဲ ၁၁:၂၅–၂၇။ ၁၃:၁၆–၁၇)
21အချိန်ႏနဝ်ꩻ တွမ်ႏကြောင်းစင် ဝိညာဉ်ႏတောႏ မာꩻဗွေဖေႏ ဗွေႏယေသျု ထာꩻပျောႏသွင်ႏတဲင်ဒေါ့ꩻ၊ “အွိုးဖါ၊ မို့ꩻတွမ်ႏဟံႏ အဗွေႏ နုဲင်းနီဗွေႏ ကအွဉ်ႏဒို့ꩻဗဉ်ႏဗꩻခါꩻဒါႏ ဉာဏ်ႏသားတွမ်ႏ ပညာႏသားဖုံႏနဝ်ꩻ ကွပ်ပွိုး နီဗွေႏ အွဉ်ႏနယ်ဖေႏ လိုꩻတသွဉ်ထူႏဗာႏတဝ်း သားဖုံႏအတွက် ခွေကေꩻဇူꩻတန်ငါႏ နီဗွေႏသွူ။ မွေးသွူ၊ ဖါတောႏ၊ ကအဝ်ႏထွာလွဉ်ဗာႏ နုဲင်းယိုနဝ်ꩻ နီဗွေႏ ကျွိုက်နစ်သက်ငါႏနဝ်ꩻသွူ။
22 #
ယော ၃:၃၅၊
ယော ၁၀:၁၅။ “ခွေဖါတောႏနဝ်ꩻ ဖေႏလို့လဲဉ်းခွေ ထာꩻကားကအဝ်ႏဖုံႏသွူ။ ပေါႏလွိုသွူ ဖါတောႏနဝ်ꩻ ပါꩻမုဲင်ꩻတဲ့ တသေတဝ်း ပိုခိုတောႏတဲင် ပေါႏလွိုသွူ ပိုခိုတောႏတွမ်ႏ ပိုခိုတောႏ ကလွိုက်ထူႏ ဗွောင်နယ်ဖေႏဒါႏ ပါꩻအဖြာꩻနဝ်ꩻ ပါꩻမုဲင်ꩻတဲ့ တသေတဝ်းဖါတောႏ” နုဲင်းနဝ်ꩻသွူ။
23နဝ်ꩻထွူ ဗွေႏယေသျု ခွယ်ထေ့ချာ တပဲ့တောႏဖုံႏတဲင် ဒေါ့ꩻတေ့ꩻဖေႏ ဝွေꩻသီး၊ ‘တွမ်ႏသီမဲ့ ကထီႏဗာႏနေးလဲဉ်း ဖုံႏနဝ်ꩻ သီမင်္ဂလာႏအဝ်ႏငါႏ။ 24ခွေဒေါ့ꩻဖေႏသီ ပရောဖဲစ်ဖုံႏ အာဖြာꩻတွမ်ႏ ခွန်တန်ဖုံႏ မဉ်ထီႏငါႏ နုဲင်းသီကထီႏဗာႏစွဉ်ႏတဲ့ ဝွေꩻသီး တထီႏနွောင်ꩻတဝ်းတဲင် မဉ်ဟွိုန်ငါႏ နုဲင်းသီကဟွိုန်ဗာႏဖုံႏနဝ်ꩻ တဟွိုန်ဗာႏတဝ်း” နုဲင်းနဝ်ꩻသွူ။
သျာမရိဟဝ်ပွုံႏဥပမာႏ
25 #
မ ၂၂:၃၅–၄၀၊ မာ ၁၂:၂၈–၃၄။ ကျမ်ꩻဒါႏဆရာႏ တဖြာꩻ လွဉ်တဲင် ကျံႏဒေါင် ဗွေႏယေသျုသွူ။ ဝွေꩻရီ၊ “ဆရာႏ၊ ဖေႏကလꩻ ထာဝရအသက်နဝ်ꩻ ခွေမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။
26ဗွေႏယေသျု လဝ်းချာဝွေꩻ၊ “လိတ်ကျမ်ꩻရိုꩻ နုဲင်းမုဲင်ꩻဟောင်း။ နာꩻဖေါႏ အဓိပ္ပါယ်ႏ နုဲင်းမုဲင်ꩻဟောင်း” နုဲင်းနဝ်ꩻသွူ။
27 #
ဟော်ꩻ ၆:၅၊
ဝိ ၁၉:၁၈။ ပါꩻခိုလဝ်းချာ၊ “‘စွဉ်ႏသီသꩻအာႏ ကားကအဝ်ႏ၊ စွဉ်ႏသီဝိညာဉ်ႏအာႏ ကားကအဝ်ႏတွမ်ႏ သီအစွန်ꩻအာႏရဲင်ꩻ ကားကအဝ်ႏ တွမ်ႏသီထာꩻစဉ်ꩻစာꩻသꩻ ကားကအဝ်ႏနဝ်ꩻ ရက်ဗာႏထာဝရဘုရာꩻ သီဗွေႏဘုရာꩻ တဲင် ‘နုဲင်းသီကရက်ချာ သီနမ်းနဝ်ꩻ ရက်သွော့ သီလိုꩻအသောင်အရင်ꩻဖုံႏ’” နုဲင်းနဝ်ꩻသွူ။
28 #
ဝိ ၁၈:၅။ ဗွေႏယေသျုလဝ်းချာ၊ “နာꩻကဒေါ့ꩻနဝ်ꩻမွေး၊ မာꩻသွော့ နုဲင်းယိုတဲင် နာꩻအသက်အီႏမွန်” နုဲင်းနဝ်ꩻသွူ။
29ကွဲႏတွော့ꩻ ကျမ်ꩻဒါႏဆရာႏနဝ်ꩻ မဉ်ဖေါႏနယ်ချာဒျာႏ အနမ်း စွို့ꩻစွဉ်ႏငါႏကျောင်ꩻ၊ နဝ်ꩻမꩻ ဝွေꩻရီဗွေႏယေသျု၊ “ခွေအသောင်အရင်ꩻနဝ်ꩻ ထွာပါꩻမုဲင်ꩻဟောင်း” နုဲင်းနဝ်ꩻသွူ။
30ဗွေႏယေသျုလဝ်းချာ၊ “တလဲင်ႏသား ပါꩻခိုတဖြာꩻ အဝ်ႏဝေင်ꩻ ယေရုသလမ်ႏ လင်ꩻလွေꩻဝေင်ꩻယေရိခေါ၊ စွန်ဖုံႏ ထွိုင်ႏစွန်ဝွေꩻချိန်ႏ ဗွောင်ႏဝွေꩻခွမ်ꩻလာꩻ တွဲႏဝွေꩻတွော့ꩻ အီႏဗော့ꩻသီထိုꩻတဲင် အွဉ်ႏပြာႏကုဲင်ထိုꩻ ဝွေꩻနဝ်ꩻသွူ။ 31ကထွာ နုဲင်းယိုထွူ ယဇ်ပရောဟိတ် တဖြာꩻ လင်ꩻလွဉ်စွဉ်ႏ တဖူꩻလောင်း၊ ကွဲႏတွော့ꩻ ဝွေꩻထွိုင်ႏထီႏ ပါꩻခိုနဝ်ꩻ ဝွေꩻထောင်လွေꩻတောစွဉ်ႏ တဖူꩻအလင် တဖဲ့ꩻနဝ်ꩻသွူ။ 32ဗွိုန်နုဲင်းနဝ်ꩻနေနေ လေဝိတဖြာꩻနဝ်ꩻတဲ့ လွဉ်နဝ်ꩻကို လွေꩻထေ့တွော့ꩻ ထွားပါꩻခိုထွူတဲင် ထောင်လွေꩻထိုꩻစွဉ်ႏ တဖူꩻအလင် တဖဲ့ꩻသွူ။ 33#၂ရာႏချုပ် ၂၈:၁၅။ ကွဲႏတွော့ꩻ သျာမရိတဖြာꩻ ထန်ႏလွေꩻတဖူꩻတဲင် ထွိုင်ႏဖျော်လွဉ် ပါꩻခိုနဝ်ꩻထျꩻ ဝွေꩻထွိုင်ႏထီႏ ပါꩻခိုနဝ်ꩻ ဝွေꩻအဝ်ႏဗွေစွဉ်ႏ ထာꩻသညင်ꩻနဝ်ꩻသွူ။ 34ဝွေꩻလွေꩻထေ့ ပါꩻခိုနဝ်ꩻထျꩻတွော့ꩻ ဝွေꩻအထာꩻဆာကဲင်ဖုံႏနဝ်ꩻ ဆျာꩻလူးဖေႏ နမ်းမန် တွမ်ႏဝုဲင်တဲင် ထာꩻဆာကဲင်ဖုံႏနဝ်ꩻ ဗဲဉ်ဖေႏတွမ်ႏ ပိတ်ခဝ်သွူ။ နဝ်ꩻထွူ လိုꩻဆာနဝ်ꩻ ဝွေꩻအွဉ်ႏဒင်ႏ ဝွေꩻအထာꩻသား လောင်းတွော့ꩻ ဟဲ့ꩻလွေꩻဝွေꩻ ထဉ်ႏစခန်ꩻတထွောင်း ဝွေꩻလုမ်ꩻလာꩻဟဝ်ဖေႏ ဝွေꩻနဝ်ꩻကိုသွူ။ 35ဆုဲင်ꩻတနီꩻ ဝွေꩻထူႏထန်ႏ ဝွေꩻရွဉ်ယာႏ ဒင်္ဂါꩻနီဗီႏတဲင် ရွဉ်ဒင်္ဂါꩻနဝ်ꩻ ဝွေꩻဖေႏ ထဉ်ႏလမ်းပွေါးသားသွူ။ ဝွေꩻဒေါ့ꩻဖေႏ ထဉ်ႏလမ်းပွေါးသား‘ ထွားဟဝ်ဟဝ်သွော့ ဝွေꩻဟုဲင်း နုဲင်းနဝ်ꩻတဲင် ခွေမဉ်ႏသဲင်ꩻလွဉ်ချာ တဖူꩻယိုချိန်ႏ နာꩻကအဝ်ႏလိုႏလꩻဒါႏ ဝွေꩻလောင်း အလင်ဖုံႏ ကားကအဝ်ႏနဝ်ꩻ ခွေအီႏဖြော်ဖေႏချာလို့ဒျာႏနာꩻ’” နုဲင်းနဝ်ꩻသွူ။
36တဲင်ဗွေႏယေသျု အွဉ်ႏသွတ်ꩻထာꩻဒေါ့ꩻ၊ “ဝွေꩻသီး ဝင်ꩻသွံယို အမာꩻထာꩻနဝ်ꩻ နာꩻထင်း အဖြာꩻမုဲင်ꩻ ဗွိုန်နုဲင်း စွန်သား ကတွဲႏဆာထိုꩻဒါႏ ပါꩻခိုယို လမ်းသောင်လမ်းထျꩻဟဝ်ဟောင်း” နုဲင်းနဝ်ꩻသွူ။
37ကျမ်ꩻဒါႏဆရာႏ လဝ်းချာ၊ “ပါꩻအဖြာꩻ ကသညင်ꩻဒါႏဝွေꩻ” နုဲင်းနဝ်ꩻသွူ။
ဗွေႏယေသျုလဝ်းချာ၊ “နာꩻလွေꩻတဲင် မာꩻနုဲင်းနုဲင်းသွော့ နုဲင်းနဝ်ꩻဟုဲင်း” နုဲင်းနဝ်ꩻသွူ။
ဗွေႏယေသျုလွေꩻလယ်ႏမာတတွမ်ႏမာရိလမ်း
38 #
ယော ၁၁:၁။ နုဲင်းဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ ကထန်ႏလွေꩻ ဝွေꩻသီးတဖူꩻနဝ်ꩻ ဝွေꩻဗွေႏ ဖျော်လွဉ် ဒုံတဒုံ၊ နဝ်ꩻကို ပါꩻမူႏတဖြာꩻ မဉ်ꩻကဟဲ့ꩻဒါႏ မာတနဝ်ꩻ ရပ်ကျိုႏဆွုမ်ႏ ဝွေꩻဗွေႏ၊ ဝွေꩻမူႏ အလမ်းကိုနဝ်ꩻသွူ။ 39ဝွေꩻမူႏနဝ်ꩻ အဖူးမူႏမဉ်ꩻ မာရိအဝ်ႏတဖြာꩻ၊ အဝ်ႏအုံလင်ꩻ ဗွေႏခင်ႏထျꩻတဲင် အဝ်ႏနာႏ ဝွေꩻဗွေႏ ထာꩻသွဉ်သင်နဝ်ꩻသွူ။ 40မာတနဝ်ꩻ သꩻအဝ်ႏခိုးလျားဒျာႏ ဝွေꩻမူႏ ကအဝ်ႏမာꩻဗာႏဒါႏ ထာꩻမာꩻဖုံႏ ကားကအဝ်ႏသွူ။ နဝ်ꩻမꩻ ဝွေꩻမူႏလွဉ် ဝွေꩻဗွေႏထျꩻတဲင်ဒေါ့ꩻ၊ “ဗွေႏ၊ ထွားဒေါ့ꩻဖေႏဗဲင်း ခွေသွဉ်း ဖူးမူႏမွိုင်၊ ဖေႏခွေကမာꩻလို့ဗာႏ ထာꩻမာꩻဖုံႏ ကားကအဝ်ႏနဝ်ꩻ နီဗွေႏ အဝ်ႏထွားလွိုဒျာႏနဲ့ဟောင်း။ လွဉ်တဲင် ဖေႏကစွဲကိုခွေနဝ်ꩻ ဒေါ့ꩻဖေႏသွော့ ဝွေꩻမူႏမွိုင်” နုဲင်းနဝ်ꩻသွူ။
41ဗွေႏဘုရာꩻ လဝ်းချာ ဝွေꩻမူႏ၊ “မာတ၊ မာတ၊ နာꩻနဝ်ꩻ အဝ်ႏနန်းခီ သꩻကုဲင်ဒျာႏထာꩻ အာစွိုးငါႏသွူ။ 42ကွဲႏတွော့ꩻ အဝ်ႏလိုႏဒျာႏ တစွိုးလွုမ်ꩻ။ မာရိနဝ်ꩻ လွိုက်ထူႏလဲဉ်း ထာꩻအမဲဉ်ႏတဲင် ထာꩻနဝ်ꩻနဝ်ꩻ အဝ်ႏဝွေꩻမူႏထျꩻ အီႏထူႏလွေꩻညာꩻထိုꩻ တလꩻတဝ်းသွူ။
ទើបបានជ្រើសរើសហើយ៖
လုကာ 10: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
