ကမ္ဘာႏစ 25
25
အဗြာဟံပိုလီꩻစွိုးခွိုꩻအလင်
(၁ခွန်ရာႏဇဝင်ႏ ၁:၃၂–၃၃)
1အဗြာဟံ တောႏလမ်းယင်း ပါꩻမူႏမဉ်ꩻ ကေတုရနဝ်ꩻသွူ။ 2ဝွေꩻမူႏနဝ်ꩻ လွူးလွဉ်ပိုခို ဇိမရန်၊ ကျုတ်သန်၊ မေဒန်၊ မိဒျန်၊ ဣသဗတ်တွမ်ႏ သျုအာသွူ။ 3ကျုတ်သန်နဝ်ꩻထွာ သျေဗတွမ်ႏ ဒေဒန်သီးအဖါတဲင် ဒေဒန် ပိုလီꩻစွိုးခွိုꩻနဝ်ꩻထွာ အသျုရိမ်၊ လတုသျိမ်တွမ်ႏ လုမ်မိမ်သွူ။ 4မိဒျန်ပိုခိုနဝ်ꩻ ထွာဧဖါ၊ ဧဖေရ၊ ဟာနုတ်၊ အဗိဓတွမ်ႏ ဧလဒါသွူ။ နဝ်ꩻဖုံႏ ကားကအဝ်ႏနဝ်ꩻ ထွာကေတုရ ပိုလီꩻခွိုꩻဖုံႏသွူ။
5အဗြာဟံကပဲင်ႏဒါႏ ထာꩻခြိုꩻအမွီႏဖုံႏ ကားကအဝ်ႏနဝ်ꩻ အွဉ်ႏကုဲင်ဖေႏ ဝွေꩻပိုခို ဣသဲစ်သွူ။ 6ကွဲႏတွော့ꩻ ဝွေꩻသက်ကအဝ်ႏမွန်တွင်ꩻ တွမ်ႏဝွေꩻမာအလင် ကလွူးဒါႏ ပိုခိုဖုံႏတာႏနဝ်ꩻ ဝွေꩻဖေႏ ထာꩻခြိုꩻ လက်ဆောင်ႏဖုံႏထွူ အွဉ်ႏအုံညာꩻထိုꩻစွဉ်ႏ ဝွေꩻပိုခိုဣသဲစ် ခမ်းကွဉ်ႏဖဲ့ꩻသွူ။
အဗြာဟံသီထိုꩻ
7-8အဗြာဟံ သက်ထွိုင်ႏလꩻ ၁၇၅နေင်ႏနဝ်ꩻ ဖြားတဲင် သီထိုꩻသွူ။ 9ဝွေꩻပိုခို ဣသဲစ်တွမ်ႏ ဣသျမေလꩻနဝ်ꩻ သင်္ဂြိုဟ်ႏအဖါ မက်ဖေလ ထမ်းအိုကို၊ မံရေအခဝ်ကွဉ်ႏဖဲ့ꩻ ဟိတ္တိလိုꩻမျိုꩻ ဇောဟာပိုခို ဧဖါရုန်ကပဲင်ႏဒါႏ ခြံကိုနဝ်ꩻသွူ။ 10#ကမ္ဘာႏ ၂၃:၃–၁၆။ ခြံနဝ်ꩻနဝ်ꩻ အဗြာဟံ ဖြေꩻသေꩻခါꩻလဲဉ်း ဟိတ္တိလိုꩻမျိုꩻဖုံႏထျꩻ၊ အဗြာဟံတွမ်ႏ ဝွေꩻမာသာရာ ဝင်ꩻနီလွုမ်းနဝ်ꩻ သင်္ဂြိုဟ်ႏသော့ꩻ ခင်ႏလမ်းနဝ်ꩻကိုသွူ။ 11အဗြာဟံသီထွူ ဗွေႏဘုရာꩻဖေႏ ဝွေꩻပိုခိုဣသဲစ် မင်္ဂလာႏနဝ်ꩻ အဝ်ႏအုံဗော့ꩻ “သက်မွန် ဗွေႏအပါꩻ ထီႏခွေ အထီအုံႏ” နဝ်ꩻအထျꩻသွူ။
ဣသျမေလပိုလီꩻစွိုးခွိုꩻဖုံႏ
(၁ခွန်ရာႏဇဝင်ႏ ၁:၂၈–၃၁)
12အဗြာဟံကလꩻဒါႏ သာရာသွဉ်းမူႏ အီဂျစ်ခမ်းရင်ꩻသားမူႏ ဟာဂါရ ပိုခိုဣသျမေလ၊ 13ဣသျမေလ ပိုခိုဖုံႏ၊ အဝ်ႏအတန် ဗꩻလင်ꩻအပေႏ မဉ်ꩻစရင်ꩻဖုံႏနဝ်ꩻ နဗာယုတ်၊ ကေဒါ၊ အဗီလာ၊ မိသမ်၊ 14မိသျမ၊ ဒုမာ၊ မာသ၊ 15ဟာဒဒ်၊ တေမ၊ ယေတုရ၊ နာဖိသျတွမ်ႏ ကေဒိမာသွူ။ 16ဝွေꩻသီးနဝ်ꩻ ထွာဣသျမေလ ပိုဖုံႏတွော့ꩻ ထွာလွဉ် လိုꩻတဆီနီမျိုꩻအဖါတဲင် ဝွေꩻသီး ကအုံဒါႏဒုံဖုံႏ၊ ပင်စခန်ꩻ ခင်ႏလမ်းဖုံႏနဝ်ꩻ ဟဲ့ꩻလွဉ်ꩻနုဲင်း ဝွေꩻသီး အမဉ်ꩻဖုံႏသွူ။ 17ဣသျမေလ သက်ထွိုင်ႏလꩻ တရျာꩻသွံဆီနွတ်ꩻနေင်ႏနဝ်ꩻ သီထိုꩻသွူ။ 18ဣသျမေလ ပိုလီꩻစွိုးခွိုꩻဖုံႏနဝ်ꩻ အုံသော့ꩻ ဟာဝိလဝေင်ꩻတွမ်ႏ သျုရဝေင်ꩻခါႏ ကအဝ်ႏဒါႏ အီဂျစ်ခမ်း၊ အခဝ်ကွဉ်ႏဖဲ့ꩻ ကလွေꩻဒါႏ အာသီးရီးယားခမ်း တဖူꩻလောင်းနဝ်ꩻသွူ။ ဝွေꩻသီးနဝ်ꩻ အုံခေါ်ဒျာႏတွမ်ႏ အဗြာဟံ ပိုလီꩻစွိုးခွိုꩻ အလင်ဖုံႏသွူ။
လွူးလွဉ်ဧသောတွမ်ႏယာကုပ်
19ယိုနဝ်ꩻထွာ အဗြာဟံပိုခို ဣသဲစ် ရာႏဇဝင်ႏသွူ။ 20ဣသဲစ်သက်ထွိုင်ႏလꩻ လစ်ꩻဆီနဝ်ꩻ ဝွေꩻတောႏလမ်းတွမ်ႏ ဗေသွေလꩻပိုမူႏ အရေမီယန်လိုꩻမျိုꩻ၊ မဲက်သိုပိုတေးမီးယား ခမ်းသား လာဗန်ဖူးမူႏ ရီဗက္ကသွူ။ 21ကွပ်ပွိုး ရီဗက္ကနဝ်ꩻ တလꩻတဝ်းပိုနဝ်ꩻမꩻ ဣသဲစ်ဆုတောင်ꩻဖေႏ ဝွေꩻမူႏအတာႏ ထာဝရဘုရာꩻထျꩻသွူ၊ ဝွေꩻဆုတောင်ꩻငဝ်းနဝ်ꩻ ထာဝရဘုရာꩻ နာႏတဲင် ရီဗက္ကလꩻလွဉ် သန္ဓေႏသွူ။ 22ရီဗက္ကသန္ဓေႏ ကအဝ်ႏနမ်းလောင်းနဝ်ꩻ ထွာမဲရွာတဲင် ခလားဝွေꩻသီးကလွူးလွဉ် ခါကာႏ တဖြာꩻတွမ်ႏတဖြာꩻ အဝ်ႏရွို့ꩻသော့ꩻလို့ဝင်ꩻ အမွိုးဟို့ꩻကိုသွူ။ ရီဗက္ကရိုꩻ “ခွေယိုပွိုးတမုဲင်ꩻ ထွာဗာႏတွိုႏ နုဲင်းယိုဟောင်း” တဲင်ဖေႏကသေနဝ်ꩻ ဝွေꩻလဝ်းထင်ႏ ထာဝရဘုရာꩻထျꩻသွူ။
23 #
ရော ၉:၁၂။ နဝ်ꩻမꩻ ထာဝရဘုရာꩻ မိန်းဖေႏဝွေꩻ၊
“နာꩻဟို့ꩻကိုနဝ်ꩻ လိုꩻမျိုꩻအဝ်ႏသော့ꩻ နီꩻမျိုꩻ၊
နာꩻနဝ်ꩻ အီႏလွူးလွဉ်ဗာႏ လိုꩻနီမျိုꩻ အချင်ꩻချင်ꩻ ကအဝ်ႏပြဲင်ႏလို့ဒါႏဝင်ꩻ။
တမျိုꩻနဝ်ꩻ အာႏအီႏတန်ကယ်ꩻ အလင်တမျိုꩻသွူ။
အဖြာꩻတန်နဝ်ꩻ အီႏခံႏဗာႏ အဖြာꩻပေႏသွဉ်း” နုဲင်းနဝ်ꩻသွူ။
24ဝွေꩻမူႏလွူးပိုချိန်ႏ ထွိုင်ႏတွိုႏနဝ်ꩻ ဝွေꩻမူႏလွူးလွဉ် ပိုခိုမဲရွာသွူ။ 25အဖြာꩻတန်နဝ်ꩻ ယာႏတနျာႏ ဆွဉ်ႏဒွိုန် နမ်းတဗာႏလွုမ်းနဝ်ꩻမꩻ ဖန်ဖေႏ ဝွေꩻမဉ်ꩻ ဧသောသွူ။ 26ဒုတိယတဖြာꩻနဝ်ꩻ အဝ်ႏခွုမ်သဲဉ်ꩻလင်ꩻ ဧသောခင်ႏဒွိုႏတဲင် လွူးလွဉ်နဝ်ꩻမꩻ ဖန်ဟဲ့ꩻဖေႏဝွေꩻအမဉ်ꩻ ယာကုပ်သွူ။ ဝွေꩻသီး ကလွူးလွဉ်ချိန်ႏနဝ်ꩻ ဣသဲစ်သက်လꩻလဲဉ်း သူဆီသွူ။
ဧသောစာထိုꩻပိုခိုတန်အရာႏ
27လိုꩻပေႏဖုံႏနဝ်ꩻ တန်လွဉ်တဲင် ဧသောနဝ်ꩻထွာ လိုꩻလော်ထာꩻကျင်ႏ တဖြာꩻတဲင် စွဲꩻငါႏဟောႏ ထာꩻသား ထာꩻခြာသွူ။ ကွဲႏတွော့ꩻ ယာကုပ်နဝ်ꩻထွာ လိုꩻသꩻခွꩻတဲင် အုံဒျာႏလမ်းသွူ။ 28ဧသော ကဟောႏလꩻ ထာꩻသားထာꩻခြာယာႏဖုံႏနဝ်ꩻ ဣသဲစ် မက်ငါႏနဝ်ꩻမꩻ ဝွေꩻရက်ငါႏ ဧသောသွူ၊ ကွဲႏတွော့ꩻ ရီဗက္ကနဝ်ꩻ ရက်ယာကုပ်သွူ။
29တနီသား ယာကုပ်အဝ်ႏဒွိုႏ ဟန်ႏအို ဗာႏခူꩻတွင်ꩻနဝ်ꩻ ဧသောဟောႏ ထာꩻသားဖျော်သဲင်ꩻလွဉ်တဲင် ဟို့ꩻခိုးငါႏထာꩻအံႏ။ 30တဲင်ဒေါ့ꩻဖေႏယာကုပ်၊ “ခွေဟို့ꩻခိုး မွေးစွဉ်ႏထာꩻ ဖေႏအံႏဗဲင်းခွေ နာꩻဟန်ႏအို ဗာႏခူꩻတနျာႏဒွိုႏနဝ်ꩻမွိုင်။” (ပွိုးနဝ်ꩻမꩻ ဝွေꩻနဝ်ꩻ ဝင်ꩻဖန်ဟဲ့ꩻဖေႏအမဉ်ꩻ ဧဒုံ)နုဲင်းနဝ်ꩻသွူ။
31ယာကုပ်ဒေါ့ꩻချာ “နာꩻမဉ်ႏဖေႏခွေ နာꩻပိုခိုတန်အရာႏမꩻ ခွေဖေႏအံႏနာꩻ” နုဲင်းနဝ်ꩻသွူ။
32ဧသောဒေါ့ꩻ “ခွေဟို့ꩻခိုးထာꩻနဝ်ꩻ အီႏသီသွူ။ ပိုခိုတန်အရာႏနဝ်ꩻ ခွေတာႏ အကျိုꩻအဝ်ႏ တမုဲင်ꩻဟောင်း” နုဲင်းနဝ်ꩻသွူ။
33 # ဟေဗြဲ ၁၂:၁၆။ ယာကုပ်ဒေါ့ꩻချာ “နာꩻအီႏဖေႏခွေ ပိုခိုတန်အရာႏနဝ်ꩻ အွဉ်ႏသစ္စာႏရီးဟုဲင်း” နုဲင်းနဝ်ꩻသွူ။
ဧသော အွဉ်ႏသစ္စာႏတဲင် ဝွေꩻပိုခိုတန် အရာႏနဝ်ꩻ ဖေႏထိုꩻစွဉ်ႏ ယာကုပ်သွူ။ 34နဝ်ꩻထွူ ယာကုပ်ဖေႏဝွေꩻ တခိုးပေါင်မုန့်တွမ်ႏ ဟန်ႏအို ဗာႏခူꩻတနျာႏထီသွူ။ ဝွေꩻအံႏအွꩻထွူ ထွိုင်ႏတဲင် ထန်ႏလွေꩻထိုꩻသွူ။ နဝ်ꩻနဝ်ꩻ ထွာဧသော အွဉ်ႏရေꩻတဝ်း ဝွေꩻပိုခိုတန် အရာႏနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 25: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.