ယောဟန် 20
20
ကအဝ်ႏခြေင်ထိုꩻဒါႏသဲင်ႏခဲင်ꩻမုတ်
(မတဲ ၂၈:၁–၈။ မာကု ၁၆:၁–၈။ လုကာ ၂၄:၁–၁၂)
1တနင်ꩻနွေႏရဝ်ꩻစဝ်း ထာꩻအဝ်ႏခေ့ꩻ နေကကျာꩻ မာဂဒလ ဝေင်ꩻသားမူႏ မာရိနဝ်ꩻ လွေꩻသဲင်ႏခဲင်ꩻမုတ်တဲင် ထီႏဗာႏစွဉ်ႏ လုံးတူႏတန် ကအဝ်ႏပေ့ꩻဒါႏ သဲင်ႏခဲင်ꩻငွါနဝ်ꩻ အဝ်ႏညာꩻထိုꩻလဲဉ်းနဝ်ꩻသွူ။ 2ဝွေꩻမူႏ ဖင်းထန်ႏလွေꩻထေ့ ပေတရုတွမ်ႏ တပဲ့တောႏ အလင်ဖုံႏ ပါꩻဗွေႏယေသျု ကရက်ဒါႏနဝ်ꩻတွော့ꩻ ဒေါ့ꩻနယ်ဝွေꩻသီး၊ “အဝ်ႏသဲင်ႏခဲင်ꩻမုတ် ဝွေꩻသီး ထူႏလွေꩻညာꩻထိုꩻလဲဉ်း ဗွေႏတဲင် ဝွေꩻသီး အွဉ်ႏထိုꩻဝွေꩻဗွေႏ မုဲင်ꩻကိုနဝ်ꩻ နီတသေတဝ်း” နုဲင်းနဝ်ꩻသွူ။
3နဝ်ꩻထွူ ပေတရုတွမ်ႏ တပဲ့တောႏ အလင်နဝ်ꩻ လွေꩻစွဉ်ႏ သဲင်ႏခဲင်ꩻအောင်နဝ်ꩻသွူ။ 4ဝွေꩻသီးဝင်ꩻနီ ဖင်းလွေꩻနေး၊ ကွဲႏတွော့ꩻ တပဲ့တောႏ အလင်နဝ်ꩻ ဖင်းတကတ်ꩻရီး ပေတရုတဲင် ဖျော်လွေꩻတွိုႏရီးစွဉ်ႏ သဲင်ႏခဲင်ꩻအောင်နဝ်ꩻသွူ။ 5ဝွေꩻအုံကောင်းထန်ႏ ထွားယောင်ႏတဲင် ထီႏဒျာႏ ပိတ်ယာႏချော်ꩻဖုံႏလွုမ်ꩻ၊ ကွဲႏတွော့ꩻ ဝွေꩻတနွို့သော့ꩻတဝ်း ကောင်းကိုသွူ။ 6ကဖျော်လွဉ်ဆုဲင်ꩻဒါႏ ဝွေꩻဆꩻချာ သိမုန်ပေတရုနဝ်ꩻ နွို့သော့ꩻစွဉ်ႏ သဲင်ႏခဲင်ꩻအောင်ကိုသွူ။ ဝွေꩻထီႏ ခွမ်ꩻလာꩻပိတ်ယာႏချော်ꩻ အဝ်ႏပြာႏကုဲင်ထာꩻ နဝ်ꩻကိုတဲင် 7ပိတ်ယာႏချော်ꩻ ကအဝ်ႏဗဲဉ်ခူဒါႏ ဗွေႏယေသျု ကတူႏနဝ်ꩻ တအဝ်ႏပြာႏငီꩻတဝ်းစွဉ်ႏ ခွမ်ꩻလာပိတ်ယာႏချော်ꩻ၊ အဝ်ႏတဒူႏခေါ်ဒျာႏနဝ်ꩻသွူ။ 8နဝ်ꩻထွူ တပဲ့တောႏ အလင်၊ ကဖျော်လွဉ်ရီးဒါႏ သဲင်ႏခဲင်ꩻအောင်နဝ်ꩻတဲ့ နွို့သော့ꩻစွဉ်ႏ ကောင်းကိုတဲင် ဝွေꩻထီႏဗာႏတွော့ꩻ ယွုမ်းစွဉ်ႏနဝ်ꩻသွူ။ 9( ဝွေꩻဗွေႏ အဝ်ႏထာꩻသီကို အီႏထွိုင်ႏမွန်ဗာႏ နုဲင်းလိတ်ကျမ်ꩻ ကဒေါ့ꩻဒါႏနဝ်ꩻ ဝွေꩻသီး လꩻသေနာႏတဝ်းဒွိုန်းသွူ။) 10နဝ်ꩻထွူ တပဲ့တောႏဖုံႏ သဲင်ꩻချာယင်း လမ်းသွူ။
ဗွေႏယေသျုပေါႏနယ်ဖေႏမာဂဒလဝေင်ꩻသားမူႏမာရိ
(မတဲ ၂၈:၉–၁၀။ မာကု ၁၆:၉–၁၁)
11မာရိနဝ်ꩻ အဝ်ႏအုံထွိုင်ႏငွိုးထာꩻ သဲင်ႏခဲင်ꩻအောင် ကောင်းထန်ႏဖဲ့ꩻနဝ်ꩻသွူ။ ဝွေꩻမူႏ အဝ်ႏငွိုးထာꩻကျာꩻနဝ်ꩻ ဝွေꩻမူႏ အုံကောင်ႏတဲင် ထွားယောင်ႏသော့ꩻ သဲင်ႏခဲင်ꩻအောင်ကိုတွော့ꩻ 12ထီႏဗာႏစွဉ်ႏ မို့ꩻလောင်းတမန်ႏ နီပါꩻ အဝ်ႏကွဉ်ကꩻ ခွမ်ꩻလာꩻဗွာ အဝ်ႏအုံလင်ꩻထာꩻ ကအွဉ်ႏလဲဉ်းဒါႏ ဗွေႏယေသျု ရုပ်ခန္ဓာႏ အကတူႏထွောင်းဖဲ့ꩻနဝ်ꩻ တဖြာꩻ အခင်ႏယောင်းဖဲ့ꩻနဝ်ꩻ တဖြာꩻသွူ။ 13ဝွေꩻသီးရီ ဝွေꩻမူႏ၊ “ပါꩻမူႏ၊ ပွိုးတမုဲင်ꩻ နာꩻအဝ်ႏငွိုး ဗာႏတွိုႏထာꩻဟောင်း” နုဲင်းနဝ်ꩻသွူ။
ဝွေꩻမူႏလဝ်းချာ၊ “ဝွေꩻသီး ထူႏညာꩻထိုꩻလဲဉ်း ခွေသွဉ်းမူႏ အဗွေႏတဲင် ဝွေꩻသီး အွဉ်ႏထိုꩻဝွေꩻဗွေႏ မုဲင်ꩻကိုနဝ်ꩻ ခွေတသေတဝ်း” နုဲင်းနဝ်ꩻသွူ။
14တွိုႏနဝ်ꩻ ဝွေꩻမူႏ ခွယ်လဲ့ခူတဲင် ထီႏစွဉ်ႏ ဗွေႏယေသျု အဝ်ႏအုံထွိုင်ႏထာꩻ နဝ်ꩻကိုသွူ။ ကွဲႏတွော့ꩻ ထွာဗွေႏယေသျုကျောင်ꩻနဝ်ꩻ ဝွေꩻမူႏ တသေတဝ်းသွူ။ 15ဗွေႏယေသျုရီ ဝွေꩻမူႏ၊ “ပါꩻမူႏနဝ်ꩻ ပွိုးတမုဲင်ꩻ နာꩻအဝ်ႏငွိုး ဗာႏတွိုႏထာꩻဟောင်း။။ နာꩻအဝ်ႏထုမ်ႏထွား ပါꩻမုဲင်ꩻဟောင်း” နုဲင်းနဝ်ꩻသွူ။
ဝွေꩻဗွေႏနဝ်ꩻ ဝွေꩻမူႏထင်းဒျာႏ ထွာဥယျာဉ်ႏ ခြံပွေါးသား၊ နဝ်ꩻမꩻ ဝွေꩻမူႏ ဒေါ့ꩻဖေႏဝွေꩻဗွေႏ၊ “နာꩻမဉ်ႏထူႏညာꩻထိုꩻ ဝွေꩻဗွေႏနဝ်ꩻ၊ ဗွေႏ ၊ အွဉ်ႏဒေါ့ꩻနယ်ဖေႏ ခွေသွဉ်းမူႏတဲင် ခွေသွဉ်းမူႏ အီႏလွေꩻထူႏချာဝွေꩻ” နုဲင်းနဝ်ꩻသွူ။
16ဗွေႏယေသျု ဒေါ့ꩻဖေႏဝွေꩻမူႏ၊ “မာရိ” နုဲင်းနဝ်ꩻသွူ။
ဝွေꩻမူႏ ခွယ်ႏစွို့ꩻလွေꩻ ဝွေꩻဗွေႏတဲင် ဒေါ့ꩻနေးဟေဗြဲငဝ်း၊ “ရဗ္ဗုနိ” နုဲင်းနဝ်ꩻသွူ။(ယိုအဓိပ္ပါယ်ႏနဝ်ꩻ၊ “ဗွေႏဆရာႏ” နုဲင်းနဝ်ꩻသွူ။)
17ဗွေႏယေသျု ဒေါ့ꩻဖေႏ ဝွေꩻမူႏ၊ “တွမ်ႏခွုမ်စမ်ႏမွိုန်းဒွိုန်း ခွေဟုဲင်း။ ပွိုးတွော့ꩻ ခွေတလꩻ သဲင်ꩻထေ့ချာ ဗာႏတဝ်းဒွိုန်း ခွေဖါတောႏထျꩻသွူ။ ကွဲႏတွော့ꩻ လွေꩻထေ့ ခွေဖူးခိုဖုံႏထျꩻတဲင် ခွေအီႏသဲင်ꩻထေ့ချာဗာႏ ဝွေꩻဗွေႏ၊ ကထွာဒါႏ ခွေဖါတောႏတွမ်ႏ ဝွေꩻသီးအဖါ၊ ခွေဗွေႏဘုရာꩻတွမ်ႏ ဝွေꩻသီး ဗွေႏဘုရာꩻထျꩻနဝ်ꩻ ဒေါ့ꩻနယ်ဖေႏသွော့ ဝွေꩻသီး” နုဲင်းနဝ်ꩻသွူ။
18နဝ်ꩻမꩻ နုဲင်းဝွေꩻမူႏ ကထီႏဗာႏလဲဉ်း ဗွေႏဘုရာꩻစွဉ်ႏ နုဲင်းဝွေꩻဗွေႏ ကဒေါ့ꩻဖေႏလဲဉ်းဒါႏ ဝွေꩻမူႏနဝ်ꩻ မာဂဒလ ဝေင်ꩻသားမူႏ မာရိလွေꩻတဲင် ဒေါ့ꩻသျင်ꩻနယ်ဖေႏစွဉ်ႏ တပဲ့တောႏဖုံႏနဝ်ꩻသွူ။
ဗွေႏယေသျုပေါႏနယ်ဝွေꩻဗွေႏတပဲ့တောႏဖုံႏ
(မတဲ ၂၈:၁၆–၂၀။ မာကု ၁၆:၁၄–၁၈။ လုကာ ၂၄:၃၆–၄၉)
19အဟာနဝ်ꩻထွာ တနင်ꩻနွေႏ မွူးဟာခိုႏ ထာꩻခေ့ꩻစတဲင် ကွပ်ပွိုး တပဲ့တောႏဖုံႏ အဝ်ႏငမ်းသꩻဗာႏ ဂျူးအာႏဏာႏပဲင်ႏ သားဖုံႏနဝ်ꩻမꩻ ဝွေꩻသီး အဝ်ႏစုဗူႏ လို့ဝင်ꩻဖုံႏနဝ်ꩻ အွဉ်ႏထွိုင်ꩻခါꩻနေး တခါꩻဖုံႏသွူ။ နဝ်ꩻထွူ ဗွေႏယေသျု ကျွꩻလွဉ်အုံထွိုင်ႏ ဝွေꩻသီး အကဲဉ်ကိုတဲင် ဝွေꩻဗွေႏဒေါ့ꩻ၊ “ယံဖေႏ ထာꩻငိမ်ꩻချမ်ꩻသာႏ ကအဝ်ႏငီꩻသွော့ စွဉ်ႏသီ” နုဲင်းနဝ်ꩻသွူ။ 20ရိုꩻဖေႏနုဲင်းယိုထွူ ဝွေꩻဗွေႏ အစူဖုံႏတွမ်ႏ ဝွေꩻဗွေႏရွို့နဝ်ꩻ ဝွေꩻဗွေႏ အွဉ်ႏနယ် ဝွေꩻသီးသွူ။ တပဲ့တောႏဖုံႏ ထွိုင်ႏထီႏဗာႏ ဗွေႏဘုရာꩻနဝ်ꩻ အဝ်ႏဗွေစွဉ်ႏ ထာꩻသꩻဟဝ်သꩻရေꩻဖုံႏသွူ။ 21ဗွေႏယေသျု ဒေါ့ꩻဖေႏဖျင် ဝွေꩻသီးတလဲင်ႏ၊ “ယံဖေႏ ထာꩻငိမ်ꩻချမ်ꩻ ကအဝ်ႏငီꩻသွော့ စွဉ်ႏသီ။ နုဲင်းဖါတောႏ ကအွဉ်ႏစွꩻလွေꩻ ခွေအတွိုင်ꩻ ခွေတဲ့ အွဉ်ႏစွꩻလွေꩻ သီ” နုဲင်းနဝ်ꩻသွူ။ 22နဝ်ꩻထွူ ဝွေꩻဗွေႏသာလူး ဝွေꩻသီးတဲင်ဒေါ့ꩻ၊ “လက်ခံႏသွော့ ကြောင်းစင် ဝိညာဉ်ႏတောႏဟုဲင်း။ 23#မ ၁၆:၁၉၊ ၁၈:၁၈။ သီမဉ်ႏအွဉ်ႏစွꩻလွစ်ဖေႏ လိုꩻဖုံႏအပဲစ်နဝ်ꩻ ဝွေꩻသီး အပဲစ်အီႏလွစ်သွူ။ သီမဉ်ႏ တအွဉ်ႏစွꩻလွစ်ဖေႏတဝ်း ဝွေꩻသီးအပဲစ်နဝ်ꩻ ဝွေꩻသီးအပဲစ် တလွစ်တဝ်း” နုဲင်းနဝ်ꩻသွူ။။
ဗွေႏယေသျုတွမ်ႏတောမ
24တပဲ့တောႏ တဆီနီကိုတဖြာꩻ ကထွာတောမ (ကဟဲ့ꩻဒါႏမဲရွာ)နဝ်ꩻ ဗွေႏယေသျု ကကျွꩻလွဉ်ချိန်ႏ တအဝ်ႏငီꩻတဝ်း တွမ်ႏဝွေꩻသီးသွူ။ 25နဝ်ꩻမꩻ တပဲ့တောႏ အလင်ဖုံႏနဝ်ꩻ ဒေါ့ꩻနယ်ဝွေꩻ၊ “နီ ထီႏဗာႏလဲဉ်း ဗွေႏဆရာႏ” နုဲင်းနဝ်ꩻသွူ။
တောမဒေါ့ꩻဖေႏ ဝွေꩻသီး၊ ပေါႏခွေတထီႏဗာႏနေးတဝ်း ဝွေꩻဗွေႏ အစူဖုံႏလောင်း ကတောက်ꩻဒါႏ မုဲင်းနာꩻဖုံႏခြောင်ꩻ စွဉ်ႏခွေစူဖုံႏ တစမ်ႏထွား ဗာႏနေးတဝ်း အဆာ ခြောင်ꩻဖုံႏတွော့ꩻ တွမ်ႏခွေစူ တခွိုင်းဗာႏနေးတဝ်း ဝွေꩻဗွေႏရွို့နဝ်ꩻ ခွေအီႏတယွုမ်းတဝ်း” နုဲင်းနဝ်ꩻသွူ။
26ညတပတ်ထွူ တပဲ့တောႏဖုံႏ အဝ်ႏစုဗူႏဖျင်လို့ဝင်ꩻ အခန်ꩻကိုတဲင် တောမတဲ့ အဝ်ႏငီꩻစွဉ်ႏ ဝွေꩻသီးသွူ။ တခါꩻနဝ်ꩻ အဝ်ႏခတ်ꩻခါꩻနေးဒျာႏ စွဉ်ႏတဲ့ ဗွေႏယေသျု လွဉ်အုံထွိုင်ႏ ဝွေꩻသီး အခါႏတဲင်ဒေါ့ꩻ၊ ထာꩻငိမ်ꩻချမ်ꩻ ယံကအဝ်ႏငီꩻသွော့ စွဉ်ႏသီ” နုဲင်းနဝ်ꩻသွူ။ 27နဝ်ꩻထွူ ဝွေꩻဗွေႏဒေါ့ꩻဖေႏ တောမ၊ “အွဉ်ႏခွိုင်းနာꩻစူနုန် ယိုကိုဟုဲင်း၊ ထွားခွေစူဖုံႏယိုမွိုင်။ ထွူယောင်းထန်ႏ နာꩻစူတွော့ꩻ စမ်ႏထွား ခွေရွို့ယိုဟုဲင်း။ သင်ႏသရသꩻ ကင်ꩻတွော့ꩻ ယွုမ်းခန်းဟုဲင်း” နုဲင်းနဝ်ꩻသွူ။
28တောမလဝ်းချာ ဝွေꩻဗွေႏ၊ “ခွေဗွေႏစွဉ်ႏ ခွေဗွေႏဘုရာꩻဒျာႏ” နုဲင်းနဝ်ꩻသွူ။
29ဗွေႏယေသျု ဒေါ့ꩻဖေႏဝွေꩻ၊ “ကွပ်ပွိုး နာꩻထီႏခွေတွော့ꩻ နာꩻယွုမ်းနဲ့ဟောင်း။ လိုꩻတထီႏဗာႏတဝ်း ခွေတွော့ꩻ ကယွုမ်းသားဖုံႏနဝ်ꩻ မင်္ဂလာႏအဝ်ႏငါႏ ခွိုင်းကားမုဲင်ꩻ” နုဲင်းနဝ်ꩻသွူ။
ကျမ်ꩻအုပ်ယိုအင်းရွယ်ႏချက်
30ဝွေꩻဗွေႏ တပဲ့တောႏဖုံႏဆꩻငါ ဗွေႏယေသျု မာꩻနယ် ထာꩻအံႏဖြာႏခရာႏ နိမိတ်လက္ခဏာႏ အလင်ဖုံႏနဝ်ꩻ၊ တတဲမ်းသော့ꩻတဝ်း လိတ်အုပ်ကိုယို အာငါႏသွူ။ 31ကွဲႏတွော့ꩻ ဖေႏနေး သီကယွုမ်း ဗွေႏယေသျုနဝ်ꩻ ထွာမေသျိယ၊ ဗွေႏဘုရာꩻ ပိုခိုတောႏတဲင် သီမဉ်ႏယွုမ်း ဝွေꩻဗွေႏနဝ်ꩻ ယံဖေႏသီကလꩻ ထာဝရ အသက်မွန်နဝ်ꩻ တဲမ်းသေꩻခါꩻဗာႏ နုဲင်းယိုဖုံႏသွူ။
ទើបបានជ្រើសរើសហើយ៖
ယောဟန် 20: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
