တမန်ႏတောႏ 11
11
ပေတရုဒင်ႏပျအွဉ်ႏဟွိုန်ဝေင်ꩻယေရုသလမ်ႏအသေန်းတောႏ
1လိုꩻမျိုꩻလင်ဖုံႏတဲ့ အဝ်ႏလက္ခံႏလꩻလဲဉ်း ဗွေႏဘုရာꩻ ငဝ်းတောႏကျောင်ꩻ တမန်ႏတောႏဖုံႏတွမ်ႏ ယုဒတခမ်းလွုမ်း လိုꩻယွုမ်းသား အလင်ဖုံႏနဝ်ꩻ ဟွိုန်စွဉ်ႏနဝ်ꩻသွူ။ 2ပေတရု ထွိုင်ႏဖျော်လွေꩻ ဝေင်ꩻယေရုလမ်ႏချိန်ႏ လိုꩻကကျွိုက်နစ်သက်ဒါႏ သွို့ꩻလိုꩻခို အင်္ဂါႏနာပီ မင်္ဂလာႏ ကထွာ လိုꩻမျိုꩻလင်ဖုံႏနဝ်ꩻ ဝေႏဖန်ႏဝွေꩻရိုꩻ၊ 3“နာꩻအဝ်ႏလွေꩻ မာꩻထဉ်ႏဗာႏတွိုႏ လိုꩻမျိုꩻလင် တသွို့ꩻတဝ်း လိုꩻခိုအင်္ဂါႏနာပီ မင်္ဂလာႏ အလမ်းကိုတဲင် နာꩻလဲင်ꩻ အံႏအွꩻငီꩻဗာႏစွဉ်ႏ တွမ်ႏဝွေꩻသီးနုဲင်းမုဲင်ꩻ” နုဲင်းနဝ်ꩻသွူ။ 4နဝ်ꩻမꩻ ထာကထွာလွဉ်လဲဉ်း နုဲင်းမုဲင်ꩻခရာႏ တယ်ႏအစ ဗꩻတွိုႏအသွတ်ꩻနဝ်ꩻ ပေတရု ဒေါ့ꩻသျင်ꩻနယ် ဖေႏလို့စွဉ်ႏ ဝွေꩻသီးသွူ။
5“ခွေကအဝ်ႏကွီ ဆုတောင်ꩻဒါႏ ဗွေႏဘုရာꩻ ဝေင်ꩻယုပ္ပေကို ကျာꩻနဝ်ꩻ ခွေထီႏ ရူႏပါႏရုံႏ တစွိုးသွူ။ ခွေထီႏဗာႏ ထာꩻတစွိုးနဝ်ꩻ ဗွိုန်နုဲင်း ပိတ်ခဝ်တန် ခွုမ်ခါꩻ လစ်ꩻဖဲ့ꩻလစ်ꩻနား အဝ်ႏခမ်းထီမို့ꩻလောင်း လင်ꩻလွဉ်တဲင် ပိတ်ခဝ်နဝ်ꩻ အဝ်ႏထွိုင်ႏစွဉ်ႏ ခွေထျꩻနဝ်ꩻသွူ။ 6ခွေထွားစဲင်းသော့ꩻ ကောင်းကိုတဲင် ထီႏဗာႏစွဉ်ႏ ထာꩻသားငဲတွမ်ႏ ထာꩻသားမီꩻဖုံႏ၊ ထာꩻသား တွာႏလွေꩻနေးဒါႏ အဟို့ꩻဖုံႏတွမ်ႏ ဝါးဖုံႏသွူ။ 7နဝ်ꩻထွူ ခွေဟွိုန် ငဝ်းဒေါ့ꩻဖေႏခွေ၊ ‘ပေတရု ထွိုင်ႏဟုဲင်း၊ မာꩻသီတွော့ꩻ အံႏဟုဲင်း’ နုဲင်းနဝ်ꩻသွူ။ 8ကွဲႏတွော့ꩻ ခွေဒေါ့ꩻ၊ ‘တမွေးတဝ်း၊ ဗွေႏ။ ထာꩻအံႏ တကြောင်းစင်တဝ်းတွမ်ႏ ထာꩻအံႏ တဗော့ꩻလဲ့ꩻဖုံႏနဝ်ꩻ မုဲင်ꩻခါတဲ့ တနွို့သော့ꩻ ဗာႏဖိုတဝ်း ခွေဖြောင်းကို’ နုဲင်းနဝ်ꩻသွူ။ 9ငဝ်းအဝ်ႏ ခမ်းထီမို့ꩻလောင်းနဝ်ꩻ ဒေါ့ꩻဖျင် တလဲင်ႏ၊ ‘ထာꩻအစွိုးမုဲင်ꩻ တယဝ်း ဗွေႏဘုရာꩻ ကေႏညာႏလဲဉ်းဒါႏ ကြောင်းစင်နဝ်ꩻ တကြောင်းစင်တဝ်း နုဲင်းနဝ်ꩻနဝ်ꩻ တွမ်ႏယူႏစဉ်ꩻစာမွိုန်းဟုဲင်း’ နုဲင်းနဝ်ꩻသွူ။ 10ထွာနုဲင်းယို သွံလဲင်ႏဗွေထွူ အဆုဲင်ꩻသွတ်ꩻ နဝ်ꩻဖုံႏ ကားကအဝ်ႏနဝ်ꩻ ထွို့ꩻထင်ႏကီချာယင်း ခမ်းထီမို့ꩻလောင်းကိုနဝ်ꩻသွူ။ 11အုံတဆင်ႏတွော့ꩻ အဝ်ႏဝေင်ꩻကဲသရိ ကပသာလွဉ်ဒါႏ ခွေထျꩻ လိုꩻဝင်ꩻသွံနဝ်ꩻ ဖျော်လွဉ်စွဉ်ႏ ခွေကအဝ်ႏအုံဒါႏ လမ်းနဝ်ꩻသွူ။ 12ဖေႏကလွေꩻလွဉ်ꩻ တွမ်ႏဝွေꩻသီးနဝ်ꩻ တွမ်ႏယွိုန်းထွို့ꩻမွိုန်းနဝ်ꩻ ဝိညာဉ်ႏတောႏ ဒေါ့ꩻဖေႏခွေသွူ။ အဝ်ႏဝေင်ꩻယုပ္ပေကို ခွေသွꩻတပဲ့တောႏဖုံႏ ဝင်ꩻသူနဝ်ꩻတဲ့ အဝ်ႏပါလွေꩻငီꩻစွဉ်ႏခွေ ဝေင်ꩻကဲသရိကိုတဲင် နီကားကအဝ်ႏ လွေꩻနွို့သော့ꩻစွဉ်ႏ ကော်နေလိ လမ်းကိုနဝ်ꩻသွူ။ 13ဝွေꩻဒေါ့ꩻဖေႏနီ၊ ဝွေꩻထီႏဗာႏ မို့ꩻလောင်းတမန်ႏတပါꩻ အဝ်ႏအုံထွိုင်ႏ ဝွေꩻလမ်းကိုတွော့ꩻ ဒေါ့ꩻဖေႏဝွေꩻ၊ ‘အွဉ်ႏစွꩻလွေꩻ လိုꩻယင်ဟန်ႏ ဝေင်ꩻယုပ္ပေတွော့ꩻ အွဉ်ႏဟဲ့ꩻလွဉ်သွော့ ပါꩻမဉ်ꩻကဟဲ့ꩻဒါႏ သိမုန်ပေတရုနဝ်ꩻဟုဲင်း။ 14ဖေႏနေးနာꩻတွမ်ႏ နာꩻတမွိုးဖါပိုစွိုꩻဖုံႏ ကားကအဝ်ႏ ကအီႏလꩻ ထာꩻကယ်ႏတင်ႏနဝ်ꩻ ဝွေꩻအီႏဒေါ့ꩻဟော်ꩻဖေႏနာꩻ တရာꩻငဝ်းဖုံႏ’ နုဲင်းနဝ်ꩻသွူ။ 15တဲင်ခွေထွိုင်ႏဒေါ့ꩻဟော်ꩻစဖေႏ တရာꩻချိန်ႏနဝ်ꩻ ကြောင်းစင် ဝိညာဉ်ႏတောႏ ကျွꩻလင်ꩻလွဉ် ဝွေꩻသီလောင်း ဗွိုန်နုဲင်း အစရီးခါ ကလင်ꩻလွဉ်ဒါႏ နီလောင်းနဝ်ꩻသွူ။ 16တွိုႏနဝ်ꩻ ၊ ‘ယောဟန်နဝ်ꩻ ဖေႏဗတ္တိဇံႏ မင်္ဂလာႏ တွမ်ႏထီ၊ ကွဲႏတွော့ꩻ သီနဝ်ꩻအီႏခံႏဗာႏ ဗတ္တိဇံႏ မင်္ဂလာႏ တွမ်ႏကြောင်းစင် ဝိညာဉ်ႏတောႏ’ နုဲင်းနဝ်ꩻနဝ်ꩻ နုဲင်းဗွေႏဘုရာꩻ ကဒေါ့ꩻလဲဉ်းဒါႏနဝ်ꩻခွေယူႏလꩻချာယင်းသွူ။ 17နဝ်ꩻနဝ်ꩻ ဗွေႏဘုရာꩻ ကဖေႏဒါႏ လိုꩻမျိုꩻလင် ဆုကေꩻဇူꩻနဝ်ꩻ ဗွိုန်စွဉ်ႏနီက ယွုမ်း ဗွေႏယေသျု ခရစ်တောႏချိန်ႏ ဝွေꩻဗွေႏ ကဖေႏနီအတွိုင်ꩻနဝ်ꩻ သျင်ꩻတန်ဒျာႏသွူ။ နဝ်ꩻထွူ ခွေယို ထွာပါꩻမုဲင်ꩻတွော့ꩻ ကျိုꩻစာꩻရဲဆီꩻဗာႏတွိုႏ ဗွေႏဘုရာꩻနုဲင်းမုဲင်ꩻ” နုဲင်းနဝ်ꩻသွူ။
18ဝွေꩻသီးထွိုင်ႏဟွိုန် နုဲင်းယိုချိန်ႏ ဝွေꩻသီး ကပဲစ်တင်ႏဒါႏ ငဝ်းဖုံႏနဝ်ꩻ ဝွေꩻသီး အွဉ်ႏဆွိုးထိုꩻစွဉ်ႏတဲင် အုပ်ꩻထင်ႏစွဉ်ႏ ဗွေႏဘုရာꩻ ဂွုဏ်ႏကေꩻဇူꩻတောႏ တဲင်ရိုꩻ၊ “ဖေႏကလꩻ ထာꩻကော့ꩻမာႏတွော့ꩻ သက်ဖေႏကအဝ်ႏမွန်ခွင်ꩻနဝ်ꩻ ဗွေႏဘုရာꩻ အဝ်ႏဖေႏပါလဲဉ်း လိုꩻမျိုꩻလင်ဖုံႏ အခွင်ꩻအရေꩻ’ နုဲင်းနဝ်ꩻသွူ။
အသေန်းတောႏကအဝ်ႏဒါႏဝေင်ꩻအန္တိအုတ်
19ကမာꩻသီထိုꩻဒါႏ တတေဖန်ချိန်ႏ လိုꩻယွုမ်းသားဖုံႏ ယင်ဟန်ႏနဝ်ꩻ စွဉ်ႏကခံႏဗာႏဒါႏ ထာꩻနစ်စက် နဝ်ꩻအတွက် အဝ်ႏလီစွစ်ꩻစဲစ်ꩻထိုꩻစွဉ်ႏ ဖိုနီးသျားခမ်း၊ သုဲင်းပရတ်ခမ်း၊ ဝေင်ꩻအန္တိအုတ်နဝ်ꩻသွူ။ တရာꩻတောႏနဝ်ꩻ ဝွေꩻသီး ဒေါ့ꩻနယ်ဖေႏဒျာႏ ဂျူးလိုꩻမျိုꩻဖုံႏ လွုမ်ꩻနဝ်ꩻသွူ။ 20ကွဲႏတွော့ꩻ လိုꩻယွုမ်းသားအလင်ဖုံႏ ကအဝ်ႏဒါႏ သုဲင်းပရတ် ခမ်းတွမ်ႏ ကုရေနေခမ်းလွဉ်သားဖုံႏနဝ်ꩻ လွေꩻဝေင်ꩻအန္တိအုတ်တွော့ꩻ ဟော်ꩻကေႏညာႏဖေႏပါ လိုꩻမျိုꩻလင်ဖုံႏ တရာꩻ၊ ဒေါ့ꩻနယ်ဖေႏပါက ဝွေꩻသီး ပွိုင်းဝွို့တွမ်ႏ ဗွေႏယေသျု ခရာႏသတင်ꩻဟဝ်နဝ်ꩻသွူ။ 21ဗွေႏဘုရာꩻ တန်ꩻခိုꩻနဝ်ꩻ အဝ်ႏငီꩻစွဉ်ႏ ဝွေꩻသီးတဲင် လိုꩻကယွုမ်းသားဖုံႏ အဖြာꩻပေါင်ꩻနဝ်ꩻ အာလွဉ်မွေးစွဉ်ႏ နဝ်ꩻမꩻ ခွယ်သဲင်ꩻထေ့ချာစွဉ်ႏ ဗွေႏဘုရာꩻထျꩻနဝ်ꩻသွူ။
22ပွိုင်းဝွို့တွမ်ႏ သတင်ꩻယိုခရာႏနဝ်ꩻ ဖျော်တွိုႏလွေꩻစွဉ်ႏ ဝေင်ꩻယေရုသလမ်ႏ အသေန်းတောႏကိုသွူ။ နဝ်ꩻမꩻ ဝွေꩻသီး အွဉ်ႏစွꩻလွေꩻ ဗာနာဗ ဝေင်ꩻအန္တိအုတ်သွူ။ 23ဝွေꩻထွိုင်ႏဖျော်တွိုႏလွဉ်တဲင် ထီႏဗာႏဗွေႏဘုရာꩻ ဖေႏလိုꩻဖုံႏ မင်္ဂလာႏ ခွိုင်းကားမုဲင်ꩻတွော့ꩻ၊ ဝွေꩻနဝ်ꩻ သꩻဟဝ်သꩻရေꩻငါႏတဲင် ဖေႏနေးသစ္စာႏ ကအဝ်ႏတွော့ꩻ စွဉ်ႏဝွေꩻသီးသꩻအာႏ ကားကအဝ်ႏ ဖေႏကစွို့ꩻစွဉ်ႏတောႏ ထေ့ဒျာႏ ဗွေႏဘုရာꩻနဝ်ꩻ တမာဖေႏအာႏ ဝွေꩻသီး ကားကအဝ်ႏသွူ။ 24ဗာနာဗနဝ်ꩻ ထွာလိုꩻဟဝ်တဖြာꩻ အဝ်ႏဗွေစွဉ်ႏ ကြောင်းစင် ဝိညာဉ်ႏတောႏတွမ်ႏ ထာꩻယွုမ်းတဲင် ပသာလိုꩻဖုံႏ ဗွေႏဘုရာꩻထျꩻနဝ်ꩻ အာငါႏသွူ။
25နဝ်ꩻထွူ ဗာနာဗထုမ်ႏ သျောလုနဝ်ꩻ တွိုႏလွေꩻ ဝေင်ꩻတာသျုသွူ။ 26ဝွေꩻထွိုင်ႏမော့ꩻ သျောလုချိန်ႏ ဝွေꩻဟဲ့ꩻလွေꩻ သျောလု ဝေင်ꩻအန္တိအုတ်ကိုတဲင် တနေင်ႏလွုမ်းလွုမ်း ဝွေꩻသီးဝင်ꩻနီနဝ်ꩻ မော့ꩻခွဲစွဉ်ႏ လိုꩻအသေန်းတောႏကိုတွော့ꩻ သွဉ်သင်ဖေႏစွဉ်ႏ လိုꩻစွိုꩻဖုံႏ အာငါႏနဝ်ꩻသွူ။ ကယွုမ်းသားဖုံႏ ကအဝ်ႏသော့ꩻဒါႏ ဝေင်ꩻအန္တိအုတ်ကိုနဝ်ꩻ ခံႏဗာႏဟဲ့ꩻ ခရစ်ယာန်ႏ အရီးသွတ်ꩻသွူ။
27အချိန်ႏနဝ်ꩻ ပရောဖဲစ်ဖုံႏ ယင်ဟန်ႏ အဝ်ႏဝေင်ꩻယေရုသလမ်ႏ လွေꩻဝေင်ꩻ အန္တိအုတ်သွူ။ 28ဝွေꩻသီးကို တဖြာꩻ မဉ်ꩻကဟဲ့ꩻဒါႏ အာဂပတ်နဝ်ꩻ လꩻဝိညာဉ်ႏတန်ꩻခိုꩻတဲင် ပွိုင်းဝွို့တွမ်ႏ ထာꩻအံႏအွꩻ အီႏခြောလွဉ်ထာꩻ တဟံႏတန်လွုမ်းနဝ်ꩻ အုံထွိုင်ႏတွော့ꩻ ဟော်ꩻငါရီးသွူ။ (ထွိုင်ႏတွိုႏ ဧကရာဇ်ခွန်တန် ကလောဒိစိုးနဝ်ꩻ ထွာလွဉ်မွေးသွူ။) 29တပဲ့တောႏ စွုမ်ႏဖြာꩻဖြာꩻ နုဲင်းဝွေꩻသီး ကလူႏနွောင်ꩻအတွိုင်ꩻ ဖေႏကစွဲကိုနွောင်ꩻ ဝွေꩻသီးသွꩻ လိုꩻယွုမ်းသားဖုံႏ ကအဝ်ႏအုံဒါႏ ယုဒခမ်းကိုနဝ်ꩻ ဝွေꩻသီး ဆွုံꩻဖျတ်စွဉ်ႏသွူ။ 30ဆွုံꩻဖျတ်နုဲင်းယိုထွူ ရွဉ်နဝ်ꩻအွဉ်ႏ ဗာနာဗတွမ်ႏ သျောလု ပသာလွေꩻဖေႏ အသေန်းတောႏ လိုꩻတန်ဖုံႏ စူကိုနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 11: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
