ယောဟန် 19
19
1နဝ်ꩻထွူ ခွန်ပိလတ်ဟဲ့ꩻ ဗွေႏယေသျုတဲင် ဖေႏဝွေꩻ ခွဉ်းတံႏနဝ်ꩻသွူ။ 2စဲ့ꩻသားဖုံႏနဝ်ꩻ တွမ်ႏထာꩻစူႏပင် မာꩻပန်ꩻကွုံꩻ တဗာႏတဲင် အွဉ်ႏခူး ဝွေꩻဗွေႏ ကတူႏလောင်း။ ထွူဝွေꩻသီးအွဉ်ႏကꩻ ဝွေꩻဗွေႏ ဆဲင်ꩻယွုံးတန်ဆွာꩻ တနျာႏတဖွူꩻတဲင်၊ 3လွဉ်ထေ့ ဝွေꩻဗွေႏထျꩻတွော့ꩻဒေါ့ꩻ၊ “ဂျူးခွန်တန် သက်တောႏ ယံကထို စိုးကဆွာꩻသွော့” နုဲင်းနဝ်ꩻတဲင် ဝွေꩻသီးလွေꩻတွော့ꩻ တဗꩻစွဉ်ႏ ဝွေꩻဗွေႏဗုဲင်ႏနဝ်ꩻသွူ။
4ခွန်ပိလတ် ထန်ႏလွေꩻဖျင် တလဲင်ႏတဲင် ဒေါ့ꩻဖေႏ လိုꩻစွိုꩻဖုံႏ၊ “ထွားဟုဲင်း။ ခွေကအီႏစီႏရင်ႏဝွေꩻနဝ်ꩻ ခွေတမော့ꩻနွောင်ꩻတဝ်း အပဲစ်တစွိုးစွိုး၊ ဖေႏသီကထီႏဗာႏနဝ်ꩻ ခွေအီႏဟဲ့ꩻထန်ႏလွဉ်ဝွေꩻ သီထျꩻယိုကို” နုဲင်းနဝ်ꩻသွူ။ 5နဝ်ꩻမꩻ ဗွေႏယေသျုနဝ်ꩻ ခူးစွဉ်ႏပန်ꩻကွုံꩻ ထာꩻဆူႏတွော့ꩻ ကꩻဆဲင်ꩻယွုံးတန် တနျာႏဆွာꩻတဲင် ထန်ႏလွဉ်စွဉ်ႏသွူ။ ခွန်ပိလတ် ဒေါ့ꩻဖေႏဝွေꩻသီး၊ “ထွားဟုဲင်း၊ ပါꩻခိုနဝ်ꩻယိုဟာ” နုဲင်းနဝ်ꩻသွူ။
6ယဇ်ပရောဟိတ် တန်ဖုံႏတွမ်ႏ ဗိမာန်ႏတောႏ ကျောင်ꩻပွေါသားဖုံႏ ထွိုင်ႏထီႏ ဝွေꩻဗွေႏချိန်ႏ၊ ဝွေꩻသီးခြောဝ်၊ “မာꩻသီဝွေꩻ ကင်းထွန်ႏလောင်းဟုဲင်း။ မာꩻသီဝွေꩻ ကင်းထွန်ႏလောင်းဟုဲင်း” နုဲင်းနဝ်ꩻသွူ။
ခွန်ပိလတ် ဒေါ့ꩻဖေႏဝွေꩻသီး၊ “သီထူႏလွေꩻဝွေꩻ ထွူတွော့ꩻ မာꩻသီခန်းဝွေꩻ ကင်းထွန်ႏလောင်းနဝ်ꩻဟုဲင်း။ ကအီႏစီႏရင်ႏ ဝွေꩻအပဲစ်တံႏနဝ်ꩻ ခွေတမော့ꩻတဝ်း အကျောင်ꩻခရာႏ တစွိုးစွိုး” နုဲင်းနဝ်ꩻသွူ။
7လိုꩻစွိုꩻဖုံႏ လဝ်းချာ၊ “ဝွေꩻနဝ်ꩻ ကွပ်ပွိုး အဝ်ႏကေႏညာႏဒျာႏ ထွာဗွေႏဘုရာꩻ ပိုခိုအတွက် နီပညတ်ကျမ်ꩻနဝ်ꩻ အဝ်ႏရိုꩻခါꩻ ဝွေꩻနဝ်ꩻ အီႏမာꩻသီဗာႏ” နုဲင်းနဝ်ꩻသွူ။
8ခွန်ပိလတ် ထွိုင်ႏဟွိုန် နုဲင်းယိုချိန်ႏ ဝွေꩻကယိန်းငမ်းသꩻစွဉ်ႏသွူ။ 9ဝွေꩻသဲင်ꩻချာသော့ꩻ ဟော်နန်ꩻကိုတဲင် ရီဗွေႏယေသျု၊ “နာꩻအဝ်ႏမုဲင်ꩻကို လွဉ်ဟောင်း” နုဲင်းနဝ်ꩻသွူ။
ကွဲႏတွော့ꩻ ဗွေႏယေသျု တလဝ်းချာတဝ်း တမုဲင်ꩻမုဲင်ꩻသွူ။ 10ခွန်ပိလတ် ဒေါ့ꩻဖေႏဝွေꩻဗွေႏ၊ “နာꩻအီႏတဒေါ့ꩻရီတဝ်း ခွေနဲ့ဟောင်း။ ခွေနဝ်ꩻ အီႏအွဉ်ႏစွꩻလွစ်နွောင်ꩻတဲင် မာꩻသီနွောင်ꩻပါကနာꩻ ကင်းထွန်ႏလောင်း အာႏဏာႏအဝ်ႏနဝ်ꩻ ယူႏလꩻသွော့” နုဲင်းနဝ်ꩻသွူ။
11ဗွေႏယေသျု လဝ်းချာ၊ “ကွပ်ပွိုး ဗွေႏဘုရာꩻ ဖေႏဒျာႏနာꩻအတွက် နာꩻအာႏဏာႏနဝ်ꩻ အဝ်ႏခွေလောင်းလွုမ်ꩻသွူ။ နဝ်ꩻမꩻ ပါꩻကအပ်ဒါႏခွေ နာꩻစူကိုနဝ်ꩻ အပဲစ်ကယိန်းတန်” နုဲင်းနဝ်ꩻသွူ။
12ခွန်ပိလတ် ထွိုင်ႏဟွိုန် နုဲင်းယိုချိန်ႏ ကအီႏအွဉ်ႏစွꩻလွစ်ဖေႏ ဗွေႏယေသျုနဝ်ꩻ ဝွေꩻကျံႏထုမ်ႏစွဉ်ႏ အနယ်ꩻသွူ။ ကွဲႏတွော့ꩻ လိုꩻစွိုꩻဖုံႏနဝ်ꩻ ခြောဝ်သန်ချာ၊ “နာꩻမဉ်ႏအွဉ်ႏစွꩻလွစ်ဝွေꩻ အဓိပ္ပါယ်ႏနဝ်ꩻ နာꩻနဝ်ꩻထွာ ဧကရာဇ်ခွန်တန် အသွꩻ တမွေးတဝ်း၊ ပါꩻမုဲင်ꩻကေႏညာႏ အနမ်းအီႏထွာ ခွန်တန်တပါꩻနဝ်ꩻ ထွာဒျာႏတောႏလန်ႏ ဆန်ချာ ဧကရာဇ်ခွန်တန်” နုဲင်းနဝ်ꩻသွူ။
13ခွန်ပိလတ် ထွိုင်ႏဟွိုန် ငဝ်းနုဲင်းယိုဖုံႏချိန်ႏ ဝွေꩻဟဲ့ꩻထန်ႏ ဗွေႏယေသျု ကောင်းထန်ႏတဲင် အွဉ်ႏအုံလင်ꩻ တရာꩻစီႏရင်ႏ ပလ္လင်ႏလောင်း ခင်ႏလမ်းကဟဲ့ꩻဒါႏ “လုံးပျာꩻ လိုꩻလွေꩻတဖူꩻလောင်း” နဝ်ꩻသွူ။ (ဟေဗြဲငဝ်း အမဉ်ꩻနဝ်ꩻဟဲ့ꩻ “ကဗ္ဗတ” နဝ်ꩻသွူ။) 14အချိန်ႏနဝ်ꩻထွာ ပွယ်ꩻပတ္တခါဖစ်နီꩻ ခလားမွူး ကနွောင်းနဝ်ꩻသွူ။ ခွန်ပိလတ် ဒေါ့ꩻဖေႏလိုꩻဖုံႏ၊ “ယိုနဝ်ꩻထွာဒျာႏ သီခွန်တန်” နုဲင်းနဝ်ꩻသွူ။
15ဝွေꩻသီးခြောဝ်ချာ၊ “မာꩻသီဝွေꩻ၊ မာꩻသီဝွေꩻ၊ မာꩻသီဝွေꩻ ကင်းထွန်ႏလောင်း” နုဲင်းနဝ်ꩻသွူ။
ခွန်ပိလတ်ရီ ဝွေꩻသီး၊ “သီမဉ်အွဉ်ႏခွေမာꩻသီ သီခွန်တန် ကင်းထွန်ႏလောင်းဟောင်း” နုဲင်းနဝ်ꩻသွူ။
ယဇ်ပရောဟိတ်တန်ဖုံႏ လဝ်းချာ၊ “နီခွန်တန်နဝ်ꩻ အဝ်ႏဒျာႏ ဧကရာဇ်ခွန် တပါꩻလွုမ်ꩻ” နုဲင်းနဝ်ꩻသွူ။
16နဝ်ꩻထွူ ဖေႏကမာꩻသီဗာႏ ကင်းထွန်ႏလောင်းနဝ်ꩻ ခွန်ပိလတ် အပ်ဗွေႏယေသျု ဝွေꩻသီးစူကိုသွူ။
မာꩻသီထိုꩻဗွေႏယေသျုကင်းထွန်ႏလောင်း
(မတဲ ၂၇:၃၂–၄၄။ မာကု ၁၅:၂၁–၃၂။ လုကာ ၂၃:၂၆–၄၃)
နဝ်ꩻမꩻ ဝွေꩻသီး ထိန်ꩻဟဲ့ꩻထန်ႏလွေꩻစွဉ်ႏ ဗွေႏယေသျုနဝ်ꩻသွူ။ 17ဝွေꩻဗွေႏ ထန်ႏလွေꩻနဝ်ꩻ ထမ်ႏပါစွဉ်ႏ ဝွေꩻဗွေႏ ကင်းထွန်ႏတဲင် တွိုႏစွဉ်ႏ ကဟဲ့ꩻဒါႏ၊ “ကတူႏခြောက်ꩻအရပ်” နဝ်ꩻသွူ။ (ဟေဗြဲ ဘာႏသာႏငဝ်းနဝ်ꩻဟဲ့ꩻ၊ “ဂေါလဂေါတ၊” နုဲင်းနဝ်ꩻသွူ။)။ 18နဝ်ꩻကိုနဝ်ꩻ ဝွေꩻသီးမာꩻသီထိုꩻ ဝွေꩻဗွေႏ ကင်းထွန်ႏလောင်းတဲင် ဝွေꩻသီး မာꩻသီပါ လိုꩻလင်ဝင်ꩻနီ ဗွေႏယေသျု အသောင် တဖဲ့ꩻတဖြာꩻစီႏ ကင်းထွန်ႏလောင်းတဲင် ဝွေꩻဗွေႏအဝ်ႏ ဝွေꩻသီးအခါႏကိုသွူ။ 19ခွန်ပိလတ် တဲမ်းလိတ်ကေႏညာႏ တစောင်ႏတဲင် လိတ်နဝ်ꩻ အွဉ်ႏကင်းထွန်ႏလောင်းသွူ။ နုဲင်းဝွေꩻကတဲမ်းဒါႏနဝ်ꩻ “နာဇရဲစ်ဝေင်ꩻသား ယေသျုနဝ်ꩻထွာ ဂျူးလိုꩻမျိုꩻဖုံႏ အခွန်တန်” နုဲင်းနဝ်ꩻသွူ။ 20ကမာꩻသီဒါႏ ဗွေႏယေသျု ခင်ႏလမ်းနဝ်ꩻ ကွပ်ပွိုး တပေါ့ꩻညာꩻတဝ်း စွဉ်ႏဝေင်ꩻတောႏတန် အတွက် လိုꩻဖုံႏကဖတ်ဗာႏ လိတ်ကေႏညာႏနဝ်ꩻ အာငါႏသွူ။ လိတ်ကေႏညာႏနဝ်ꩻ တဲမ်းနေး ဟေဗြဲငဝ်း၊ လဲက်တေင်ငဝ်းစွဉ်ႏ ဂရိငဝ်းနဝ်ꩻသွူ။ 21ယဇ်ပရောဟိတ် တန်ဖုံႏ ဒေါ့ꩻဖေႏ ခွန်ပိလတ်၊ “တွမ်ႏတဲမ်းမွိုန်း ‘ဂျူးလိုꩻမျိုꩻ အခွန်တန်’ နုဲင်းနဝ်ꩻဟုဲင်း၊ ကွဲႏတွော့ꩻ အဝ်ႏလိုႏဟဝ်တဲမ်းဒျာႏ၊ ‘ပါꩻခိုယိုနဝ်ꩻရိုꩻ၊ ခွေနဝ်ꩻထွာ ဂျူးအခွန်တန်’ နုဲင်းနဝ်ꩻသွူ။
22ခွန်ပိလတ်လဝ်းချာ၊ “နုဲင်းခွေကတဲမ်းလဲဉ်းနဝ်ꩻ အွဉ်ႏစွူစွူဗော့ꩻ နုဲင်းနဝ်ꩻဟုဲင်း” နုဲင်းနဝ်ꩻသွူ။
23စဲ့ꩻသားဖုံႏ ထွိုင်ႏတွဲႏဒပ် ဗွေႏယေသျု ကင်းထွန်ႏလောင်းထွူ ဝွေꩻသီးထူႏ ဝွေꩻဗွေႏခွမ်ꩻလာꩻတဲင် အဲ့ꩻထိုꩻ လစ်ꩻခဝ်တွော့ꩻ တခဝ်နဝ်ꩻ စဲ့ꩻသား တဖြာꩻစီႏတာႏသွူ။ ဝွေꩻသီး ထူႏပါက အသွုပ်တအဲဉ်ထဝ်း ကထꩻဟဝ်မွေးနေးစွဉ်ႏ လူႏကွုံ တဖွူꩻလွုမ်း ဆဲင်ꩻယွုံးတန်ဆွာꩻနဝ်ꩻသွူ။ 24#သာ ၂၂:၁၈။ စဲ့ꩻသားဖုံႏ တဖြာꩻစွဉ်ႏတဖြာꩻ ဒေါ့ꩻဖေႏလို့ဝင်ꩻ၊ “တွမ်ႏအဲ့ꩻသဲ့ ထိုꩻနေးမွိုန်း ဆဲင်ꩻနဝ်ꩻတွော့ꩻ အဖြာꩻမုဲင်ꩻလꩻ ဖေႏကသေနဝ်ꩻ အွဉ်ႏတခြွီႏလင်ꩻနေး ထာꩻတောႏရာႏနယ်ꩻ” နုဲင်းနဝ်ꩻသွူ။ ကထွာဗာႏ နုဲင်းယိုနဝ်ꩻ ဖေႏနေး ကဗွေမဲဉ်ႏလွဉ်ꩻ နုဲင်းလိတ်ကျမ်ꩻကို ကဒေါ့ꩻ၊
“ခွေဆဲင်ꩻခွမ်ꩻလာꩻဖုံႏနဝ်ꩻ ဝွေꩻသီး အချင်ꩻချင်ꩻ ဖန်းဖေႏလို့ဝင်ꩻဖုံႏတဲင်
ခွေဆဲင်ꩻယွုံးတန်နဝ်ꩻ ဝွေꩻသီး အီႏလောင်ꩻအံႏအီလို့ဝင်ꩻ”နဝ်ꩻသွူ။
ယိုနဝ်ꩻထွာ နုဲင်းစဲ့ꩻသားဖုံႏ ကမာꩻလဲဉ်းဒါႏနဝ်ꩻသွူ။
25ဝွေꩻဗွေႏ အမွိုး၊ ဝွေꩻဗွေႏအမွိုးဖူးမူႏ၊ ကလောဖအမာ မာရိတွမ်ႏ မာဂဒလ ဝေင်ꩻသားမူႏ မာရိသီႏဖုံႏနဝ်ꩻ အဝ်ႏအုံထွိုင်ႏဗော့ꩻ ဗွေႏယေသျု ကင်းထွန်ႏထျꩻနဝ်ꩻသွူ။ 26ဝွေꩻဗွေႏ အမွိုးတွမ်ႏ ဝွေꩻဗွေႏကရက်ငါႏ တပဲ့တောႏ အဝ်ႏအုံထွိုင်ႏထာꩻ နဝ်ꩻကိုနဝ်ꩻ ဗွေႏယေသျု အဝ်ႏထီႏသွူ။ နဝ်ꩻမꩻ ဝွေꩻဗွေႏဒေါ့ꩻဖေႏ ဝွေꩻဗွေႏအမွိုး၊ “ဝွေꩻနဝ်ꩻထွာဒျာႏ နာꩻပိုခို” နုဲင်းနဝ်ꩻသွူ။
27နဝ်ꩻထွူ ဝွေꩻဗွေႏဒေါ့ꩻဖေႏ တပဲ့တောႏ၊ “ဝွေꩻမူႏနဝ်ꩻထွာဒျာႏ နာꩻမွိုး” နုဲင်းနဝ်ꩻသွူ။ တယ်ႏစွဉ်ႏ အချိန်ႏနဝ်ꩻကာႏ တပဲ့တောႏ ဟဲ့ꩻဝွေꩻမူႏတွော့ꩻ ဖေႏအုံသော့ꩻစွဉ်ႏ ဝွေꩻအလမ်းကိုနဝ်ꩻသွူ။
ဗွေႏယေသျုသီ
(မတဲ ၂၇:၄၅–၅၆။ မာကု ၁၅:၃၃–၄၁။ လုကာ ၂၃:၄၄–၄၉)
28 #
သာ ၆၉:၂၁၊ ၂၂:၁၅။ ထာꩻမာꩻကားကအဝ်ႏ ထွူလဲဉ်းကျောင်ꩻ ဗွေႏယေသျု အဝ်ႏသေလဲဉ်း နဝ်ꩻမꩻ ဖေႏနေး ကဗွေမဲဉ်ႏလွဉ်ꩻ လိတ်ကျမ်ꩻနဝ်ꩻ ဝွေꩻဗွေႏဒေါ့ꩻ၊ “ခွေဟို့ꩻခိုးငါႏထီ” နုဲင်းနဝ်ꩻသွူ။
29နဝ်ꩻကိုနဝ်ꩻ ထီကောက်ꩻ အဝ်ႏတဖြုံႏ အဝ်ႏဗွေသော့ꩻစွဉ်ႏ ဝုဲင်ညံး၊ နဝ်ꩻမꩻ ဖုဲင်စုပ်ꩻအီထီနဝ်ꩻ စုပ်ꩻလင်ꩻသော့ꩻ ဝုဲင်ကိုတွော့ꩻ အွဉ်ႏဖွို့လူးဖြွမ်း ခွဉ်းနာ တလီးလောင်းတဲင် အွဉ်ႏမိုꩻဖေႏ ဝွေꩻဗွေႏ ဖြောင်းလောင်းနဝ်ꩻသွူ။ 30ဗွေႏယေသျု အွꩻဝုဲင်နဝ်ꩻတဲင်ဒေါ့ꩻ၊ “ထာꩻမာꩻထွူလဲဉ်း” နုဲင်းနဝ်ꩻထွူ။
နဝ်ꩻထွူ ဝွေꩻဗွေႏကတူႏ တငေါက်ꩻလင်ꩻတဲင် သက်တောႏထန်ႏ သီထိုꩻစွဉ်ႏနဝ်ꩻသွူ။
စွဉ်ႏဗင်ထောင်းဗွေႏယေသျုရွို့
31နဝ်ꩻထွူ ဖေႏကတွဲႏထို့ထိုꩻဗာႏ လိုꩻဖုံႏကခံႏသီ ကင်းထွန်ႏလောင်းသားဖုံႏ အခင်ႏထွူတွော့ꩻ အဝ်ႏကင်းထွန်ႏလောင်း ဖေႏကထူႏလင်ꩻဗာႏ ရုပ်ခန္ဓာႏဖုံႏနဝ်ꩻ ဂျူးအာႏဏာႏ ပဲင်ႏသားဖုံႏ ကွီခွန်ပိလတ် အခွင်ꩻသွူ။ ဝွေꩻသီး ကကွီဗာႏ နုဲင်းယိုနဝ်ꩻ ပွိုးတွော့ꩻ အနီꩻနဝ်ꩻနဝ်ꩻထွာ သောကျာႏနီꩻတဲင် ဝွေꩻသီး တမဉ်အွဉ်ႏတဝ်း ရုပ်ခန္ဓာႏ ကင်းထွန်ႏဖုံႏလောင်း ဥပုသ်မွူးနီꩻကို နဝ်ꩻအတွက်သွူ။ ကအီႏလွဉ်ဒါႏ ဥပုသ်မွူးနီꩻနဝ်ꩻ ထွာအွဉ်ႏအရေꩻ အွဉ်ႏကြောင်းစင်ဗာႏနဝ်ꩻသွူ။ 32နဝ်ꩻမꩻ စဲ့ꩻသားဖုံႏ လွေꩻတဲင် တွဲႏထို့ ပါꩻပထမတဖြာꩻ ခင်ႏထွူ၊ တွဲႏထို့ဖျင်ယင်း ကအဝ်ႏမာꩻသီငီꩻစွဉ်ႏ ဗွေႏယေသျုထျꩻ အလင်တဖြာꩻ ကင်းထွန်ႏလောင်း နဝ်ꩻသွူ။ 33ကွဲႏတွော့ꩻ ဝွေꩻသီး ထွိုင်ႏလွဉ်ထေ့ ဗွေႏယေသျုထျꩻနဝ်ꩻ ဝွေꩻဗွေႏ သီထိုꩻလဲဉ်းကျောင်ꩻ ဝွေꩻသီးထီႏနဝ်ꩻမꩻ ဝွေꩻသီး တတွဲႏထို့တဝ်းဒွုမ် ဝွေꩻဗွေႏခင်ႏဖုံႏသွူ။ 34ကွဲႏတွော့ꩻ စဲ့ꩻသားဖုံႏကို တဖြာꩻနဝ်ꩻ တွမ်ႏအဗင် ထောင်းဗွေႏယေသျု ရွို့တဲင် တလဲင်ႏချင်ႏ သွီႏတွမ်ႏထီ ထန်ႏလွဉ်စွဉ်ႏသွူ။ 35( ဖေႏနေး သီတဲ့ ယံကယွုမ်းနဝ်ꩻ ပါꩻအဖြာꩻ ကထီႏဗာႏ ထွာထာꩻနုဲင်းယိုနဝ်ꩻ ဒေါ့ꩻထန်ႏ၊ နုဲင်းဝွေꩻဗွေႏ ကဒေါ့ꩻနဝ်ꩻ ထွာဒျာႏအမဲဉ်ႏတဲင် ဝွေꩻဗွေႏ ဒေါ့ꩻ အမဲဉ်ႏတရာꩻကျောင်ꩻ ဝွေꩻအဝ်ႏသေသွူ။)။ 36#ထလ ၁၂:၄၆၊ ကွ ၉:၁၂၊ သာ ၃၄:၂၀။ “ဝွေꩻဗွေႏဆွတ်ꩻဖုံႏနဝ်ꩻ တလီးငါတဲ့ အီႏတထို့ဗာႏတဝ်း” နုဲင်းယိုနဝ်ꩻ ဗွေမဲဉ်ႏလွဉ်ꩻစွဉ်ႏ လိတ်ကျမ်ꩻကိုသွူ။ 37#ဇာ ၁၂:၁၀၊ ဗျာ ၁:၇။ တဲင်လိတ်ကျမ်ꩻပိုဒ် အလင်တထွောင်းနဝ်ꩻရိုꩻ၊ “ဝွေꩻဗွေႏ ဝွေꩻသီး ကထောင်းတွမ်ႏဗင်နဝ်ꩻ လိုꩻဖုံႏ အီႏထွား” နုဲင်းနဝ်ꩻသွူ။
သင်္ဂြိုဟ်ႏဗွေႏယေသျု
(မတဲ ၂၇:၅၇–၆၁။ မာကု ၁၅:၄၂–၄၇။ လုကာ ၂၃:၅၀–၅၆)
38ယိုထွူ ပါꩻကအဝ်ႏဒါႏ ဝေင်ꩻအရိမတဲ ယောသပ်နဝ်ꩻ ဝွေꩻမဉ်ႏထူႏ ဗွေႏယေသျု ရုပ်ခန္ဓာႏ လꩻနေနဝ်ꩻ ဝွေꩻကွီ ခွန်ပိလတ်သွူ။ (ယောသပ်နဝ်ꩻ ကွပ်ပွိုး ဝွေꩻအဝ်ႏငမ်းသꩻဗာႏ ဂျူးအာႏဏာႏပဲင်ႏ သားဖုံႏအတွက် အဝ်ႏထွာတေ့ꩻနေးဒျာႏ ဗွေႏယေသျု တပဲ့တောႏသွူ။) ဝွေꩻထူႏလွေꩻလꩻဒျာႏ ရုပ်ခန္ဓာႏနဝ်ꩻ ခွန်ပိလတ် ဒေါ့ꩻဖေႏဝွေꩻသွူ။ နဝ်ꩻမꩻ ယောသပ်လွေꩻတဲင် ထူႏလွေꩻညာꩻထိုꩻစွဉ်ႏ ရုပ်ခန္ဓာႏနဝ်ꩻသွူ။ 39#ယော ၃:၁၊ ၂။ ပါꩻအရီးခါ ကလွဉ်မော့ꩻခွဲခေ့ꩻဒါႏ ဗွေႏယေသျု နိကောဒေင်နဝ်ꩻ ဝွေꩻထူႏလွဉ်ပါ နံꩻသာႏဟွမ် အယာႏခဉ်ႏအဝ်ႏ ပေါင်တရျာꩻ(၂၅စွဲ)နဝ်ꩻ ရော်ꩻမုရန်စွဉ်ႏ အလွတ်နံꩻသာႏဟွမ်တဲင် လွေꩻလွဉ်ꩻတွမ်ႏ ယောသပ်နဝ်ꩻသွူ။ 40ပါꩻဝင်ꩻနီနဝ်ꩻ ထူႏဗွေႏယေသျု ရုပ်ခန္ဓာႏတွော့ꩻ နုဲင်းဂျူးထွုံꩻစံႏ ကအဝ်ႏအတွိုင်ꩻ အီႏသင်္ဂြိုဟ်ႏတာႏ ဖျင်ရဲဉ်ꩻရုပ်ခန္ဓာႏ တွမ်ႏနံꩻသာႏ နမ်းမန်ꩻဟွမ် လွမ်တွမ်ႏ ပိတ်ယာႏချော်ꩻ တသာနဝ်ꩻသွူ။ 41ကမာꩻသီဒါႏ ဗွေႏယေသျု အရပ်ခင်ႏလမ်း နဝ်ꩻကိုနဝ်ꩻ ဥယျာဉ်ႏခြံ အဝ်ႏတခြံ၊ နဝ်ꩻကို ပါꩻမုဲင်ꩻတဲ့ သင်္ဂြိုဟ်ႏသော့ꩻ ဗာႏဖိုတဝ်းဒွိုန်း သဲင်ႏခဲင်ꩻထမ်းအို တသာ အဝ်ႏတအိုသွူ။ 42အနီꩻနဝ်ꩻနဝ်ꩻထွာ ဥပုသ်ဖစ်နီꩻတဲင် ကွပ်ပွိုး သဲင်ႏခဲင်ꩻအောင် အဝ်ႏဗော့ꩻ နဝ်ꩻကိုအတွက် ဝွေꩻသီး သင်္ဂြိုဟ်ႏ ဗွေႏယေသျု ရုပ်ခန္ဓာႏ နဝ်ꩻကိုသွူ။
ទើបបានជ្រើសរើសហើយ៖
ယောဟန် 19: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
