တမန်ႏတောႏ 19
19
ပေါလုအဝ်ႏသော့ꩻဝေင်ꩻဧဖဲစ်ကို
1အာပေါလု အဝ်ႏသော့ꩻ ဝေင်ꩻကောရိန္တုကို ကျာꩻနဝ်ꩻ ပေါလုထန်ႏ တဖူꩻဖျတ်ကာႏ လွေꩻနယ်ႏဖုံႏ နုဲင်းဆကီဖုံႏထွူ ဖျော်လွဉ်သော့ꩻ ဝေင်ꩻဧဖဲစ်ကိုနဝ်ꩻသွူ။ နဝ်ꩻကို ဝွေꩻမော့ꩻ တပဲ့တောႏဖုံႏ ယင်ဟန်ႏတဲင်၊ 2ရီဝွေꩻသီး၊ “သီကထွာလွဉ် လိုꩻယွုမ်းသားဖုံႏချိန်ႏနဝ်ꩻ သီလက်ခံႏ လꩻလဲဉ်း ကြောင်းစင် ဝိညာဉ်ႏတောႏဖုံႏဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “ကြောင်းစင် ဝိညာဉ်ႏတောႏ အဝ်ႏကျောင်ꩻငါတဲ့ နီလဲင်ꩻ တဟွိုန်ဗာႏဖိုတဝ်း” နုဲင်းနဝ်ꩻသွူ။
3ပေါလုရီ၊ “မွေးလဲဉ်းသွူ၊ သီကလက်ခံႏလꩻဒါႏ ဗတ္တိဇံႏ ထီမင်္ဂလာႏနဝ်ꩻ အစားမုဲင်ꩻဟောင်း” နုဲင်းနဝ်ꩻသွူ။
ဝွေꩻသီး လဝ်းချာ၊ “ယောဟန် ဗတ္တိဇံႏ ထီမင်္ဂလာႏဒျာႏ” နုဲင်းနဝ်ꩻသွူ။
4 #
မ ၃:၁၁၊ မာ ၁:၄၊ ၇,၈၊ လု ၃:၄၊ ၁၆၊ ယော ၁:၂၆၊ ၂၇။ ပေါလုဒေါ့ꩻ၊ “ယောဟန် ဗတ္တိဇံႏ ထီမင်္ဂလာႏနဝ်ꩻ ထွာလိုꩻဖုံႏ အဝ်ႏဝွေꩻသီး အပဲစ်ဖုံႏကို လꩻချာကော့ꩻမာႏတာႏတဲင် ဝွေꩻဒေါ့ꩻနယ်ဖေႏ ဣသရေး လိုꩻမျိုꩻဖုံႏ ဖေႏကယွုမ်း ဗွေႏအပါꩻ ကကျွꩻလွဉ်ဒါႏ ဝွေꩻဆꩻချာနဝ်ꩻသွူ၊ ဝွေꩻဗွေႏနဝ်ꩻထွာ ဗွေႏယေသျု” နုဲင်းနဝ်ꩻသွူ။။
5ဝွေꩻသီး ထွိုင်ႏဟွိုန် နုဲင်းယိုချိန်ႏ စွဉ်ႏဗွေႏယေသျု အမဉ်ꩻတောႏနာႏမနဝ်ꩻ ဝွေꩻသီးခံႏစွဉ်ႏ ဗတ္တိဇံႏ ထီမင်္ဂလာႏနဝ်ꩻသွူ။ 6ပေါလုစူဖုံႏနဝ်ꩻ အွဉ်ႏဒင်ႏ ဝွေꩻသီးလောင်းတဲင် ကြောင်းစင် ဝိညာဉ်ႏတောႏ ကျွꩻလင်ꩻလွဉ်စွဉ်ႏ ဝွေꩻသီးလောင်းသွူ။ ဝွေꩻသီးဒေါ့ꩻစွဉ်ႏ ငဝ်းဆန်ꩻဖုံႏတဲင် ဟော်ꩻကေႏညာႏပါက ဗွေႏဘုရာꩻ တရာꩻနဝ်ꩻသွူ။။ 7ဝွေꩻသီး ကားကအဝ်ႏနဝ်ꩻ အဝ်ႏတဆီနီဖြာꩻသွူ။
8ပေါလု နွို့လွေꩻသော့ꩻ တရာꩻစရွပ်ကိုတဲင် သွံလာလွုမ်း ဒေါ့ꩻရုဲင်းဖေႏမွေးစွဉ်ႏ လိုꩻဖုံႏ အုံကွံစွဉ်ႏ ဝွေꩻသီးတွော့ꩻ ဖေႏဝွေꩻသီး ကယွုမ်းလက္ခံႏ ဗွေႏဘုရာꩻ ခမ်းထီခရာႏနဝ်ꩻ ကျိုꩻစာꩻမွေးစွဉ်ႏသွူ။ 9ကွဲႏတွော့ꩻ ဝွေꩻသီး ယင်ဟန်ႏနဝ်ꩻ သꩻနုတ်ငါႏတဲင် တယွုမ်းတဝ်းတွော့ꩻ လိုꩻတစွိုꩻလွုမ်း ဆꩻငါနဝ်ꩻ ဝွေꩻသီး ဒေါ့ꩻကုဲင်ဒျာႏ ဗွေႏဘုရာꩻ အနယ်ꩻတဖူꩻဖုံႏ နဝ်ꩻသွူ။ နဝ်ꩻမꩻ ပေါလု အဝ်ႏဝွေꩻသီးထျꩻနဝ်ꩻ ထန်ႏထိုꩻ တဲင် လိုꩻယွုမ်းသားဖုံႏနဝ်ꩻ ဟဲ့ꩻလွေꩻငီꩻစွဉ်ႏ ဝွေꩻတွော့ꩻ စွုမ်ႏနီꩻ ဝွေꩻအုံကွံစွဉ်ႏ တုရန်နု လိတ်သွဉ်တွိုက်ကို နဝ်ꩻသွူ။ 10မာꩻနုဲင်းယိုနဝ်ꩻ ညစွဉ်ႏနီနေင်ႏတဲင် ဖေႏနေး လိုꩻကအဝ်ႏအုံသော့ꩻဒါႏ အာသျနယ်ႏကို ဂျူးလိုꩻမျိုꩻဖုံႏတွမ်ႏ လိုꩻမျိုꩻလင်နီမျိုꩻလွုမ်း ဖေႏကဟွိုန်ဗာႏ ဗွေႏဘုရာꩻ တရာꩻတောႏနဝ်ꩻသွူ။
သကေဝပိုခိုဖုံႏ
11စွဉ်ႏပေါလုနဝ်ꩻ ဗွေႏဘုရာꩻမာꩻနယ် နိမိတ်လက္ခဏာႏ ထူꩻဆန်ꩻဖုံႏသွူ။ 12ဝွေꩻကအဝ်ႏသွုံꩻဒါႏ ဖေါက်ဝါႏတွမ်ႏ အငင်းဒေင်စွိုင် ပိတ်ခဝ်ငါမဉ်ႏတဲ့ ထူႏလွေꩻ လိုꩻဆာဖုံႏထျꩻတွော့ꩻ ဝွေꩻသီးရောႏဂါႏဖုံႏ ထိုꩻမာႏတဲင် လူꩻကုဲင်ဖုံႏ အဝ်ႏဝွေꩻသီးအကို ထန်ႏထိုꩻစွဉ်ႏသွူ။ 13ဂျူးလိုꩻမျိုꩻဖုံႏ ယင်ဟန်ႏ ကအဝ်ႏစွစ်ꩻစဲစ်ꩻဒါႏ ထာꩻဖုံႏ ကအီႏမာꩻနုဲင်းယိုနဝ်ꩻ သွုံꩻအီ ဗွေႏယေသျု အမဉ်ꩻတောႏ နာႏမတွော့ꩻ ကျိုꩻစာꩻဝါးထန်ႏ လူꩻကုဲင်ဖုံႏသွူ။ ဝွေꩻသီးဒေါ့ꩻဖေႏ လူꩻကုဲင်၊ “စွဉ်ႏပေါလု ကအဝ်ႏဟော်ꩻဒါႏ ဗွေႏယေသျု အမဉ်ꩻတောႏ နာႏမနဝ်ꩻ ခွေဖေႏနာအမိန်း ထန်ႏထိုꩻဟုဲင်း” နုဲင်းနဝ်ꩻသွူ။ 14ပါꩻကအဝ်ႏ မာꩻထာꩻနုဲင်းယိုနဝ်ꩻ ထွာဒျာႏ ဂျူးယဇ်ပရောဟိတ် ခွန်တန်တပါꩻ သကေဝ ပိုခို တဖူးဝေး နွတ်ꩻဖြာꩻဖုံႏဒျာႏသွူ။
15ကွဲႏတွော့ꩻ လူꩻကုဲင်နဝ်ꩻ ဒေါ့ꩻဖေႏဝွေꩻသီး၊ “ဗွေႏယေသျုနဝ်ꩻ ခွေအဝ်ႏသေတဲင် ပေါလုတဲ့ ခွေအဝ်ႏသေ။ ကွဲႏတွော့ꩻ သီနဝ်ꩻ ပါꩻမုဲင်ꩻဟောင်း” နုဲင်းနဝ်ꩻသွူ။
16ပါꩻခိုလူꩻကုဲင် ကအဝ်ႏစောင်ꩻဒါႏ ဝွေꩻနဝ်ꩻ နက်ဗွန်းတိက်ꩻ ကျံꩻမွေးစွဉ်ႏတွော့ꩻ ဝွေꩻနွောင်ꩻထိုꩻလို့စွဉ်ႏ ဝွေꩻသီးသွူ။ ဝွေꩻသီး လꩻထာꩻဆာကဲင်တွော့ꩻ စွဉ်ႏအခွမ်ꩻလာꩻသဲ့ဖုံႏနဝ်ꩻ အဝ်ႏဝွေꩻနဝ်ꩻ အလမ်း ဖင်းညာꩻထိုꩻလို့စွဉ်ႏဖုံႏသွူ။ 17ပွိုင်းဝွို့တွမ်ႏ ထာꩻယိုဖုံႏခရာႏ ဂျူးလိုꩻမျိုꩻဖုံႏ ကားကအဝ်ႏတွမ်ႏ လိုꩻမျိုꩻလင်ဖုံႏ ကအုံသော့ꩻဒါႏ ဝေင်ꩻဧဖဲစ်ကိုသား ထွိုင်ႏဟွိုန်နဝ်ꩻ ဝွေꩻသီး ကားကအဝ်ႏ အဝ်ႏဗွေစွဉ်ႏ ထာꩻငမ်းသꩻတွော့ꩻ အုပ်ꩻသန် မွေးနေးစွဉ်ႏ ဗွေႏယေသျု အမဉ်ꩻတောႏနာႏမသွူ။ 18လိုꩻယွုမ်းသားအာဖုံႏနဝ်ꩻ လွဉ်တဲင် နုဲင်းဝွေꩻသီး ကမာꩻလဲဉ်းဒါႏ လူꩻကုဲင် ဝိဇ္ဇာႏပညာႏဖုံႏနဝ်ꩻ ဝွန်ႏခံႏတဲင် ဖေါႏထန်ႏနယ်စွဉ်ႏ လိုꩻအမျာꩻငါသွူ။ 19လိုꩻကသွုံꩻဒါႏ လူꩻကုဲင်ဝိဇ္ဇာႏ ထာꩻဒါႏသား အာဖုံႏနဝ်ꩻ အီလွဉ် ဝွေꩻသီး လိတ်အုပ်ဖုံႏ စုဗူႏတဲင် လိတ်အုပ်ဖုံႏနဝ်ꩻ လဲ့ꩻထိုꩻလို့စွဉ်ႏမေႏ အမျာꩻငါသွူ။ ဝွေꩻသီး ပေါင်ꩻထွား လိတ်အုပ်ဖုံႏ တံႏဖိုꩻအငိုꩻ ကားကအဝ်ႏနဝ်ꩻ တန်ႏစွဉ်ႏ ရွဉ်ယာႏဒင်္ဂါꩻ ဗီႏငတ်ꩻသောင်ႏနဝ်ꩻသွူ။ 20ဗွေႏဘုရာꩻ တရာꩻတောႏ ငဝ်းတန်ꩻခိုꩻနဝ်ꩻ တန်စွဉ်ႏ အနယ်ꩻ နုဲင်းယိုတွော့ꩻ စွစ်ꩻလီ တန်ထို ခွေါင်ခံႏစွဉ်ႏနဝ်ꩻသွူ။
ထာꩻသျွုတ်တရေင်ဝေင်ꩻဧဖဲစ်ကို
21ထွာလဲဉ်းထာꩻ နုဲင်းယိုထွူ ပေါလုဆွုံꩻဖျတ် ထန်ႏလွေꩻတဖူꩻ ကာႏလွေꩻ မာကေဒေါနိခမ်းတွမ်ႏ အခါယခမ်းတဲင် အီႏလွေꩻသွုပ်ထိုꩻ ဝေင်ꩻယေရုသလမ်ႏ နဝ်ꩻသွူ။ ဝွေꩻဒေါ့ꩻ၊ “ခွေလွေꩻ နဝ်ꩻကိုထွူ ခွေအီႏလွေꩻထွားပါဗာႏက ဝေင်ꩻရောမ” နုဲင်းနဝ်ꩻသွူ။ 22နဝ်ꩻမꩻ ဝွေꩻအွဉ်ႏစွꩻလွေꩻ ဝွေꩻစူထောက်ဝင်ꩻနီ ကထွာ တိမောတေတွမ်ႏ ဧရတ္တု မာကေဒေါနိခမ်းတဲင် အတွင်ꩻနဝ်ꩻ ဝွေꩻအုံသော့ꩻညဒျာႏ အာသျဟံႏနယ်ႏကိုနဝ်ꩻသွူ။
23ကွပ်ပွိုး ဗွေႏဘုရာꩻ အထွုံꩻနယ်တွော့ꩻ အချိန်ႏယို ဝေင်ꩻဧဖဲစ်ကိုနဝ်ꩻ ထွာသန်မွေးနေးစွဉ်ႏ ထာꩻဒုက္ခ နဝ်ꩻသွူ။ 24စင်းခံꩻတဖြာꩻ မဉ်ꩻကဟဲ့ꩻဒါႏ ဒေမေတရိနဝ်ꩻ စွဉ်ႏရွဉ်ယာႏ အဝ်ႏမာꩻအာတေမိ နင်ꩻလူꩻမူႏဘုရာꩻ ကျောင်ꩻပွုံႏတဲင် ဝွေꩻထာꩻမာꩻနဝ်ꩻ စီꩻပွါꩻတန် လွဉ်မွေးနေးစွဉ်ႏသွူ။ 25နဝ်ꩻမꩻ ဝွေꩻဟဲ့ꩻစုဗူႏလို့ စင်းခံꩻလင်ဖုံႏ၊ ဝွေꩻသီးထာꩻမာꩻ ကဗွိုန်ဒါႏ ဝင်ꩻနဝ်ꩻတွော့ꩻ ဒေါ့ꩻဖေႏဝွေꩻသီး၊ “စင်းခံꩻဖုံႏ၊ စွဉ်ႏထာꩻမာꩻယို နီခြွေချမ်ꩻသာႏ လွဉ်ငါႏကျောင်ꩻနဝ်ꩻ သီအဝ်ႏသေသွူ။ 26ယိုခါ ပါꩻပေါလု အဝ်ႏမာꩻထာꩻမာꩻ၊ ဝွေꩻဒေါ့ꩻဟော်ꩻဒျာႏ တွမ်ႏလိုꩻစူဖုံႏ ကမာꩻနေးဒါႏ ထာꩻကားကအဝ်ႏဖုံႏနဝ်ꩻ ဘုရာꩻတမွေးတဝ်းတဲင် တယ်ႏစွဉ်ႏ ဝေင်ꩻဧဖဲစ် ဗꩻတွိုႏလွေꩻ အာသျဟံႏနယ်ႏ တနယ်ႏလွုမ်း၊ ဝွေꩻသွေꩻအောင်ႏလꩻ လိုꩻဖုံႏ အာငါႏနဝ်ꩻ သီနမ်း အဝ်ႏထီႏ၊ အဝ်ႏဟွိုန်ဒျာႏသွူ။ 27နဝ်ꩻထွူ နီစီꩻပွါꩻရေꩻ ထာꩻမာꩻဖုံႏယိုနဝ်ꩻ အီႏလꩻထိုꩻမဉ်ꩻကုဲင်၊ နဝ်ꩻနဝ်ꩻထွာ အန္တရာယ်ႏ။ နဝ်ꩻလွုမ်ꩻ တကာႏတဝ်း ကတန်မျတ်ငါႏ အာတေမိ နင်ꩻလူႏမူႏ ဘုရာꩻကျောင်ꩻနဝ်ꩻတဲ့ ထွာဒျာႏအဓိပ္ပါယ်ႏ တအဲဉ်ထဝ်းတဲင် စွဉ်ႏလိုꩻအာသျခမ်း စွုမ်ႏဖြာꩻ တွမ်ႏတဟံႏတန်လွုမ်း လိုꩻကဝုဲင်ႏ ကိုꩻကွယ်ႏဒါႏ ကတန်မျတ်ငါႏ နင်ꩻလူꩻမူႏ အဘွုန်ꩻသရေႏနဝ်ꩻတဲ့ မဲ့ꩻအီႏကုဲင်ပြင်ꩻထိုꩻနဝ်ꩻ အန္တရာယ်ႏအဝ်ႏပါက” နုဲင်းနဝ်ꩻသွူ။
28လိုꩻစွိုꩻဖုံႏထွိုင်ႏဟွိုန် ငဝ်းနုဲင်းယိုဖုံႏနဝ်ꩻ ဝွေꩻသီး ဒေါသထန်ႏတဲင်ခြောဝ်သင်ႏသန် အငဝ်း၊ “ဝေင်ꩻဧဖဲစ် နင်ꩻလူꩻမူႏ အာတေမိနဝ်ꩻထွာ အတန်မျတ်သွတ်ꩻ” နုဲင်းနဝ်ꩻသွူ။ 29ရောင်သျွုတ် တရေင်ထာꩻနဝ်ꩻ စွစ်ꩻထံစွဉ်ႏ တဝေင်ꩻလွုမ်းသွူ။ လိုꩻရောင်ထာꩻသားဖုံႏနဝ်ꩻ ဆွမ်ꩻထိုꩻစွဉ်ႏ ကထန်ႏလွေꩻငီꩻ လꩻသွꩻဒါႏ တွမ်ႏပေါလုတဖူꩻ၊ မာကေဒေါနိ ခမ်းသား ဂါယုတွမ်ႏ အာရိတ္တာခုသီးတဲင် နဲစ်လွေꩻငီꩻစွဉ်ႏ ဝွေꩻသီး ဝေင်ꩻတောႏ အခန်ꩻလုဲင်းကိုသွူ။ 30ပေါလုနမ်းနဝ်ꩻ မဉ်လွေꩻထေ့ဒျာႏ လိုꩻစွိုꩻဆꩻငါ၊ ကွဲႏတွော့ꩻ လိုꩻယွုမ်းသားဖုံႏနဝ်ꩻ တဖေႏလွေꩻတဝ်း ဝွေꩻနဝ်ꩻသွူ။ 31ပေါလုသွꩻဖုံႏ ကအဝ်ႏထွာဒါႏ နယ်ႏအာႏဏာႏပဲင်ႏသားဖုံႏ ယင်ဟန်ႏနဝ်ꩻတဲ့ ဖေႏကအွဉ်ႏနယ်မွိုန်း ဝွေꩻအနမ်း ဝေင်ꩻတောႏ အခန်ꩻလုဲင်းကိုနဝ်ꩻ ပသာလွဉ်ဖေႏ ဝွေꩻသတင်ꩻ တောင်ꩻပြန်ႏဝွေꩻသွူ။ 32အကျာꩻနဝ်ꩻ လိုꩻတစွိုꩻလွုမ်း အုံကွံဝင်ꩻနဝ်ꩻ ရောင်သန် မွေးနေးစွဉ်ႏထာꩻဖုံႏသွူ။ လိုꩻယင်ဟန်ႏဖုံႏနဝ်ꩻ ခြောဝ်သန်တစွိုး၊ အလင်တစွိုꩻနဝ်ꩻ အဝ်ႏခြောဝ်သန်ဒျာႏ အလင်တမျိုꩻသွူ။ ပွိုးတွော့ꩻ ဝွေꩻသီး ကဲဉ်းအာအာနဝ်ꩻ ပွိုးတမုဲင်ꩻ ဝွေꩻသီး လွဉ်စုဗူႏဗာႏဝင်ꩻငါတဲ့ လဲင်ꩻတသေတဝ်းဖုံႏသွူ။ 33အလဲက်ဇန္ဒြားနဝ်ꩻ ဂျူးလိုꩻမျိုꩻဖုံႏအွဉ်ႏလွေꩻဝွေꩻ လိုꩻစွိုꩻဆꩻငါတွော့ꩻ လိုꩻယင်ဟန်ႏရိုꩻ ဝွေꩻနဝ်ꩻ ထာꩻဝွန်ႏအဝ်ႏ နုဲင်းနဝ်ꩻသွူ။ တွိုႏနဝ်ꩻ လိုꩻဖုံႏ ဖေႏကအုံတေ့ꩻထာꩻနဝ်ꩻ အလဲက်ဇန္ဒြားယွိုင်ႏအစူတဲင် ဝွေꩻအဝ်ႏကျိုꩻစာꩻဒေါ့ꩻ ရဲချာအနမ်းနဝ်ꩻသွူ။ 34ကွဲႏတွော့ꩻ ဝွေꩻနဝ်ꩻအဝ်ႏထွာ ဂျူးလိုꩻမျိုꩻ တဖြာꩻကျောင်ꩻ ဝွေꩻသီး ထွိုင်ႏတောင်ꩻချာ ၊ “ဝေင်ꩻဧဖဲစ် အာတေမိ နင်ꩻလူꩻမူႏနဝ်ꩻ ထွာအတန်မျတ်သွတ်ꩻ” နုဲင်းနဝ်ꩻနဝ်ꩻ ဝွေꩻသီး ကားကအဝ်ႏ ခြောဝ်ဗွိုန်လို့ဝင်ꩻ ညစွဉ်ႏနီနားရီးနဝ်ꩻသွူ။
35အဆုဲင်ꩻသွတ်ꩻ ဝေင်ꩻတောႏစရေꩻနဝ်ꩻ ထွဉ်ႏလိုꩻဖုံႏ အုံတေ့ꩻတွော့ꩻ၊ ဝွေꩻဒေါ့ꩻ၊ “သွꩻဝေင်ꩻဧဖဲစ်သားဖုံႏ၊ ဝေင်ꩻဧဖဲစ် ကထိန်ꩻသိမ်ꩻ ရိုႏသေႏဒါႏ ကတန်မျတ်ငါႏ အာတေမိနင်ꩻလူꩻမူႏ ဘုရာꩻကျောင်ꩻတွမ်ႏ တံꩻခွဉ်ႏထွန်ႏလုံး အဝ်ႏခမ်းထီမို့ꩻလောင်း ထဲ့လင်ꩻဒါႏနဝ်ꩻ လိုꩻစွုမ်ႏဖြာꩻ အဝ်ႏသေသွူ။ 36အချက်ယိုဖုံႏနဝ်ꩻ ပါꩻမုဲင်ꩻတဖြာꩻတဲ့ ထေင်ချာ တလꩻနွောင်ꩻ တဝ်းနဝ်ꩻသွူ။ ပွိုးနုဲင်းနဝ်ꩻ သီအုံယဉ်တဲင် တသင်ႏချင်ႏတဝ်းနဝ်ꩻ တွမ်ႏမာꩻငီႏငါမွိုန်းထာꩻ တစွိုးစွိုးဟုဲင်း။ 37သီကအဝ်ႏဆွမ်ꩻလွဉ် ပါꩻစားယိုဖုံႏ ယိုကိုငါမဉ်ႏတဲ့ ဝွေꩻသီး တစွန်ရိမ်တဝ်း သီနင်ꩻလူꩻမူႏ ဘုရာꩻကျောင်ꩻ၊ မဉ်ႏတမွေးတဝ်း၊ တဒေါ့ꩻစောက်ꩻကာꩻတဝ်း နီနင်ꩻလူꩻမူႏ ဘုရာꩻဖုံႏ ခရာႏနဝ်ꩻသွူ။ 38ဒေမေတရိတွမ်ႏ ဝွေꩻစင်းခံꩻသားဖုံႏ၊ သီမဉ်ႏမဉ်စွဲꩻတရာꩻနဝ်ꩻ စွုမ်ႏနီꩻ တရာꩻရွုမ်ꩻအဝ်ႏဗွောင်တဲင် နီအာႏဏာႏပဲင်ႏသားဖုံႏ အဝ်ႏဒျာႏ ရွုမ်ꩻကိုနဝ်ꩻမꩻ စွဲꩻတရာꩻနွောင်ꩻဒျာႏသွူ။ 39ကွဲႏတွော့ꩻ သီမဉ်ဒင်ႏပျနယ်ခရာႏ အလင်တစွိုးစွိုး မဉ်ႏအဝ်ႏနဝ်ꩻ ဒင်ႏနယ်နေးဗာႏ တရာꩻဝင်ႏ ခမ်းရင်ꩻသား ပွယ်ꩻအုံကွံကို နဝ်ꩻသွူ။ 40ပွိုးတွော့ꩻ ကထွာလွဉ် ထာꩻသျွုတ်တရေင် နုဲင်းဟန်ႏနီꩻယိုနဝ်ꩻ နီအီႏခံႏဗာႏထဲင်း စွဲꩻတရာꩻ အန္တရာယ်ႏအဝ်ႏသွူ။ ကသျွုတ်တရေင်ထာꩻ နုဲင်းယိုဖုံႏနဝ်ꩻ တလိုႏမာꩻတဝ်း၊ ပွိုင်းဝွို့ယိုခရာႏနဝ်ꩻ ဒင်ႏပျနယ် အခြောင်ꩻခရာႏ ခွေါင်ခံႏဟဝ် တအဲဉ်ထဝ်း” နုဲင်းနဝ်ꩻသွူ။ 41ဒေါ့ꩻဖေႏ နုဲင်းယိုထွူ ဝွေꩻအွဉ်ႏထွူထိုꩻစွဉ်ႏ ပွယ်ꩻအုံကွံ နဝ်ꩻသွူ။
ទើបបានជ្រើសរើសហើយ៖
တမန်ႏတောႏ 19: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
