တမန်ႏတောႏ 4
4
ပေတရုတွမ်ႏယောဟန်ဖျော်လွေꩻကောင်စီလွတ်တောႏဆꩻငါ
1ပေတရုတွမ်ႏ ယောဟန် အဝ်ႏဟော်ꩻဖေႏနေက လိုꩻဖုံႏချိန်ႏနဝ်ꩻ ယဇ်ပရောဟိတ်ဖုံႏ ယင်ဟန်ႏ၊ ဗိမာန်ႏတောႏ ကျောင်ꩻပွေါး စဲ့ꩻပိုႏဖုံႏတွမ်ႏ သာဒုကဲဖုံႏ ယင်ဟန်ႏနဝ်ꩻ ဖျော်လွဉ်သွူ။ 2တမန်ႏတောႏ နီဖြာꩻနဝ်ꩻ အဝ်ႏသွဉ်သင်ဖေႏ လိုꩻဖုံႏ၊ ဗွေႏယေသျု အဝ်ႏထာꩻသီ ထွိုင်ႏမွန်ချာ ခရာႏနဝ်ꩻမꩻ ဝွေꩻသီး အဝ်ႏသꩻလျားထာꩻ ပွိုးတွော့ꩻ လိုꩻကသီလဲဉ်းနဝ်ꩻ သက်အီႏမွန်လွဉ်ချာ ခံႏသက်သေႏ နုဲင်းနဝ်ꩻအတွက်သွူ။ 3နဝ်ꩻမꩻ ဝွေꩻသီးဆွမ်ꩻ တမန်ႏတောႏဖုံႏ အွဉ်ႏခံသော့ꩻ ဝွေꩻသီး ထောင်ႏကို တယ်ႏစွဉ်ႏ မွူးဟာလင်ꩻ ဗꩻတွိုႏစွဉ်ႏ ဆုဲင်ꩻတနီꩻနဝ်ꩻသွူ။ 4ကွဲႏတွော့ꩻ လိုꩻကဟွိုန်ဗာႏလဲဉ်း သတင်ꩻသားဖုံႏတွော့ꩻ ယွုမ်းလွဉ်နဝ်ꩻ အာငါႏတဲင် အဝ်ႏစွဉ်ႏ အဖြာꩻ၅၀ဝဝရပ်သွူ။
5ဆုဲင်ꩻတနီꩻ ဂျူးခေါင်းဆောင်ဖုံႏ၊ လိုꩻတန်ဖုံႏတွမ်ႏ ကျမ်ꩻဒါႏဆရာႏဖုံႏနဝ်ꩻ စုဗူႏသော့ꩻလို့ဝင်ꩻ ဝေင်ꩻယေရုသလမ်ႏကိုသွူ။ 6ဝွေꩻသီး မော့ꩻခွဲစွဉ်ႏ ယဇ်ပရောဟိတ်ခွန် အန္နတွမ်ႏ ကယာဖ၊ ယောဟန်၊ အလဲက်ဇန္ဒြားစွဉ်ႏ လိုꩻလင်ဖုံႏ ကဆဲင်ႏဒါႏ ယဇ်ပရောဟိတ်ခွန် တမွိုးဖါပိုစွိုꩻဖုံႏနဝ်ꩻသွူ။ 7ဝွေꩻသီး အွဉ်ႏအုံထွိုင်ႏ တမန်ႏတောႏဖုံႏ ဝွေꩻသီးဆꩻငါတဲင် ရီဝွေꩻသီး၊ “သီမာꩻတမုဲင်ꩻ နုဲင်းယိုဟောင်း။ သီကအဝ်ႏမာꩻနဝ်ꩻ စွဉ်ႏတမုဲင်ꩻတန်ꩻခိုꩻ၊ မဉ်ႏမွေးတဝ်း သီသွုံꩻအီစွဉ်ႏ ပါꩻမုဲင်ꩻ အမဉ်ꩻနာႏမဟောင်း” နုဲင်းနဝ်ꩻသွူ။
8ပေတရုနဝ်ꩻ အဝ်ႏဗွေစွဉ်ႏ ကြောင်းစင် ဝိညာဉ်ႏတောႏတဲင် လဝ်းချာ ဝွေꩻသီး၊ “လိုꩻခေါင်းဆောင်ဖုံႏတွမ်ႏ လိုꩻတန်ဖုံႏ။ 9ပွိုင်းဝွို့တွမ်ႏ ကမာꩻလဲဉ်း ထာꩻဟဝ်မျတ် လိုꩻမာႏရေႏခရာႏတွော့ꩻ ဝွေꩻဟဝ်ရေꩻ နုဲင်းမုဲင်ꩻခရာႏနဝ်ꩻ ဟန်ႏနီꩻယို နီအဝ်ႏခံႏဗာႏလဲဉ်း အရီစဲစ်သွူ။ 10နဝ်ꩻထွူ စွဉ်ႏနာဇရဲစ်ဝေင်ꩻသား ဗွေႏယေသျု ခရစ်တောႏ အမဉ်နာႏမ တန်ꩻခိုꩻနဝ်ꩻ ပါꩻခို ကအဝ်ႏအုံထွိုင်ႏထာꩻ သီဆꩻငါယိုနဝ်ꩻ ဟဝ်ရေꩻလဲဉ်းတဲင် ဣသရေး လိုꩻမျိုꩻဖုံႏ ကားကအဝ်ႏ ထွိုက်သေသွူ၊ ပါꩻသီကမာꩻသီဒါႏ ကင်းထွန်ႏလောင်းနဝ်ꩻ အဝ်ႏထာꩻသီကို ဗွေႏဘုရာꩻ မာꩻထွိုင်ႏမွန်လဲဉ်း ဝွေꩻဗွေႏနဝ်ꩻသွူ။ 11#သာ ၁၁၈:၂၂။ ဗွေႏယေသျုနဝ်ꩻ ထွာဗွေႏအပါꩻ လိတ်ကျမ်ꩻကိုကရိုꩻဒါႏ၊
‘သီလမ်းမာꩻသားဖုံႏ ကပယ်ႏထိုꩻဒါႏ လုံးတူႏနဝ်ꩻ၊
ထွာခွိုန်ꩻချာယင်း ကားကအဝ်ႏအကို အရေꩻတန်သွတ်ꩻ’ နုဲင်းနဝ်ꩻသွူ။
12ထာꩻကယ်ႏတင်ႏနဝ်ꩻ အီႏလꩻအီဒျာႏစွဉ်ႏ ဝွေꩻဗွေႏ တပါꩻလွုမ်ꩻသွူ။ ဟံႏတန်လောင်းကိုယို ကားကအဝ်ႏ ဗွေႏဘုရာꩻ ကကယ်ႏအီဒါႏနီနဝ်ꩻ အလင် တဖြာꩻဖြာꩻအဲဉ်ထဝ်း၊” နုဲင်းနဝ်ꩻသွူ။
13ပေတရုတွမ်ႏ ယောဟန်နဝ်ꩻ လိုꩻဒါႏပညာႏသား တမွေးတဝ်း၊ လိုꩻရိုꩻရိုꩻသာꩻသာꩻဒျာႏတွော့ꩻ ရုဲင်းငါႏကျောင်ꩻ တရာꩻလွတ်တောႏ ကောင်စီ စွုမ်ꩻစွိုꩻသားဖုံႏ ထွိုင်ႏထီႏနဝ်ꩻ အံႏဖြာႏမွေးငါႏသွူ။ ဝွေꩻသီးဝင်ꩻနီယို အဝ်ႏပါငီꩻ ဗွေႏယေသျုအစွိုꩻနဝ်ꩻ တွိုႏနဝ်ꩻမꩻ ဝွေꩻသီး တောင်ꩻချာယင်းသွူ။ 14ကွဲႏတွော့ꩻ ပွိုးပါꩻခို ကဟဝ်ရေꩻလဲဉ်းနဝ်ꩻ အဝ်ႏအုံထွိုင်ႏငီꩻလဲဉ်း ပေတရုတွမ်ႏ ယောဟန် နဝ်ꩻမꩻ နဝ်ꩻကိုနဝ်ꩻ ဝွေꩻသီး ဒေါ့ꩻနွောင်ꩻတဝ်းဒွုမ် တမုဲင်ꩻမုဲင်ꩻသွူ။ 15နဝ်ꩻမꩻ တမန်ႏတောႏဖုံႏ ဖေႏကထန်ႏထိုꩻ ကောင်စီရွုမ်ꩻကိုနဝ်ꩻ ဒေါ့ꩻဖေႏဝွေꩻသီးတဲင်၊ ဝွေꩻသီးကို အချင်ꩻချင်ꩻ စတဲင် တွိုင်ႏပင်ႏ အုံကွံ လို့စွဉ်ႏဝင်ꩻနဝ်ꩻသွူ။ 16ဝွေꩻသီးရီ၊ “လိုꩻစားယိုဖုံႏနဝ်ꩻ နီအီႏမာꩻဗာႏ နုဲင်းမုဲင်ꩻဟောင်း။ တွမ်ႏဝွေꩻသီး ကမာꩻနယ်ဒါႏ ထာꩻထူꩻဆန်ꩻ နိမိတ်လက္ခဏာႏ ကထွာလွဉ်ယိုနဝ်ꩻ လိုꩻဝေင်ꩻ ယေရုသလမ်ႏကိုသား စွုမ်ႏဖြာꩻ အဝ်ႏသေတဲင် နီထေင်ဆန် တလꩻတဝ်းဒွုမ်သွူ။ 17ကွဲႏတွော့ꩻ စွဉ်ႏဗွေႏယေသျု အမဉ်ꩻတောႏ နာႏမတွော့ꩻ မုဲင်ꩻခါတဲ့ ဖေႏကဒေါ့ꩻဖျင် ထဲင်းမွိုန်းဒွုမ်နဝ်ꩻ နီအွဉ်ဝင်ꩻ ဖေႏသတိꩻတွမ် လိုꩻစားယိုဖုံႏ၊ ကိစ္စယို ဖေႏကစွစ်ꩻလီ ထဲင်းမွိုန်းဒွုမ် လိုꩻဖုံႏကိုနဝ်ꩻ အဝ်ႏလိုႏထိန်ꩻ” နုဲင်းနဝ်ꩻသွူ။
18နဝ်ꩻမꩻ ထွာစွဉ်ႏ နုဲင်းမုဲင်ꩻတယဝ်း စွဉ်ႏဗွေႏယေသျု အမဉ်ꩻတောႏ နာႏမနဝ်ꩻ ဖေႏဝွေꩻသီး ကဒေါ့ꩻထဲင်းမွိုန်းဒွုမ်၊ မဉ်ႏတမွေးတဝ်း ဖေႏကသွဉ်သင်ထဲင်း မွိုန်းဒွုမ်နဝ်ꩻ ဝွေꩻသီး ဟဲ့ꩻနွို့သော့ꩻချာ တမန်ႏတောႏဖုံႏတဲင် ဒေါ့ꩻဖေႏစွဉ်ႏ ဝွေꩻသီးသွူ။ 19ကွဲႏတွော့ꩻ ပေတရုတွမ်ႏ ယောဟန် လဝ်းချာ ဝွေꩻသီး၊ “အီႏလွောက်ꩻနာႏဗာႏ သီငဝ်းနဲ့ မဉ်ႏတမွေးတဝ်း အီႏလွောက်ꩻနာႏဗာႏ ဗွေႏဘုရာꩻ အငဝ်းနဲ့၊ ဗွေႏဘုရာꩻဆꩻငါ အစွိုးမုဲင်ꩻမဲဉ်ႏနဝ်ꩻ သီနမ်း စီႏရင်ႏဆွုံꩻဖျတ် ချာသွော့။ 20ကအဝ်ႏဒေါ့ꩻဗာႏဒါႏ နုဲင်းနီနမ်း ကထီႏလဲဉ်းတွမ်ႏ ကဟွိုန်လဲဉ်းဖုံႏနဝ်ꩻ နီတအွဉ်ႏဆွိုးနွောင်ꩻတဝ်း” နုဲင်းနဝ်ꩻသွူ။ 21နဝ်ꩻမꩻ ကောင်စီစွိုꩻဖုံႏ ဖေႏသတိခြေင်း ထဲင်းယင်း ဝွေꩻသီးတဲင် အွဉ်ႏစွလွစ်ထိုꩻ ဝွေꩻသီးသွူ။ ပွိုးတွော့ꩻ နုဲင်းထာꩻကထွာလဲဉ်းဖုံႏနဝ်ꩻ လိုꩻဖုံႏအဝ်ႏ အုပ်ꩻဗွေႏဘုရာꩻ ဂွုဏ်ႏတောႏအတွက် ကအီႏဖေႏတံႏ တမန်ႏတောႏဖုံႏနဝ်ꩻ တထွာနွောင်ꩻတဝ်းကျောင်ꩻ ဝွေꩻသီးထီႏဗာႏနဝ်ꩻသွူ။ 22တွမ်ႏနိမိတ်လက္ခဏာႏ ကလုမ်ꩻလာꩻ မာꩻဟဝ်ရေꩻလဲဉ်းဒါႏ ပါꩻခိုယိုနဝ်ꩻ သက်လꩻလဲဉ်း လစ်ꩻဆီလွိုနဝ်ꩻသွူ။
ဖေႏကရုဲင်းတာႏလိုꩻယွုမ်းသားဖုံႏဆုတောင်ꩻ
23ပေတရုတွမ်ႏ ယောဟန် သဲစ်ကလွစ်ထန်ႏထွူ တလဲင်ႏချင်ꩻ ဝွေꩻသီး သဲင်ꩻထေ့ချာစွဉ်ႏ ဝွေꩻသီး အစွိုꩻထျꩻတဲင် နုဲင်းယဇ်ပရောဟိတ် တန်ဖုံႏတွမ်ႏ လိုꩻတန်ဖုံႏ ကဒေါ့ꩻလဲဉ်းနဝ်ꩻ ဒေါ့ꩻနယ်ဖေႏစွဉ်ႏ ဝွေꩻသီးသွူ။ 24#ထလ ၂၀:၁၁၊ နေ ၉:၆၊ သာ ၁၄၆:၆။ လိုꩻယွုမ်းသားဖုံႏ ထွိုင်ႏဟွိုန် နုဲင်းယိုချိန်ႏ ဝွေꩻသီး ကားကအဝ်ႏ စုဗူႏငီꩻ လို့စွဉ်ႏဝင်ꩻတွော့ꩻ ဆုတောင်ꩻထေ့ ဗွေႏဘုရာꩻ၊ “ဖန်ဆင်ꩻ မာꩻထွာလွဉ်ဒါႏ မို့ꩻ၊ ဟံႏတန်၊ ပင်ႏလယ်ႏစွဉ်ႏ နဝ်ꩻဖုံႏကို ကားကအဝ်ႏ အဗွေႏ၊ 25#သာ ၂:၁၊ ၂ (LXX)။ စွဉ်ႏကြောင်းစင် ဝိညာဉ်ႏတောႏ နီဗွေႏ ကဒေါ့ꩻအီစွဉ်ႏ နီဗွေႏအသွဉ်း နီဖါဖြား ဒါဝိဒ် ဝွေꩻကဒေါ့ꩻထန်ႏ၊
‘ပွိုးတမုဲင်ꩻ လိုꩻမျိုꩻလင်ဖုံႏ ဒေါသထန်ႏ သꩻလျားဗာႏတွိုႏထာꩻ။
ပွိုးတမုဲင်ꩻ လိုꩻဖုံႏယို အကျိုꩻတအဲဉ်ထဝ်းနဝ်ꩻ ဝွေꩻသီး ကျံႏတေ့ꩻ ဗာႏတွိုႏထာꩻဟောင်း။
26ဟံႏတန်လောင်း ခွန်တန်ဖုံႏနဝ်ꩻ အဝ်ႏဖျင်ရဲဉ်ꩻသေꩻမꩻ ဝွေꩻသီး နမ်းတာႏတဲင်၊
ကအီႏဆန်ချာ ဝွေꩻဗွေႏတွမ်ႏ ဝွေꩻဗွေႏ မေသျိယနဝ်ꩻ
အာႏဏာႏပဲင်ႏသားဖုံႏ မော့ꩻခွဲစုဗူႏလို့ဝင်ꩻ’ နုဲင်းနဝ်ꩻသွူ။
27 #
လု ၂၃:၇–၁၁၊
မ ၂၇:၁၊ ၂၊ မာ ၁၅:၁၊ လု ၂၃:၁၊ ယော ၁၈:၂၈၊ ၂၉။ ဟေရုဒ်ခွန်တွမ်ႏ ပုန္တိပိလတ်ခွန် တွမ်ႏလိုꩻမျိုꩻလင်ဖုံႏစွဉ်ႏ ဣသရေး လိုꩻမျိုꩻဖုံႏနဝ်ꩻ ကအီႏဆန်ချာ ဗွေႏယေသျု၊ နီဗွေႏအသွဉ်း ကြောင်းစင် စွဉ်ႏနီဗွေႏ ကမာꩻထွာဒါႏ မေသျိယနဝ်ꩻ မော့ꩻခွဲစုဗူႏလို့စွဉ်ႏဝင်ꩻ ဝေင်ꩻကိုယိုသွူ။ 28ဝွေꩻသီး ကစုဗူႏလို့ဗာႏဝင်ꩻနဝ်ꩻ စွဉ်ႏနီဗွေႏအတန်ꩻခိုꩻ စွဉ်ႏနီဗွေႏ အလိုႏတောႏအလꩻ ကဆွုံꩻဖျတ်ခါꩻလဲဉ်း ထာꩻကားကအဝ်ႏနဝ်ꩻ အီႏထွာဗာႏနဝ်ꩻသွူ။ 29ဝွေꩻသီး ကအဝ်ႏဒိုႏဒါႏထာꩻနဝ်ꩻ ယိုခါ ဗွေႏဘုရာꩻ ထူႏရေꩻဗဲင်းတွော့ꩻ ၊ နီဗွေႏ အသွဉ်းဖုံႏ ဖေႏကဒေါ့ꩻဟော်ꩻရုဲင်း နီဗွေႏတရာꩻနဝ်ꩻ ဖေႏနီအခွင်ꩻမွိုင်။ 30ဖေႏကလုမ်ꩻလာꩻဟဝ်နဝ်ꩻ ယောင်းထန်ႏ နီဗွေႏစူတောႏတဲင် စွဉ်ႏနီဗွေႏသွဉ်း ကြောင်းစင် ဗွေႏယေသျု အမဉ်ꩻတောႏ နာႏမနဝ်ꩻ ယံဖေႏ ကမာꩻနယ်နွောင်ꩻ ထာꩻအံႏဖြာႏခရာႏစွဉ်ႏ နိမိတ်လက္ခဏာႏမွိုင်” နုဲင်းနဝ်ꩻသွူ။
31ဝွေꩻသီး ထွိုင်ႏဆုတောင်ꩻထွူချိန်ႏ၊ ခင်ႏလမ်း ဝွေꩻသီး ကအဝ်ႏမော့ꩻခွဲ အုံကွံလို့ဒါႏဝင်ꩻကိုနဝ်ꩻ တသွိုးစွဉ်ႏနဝ်ꩻသွူ။ ဝွေꩻသီး ကားကအဝ်ႏနဝ်ꩻ အဝ်ႏဗွေစွဉ်ႏ ကြောင်းစင် ဝိညာဉ်ႏတောႏတဲင် စွဉ်ႏထာꩻသꩻရုဲင်း ဟော်ꩻကေႏညာႏစစွဉ်ႏ ဗွေႏဘုရာꩻအတရာꩻ” နဝ်ꩻသွူ။
လိုꩻယွုမ်းသားဖုံႏဝွေꩻသီးထာꩻခြိုꩻဖုံႏနဝ်ꩻဖဖေႏလို့ဝင်ꩻ
32 #
တ ၂:၄၄၊ ၄၅။ လိုꩻကယွုမ်းသားစွိုꩻနဝ်ꩻ သွိုန်ႏသꩻသဘော်ꩻ အဝ်ႏတဖြုံႏချင်ႏသွူ။ ဝွေꩻသီးနမ်း ကပဲင်ႏဒါႏ ထာꩻခြိုꩻနဝ်ꩻ ပါꩻမုဲင်ꩻတဖြာꩻတဲ့ တဒေါ့ꩻတဝ်း အထာꩻခြိုꩻ၊ ကွဲႏတွော့ꩻ ဝွေꩻသီး ကအဝ်ႏဒါႏ ထာꩻခြိုꩻဖုံႏ ကားကအဝ်ႏနဝ်ꩻ ဝွေꩻသီး တဖြာꩻတွမ်ႏတဖြာꩻ ဖဖေႏလို့စွဉ်ႏဝင်ꩻသွူ။ 33ဗွေႏယေသျု အဝ်ႏထာꩻသီ ထွိုင်ႏမွန်လဲဉ်းနဝ်ꩻ တမန်ႏတောႏဖုံႏ စွဉ်ႏကတန်မျတ်ငါႏ တန်ꩻခိုꩻဖုံႏနဝ်ꩻ ခံႏစွဉ်ႏသက်သေႏတဲင် ဝွေꩻသီး ကားကအဝ်ႏလောင်းနဝ်ꩻ ဗွေႏဘုရာꩻ ထောက်ꩻလင်ꩻအာ ဖေႏမွေးနေးစွဉ်ႏ မင်္ဂလာႏဖုံႏသွူ။ 34လိုꩻကပဲင်ႏဒါႏ လုဲင်းခြံသားဖုံႏ တဲ့နဝ်ꩻ တမွိုးဖါပိုစွိုꩻဖုံႏ တဲ့နဝ်ꩻ စာထိုꩻတွော့ꩻ ကလꩻဒါႏ ရွဉ်ဖုံႏနဝ်ꩻ အီလွဉ်တဲင်၊ 35ရွဉ်ဖုံႏနဝ်ꩻ အပ်ဖေႏ တမန်ႏတောႏဖုံႏတွော့ꩻ ရွဉ်နဝ်ꩻနဝ်ꩻ လိုꩻ ကအဝ်ႏလိုႏဒါႏ အတွိုင်ꩻ ဖန်းဝေႏဖေႏစွဉ်ႏ အစွိုꩻကိုတဲင် လိုꩻကအဝ်ႏလိုႏဒါႏသား တဖြာꩻဖြာꩻ အဲဉ်ထဝ်းဒွုမ်သွူ။
36နဝ်ꩻမꩻ လေဝိစွိုးခွိုꩻ ကလွူးလွဉ်သော့ꩻ သုဲင်းပရတ်ခမ်းကို ယောသပ် အဝ်ႏတဖြာꩻ၊ တမန်ႏတောႏဖုံႏ ကဟဲ့ꩻဒါႏ ဗာနဗ (အဓိပ္ပါယ်ႏနဝ်ꩻ “ပါꩻစွဲကိုဖေႏသား တဖြာꩻ”) နဝ်ꩻ၊ 37ဝွေꩻကပဲင်ႏဒါႏ လုဲင်းတဟိုႏနဝ်ꩻ စာထိုꩻတဲင် ရွဉ်နဝ်ꩻအီလွဉ် အပ်ဖေႏစွဉ်ႏ တမန်ႏတောႏဖုံႏ စူကိုနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 4: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
