ကမ္ဘာႏစ 34
34
ဒိန
1တနီသား ယာကုပ်တွမ်ႏ လေအာပိုမူႏ ဒိနနဝ်ꩻ လွေꩻလယ်ႏ ခါနန်လိုꩻမူႏဖုံႏထျꩻ။ 2နဝ်ꩻကို ကအဝ်ႏထွာလိုꩻတန် ပါꩻဟိဝိလိုꩻမျိုꩻ ဟာမော်ပိုခို သျေခိမ်နဝ်ꩻ ထီႏဒိနတဲင် သိမ်ꩻထူႏနွိုင်ႏတွော့ꩻ ထွို့ꩻဗေင်ႏငီꩻစွဉ်ႏ ဝွေꩻမူႏသွူ။ 3ကွဲႏတွော့ꩻ ဝွေꩻထီႏတရေꩻ သꩻစွဲꩻငါႏ ဒိနနဝ်ꩻမꩻ ဝွေꩻရက်မွေးနေးစွဉ်ႏတဲင် ဖေႏနေးပါꩻမူႏ ကရက်ချာဝွေꩻနဝ်ꩻ ကျမ်ႏကဲႏ ချောက်ချာနဝ်ꩻသွူ။ 4ကွပ်နဝ်ꩻမꩻ ဝွေꩻဒေါ့ꩻဖေႏအဖါ “ဖေႏနေးခွေ ကတောႏလမ်းဗာႏတွမ်ႏ ဒိနနဝ်ꩻ ခွေမဉ်အွဉ်ႏနီဖါ လွေꩻရီဖေႏခွေ” နုဲင်းနဝ်ꩻသွူ။
5ပါꩻစောက်ꩻကာꩻလဲဉ်း ဝွေꩻပိုမူႏနဝ်ꩻ ယာကုပ်သေစွဉ်ႏသွူ။ ကွဲႏတွော့ꩻ ဝွေꩻပိုခိုဖုံႏနဝ်ꩻ လွေꩻတီဒျာႏ ထာꩻသားဖုံႏ တခြာကို လꩻဖျော်သဲင်ꩻတဝ်းဒွိုန်း နဝ်ꩻမꩻ ဝွေꩻတမာꩻတဝ်း တမုဲင်ꩻမုဲင်ꩻသွူ။ 6သျေခိမ်အဖါ ဟာမော်နဝ်ꩻ ဖျော်လွဉ် အီႏဒေါ့ꩻရီဖြောင် တွမ်ႏယာကုပ်သွူ။ အတွင်ꩻနဝ်ꩻ 7ယာကုပ်ပိုခိုဖုံႏ တီထာꩻသောင်ꩻထာꩻသား တခြာကို ဖျော်သဲင်ꩻလွဉ်ချာတဲင် ဝွေꩻသီး ထွိုင်ႏဟွိုန် သျေခိမ်ထွို့ꩻငင်ႏ အုံငီꩻနွိုင်ႏထိုꩻ ဝွေꩻသီးဖူးမူႏနဝ်ꩻ စော်ႏကာꩻလဲဉ်း ဣသရေးတမျိုꩻလွုမ်းတဲင် တထွိုက်မာꩻတဝ်းနဝ်ꩻ ကွပ်ပွိုး ဝွေꩻမာꩻထိုꩻအတွက် သꩻဆာငါႏ၊ သလျားမွေးနေးစွဉ်ႏ ထာꩻဖုံႏသွူ။ 8ဟာမော် ဒေါ့ꩻဖေႏဝွေꩻသီး၊ “ခွေပိုခိုသျေခိမ်နဝ်ꩻ ရက်မွေးနေးလဲဉ်း သီဖူးမူႏ၊ မာꩻကေꩻဇူꩻတဲင် ဝွေꩻနဝ်ꩻ ဖေႏတောႏလမ်းခန်း ဝွေꩻမူႏမွိုင်။ 9နီလိုꩻမျိုꩻတွမ်ႏ သီလိုꩻမျိုꩻ တောႏလမ်းမင်္ဂလာႏခွင်ꩻ ဖေႏကလꩻနဝ်ꩻ မာꩻဒျာႏတွမ် သဘော်ꩻတူႏချက်။ 10သီတဲ့ꩻ အုံငီꩻဗော့ꩻ နီခမ်းယို။ သီကျွိုက်သꩻ အရပ်မုဲင်ꩻတဲ့ အုံဟုဲင်း၊ ကူကား ဖြေꩻစာသော့ꩻ ကမ်းသꩻတဲင် ထာꩻခြိုꩻဥစ္စာႏဖုံႏနဝ်ꩻ ပဲင်ႏချာလွဒျာႏဟုဲင်း” နုဲင်းနဝ်ꩻသွူ။
11နဝ်ꩻထွူ သျေခိမ်ဒေါ့ꩻဖေႏ ဒိနအဖါတွမ်ႏ အဝေးခိုဖုံႏ “သီမဉ်ႏဖေႏတောႏလမ်းခွေငါ ခွိုင်းသီကကွီနဝ်ꩻ ခွေအီႏဖေႏဒျာႏ။ 12သီကမဲဉ်လꩻဒါႏ စူခူꩻလက်ဆောင်ႏတွမ်ႏ မင်္ဂလာႏစရိပ် အထိုသွတ်ꩻနဝ်ꩻ ထွော့ဒေါ့ꩻနယ်ဖေႏခွေဟုဲင်း၊ မဉ်ႏဖေႏတောႏလမ်းခွေ ဒိနငါ၊ ခွိုင်းသီကကွီနဝ်ꩻ ခွေဖေႏဒျာႏ” နုဲင်းနဝ်ꩻသွူ။
13ကွပ်ပွိုး သျေခိမ် ယားတရေႏထိုꩻ ဝွေꩻသီးဖူးမူႏဒိနနဝ်ꩻမꩻ ယာကုပ်ပိုခိုဖုံႏနဝ်ꩻ တွမ်ႏငဝ်းပရိယာယ်ႏ လဝ်းချာ သျေခိမ်တွမ်ႏ အဖါဟာမော်သွူ။ 14ဝွေꩻသီးဒေါ့ꩻဖေႏဝွေꩻ “နီဖူးမူႏနဝ်ꩻ တဖေႏတောႏလမ်းတဝ်း တွမ်ႏလိုꩻတသွို့ꩻတဝ်း လိုꩻခိုအင်္ဂါႏနာပီ မင်္ဂလာႏသား၊ နီမဉ်ႏဖေႏတောႏလမ်းနဝ်ꩻ နီအတာႏ တရေႏအီႏကုဲင် ထွာထာꩻဝင်ꩻသꩻခရာႏသွူ။ 15နီသꩻဖော်ꩻအီႏတူႏနွောင်ꩻနဝ်ꩻ အဝ်ႏဒျာႏတစွိုးလွုမ်ꩻ သီလိုꩻခိုဖုံႏ ခွိုင်းကားကအဝ်ႏ မဉ်ႏခံႏသွို့ꩻ လိုꩻခိုအင်္ဂါႏနာပီ မင်္ဂလာႏ နုဲင်းနီမꩻသွူ။ 16နဝ်ꩻမꩻ နီပိုမူႏဖုံႏတဲ့ꩻ သီတောႏလမ်းလꩻ သီပိုမူႏဖုံႏတဲ့ꩻ နီအီႏတောႏလမ်း နီတဲ့ꩻအီႏအုံငီꩻနွောင်ꩻ သီအကိုတဲင် အီႏထွာလွဉ် လိုꩻတမျိုꩻချင်ႏသွူ။ 17ကွဲႏတွော့ꩻ သီမဉ်ႏတလက္ခံႏတဝ်း နီငဝ်း ပွေါ့ꩻတသွို့ꩻတဝ်း လိုꩻခိုအင်္ဂါႏနာပီ မင်္ဂလာႏနဝ်ꩻ နီအီႏသိမ်ꩻချာ နီဖူးမူႏတွော့ꩻ နီအီႏထန်ႏလွေꩻထိုꩻ” နုဲင်းနဝ်ꩻသွူ။
18ငဝ်းနဝ်ꩻနဝ်ꩻ ဟာမော်တွမ်ႏ ဝွေꩻအပိုခိုသျေခိမ် ရစွဉ်ႏ လက္ခံႏနွောင်ꩻဒျာႏသွူ။ 19သျေခိမ်နဝ်ꩻ ရက်လဲဉ်းသွူ ယာကုပ်ပိုမူႏနဝ်ꩻမꩻ နုဲင်းယာကုပ်ပိုခိုဖုံႏ ကဖေႏကျံႏဒါႏ အတွိုင်ꩻနဝ်ꩻ ဝွေꩻယွိုန်းထွို့ꩻဒွုမ်တဲင် လက္ခံႏစွဉ်ႏသွူ။ သျေခိမ်နဝ်ꩻ ဝွေꩻဖူးဝေးစွိုးခွိုꩻအကို ထွာလိုꩻတန်တဖြာꩻသွူ။
20ဟာမော်တွမ်ႏ အပိုခိုသျေခိမ်နဝ်ꩻ လွေꩻဝေင်ꩻတခါꩻတန်ငွါထျꩻ စီꩻဝေꩻဒါႏဝင်ꩻ ခင်ႏလမ်းနဝ်ꩻတွော့ꩻ ဒေါ့ꩻဖေႏဝေင်ꩻသားဖုံႏ၊ 21“ဝွေꩻသီးစားယိုဖုံႏနဝ်ꩻ အုံငီꩻအဝ်ႏဟဝ်ဒျာႏ၊ ဝွေꩻသီးနဝ်ꩻ ဖေႏအုံသော့ꩻငီꩻသွော့နီခမ်း အွဉ်ႏလွေꩻသဲင်ꩻ ကမ်းသꩻသော့ꩻသွော့၊ နီခမ်းတဲ့ꩻ အဝ်ႏလုဲင်းဒျာႏ ဝွေꩻသီးအုံငီꩻတဲ့ အဝ်ႏတွမ်ႏဒျာႏ၊ နီတဲ့ꩻ တောႏလမ်းတွမ်ႏ ဝွေꩻသီး အပိုမူႏဖုံႏတဲင် ဝွေꩻသီးတဲ့ꩻ ဖေႏတောႏလမ်းသွော့ နီပိုမူႏဖုံႏဟုဲင်း။ 22ကွဲႏတွော့ꩻ နီလိုꩻခိုဖုံႏ ကားကအဝ်ႏ မဉ်ႏသွို့ꩻအင်္ဂါႏနာပီ မင်္ဂလာႏ ဗွိုန်နုဲင်းဝွေꩻသီး ကသွို့ꩻနဝ်ꩻမꩻ ဝွေꩻသီးစားနဝ်ꩻဖုံႏနဝ်ꩻ သဘော်ꩻအီႏလꩻ အီႏအုံငီꩻနီတဲင် ဝွေꩻသီးတွမ်ႏနီနဝ်ꩻ ထွာလွဉ် လိုꩻတမျိုꩻချင်ႏဖုံႏသွူ။ 23ဝွေꩻသီးသွိုꩻဖုံႏ၊ ဖိုးဖုံႏတွမ်ႏ အထာꩻခြိုꩻဥစ္စာႏ ကားကအဝ်ႏနဝ်ꩻ အီႏထွာနီထာꩻ မွေးတဝ်းနဲ့ဟောင်း၊ နဝ်ꩻမꩻ ဝွေꩻသီးအုံငီꩻနီ ဖေႏကလꩻနဝ်ꩻ နီအွဉ်ဝင်ꩻ သဘော်ꩻတူႏတွမ်။” 24နုဲင်းဟာမော်တွမ်ႏ သျေခိမ် ကဖေႏဒါႏ အကျံႏအဉာဏ်ႏအတွိုင်ꩻ ဝေင်ꩻသားဖုံႏ ကားကအဝ်ႏနဝ်ꩻ သꩻဖော်ꩻတူႏစွဉ်ႏတဲင် လိုꩻခိုဖုံႏ ကားကအဝ်ႏနဝ်ꩻ သွို့ꩻလို့စွဉ်ႏ လိုꩻခိုအင်္ဂါႏနာပီ မင်္ဂလာႏသွူ။
25ထွိုင်ႏလꩻသွံနီꩻ ပွိုးလိုꩻခိုဖုံႏ ကသွို့ꩻဒါႏ အင်္ဂါႏနာပီ မင်္ဂလာႏသားနဝ်ꩻ အဝ်ႏဆာနေကတွင်ꩻ ယာကုပ်ပိုခိုဝင်ꩻနီ ကထွာဒိန အဝေးခို သိမောင်တွမ်ႏ လေဝိနဝ်ꩻ ထူႏဝွေꩻသီးနတဲင် နွို့သော့ꩻစွော့ꩻစွဉ်ႏ ဝေင်ꩻကို မာꩻသီထိုꩻလို့စွဉ်ႏ လိုꩻခိုဖုံႏ ကားကအဝ်ႏသွူ။ 26မာꩻသီပါစွဉ်ႏ ဟာမော်တွမ်ႏ ဝွေꩻပိုခိုသျေခိမ်သွူ။ နဝ်ꩻထွူ အဝ်ႏသျေခိမ်လမ်းကိုနဝ်ꩻ ဝွေꩻသီးဟဲ့ꩻသဲင်ꩻပါ ဒိနတဲင် ထန်ႏသဲင်ꩻစွဉ်ႏသွူ။ 27ဝွေꩻသီးမာꩻသီ ပါꩻစားနဝ်ꩻဖုံႏထွူ ယာကုပ်ပိုခို အလင်ဖုံႏနဝ်ꩻတဲ့ ဖေႏနေး ကမာꩻလုမ်းလီး တဲဉ်ꩻချာဗာႏ ပါꩻယားတရေႏဒါႏ ဝွေꩻသီးဖူးမူႏ အတာႏနဝ်ꩻ နွို့လွေꩻချာယင်း ဝေင်ꩻကိုတဲင် ရိမ်ထူႏ ယားကုဲင်ထိုꩻစွဉ်ႏသွူ။ 28ဝွေꩻသီး ထူႏလို့စွဉ်ႏဗဲ၊ သွိုꩻ၊ ဖိုး၊ လာꩻဖုံႏတွမ်ႏ ထာꩻခြိုꩻဖုံႏ ကားကအဝ်ႏဒါႏ ဝေင်ꩻကိုတွမ်ႏ ခြံတုံးကိုဖုံႏသွူ။ 29ဝွေꩻသီး သိမ်ꩻထူႏလို့စွဉ်ႏ ထာꩻခြိုꩻ အဖိုꩻတန်ႏဖုံႏ ကားကအဝ်ႏတဲင် ဆွမ်ꩻလွေꩻပါလို့ လိုꩻမူႏဖုံႏတွမ်ႏ လိုꩻပေႏဖုံႏတဲင် ကထီႏဒါႏ ထာꩻခြိုꩻ လမ်းကိုဖုံႏနဝ်ꩻတဲ့ꩻ တောလွေꩻလို့စွဉ်ႏသွူ။ 30ယာကုပ်ဒေါ့ꩻဖေႏ သိမောင်တွမ်ႏလေဝိ၊ “သီမာꩻဒုက္ခလဲဉ်းခွေ၊ ယိုခါ ခါနန်လိုꩻမျိုꩻ၊ ဖေရဇိလိုꩻမျိုꩻတွမ်ႏ ခမ်းကိုလိုꩻအလင်ဖုံႏ ကားကအဝ်ႏနဝ်ꩻ မဲ့အီႏလွꩻထီႏခွေ၊ ခွေလိုꩻနဝ်ꩻ တအဝ်ႏအာတဝ်း၊ ဝွေꩻသီးမဉ်ႏပေါင်ꩻလို့ဝင်ꩻတဲင် မဉ်ႏလွဉ်တွိုက်ꩻချာစွော့ꩻခွေနဝ်ꩻ ခွေတမွိုးဖါပိုစွိုꩻဖုံႏ ကားကအဝ်ႏ မဲ့ꩻအီႏသီကုဲင်ထိုꩻလို့” နုဲင်းနဝ်ꩻသွူ။ 31ကွဲႏတွော့ꩻ ဝွေꩻသီးဒေါ့ꩻ၊ “နီဖူးမူႏယို ဝွေꩻသီးမာꩻစွဉ်ႏ နုဲင်းလိုꩻမူႏဖွီနဝ်ꩻ နီတခံႏတဝ်း” နုဲင်းနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 34: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.