တမန်ႏတောႏ 3
3
လုမ်ꩻလာꩻမာꩻဟဝ်ဖေႏလိုꩻဆာမာႏရေႏတဖြာꩻ
1တနီꩻသား မွူးပင်ꩻလင်ꩻ သွံနားရီး ဆုတောင်ꩻ ဘုရာꩻချိန်ႏနဝ်ꩻ ပေတရုတွမ်ႏ ယောဟန် ထန်ႏလွေꩻ ဗိမာန်ႏတောႏကျောင်ꩻသွူ။ 2နဝ်ꩻကို ကဟဲ့ꩻဒါႏ တင်ႏတယ်ႏ တခါꩻတန်ထျꩻနဝ်ꩻ ပါꩻတဖြာꩻ ဝွေꩻဘဝ တစိုးလွုမ်း အဝ်ႏဆာမာႏရေႏ ထာꩻနဝ်ꩻသွူ။ စွုမ်ႏနီꩻနီꩻ ဝွေꩻနဝ်ꩻ ဝင်ꩻထမ်ႏလွဉ် တခါꩻတန်ထျꩻ ဖေႏကကွီရွဉ် လိုꩻဖုံႏ ကအဝ်ႏနွို့လွေꩻသော့ꩻဒါႏ ကျောင်ꩻဗိမာန်ႏ ကိုသားဖုံႏထျꩻနဝ်ꩻသွူ။ 3ဝွေꩻထွိုင်ႏထီႏ ပေတရုတွမ်ႏ ယောဟန် အဝ်ႏနွို့လွေꩻသော့ꩻနဝ်ꩻ ဝွေꩻကွီဝွေꩻသီး ဖေႏကဖေႏဝွေꩻ ရွဉ်ယင်ဟန်ႏသွူ။ 4ဝွေꩻသီး ထွားစွို့ꩻလွေꩻ ဝွေꩻတဲင် ပေတရုဒေါ့ꩻ၊ “ထွားလွဉ်နီယိုဟုဲင်း” နုဲင်းနဝ်ꩻသွူ။ 5နဝ်ꩻမꩻ ဝွေꩻထွားထေ့ ဝွေꩻသီးတဲင် အဝ်ႏမောင်ꩻ အီႏလꩻ ရွဉ်ယင်ဟန်ႏ ဝွေꩻသီးထျꩻနဝ်ꩻသွူ။ 6ကွဲႏတွော့ꩻ ပေတရုဒေါ့ꩻ၊ “ခွေထျꩻနဝ်ꩻ ကအီႏဖေႏနာꩻ ရွဉ်တမုဲင်ꩻမုဲင်ꩻ အဲဉ်ထဝ်း၊ ကွဲႏတွော့ꩻ နုဲင်းခွေကအဝ်ႏနဝ်ꩻ ခွေအီႏဖေႏနာꩻ။ စွဉ်ႏနာဇရဲစ်ဝေင်ꩻသား ဗွေႏယေသျု ခရစ်တောႏ အမဉ်ꩻနာႏမနဝ်ꩻ ခွေမိန်းဖေႏနာꩻ ထွိုင်ႏတဲင် ထောင်လွေꩻဟုဲင်း” နုဲင်းနဝ်ꩻသွူ၊၊ 7ပေတရု စွဉ်ႏဝွေꩻစူအပင်ထွေဖဲ့ꩻနဝ်ꩻ ထွို့ꩻထွိုင်ႏ စွဲကိုစွဉ်ႏ ဝွေꩻနဝ်ꩻသွူ။ တလဲင်ႏချင်ꩻ ပါꩻခိုခင်ႏတွမ်ႏ ခင်ႏတူႏဖုံႏနဝ်ꩻ အာႏတလာလွဉ်စွဉ်ႏသွူ။ 8ဝွေꩻပကျောက်ꩻ၊ အုံထွိုင်ႏစွဉ်ႏတဲင် ထောင်လွေꩻခူဝစ် စစွဉ်ႏထာꩻနဝ်ꩻသွူ။ နဝ်ꩻထွူ တွမ်ႏဝွေꩻသီးနဝ်ꩻ ဝွေꩻနွို့လွေꩻစွဉ်ႏ ဗိမာန်ႏတောႏ ကျောင်ꩻကိုတဲင် ပကျောက်ꩻလွေꩻနေးတွော့ꩻ အုပ်ꩻထင်ႏစွဉ်ႏ ဗွေႏဘုရာꩻ ဂွုဏ်ႏတောႏနဝ်ꩻသွူ။ 9လိုꩻနဝ်ꩻကိုနဝ်ꩻ ထီႏဗာႏဝွေꩻ အဝ်ႏထောင်လွေꩻထာꩻတွော့ꩻ အဝ်ႏအုပ်ꩻ ဗွေႏဘုရာꩻ ဂွုဏ်ႏတောႏတဲင်၊ 10နုဲင်းကအဝ်ႏအုံလင်ꩻ ကွီအံႏထာꩻ တင်ႏတယ်ႏ တခါꩻတန်ထျꩻနဝ်ꩻ ဝွေꩻသီး တောင်ꩻစွဉ်ႏဝွေꩻတဲင် နုဲင်းဝွေꩻကအဝ်ႏထွာလွဉ် ထာꩻဖုံႏနဝ်ꩻ ဝွေꩻသီး ကားကအဝ်ႏ အံႏဖြာႏငါႏသွူ။
ပေတရုဟော်ꩻတရာꩻဗိမာန်ႏတောႏ ကျောင်ꩻကို
11နုဲင်းပါꩻခို ကဟဝ်ရေꩻလဲဉ်း အဝ်ႏလွေꩻလွဉ်ꩻ ပေတရုတွမ်ႏ ယောဟန် အဝ်ႏသော့ꩻ ခင်ႏလမ်းကဟဲ့ꩻ သောလမုန် တခါꩻမုခ်နဝ်ꩻ ပွိုးလိုꩻဖုံႏ အံႏဖြာႏငါႏတဲင် ဖင်းထေ့စွဉ်ႏ ဝွေꩻသီးထျꩻသွူ။ 12ပေတရု ထွိုင်ႏထီႏ လိုꩻဖုံႏနဝ်ꩻ ဝွေꩻဒေါ့ꩻဖေႏဝွေꩻသီး၊ “သွꩻဣသရေး လိုꩻမျိုꩻဖုံႏ၊ ပွိုးတမုဲင်ꩻ သီအံႏဖြာႏဗာႏတွိုႏ ထာꩻယိုတဲင် ပွိုးတမုဲင်ꩻ သီထွားစဲင်းဗာႏတွိုႏနီ နုဲင်းမုဲင်ꩻဟောင်း။ သီထင်းဒျာႏ ကထွာထာꩻ နုဲင်းနဝ်ꩻနဝ်ꩻ စွဉ်ႏနီနမ်းတန်ꩻခိုꩻ မဉ်ႏတမွေးတဝ်း စွဉ်ႏနီအကျင်ꩻ တရာꩻဟဝ်တွော့ꩻ မာꩻဖေႏ ပါꩻခိုယို ကထောင်လွေꩻ ထာꩻနဲ့ဟောင်း။ 13အဗြာဟံ ဗွေႏဘုရာꩻ၊ ဣသဲစ်တွမ်ႏ ယာကုပ် နီမွိုးဖြား ဖါဖြားသီးဖုံႏ အဗွေႏဘုရာꩻနဝ်ꩻ အဝ်ႏဖေႏ ဝွေꩻဗွေႏအသွဉ်း ဗွေႏယေသျု ဘွုန်ꩻသရေႏတောႏသွူ။ ကွဲႏတွော့ꩻ သီဆွမ်ꩻ အပ်ဖေႏထိုꩻ အာႏဏာႏပဲင်ႏသားဖုံႏ စူကိုတဲင် ခွန်ပိလတ်ဆꩻငါနဝ်ꩻ ခွန်ပိလတ် လဲင်ꩻဆွုံꩻဖျတ်လဲဉ်း အီႏအွဉ်ႏစွꩻလွစ်ဖေႏ ဝွေꩻဗွေႏစွဉ်ႏတဲ့ သီပယ်ႏထိုꩻ ဝွေꩻဗွေႏသွူ။ 14ဝွေꩻဗွေႏနဝ်ꩻ ကြောင်းစင်တွော့ꩻ ဟဝ်မျတ်စွဉ်ႏတဲ့ သီပယ်ႏထိုꩻ ဝွေꩻဗွေႏတဲင် ကမာꩻဖေႏသီတာႏ ဖေႏကအွဉ်ႏစွꩻလွစ် ထိုꩻတောဒျာႏ လိုꩻတဖြာꩻ ကမာꩻသီဒါႏလိုꩻနဝ်ꩻ ဖေႏသေရေꩻတွော့ꩻ သီကွီ တောဒျာႏ ခွန်ပိလတ်နဝ်ꩻသွူ။ 15ဗွေႏအပါꩻ ကအွဉ်လွေꩻဖေႏဒါႏ အသက်မွန်နဝ်ꩻ သီမာꩻသီထိုꩻဒျာႏ၊ ကွဲႏတွော့ꩻ အဝ်ႏထာꩻသီကို ဗွေႏဘုရာꩻနဝ်ꩻ မာꩻထွိုင်ႏမွန် ဝွေꩻဗွေႏတဲင် ယိုနဝ်ꩻနီ အဝ်ႏခံႏဖေႏ သက်သေႏသွူ။ 16ကဖေႏဒါႏ ပါꩻခိုမာႏရေႏယို အာႏရဲင်ꩻနဝ်ꩻ ထွာဒျာႏ ဝွေꩻဗွေႏ အမဉ်ꩻတောႏ နာႏမ တန်ꩻခိုꩻသွူ။ စွဉ်ႏကယွုမ်းဒါႏ ဝွေꩻဗွေႏ အမဉ်ꩻတောႏ နာႏမတဲင် ထွာထာꩻ နုဲင်းသီကထီႏဗာႏတွမ်ႏ ကသေဗာႏနဝ်ꩻသွူ။ ကမာꩻဟဝ် မာꩻရေꩻဖေႏဝွေꩻ နုဲင်းသီကထီႏဒါႏဖုံႏ ကားကအဝ်ႏနဝ်ꩻနဝ်ꩻ ပွိုးယွုမ်း ဗွေႏယေသျုနဝ်ꩻသွူ။
17“ခွေသွꩻဖုံႏ၊ ယိုခါ နုဲင်းသီတွမ်ႏ သီခေါင်းဆောင်ဖုံႏ ကမာꩻလဲဉ်း ဗွေႏယေသျုနဝ်ꩻ သီတသေတဝ်းတွော့ꩻ မာꩻဒျာႏကျောင်ꩻ ခွေအဝ်ႏသေသွူ။ 18ဝွေꩻဗွေႏ မေသျိယ အီႏခံႏဗာႏ ထာꩻဒုက္ခကျောင်ꩻ စွဉ်ႏပရောဖဲစ်ဖုံႏ ကားကအဝ်ႏနဝ်ꩻ ဗွေႏဘုရာꩻ ကေႏညာႏခါꩻ ညငါႏလဲဉ်းသွူ။ တဲင်ဝွေꩻဗွေႏ မာꩻဗွေမဲဉ်ႏလွဉ်ꩻစွဉ်ႏ အနယ်ꩻနုဲင်းယိုသွူ။ 19နဝ်ꩻထွူ လꩻချာသွော့ ထာꩻကော့ꩻမာႏတဲင် ဖေႏနေး ဝွေꩻဗွေႏ ကအွဉ်ႏစွꩻလွစ်ဖေႏ သီအပဲစ်ဖုံႏနဝ်ꩻ ခွယ်သဲင်ꩻထေ့ချာသွော့ ဗွေႏဘုရာꩻထျꩻဟုဲင်း။ 20သီမဉ်ႏခွယ်ထေ့နဝ်ꩻ ဝိညာဉ်ႏအာႏအဝ်ႏ ဗွေႏထျꩻ အီႏကျွꩻလွဉ်ချိန်ႏ ဖျော်လွဉ်တွော့ꩻ သီတာႏ ဝွေꩻဗွေႏနဝ်ꩻ အဝ်ႏလွိုက်ခါꩻလဲဉ်း မေသျိယ ဗွေႏယေသျုနဝ်ꩻ ဝွေꩻဗွေႏ အီႏအွဉ်ႏစွꩻလွဉ်နဝ်ꩻသွူ။ 21နုဲင်းဗွေႏဘုရာꩻ ကကေႏညာႏခါꩻလဲဉ်း စွဉ်ႏဝွေꩻဗွေႏ ကကြောင်းစင်ငါႏ ပရောဖဲစ်ဖုံႏ စခါအတွိုင်ꩻ ဗꩻတွိုႏစွဉ်ႏ ကမာꩻတသာလို့ထာꩻ ကားကအဝ်ႏ အချိန်ႏ ကအီႏတွိုႏလွဉ်နဝ်ꩻ ဝွေꩻဗွေႏ အဝ်ႏသော့ꩻစွူစွူဒျာႏ မို့ꩻလောင်းကိုသွူ။ 22ပွိုးမောသျေဒေါ့ꩻ၊ ‘ဗွိုန်နုဲင်းဝွေꩻဗွေႏ ကအွဉ်ႏစွꩻလွဉ် ခွေအတွိုင်ꩻ ထာဝရဘုရာꩻ သီဗွေႏဘုရာꩻ နဝ်ꩻ အီႏအွဉ်ႏစွꩻလွဉ်ဖေႏသီ ပရောဖဲစ် တပါꩻတဲင် ဝွေꩻဗွေႏနဝ်ꩻ အီႏထွာ သီလိုꩻမျိုꩻတဖြာꩻနဝ်ꩻသွူ။ ဖေႏကမာꩻနုဲင်း ဝွေꩻဗွေႏ ကဒေါ့ꩻနယ် သီနဝ်ꩻ သီအီႏလွောက်ꩻနာႏ မာꩻလွဉ်ꩻလို့ဗာႏသွူ။ 23ပါꩻမုဲင်ꩻတဖြာꩻ မဉ်ႏတလွောက်ꩻနာႏတဝ်း ပရောဖဲစ်အငဝ်းနဝ်ꩻ အဝ်ႏဗွေႏဘုရာꩻ အလိုꩻဖုံႏကို အီႏဖထန်ႏထိုꩻတဲင် အီႏခံႏဗာႏ ယားကုဲင်ထိုꩻ’နုဲင်းနဝ်ꩻသွူ။ 24ပရောဖဲစ်ဖုံႏ ကားကအဝ်ႏ ငဝ်းသတင်ꩻ တစွိုး ပါစွဉ်ႏ သျာမွေလ တွမ်ႏလိုꩻကကျွꩻလွဉ် ဝွေꩻဗွေႏ ဆꩻချာသားဖုံႏနဝ်ꩻတဲ့ အဝ်ႏကေႏညာႏပါက နုဲင်းထာꩻကအဝ်ႏထွာလွဉ်ဒါႏ အနီꩻယိုဖုံႏ ခရာႏနဝ်ꩻသွူ။ 25သီတာႏနဝ်ꩻ ဗွေႏဘုရာꩻ အွဉ်ႏခါꩻ ဂတိ စွဉ်ႏဝွေꩻဗွေႏ ပရောဖဲစ်ဖုံႏတဲင် ဗွေႏဘုရာꩻ ကအွဉ်ႏခါꩻစွဉ်ႏ သီမွိုးဖြား ဖါဖြားသီးဖုံႏ ပဋိညာဉ်ႏနဝ်ꩻ သီလꩻဖသော့ꩻဒျာႏသွူ။ နုဲင်းဝွေꩻဗွေႏ ကဒေါ့ꩻဖေႏဒါႏ အဗြာဟံအတွိုင်ꩻ၊ ‘ဗꩻတွိုႏ နာꩻပိုလီꩻ စွိုးခွိုꩻဖုံႏနဝ်ꩻ ဟံႏတန်လောင်း လိုꩻဖုံႏကားကအဝ်ႏနဝ်ꩻ ခွေအီႏဖေႏ မင်္ဂလာႏ’ နုဲင်းနဝ်ꩻသွူ။ 26နဝ်ꩻမꩻ စွဉ်ႏသီကအဝ်ႏမာꩻဒါႏ ထာꩻမွိုက်ကုဲင် အနယ်ꩻဖုံႏနဝ်ꩻ စွဉ်ꩻထိုꩻတွော့ꩻ ဖေႏနေးသီကလꩻ မင်္ဂလာႏနဝ်ꩻ ဗွေႏဘုရာꩻလွိုက် ဝွေꩻဗွေႏသွဉ်းတဲင် အသွဉ်းနဝ်ꩻနဝ်ꩻ အွဉ်ႏစွꩻလွဉ်ထေ့ရီး သီထျꩻ” နုဲင်းနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 3: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
