တမန်ႏတောႏ 20
20
လွေꩻမာကေဒေါနိခမ်းတွမ်ႏအခါယခမ်း
1ရောင်သျွုတ်တရေင်ထာꩻ ထွိုင်ႏငိမ်ꩻချမ်ꩻထွူ ပေါလုဟဲ့ꩻစုဗူႏ လိုꩻယွုမ်းသားဖုံႏတဲင် စွဉ်ႏငဝ်းတမာဖေႏအာႏ ဒေါ့ꩻနုတ်ဆက် ဝွေꩻသီးသွူ။ နဝ်ꩻထွူ ဝွေꩻထန်ႏတဲင် လွေꩻထိုꩻ မာကေဒေါနိခမ်းနဝ်ꩻသွူ။ 2ဝွေꩻဖျတ်ကာႏလွေꩻ နယ်ႏနဝ်ꩻကိုဖုံႏတဲင် စွဉ်ႏတရာꩻငဝ်းဖုံႏနဝ်ꩻ တမာဖေႏအာႏ လိုꩻဖုံႏသွူ။ နဝ်ꩻထွူ ဝွေꩻဖျော်လွဉ်သော့ꩻ အခါယခမ်းနဝ်ꩻသွူ။ 3နဝ်ꩻကိုနဝ်ꩻ ဝွေꩻအုံည သွံလာနဝ်ꩻသွူ။ အီႏလွေꩻ သီးရီးယားခမ်း ဝွေꩻအဝ်ႏဖျင်ရဲဉ်ꩻချိန်ႏ ဂျူးလိုꩻမျိုꩻဖုံႏ ကအဝ်ႏနဝ်ꩻကို ကျံႏမာꩻသီ တေ့ꩻထိုꩻဝွေꩻကျောင်ꩻ ဝွေꩻအဝ်ႏသေ၊ နဝ်ꩻမ အီႏဖျတ်ကာႏသဲင်ꩻ မာကေဒေါနိ ခမ်းဖဲ့ꩻနဝ်ꩻ ဝွေꩻဆွုံꩻဖျတ်စွဉ်ႏသွူ။ 4ဝေင်ꩻဗေရိသား ပုရုပိုခို ကထွာ သောပတရုနဝ်ꩻ အဝ်ႏလွေꩻငီꩻ စွဉ်ႏဝွေꩻသွူ။ နဝ်ꩻမꩻ ဝေင်ꩻသက်သာလောနိတ်သားဖုံႏ ကထွာ အာရိတ္တာခုစွဉ်ႏ သေကုန်ဒု၊ ကထွာ ဝေင်ꩻဒေရဗေသား ဂါယု၊ အာသျခမ်းသား ကထွာတုခိတ်စွဉ်ႏ တရောဖိမ်သီး တွမ်ႏတိမောတေ နဝ်ꩻတဲ့ အဝ်ႏလွေꩻလွဉ်ꩻ တွမ်ႏဝွေꩻသွူ။ 5ဝွေꩻသီး လွေꩻရီးတွော့ꩻ အုံပွေါးနီ ဝေင်ꩻတရော်ꩻကိုသွူ။ 6ပွယ်ꩻအံႏတခိုးတမီႏ တပါတဝ်းထွူ နီအဝ်ႏဝေင်ꩻဖိလိပ္ပိ ဖြုဲင်ꩻလွေꩻသင်္ဘောꩻ ထွိုင်ႏည ငတ်ꩻနီꩻထွူ နီပေါင်ꩻငီꩻစွဉ်ႏ ဝွေꩻသီး ဝေင်ꩻတရော်ꩻကိုတွော့ꩻ နီအုံနဝ်ꩻကို တပတ်သွူ။
ပေါလုလွေꩻလယ်ႏဝေင်ꩻတရော်ꩻအဆုဲင်ꩻသွတ်ꩻလဲင်ႏ
7စနေႏနီꩻ မွူးဟာခိုႏ အီႏအံႏ ဖဉ်းမွိုတ်မာꩻသွꩻ ထာꩻအံႏပွယ်ꩻနဝ်ꩻ နီစုဗူႏလို့ဝင်ꩻသွူ။ တွိုႏနုဲင်း မွူးရဝ်ꩻနီꩻ ပေါလု အီႏထန်ႏလွေꩻထိုꩻ နဝ်ꩻမꩻ ဝွေꩻဒေါ့ꩻဟော်ꩻဖေႏ လိုꩻဖုံႏတဲင် ဒေါ့ꩻသွုပ် ဗꩻတွိုႏစွဉ်ႏ မွူးကွို့ꩻနာꩻနဝ်ꩻသွူ။ 8နီကအဝ်ႏအုံကွံသော့ꩻဒါႏ ခင်ႏလမ်း အခန်ꩻကီကိုနဝ်ꩻ တဲစ်ꩻသေꩻ မေႏတေန်ꩻဖုံႏ အာငါႏသွူ။ 9လိုꩻယွဲတဖြာꩻ မဉ်ꩻကဟဲ့ꩻဒါႏ ဥတုခုနဝ်ꩻ အဝ်ႏအုံလင်ꩻ တခါꩻပတဲင်ႏပေါက် လောင်းတဲင် နုဲင်းပေါလု ကအဝ်ႏဒေါ့ꩻဟော်ꩻသွုပ်နဝ်ꩻ ဥတုခု အဝ်ႏဗေင်ႏတခေင်ꩻထာꩻတဲင် တခေင်ꩻထာꩻနဝ်ꩻ အဆုဲင်ꩻသွတ်ꩻ တွိုႏစွဉ်ႏ ဝွေꩻဗေင်ႏအွီႏထိုꩻတွော့ꩻ အဝ်ႏလမ်းသွံရန်ႏကိုနဝ်ꩻ ထဲ့လင်ꩻစွဉ်ႏ ဟံႏလောင်းသွူ၊ ဝွေꩻသီး ထွိုင်ႏယွော့ဝွေꩻချိန်ႏ ဝွေꩻသီထိုꩻလဲဉ်းသွူ။ 10ကွဲႏတွော့ꩻ ပေါလုလင်ꩻတဲင် ဝွေꩻအနမ်းနဝ်ꩻ အွဉ်ႏတခို့လူး ဥတုခုတွော့ꩻ တဖေါ့ခါꩻဝွေꩻနဝ်ꩻသွူ။ ဝွေꩻဒေါ့ꩻ၊ “တွမ်ႏနန်းခီမွိုန်း။ ဝွေꩻအသက် အဝ်ႏမွန်နေကဒွိုန်း” နုဲင်းနဝ်ꩻသွူ။ 11နဝ်ꩻထွူ ဝွေꩻထင်ႏကီချာ လမ်းအထပ်ကီ အဲ့ꩻတခိုးတွော့ꩻ အံႏစွဉ်ႏနဝ်ꩻသွူ။ နဝ်ꩻထွူဒေါ့ꩻဖေႏ ဝွေꩻသီး အချိန်ႏညတန်တဲင် လဲင်ꩻဗꩻတွိုႏစွဉ်ႏ မွူးထန်ႏစတွော့ꩻ ပေါလုထန်ႏထိုꩻ နဝ်ꩻသွူ။ 12ပါꩻခိုဗင်ႏယွဲနဝ်ꩻ သက်အဝ်ႏမွန်ဒျာႏတဲင် ဝွေꩻသီး ဟဲ့ꩻသဲင်ꩻအလမ်းတွော့ꩻ သက်သာႏထိုꩻစွဉ်ႏ နဝ်ꩻသွူ။
အဝ်ႏဝေင်ꩻတရော်ꩻလွေꩻထိုꩻဝေင်ꩻမိလတ်
13နီလွေꩻငါရီး သင်္ဘောꩻထျꩻတွော့ꩻ ထုမ်းလွေꩻ ဝေင်ꩻအာသုတ်၊ နဝ်ꩻကို နီလွေꩻဟဲ့ꩻထင်ႏ ပေါလု သင်္ဘောꩻလောင်းနဝ်ꩻသွူ။ ပွိုးတွော့ꩻ ဝွေꩻအီႏလွေꩻခင်ႏနေးဒျာႏ နဝ်ꩻကို အတွက် ဖေႏကမာꩻနုဲင်းယိုနဝ်ꩻ ဝွေꩻဒေါ့ꩻဖေႏနီသွူ။ 14ဝွေꩻထွိုင်ႏမော့ꩻခွဲနီ ဝေင်ꩻအာသုတ်ကိုနဝ်ꩻ နီဟဲ့ꩻထင်ႏဝွေꩻ သင်္ဘောꩻလောင်းတဲင် လွေꩻထိုꩻစွဉ်ႏ ဝေင်ꩻမိတုလိန်နဝ်ꩻသွူ။ 15နီအဝ်ႏနဝ်ꩻကို စွဉ်ႏသင်္ဘောꩻ ထန်ႏလွေꩻတဲင် ဆုဲင်ꩻတနီꩻနဝ်ꩻ ဖျော်လွဉ် ခိအုကြွန်သွူ။ ဆုဲင်ꩻတနီꩻနဝ်ꩻ နီဖျော်လွဉ် သာမုကြွန်တဲင် ထဲင်းယင်းတနီꩻနဝ်ꩻ နီဖျော်တွိုႏလွေꩻ ဝေင်ꩻမိလဲတ်နဝ်ꩻသွူ။ 16ဖေႏကဖျုန်ꩻကုဲင် ဗာႏမွိုန်း အချိန်ႏ အာသျနယ်ႏကိုနဝ်ꩻ အီႏထုမ်းနေးစွဉ်ႏ သင်္ဘောꩻတဲင် ကာႏလွေꩻစွဉ်ႏ ဝေင်ꩻဧဖဲက်နဝ်ꩻ ပေါလု ဆွုံꩻဖျတ်စွဉ်ႏနဝ်ꩻသွူ။ မဉ်ႏထွာနွောင်ꩻနဝ်ꩻ ခလားပွယ်ꩻ ပဉ်တေကုတ္တေ ဝွေꩻမဉ်ဖျော်မွိုင် ဝေင်ꩻယေရုသလမ်ႏကို နဝ်ꩻသွူ။
ပေါလုဒေါ့ꩻဖေႏဧဖဲက်အသေန်းတောႏလိုꩻတန်ဖုံႏငဝ်းနုတ်ဆက်
17အဝ်ႏဝေင်ꩻမိလဲတ် ပေါလုအွဉ်ႏစွꩻလွေꩻ သတင်ꩻဖေႏသား တဖြာꩻ ဝေင်ꩻဧဖဲက်တွော့ꩻ ထွဉ်ႏအသေန်းတောႏ လိုꩻတန်ဖုံႏ ဖေႏကမော့ꩻခွဲ စွဉ်ႏဝွေꩻနဝ်ꩻသွူ။ 18ဝွေꩻသီး ထွိုင်ႏဖျော်လွဉ်ချိန်ႏ ဝွေꩻဒေါ့ꩻဖေႏဝွေꩻသီး၊ “တယ်ႏစွဉ်ႏ ခွေကဖျော်လွဉ်သော့ꩻ အာသျနယ်ႏကို အရီးသွတ်ꩻနီꩻကာႏ တချိန်ႏလွုမ်း ခွေအဝ်ႏငီꩻဒျာႏ စွဉ်ႏသီနဝ်ꩻ သီအဝ်ႏသေဒျာႏသွူ။ 19ကွပ်ပွိုး ဂျူးလိုꩻမျိုꩻဖုံႏ ယင်ဟန်ႏနဝ်ꩻ အဝ်ႏကျံႏတကုဲင် ခွေအတွက် ခွေကမော့ꩻဒါႏ ထာꩻယပ်ꩻခုဲင်ႏချိန်ႏ၊ တွမ်ႏမဲ့ထီမဲ့နောင် စွဉ်ႏထာꩻယွိုန်းယော သယ်ꩻခံႏ နုဲင်းဗွေႏဘုရာꩻ သွဉ်းအနေႏ ခွေမာꩻဒျာႏ ခွေထာꩻမာꩻသွူ။ 20နုဲင်းခွေကဟော်ꩻဒါႏ တရာꩻတွမ်ႏ ကသွဉ်သင်ဒါႏ လိုꩻအမျာꩻကို စွဉ်ႏသီလမ်းဖုံႏကို ကထွာအီဒါႏ သီအကျိုꩻနဝ်ꩻ ခွေတအွဉ်ႏကုဲင်ခါꩻတဝ်း တစွိုးစွိုးနဝ်ꩻ သီအဝ်ႏသေသွူ။ 21ဂျူးလိုꩻမျိုꩻဖုံႏတွမ်ႏ လိုꩻမျိုꩻလင်ဖုံႏ အဝ်ႏဝွေꩻသီး ကမာꩻအပဲစ်နဝ်ꩻ ဝွေꩻသီး ဖေႏကလꩻ ထာꩻကော့ꩻမာႏတွော့ꩻ ကသဲင်ꩻထေ့ချာ ဗွေႏဘုရာꩻထျꩻတဲင် ဖေႏကယွုမ်း နီဗွေႏယေသျုနဝ်ꩻ ခွေတွိုင်ႏတယ်ႏ အဝ်ႏဖေႏသတိꩻသွူ။ 22တဲင်ယိုခါ ခွေလွောက်ꩻနာႏ ကြောင်းစင် ဝိညာဉ်ႏတောႏ ငဝ်းတွော့ꩻ အဝ်ႏလွေꩻထေ့ ဝေင်ꩻယေရုသလမ်ႏ၊ နဝ်ꩻကိုနဝ်ꩻ ခွေအီႏထွာ နုဲင်းမုဲင်ꩻတဲ့ တသေတဝ်းသွူ။ 23ခွေသေဒျာႏ တစွိုးလွုမ်ꩻ ခွေတာႏ ဝေင်ꩻစွုမ်ႏဝေင်ꩻကို ထောင်ႏတွမ်ႏ ထာꩻဒုက္ခ အဝ်ႏအုံပွေါးမꩻခွေနဝ်ꩻ ကြောင်းစင် ဝိညာဉ်ႏတောႏ အဝ်ႏဖေႏသတိꩻ ခွေသွူ။ 24#၂တိ ၄:၇။ ကွဲႏတွော့ꩻ ခွေမဉ်မာꩻစွုံႏလင်ႏဒျာႏ ခွေသာႏသနာႏ ထာꩻမာꩻတွမ်ႏ မာꩻထွူထဲ့ဖေႏဒျာႏ ဗွေႏယေသျု ကထွဉ်ႏဒါႏ ခွေထာꩻမာꩻ ကအီႏကေႏညာꩻဒါႏ သတင်ꩻဟဝ် ပွိုင်းဝွို့တွမ်ႏ ဗွေႏဘုရာꩻ ကေꩻဇူꩻတောႏ ခရာႏလွုမ်ꩻနဝ်ꩻ ခွေတလောက်ꩻကာႏတဝ်း ခွေအသက်သွူ။
25“ခွေအဝ်ႏလွေꩻ သီကားကအဝ်ႏအကို အဝ်ႏဟော်ꩻဖေႏ ဗွေႏဘုရာꩻခမ်းထီ ခရာႏသွူ။ ယိုခါ သီတဖြာꩻငါတဲ့ အီႏတထီႏထဲင်း ဗာႏဖျင်တဝ်းဒွုမ် ခွေနဝ်ꩻ ခွေအဝ်ႏသေနဝ်ꩻသွူ။ 26နဝ်ꩻမꩻ ဟန်ႏနီꩻယို ခွေတွိုင်ႏတယ်ႏ ဖေါႏနယ်သီ၊ သီမဉ်ႏသွုမ်ꩻကုဲင်ထိုꩻ တဖြာꩻဖြာꩻနဝ်ꩻ ခွေတာႏဝွန်ႏ တအဲဉ်ထဝ်းဒွုမ်သွူ။ 27ပွိုးကအီႏကေႏညာႏဖေႏသီ ဗွေႏဘုရာꩻ အကျံႏတောႏ ကားကအဝ်ႏနဝ်ꩻ ခွေတဖျော်သဲင်ꩻချာ တဝ်းဒွုမ်နဝ်ꩻသွူ။ 28နဝ်ꩻမꩻ ထိန်ꩻချာသွော့ သီနမ်း၊ တွမ်ႏကြောင်းစင် ဝိညာဉ်ႏတောႏ ကအပ်သေꩻခါသီ၊ သွိုꩻစွိုꩻတဖုံႏလွုမ်းနဝ်ꩻ ထိန်ꩻထွား ဟဝ်ဟဝ်သွော့။ ထွားဟဝ်ဟဝ်သွော့ ဗွေႏဘုရာꩻ အသေန်းတောႏ၊ စွဉ်ႏဝွေꩻဗွေႏ ပိုခိုတောႏ အသွီႏနဝ်ꩻ ဝွေꩻဗွေႏ မာꩻလဲဉ်း ဝွေꩻဗွေႏ နမ်းပဲင်ႏ အသေန်းတောႏ။ 29ခွေမဉ်ႏထန်ႏလွေꩻထွူ ဟဝ်ငမ်းခရာႏ ထွီႏမီꩻဖုံႏ အီႏလွဉ်သီအကိုတဲင် ဝွေꩻသီး အီႏတသညင်ꩻတဝ်း သွိုꩻဖုံႏနဝ်ꩻ ခွေအဝ်ႏသေသွူ။ 30သီလိုꩻစွိုꩻဖုံႏကို လိုꩻယင်ဟန်ႏနဝ်ꩻ အီႏဒေါ့ꩻလိန်ႏလဲဉ် အော်ကုဲင်ထိုꩻ ဝွေꩻသီး အချိန်ႏနဝ်ꩻ အီႏတွိုႏလွဉ်သွူ။ 31နဝ်ꩻထွူ အွဉ်ႏရေꩻတွော့ꩻ သွံနေင်ႏလွုမ်း စွဉ်ႏမဲ့ထီမဲ့နောင် နီꩻနီꩻ နာꩻနာꩻ ခွေကအဝ်ႏ သွဉ်သင်ဖေႏဒါႏ သီစွုမ်ႏဖြာꩻနဝ်ꩻ ယူႏလꩻချာသွော့။
32“တဲင်ယိုခါ ဖေႏကအဝ်ႏဒျာႏ တွမ်ႏဗွေႏဘုရာꩻ ထာꩻထိန်ꩻထွားကိုတွမ်ႏ ဝွေꩻဗွေႏ ကေꩻဇူꩻတရာꩻတောႏကိုနဝ်ꩻ ခွေမိန်းဖေႏသီ သွူ၊ ကေꩻဇူꩻတောႏ ကအီႏတယ်ႏထင်ႏ ထိုꩻနွောင်ꩻဒါႏသီ တဲင် ဝွေꩻဗွေႏ အလိုꩻဖုံႏ ကားကအဝ်ႏတာႏ ဗွေႏဘုရာꩻ မင်္ဂလာႏနဝ်ꩻ ယံကဖေႏသွော့သီ။ 33ပါꩻမုဲင်ꩻတဖြာꩻ အရွဉ်တဲ့နဝ်ꩻ ခံꩻတဲ့နဝ်ꩻ ခွမ်ꩻလာꩻတဲ့နဝ်ꩻ ခွေတမဉ်လꩻတဝ်းသွူ။ 34ခွေကအဝ်ႏလိုႏဒါႏတွမ်ႏ ကအီႏလွူး ဖေႏအံႏအွꩻဒါႏ ခွေသွꩻခွဖုံႏတာႏနဝ်ꩻ တွမ်ႏခွေစူဖုံႏတဲင် မာꩻဒျာႏ ထာꩻမာꩻနဝ်ꩻ သီအဝ်ႏသေသွူ။ 35တွမ်ႏထာꩻကျိုꩻစာꩻ လုပ်ꩻမာꩻယပ်ꩻခုဲင်ႏ အနယ်နုဲင်းယိုတွော့ꩻ နီစွဲကိုလဲဉ်း လိုꩻကေန်ꩻခြော အာႏဆေ့ꩻနဝ်ꩻ ခွေမာꩻနယ်ဖေႏလဲဉ်းသီ ကားကအဝ်ႏသွူ။ ဗွေႏယေသျုနမ်း ကမိန်းဖေႏဒါႏငဝ်းဖုံႏ ၊‘ဖေႏဗာႏဝင်ꩻနဝ်ꩻ မင်္ဂလာႏ အဝ်ႏအာကယ်ꩻက ကလက္ခံႏလꩻ’” နုဲင်းနဝ်ꩻနဝ်ꩻ ယူႏလꩻချာသွော့။
36ပေါလုဒေါ့ꩻဖေႏ ထွိုင်ႏထွူ ဝွေꩻအုံထောက်လင်ꩻငီꩻ စွဉ်ႏဝွေꩻသီးတဲင် ဆုတောင်ꩻစွဉ်ႏသွူ။ 37ဝွေꩻသီးကားကအဝ်ႏ စွဉ်ႏထာꩻငွိုး တဖော့ဝွေꩻတဲင် နို့ꩻနုတ်ဆက်စွဉ်ႏသွူ။ 38ကွပ်ပွိုး ဝွေꩻကဒေါ့ꩻဖေႏဒါႏ ဝွေꩻသီး မုဲင်ꩻခါတဲ့ အီႏတထီႏဗာႏ ဖျင်ထဲင်းတဝ်းဒွုမ်ဝွေꩻ နုဲင်းနဝ်ꩻအတွက် ဝွေꩻသီးသꩻပေႏ မွေးနေးစွဉ်ႏနဝ်ꩻသွူ။ နဝ်ꩻမꩻ ဝွေꩻသီး လွေꩻငီꩻစွဉ်ႏဝွေꩻ သင်္ဘောꩻထျꩻနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 20: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
