ကမ္ဘာႏစ 33
33
ယာကုပ်မော့ꩻခွဲဧသော
1ယာကုပ်ထီႏ ဧသောတွမ်ႏအလိုꩻ လစ်ꩻရျာꩻ အဝ်ႏလွဉ်တဲင် ဝွေꩻပိုဖုံႏနဝ်ꩻ ဖအွဉ်ႏစွဉ်ႏ အမွိုးလေအာ၊ ရာခေလတွမ်ႏ အမာပေႏဝင်ꩻနီထျꩻသွူ။ 2ဆꩻငါသွတ်ꩻနဝ်ꩻ အွဉ်ႏဝွေꩻမာပေႏတွမ်ႏ အပိုဖုံႏထွူ လေအာတွမ်ႏအပိုဖုံႏ၊ ဆꩻချာသွတ်ꩻနဝ်ꩻ အွဉ်ႏရာခေလတွမ်ႏ ယောသပ်သွူ။ 3ယာကုပ်နဝ်ꩻ လွေꩻဝွေꩻသီး ဆꩻငါတဲင် ထွိုင်ႏတွိုႏ ဝွေꩻဝေးခိုထျꩻနဝ်ꩻ ခံႏနွမ်ꩻအွပ်ꩻလင်ꩻစွဉ်ႏ ဟံႏလောင်း နွတ်ꩻလဲင်ႏသွူ။ 4ကွဲႏတွော့ꩻ ဧသော ဖင်းလွဉ်တဖေါ့နို့ꩻစွဉ်ႏ ယာကုပ်သွူ။ ဝွေꩻသီး ဝင်ꩻနီလွုမ်း ငွိုးစွဉ်ႏထာꩻဖုံႏသွူ။ 5ဧသောထွိုင်ႏထွားချာငါထာꩻနဝ်ꩻ ထီႏလိုꩻမူႏဖုံႏတွမ်ႏ လိုꩻပေႏဖုံႏတဲင် ဝွေꩻရီ “လိုꩻကပါလွဉ်ငီꩻဒါႏ တွမ်ႏနာꩻယိုဖုံႏနဝ်ꩻ ပါꩻမုဲင်ꩻဟောင်း” နုဲင်းနဝ်ꩻသွူ။
ယာကုပ်လဝ်းချာ “ဝွေꩻသီးနဝ်ꩻ ဗွေႏဘုရာꩻ သညင်ꩻခွေတဲင် ဖေႏသေꩻ ခွေပိုဖုံႏဒျာႏ” နုဲင်းနဝ်ꩻသွူ။
6နဝ်ꩻထွူ ဝွေꩻမာပေႏဖုံႏတွမ်ႏ အပိုဖုံႏတဲ့ꩻ လွဉ်ခံႏနွမ်ꩻနဝ်ꩻသွူ။ 7နဝ်ꩻထွူ လေအာတွမ်ႏ အပိုဖုံႏတဲ့လွဉ်ခံႏနွမ်ꩻတဲင် အဆုဲင်ꩻသွတ်ꩻနဝ်ꩻ ယောသပ်တွမ်ႏ ရာခေလလွဉ်တဲင် ခံႏနွမ်ꩻစွဉ်ႏသွူ။
8ဧသောရီ “ခွေကခွဲဆွုမ်ႏလဲဉ်းဒါႏ တိရစ္ဆာန်ႏစွိုꩻဖုံႏနဝ်ꩻ အဓိပ္ပါယ်ႏ တမုဲင်ꩻဟောင်း။”
ယာကုပ်လဝ်းချာ “နဝ်ꩻဖုံႏနဝ်ꩻ ဖေႏနေးကလꩻမဲ့ငါ မေတ္တာႏ နီဝေးထျꩻဒျာႏသွူ။”
9တွိုႏနဝ်ꩻ ဧသောဒေါ့ꩻ “ဖူးပေႏ ခွေနဝ်ꩻ အဝ်ႏလုမ်းကုမ်ႏလဲဉ်းဒျာႏ၊ ထူႏချာယင်းသွော့ နာꩻထာꩻခြိုꩻဟုဲင်း။”
10ယာကုပ်ဒေါ့ꩻ “မွေးတဝ်း၊ ခွေမဉ်လꩻမဲ့ငါ နီဝေးထျꩻနဝ်ꩻမꩻ လက်ခံႏသွော့ ခွေသွဉ်း လက်ဆောင်ႏဟုဲင်း၊ ယိုခါ နီဝေးနဝ်ꩻ ရပ်ဆွုမ်ႏဟဝ် မွေးလဲဉ်းခွေတဲင် ထီႏဗာႏ နီဝေးမဲ့ငါနဝ်ꩻ ဗွိုန်နုဲင်း ထီႏဗာႏ ဗွေႏဘုရာꩻမဲ့ငါသွူ။ 11ခွေသွဉ်း ကထူႏလွဉ်ဖေႏ နီဝေးတာႏ မေတ္တာႏ လက်ဆောင်ႏယိုနဝ်ꩻ လက်ခံႏဖေႏဗဲင်းဟုဲင်း။ ခွိုင်းကား ခွေကအဝ်ႏလိုႏနဝ်ꩻ ဗွေႏဘုရာꩻ သꩻညင်ꩻတဲင် ဖေႏထွူလဲဉ်းခွေ” နုဲင်းနဝ်ꩻသွူ။ ယာကုပ် အဝ်ႏတောင်ꩻပြန်ႏ နွိုင်ႏနွိုင်ႏ ဗꩻတွိုႏစွဉ်ႏ ဧသော ကလက်ခံႏနဝ်ꩻသွူ။
12ဧသောဒေါ့ꩻ “ရဲဉ်ꩻခန်းဟုဲင်း၊ လွေꩻတွမ် ခွေလွေꩻရီးသွူ နာꩻဆꩻငါ” နုဲင်းနဝ်ꩻသွူ။
13ယာကုပ်ရိုꩻ “နီဝေးအဝ်ႏသေဒျာႏအတွိုင်ꩻ ခွေပိုဖုံႏနဝ်ꩻ ပေႏဆားငါႏဒွိုန်းက ထာꩻသောင်ꩻထာꩻသား အပေႏနဲဉ်းသားဖုံႏ ကရိုꩻဒါႏ သွိုꩻဖုံႏ၊ ဗဲဖုံႏ၊ ဖိုးဖုံႏနဝ်ꩻတဲ့ꩻ ချင်းဖေႏပါဗာႏ၊ မဉ်ႏဝါးနဲစ်ငါႏ တနီꩻချင်ꩻနဝ်ꩻ တဖုံႏလွုမ်း မဲ့ꩻအသီထိုꩻလို့ဒါႏသွူ။ 14နီဝေးလွေꩻရီးခွေဟုဲင်း ခွေသွဉ်းနဝ်ꩻ တွမ်ႏထာꩻသောင်ꩻ ထာꩻသားဖုံႏ တွမ်ႏလိုꩻပေႏဖုံႏ ကားကလွေꩻနွောင်ꩻနဝ်ꩻ အီႏလွဉ်ယွယွဒျာႏ၊ မဲ့ꩻထွလွဉ်ꩻယင်းဒျာႏ နီဝေး အွိုးဧဒုံခမ်းကို” နုဲင်းနဝ်ꩻသွူ။
15ဧသောဒေါ့ꩻ “ပေါ့ꩻနုဲင်းနဝ်ꩻ ခွေလိုꩻယင်ဟန်ႏနဝ်ꩻ အွဉ်ႏကုဲင်ငီꩻဖေႏနာꩻ” နုဲင်းနဝ်ꩻသွူ။
တွိုႏနဝ်ꩻ ယာကုပ်လဝ်းချာ “နဝ်ꩻအတာႏ ခွေတလိုႏတဝ်း ခွေမဉ်လꩻဒျာႏမဲ့ငါ နီဝေးထျꩻလွုမ်ꩻ” နုဲင်းနဝ်ꩻသွူ။ 16နဝ်ꩻမꩻ အနီꩻနဝ်ꩻ ဧသောသဲင်ꩻချာ ဧဒုံခမ်းသွူ။ 17ကွဲႏတွော့ꩻ ယာကုပ်နဝ်ꩻ ထန်ႏလွေꩻ သုကုတ်အရပ်တဲင်၊ နဝ်ꩻကိုဝွေꩻမာꩻ လမ်းတဖြုံႏတွမ်ႏ ထာꩻသောင်ꩻ ထာꩻသားတာႏ သုမ်းဖုံႏသွူ။ နဝ်ꩻမꩻ ခင်ႏလမ်းနဝ်ꩻနဝ်ꩻ ဟဲ့ꩻဗာႏ သုကုတ်သွူ။
18ယာကုပ်အဝ်ႏ မဲက်သိုပိုတေးမီးယားခမ်း သဲင်ꩻလွဉ်ချိန်ႏနဝ်ꩻ ဝွေꩻလွစ်ကင်ꩻ တွမ်ႏဘေꩻရန်ႏ ဖျော်တွိုႏချာ ခါနန်ခမ်း သျေခိမ်ဝေင်ꩻထျꩻတဲင် ဝွေꩻချꩻပင်စခန်ꩻ ဝေင်ꩻတန်ထျꩻသွူ။ 19#ယောသျု ၂၄:၃၂၊ ယော ၄:၅။တွမ်ႏရွဉ်ယာႏတစွဲနဝ်ꩻ ဝွေꩻဖြေꩻဟံႏတကွက် သျေခိမ်အဖါ ဟာမော်ပိုလီꩻထျꩻသွူ။ 20ဝွေꩻတယ်ႏပလ္လင်ႏ နဝ်ꩻကိုတွော့ꩻ၊ ပလ္လင်ႏနဝ်ꩻနဝ်ꩻ ဖန်ဟဲ့ꩻ ဣသရေး ဗွေႏဘုရာꩻ ဧလေနုဲင်းနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 33: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.