တမန်ႏတောႏ 10
10
ပေတရုတွမ်ႏကော်နေလိ
1ဝေင်ꩻကဲသရိကိုနဝ်ꩻ ပါꩻခို မဉ်ꩻကဟဲ့ꩻဒါႏ ကော်နေလိ အဝ်ႏတဖြာꩻသွူ။ ဝွေꩻနဝ်ꩻ အဝ်ႏထွာ ရောမစဲ့ꩻတပ် ကဟဲ့ꩻဒါႏ “အီတလီစဲ့ꩻတပ်”နဝ်ꩻ တပ်ခွဲꩻမူး တဖြာꩻသွူ။ 2ဝွေꩻနဝ်ꩻထွာ ဘုရာꩻတရာꩻသား တဖြာꩻတဲင် ဝွေꩻတွမ်ႏ ဝွေꩻတမွိုးဖါပိုစွိုꩻ ကားကအဝ်ႏနဝ်ꩻ ဝုဲင်ႏကိုꩻကွယ်ႏဒျာႏ ဗွေႏဘုရာꩻသွူ။ ဝွေꩻနဝ်ꩻ အဝ်ႏစွဲကို လွူးပါက ဂျူးလိုꩻ ကေန်ꩻခြောဖုံႏတွော့ꩻ အဝ်ႏဆုတောင်ꩻထေ့ သေႏသေႏဒျာႏ ဗွေႏဘုရာꩻထျꩻသွူ။ 3တလဲင်ꩻသား မွူးပင်ꩻလင်ꩻ သွံနာႏရီႏရပ် ဗျာဒိတ်ရူႏပါႏရုံႏကိုနဝ်ꩻ ဝွေꩻထီႏစဲင်း ဗွေႏဘုရာꩻ မို့လောင်းတမန်ႏ တပါꩻ နွို့လွဉ်သော့ꩻတဲင် ရိုꩻဖေႏဝွေꩻ၊ “ကော်နေလိ” နုဲင်းနဝ်ꩻသွူ။
4စွဉ်ႏထာꩻငမ်းသꩻနဝ်ꩻ ဝွေꩻထွားစဲင်း မို့ꩻလောင်းတမန်ႏ တဲင်ဒေါ့ꩻ၊ “အလိုႏတောႏ အဝ်ႏတမုဲင်ꩻဟောင်းဗွေႏ၊” နုဲင်းနဝ်ꩻသွူ။။
မို့ꩻလောင်းတမန်ႏ လဝ်းချာ၊ “ဗွေႏဘုရာꩻနဝ်ꩻ ကျွိုက်နစ်သက် နာꩻထာꩻဆုတောင်ꩻ တွမ်ႏနာꩻထာꩻလူႏ ထာꩻတန်ꩻစွဉ်ႏ ကမာꩻဒါႏ မေတ္တာႏ ထာꩻမာꩻဖုံႏတဲင် လဝ်းဖြေႏချာနာꩻသွူ။ 5နဝ်ꩻမꩻ ယိုခါ အွဉ်ႏစွꩻလွေꩻ လိုꩻယင်ဟန်ႏ ဝေင်ꩻယုပ္ပေတွော့ꩻ အွဉ်ႏဟဲ့ꩻပါꩻမဉ်ꩻ ကဟဲ့ꩻဒါႏ သိမုန်ပေတရုနဝ်ꩻဟုဲင်း။ 6ဝွေꩻနဝ်ꩻ အဝ်ႏမာꩻထဉ်ႏ တဖြို့ꩻမာꩻသား ပါꩻမဉ်ꩻကဟဲ့ꩻဒါႏ သိမုန်နဝ်ꩻအလမ်း ကအဝ်ႏအုံဒါႏ ပင်ႏလယ်ႏဖင်ႏထျꩻနဝ်ꩻသွူ။ 7နဝ်ꩻထွူ မို့ꩻလောင်းတမန်ႏ ထန်ႏလွေꩻညာꩻထိုꩻတဲင် ကော်နေလိ ဟဲ့ꩻဝွေꩻလမ်းအသွဉ်း ဝင်ꩻနီတွမ်ႏ ဘုရာꩻတရာꩻသား ကပွေါးရံႏဒါႏဝွေꩻ စဲ့ꩻသားတဖြာꩻနဝ်ꩻသွူ။ 8နုဲင်းထာꩻကထွာလဲဉ်း ခရာႏဖုံႏနဝ်ꩻ ဝွေꩻဒေါ့ꩻနယ်ဖေႏ ဝွေꩻသီးတွော့ꩻ အွဉ်ႏစွꩻလွေꩻ ဝွေꩻသီး ဝေင်ꩻယုပ္ပေနဝ်ꩻသွူ။
9ဆုဲင်ꩻတနီꩻ နုဲင်းဝွေꩻသီး ကအဝ်ႏလွေꩻ ဝွေꩻသီးတဖူꩻနဝ်ꩻ ဖျော်လွဉ်ဗော့ꩻစွဉ်ႏ ဝေင်ꩻယုပ္ပေ မွူးနွောင်းရပ်နဝ်ꩻ ပေတရုထင်ႏလမ်း အခန်ꩻကီတွော့ꩻ အီႏဆုတောင်ꩻ ဘုရာꩻနဝ်ꩻသွူ။ 10ဝွေꩻဟို့ꩻခိုး ထာꩻအံႏတဲင် မဉ်အံႏထာꩻအံႏ တစွိုးစွိုးနဝ်ꩻသွူ။ ကအဝ်ႏဖျင်ဖေႏ ထာꩻအံႏကျာꩻနဝ်ꩻ ဝွေꩻထီႏ ရူႏပါႏရုံႏ တစွိုးသွူ။ 11ဝွေꩻထီႏ ခမ်းထီမို့ꩻလောင်းနဝ်ꩻ ဗွောင်တဲင် ထာꩻတစွိုး ထွားဗွိုန်နုဲင်း ပိတ်ခဝ်တန် အဝ်ႏစွိုင်ခါꩻ အစဲင်ႏလစ်ꩻဖဲ့ꩻ နုဲင်းတွေနဝ်ꩻ အဝ်ႏလင်ꩻလွဉ် ဟံႏတန်လောင်းသွူ။ 12နဝ်ꩻကောင်းကိုနဝ်ꩻ တိရစ္ဆာန်ႏမျိုꩻပေါင်ꩻ ကားကအဝ်ႏ၊ ထာꩻသား တွာႏလွေꩻနေးဒါႏ အဟို့ꩻဖုံႏတွမ်ႏ ဝါးထာꩻခြာ အမျိုꩻမျိုꩻဖုံႏ အဝ်ႏသော့ꩻသွူ။ 13ငဝ်းတငွါ ဒေါ့ꩻဖေႏဝွေꩻ၊ “ပေတရု ထွိုင်ႏဟုဲင်း၊ မာꩻသီတွော့ꩻ အံႏဟုဲင်း” နုဲင်းနဝ်ꩻသွူ။
14ကွဲႏတွော့ꩻ ပေတရုဒေါ့ꩻ၊ “တမွေးတဝ်းဗွေႏ၊ ထာꩻတကြောင်းစင်တဝ်း တစွိုးစွိုးတဲ့နဝ်ꩻ ထာꩻတဗော့ꩻလဲ့ꩻ တဲ့နဝ်ꩻ မုဲင်ꩻခါတဲ့ ခွေသွဉ်း တအံႏဖိုတဝ်း” နုဲင်းနဝ်ꩻသွူ။
15ငဝ်းနဝ်ꩻ ဒေါ့ꩻဖေႏဖျင် ဝွေꩻတလဲင်ႏ၊ “ဗွေႏဘုရာꩻကရိုꩻဒါႏ ကြောင်းစင် စွုမ်ႏစွိုးနဝ်ꩻ တကြောင်းစင်တဝ်း နုဲင်းနဝ်ꩻနဝ်ꩻ ယူႏစဉ်ꩻစာꩻဗာႏတဝ်း” နုဲင်းနဝ်ꩻသွူ။ 16ထွာထာꩻ နုဲင်းယို ဗွေသွံလဲင်ႏထွူ ထာꩻနဝ်ꩻဖုံႏနဝ်ꩻ သိမ်ꩻထင်ႏချာယင်း မို့ꩻလောင်းကိုသွူ။
17ပွိုင်းဝွို့တွမ်ႏ ရူႏပါႏရုံႏယို အဓိပ္ပါယ်ႏ ပေတရု အဝ်ႏယူႏကွင်ကယ် တွင်ꩻ ကော်နေလိ ကအွဉ်ႏစွꩻလွဉ် လိုꩻဖုံႏနဝ်ꩻ၊ သိမုန်လမ်း အဝ်ႏမုဲင်ꩻကို အဝ်ႏထုမ်ႏရီတဲင် ယိုခါ အဝ်ႏဖျော်လွဉ် အုံထွိုင်ႏထာꩻ လမ်းငါ တခါꩻတန်ထျꩻသွူ။ 18ဝွေꩻသီး ခြဝ်ထန်ႏတဲင်ရီ၊ “ထဉ်ႏတဖြာꩻ မဉ်ꩻကဟဲ့ꩻဒါႏ သိမုန်ပေတရုနဝ်ꩻ အဝ်ႏနေယိုကိုဟောင်း” နုဲင်းနဝ်ꩻသွူ။
19ဖေႏကသေနာႏ ရူႏပါႏရုံႏ အဓိပ္ပါယ်ႏ ပေတရု အဝ်ႏကျိုꩻစာꩻချိန်ႏနဝ်ꩻ ဝိညာဉ်ႏတောႏ ဒေါ့ꩻဖေႏဝွေꩻ၊ “နာႏဟုဲင်း၊ ပါꩻခိုဝင်ꩻသွံ အဝ်ႏထုမ်ႏနာꩻသွူ။ 20နဝ်ꩻမꩻ ဖျင်ရဲဉ်ꩻတွော့ꩻ လင်ꩻတဲင် ကအီႏလွေꩻငီꩻစွဉ်ႏ ဝွေꩻသီးနဝ်ꩻ တွမ်ႏယွိုန်းထွို့ꩻမွိုန်းဟုဲင်း၊ ပွိုးတွော့ꩻ ဝွေꩻသီးနဝ်ꩻ ခွေအွဉ်ႏစွꩻလွဉ်ဒျာႏ” နုဲင်းနဝ်ꩻသွူ။ 21နဝ်ꩻမꩻ ပေတရုလင်ꩻတဲင် ဒေါ့ꩻဖေႏပါꩻခို၊ “ပါꩻခို သီကအဝ်ႏထုမ်ႏဒါႏနဝ်ꩻ ခွေသွူ။ ပွိုးအကျောင်ꩻ ခရာႏတမုဲင်ꩻတဲင် သီလွဉ်ဗာႏတွိုႏဟောင်း” နုဲင်းနဝ်ꩻသွူ။
22ဝွေꩻသီးလဝ်းချာ၊ “စဲ့ꩻပိုႏတန် ကော်နေလိ အွဉ်ႏစွꩻလွဉ်နီ၊ ဝွေꩻနဝ်ꩻထွာ လိုꩻဟဝ်တဖြာꩻ ဝုဲင်ႏကိုꩻကွယ်ႏဒျာႏ ဗွေႏဘုရာꩻတဲင် ဂျူးလိုꩻမျိုꩻဖုံႏ ကားကအဝ်ႏနဝ်ꩻ ရိုႏသေႏမွေးစွဉ်ႏ ဝွေꩻသွူ။ ဗွေႏဘုရာꩻ အမို့ꩻလောင်းတမန်ႏတပါꩻနဝ်ꩻ လွဉ်ဒေါ့ꩻဖေႏဝွေꩻ နာꩻကဒေါ့ꩻဒါႏငဝ်းဖုံႏ ဖေႏနေး ဝွေꩻကဟွိုန်ဗာႏနဝ်ꩻ အွဉ်ႏနီဖစ်ဟဲ့ꩻနာꩻ ဖေႏကလွဉ်လယ်ႏ ကော်နေလိလမ်း ” နုဲင်းနဝ်ꩻသွူ။ 23ပါꩻခိုဖုံႏနဝ်ꩻ ပေတရုဖစ်သော့ꩻ လမ်းကိုတဲင် ဝွေꩻသီးဗေင်ႏ နဝ်ꩻကို တနာꩻသွူ။
ဆုဲင်ꩻတနီꩻ ဝွေꩻဖျင်ရဲဉ်ꩻတဲင် လွေꩻငီꩻစွဉ်ႏ ဝွေꩻသီးတွော့ꩻ စွဉ်ႏလိုꩻကယွုမ်းသားဖုံႏ ဝေင်ꩻယုပ္ပေကို ယင်ဟန်ႏနဝ်ꩻ လွေꩻငီꩻစွဉ်ႏ ဝွေꩻနဝ်ꩻသွူ။ 24ဆုဲင်ꩻတနီꩻ ဝွေꩻဖျော်သော့ꩻ ဝေင်ꩻကဲသရိကိုတွော့ꩻ နဝ်ꩻကိုနဝ်ꩻ ကော်နေလိ ကဖစ်ဟဲ့ꩻသေꩻခါꩻ အဖူးဝေးဖုံႏတွမ်ႏ အသွꩻဟဝ်ဖုံႏ ဝွေꩻကအဝ်ႏ ဖစ်ခါꩻဖုံႏနဝ်ꩻ ကအုံစုဗူႏလို့ဒါႏဝင်ꩻတွမ်ႏ ကော်နေလိနဝ်ꩻ အဝ်ႏအုံပွေါးဆွုမ်ႏသွူ။ 25နုဲင်းပေတရု ထွိုင်ႏအီႏနွို့သော့ꩻ ကောင်းကိုချိန်ႏ ကော်နေလိ အွပ်ꩻလင်ꩻစွဉ်ႏ ပေတရုဆꩻငါတဲင် ကျိုႏဆွုမ်ႏစွဉ်ႏ ဝွေꩻနဝ်ꩻသွူ။ 26ကွဲႏတွော့ꩻ ပေတရု စွီႏထွိုင်ႏဝွေꩻထွူ၊ ပေတရုဒေါ့ꩻ၊ “အုံထွိုင်ႏဟုဲင်း၊ ခွေတဲ့ ထွာဒျာႏ လိုꩻတဖြာꩻလွုမ်ꩻနေနေ” နုဲင်းနဝ်ꩻသွူ။ 27ပေတရု အဝ်ႏဒေါ့ꩻရီသွုပ်တွမ်ႏ ကော်နေလိ၊ နုဲင်းဝွေꩻကအဝ်ႏ နွို့လွေꩻသော့ꩻ လမ်းကိုချိန်ႏနဝ်ꩻ ဝွေꩻထီႏ လိုꩻအဝ်ႏအုံစုဗူႏ လို့ဝင်ꩻအာငါႏသွူ။ 28ပေတရုဒေါ့ꩻဖေႏဝွေꩻသီး၊ “ဂျူးတဖြာꩻ စွဉ်ႏဝွေꩻဘာႏသာႏရေꩻ ထွုံꩻအလꩻ ကအီႏလယ်ႏဝင်ꩻ မဉ်ႏတမွေးတဝ်း ကအီႏပေါင်ꩻငီꩻစွဉ်ႏ လိုꩻမျိုꩻလင်နဝ်ꩻ တဖေႏတဝ်း အခွင်ꩻနဝ်ꩻ သီနမ်းဖုံႏ အဝ်ႏသေစဲင်းဒျာႏသွူ။ ကွဲႏတွော့ꩻ လိုꩻပုဂ္ဂိုလ်ႏ အဖြာꩻမုဲင်ꩻတယဝ်း တကြောင်းစင်တဝ်း မဉ်ႏတမွေးတဝ်း တဗော့ꩻလဲ့ꩻတန် ဖေႏကယူႏ စဉ်ꩻစာꩻဗာႏမွိုန်းနဝ်ꩻ ဗွေႏဘုရာꩻ အဝ်ႏအွဉ်ႏနယ်ဖေႏလဲဉ်း ခွေသွူ။ 29နဝ်ꩻမꩻ နာꩻကအွဉ်ႏစွꩻလွဉ် ဖစ်ဟဲ့ꩻခွေနဝ်ꩻ ခွေတရိုꩻတဝ်း တမုဲင်ꩻမုဲင်ꩻတွော့ꩻ ခွေလွဉ်ဒျာႏနဝ်ꩻသွူ။ နဝ်ꩻထွူ ခွေရီနာꩻ ပွိုးတမုဲင်ꩻ နာꩻအွဉ်ႏလွဉ် ဖစ်ဟဲ့ꩻဗာႏတွိုႏ ခွေဟောင်း” နုဲင်းနဝ်ꩻသွူ။
30ကော်နေလိဒေါ့ꩻ၊ “ကလဲဉ်းလဲဉ်းဒါႏ သွံနီꩻအချိန်ႏယို မွူးပင်ꩻ သွံနားရီႏရပ်နဝ်ꩻ ခွေအဝ်ႏဆုတောင်ꩻ ဘုရာꩻ ခွေလမ်းကိုသွူ။ ပါꩻခိုတဖြာꩻ ကွဉ်ကꩻခွမ်ꩻလာꩻ ခလိက်ꩻနဝ်ꩻ အုံထွိုင်ႏစွော့ꩻ ခွေဆꩻငါတဲင်၊ 31ဒေါ့ꩻ၊ ‘ကော်နေလိ၊ ဗွေႏဘုရာꩻ အဝ်ႏဟွိုန် နာꩻဆုတောင်ꩻ ငဝ်းတဲင် နာꩻထာꩻလူႏ စွဲကမ်းကိုဒါႏဝင်ꩻနဝ်ꩻ အဝ်ႏမတ်လက္ခံႏလဲဉ်း နဝ်ꩻသွူ။ 32နဝ်ꩻမꩻ အွဉ်ႏစွꩻလွေꩻ လိုꩻယင်ဟန်ႏ ဝေင်ꩻယုပ္ပေတွော့ꩻ ဖစ်လွဉ်သွော့ ပါꩻတဖြာꩻ မဉ်ꩻကဟဲ့ꩻ သိမုန်ပေတရုနဝ်ꩻဟုဲင်း။ ဝွေꩻနဝ်ꩻ အဝ်ႏမာꩻထဉ်ႏဒျာႏ တဖြို့ꩻမာꩻသား သိမုန်အလမ်း ပင်ႏလယ်ႏဖင်ႏလယ်ႏထျꩻ’ နုဲင်းနဝ်ꩻသွူ။ 33နဝ်ꩻမꩻ တလဲင်ႏချင်ꩻ ခွေအွဉ်ႏဖစ်ဟဲ့ꩻနာꩻတဲင် နာꩻဖျော်လွဉ် ဟဝ်ဟဝ်လဲဉ်းနဝ်ꩻသွူ။ ဖေႏကနာႏဗာႏ ဗွေႏဘုရာꩻ ကထွန်ႏသေꩻခါꩻ နာꩻဖေႏကဒေါ့ꩻ တစွိုးစွိုးနဝ်ꩻ ယိုခါ နီကားကအဝ်ႏနဝ်ꩻ ဖျော်လွဉ်လဲဉ်း ဗွေႏဘုရာꩻဆꩻငါ ယိုကို” နုဲင်းနဝ်ꩻသွူ။
ပေတရုဟော်ꩻတရာꩻ
34 #
ဟော်ꩻ ၁၀:၁၇။ ပေတရု ဒေါ့ꩻစ၊ “အမဲဉ်ႏနဝ်ꩻ ဗွေႏဘုရာꩻ တခွယ်ꩻချာꩻတဝ်း လိုꩻဖုံႏ၊ လိုꩻစွုမ်ႏဖြာꩻဖြာꩻနဝ်ꩻ အွဉ်ႏဗွိုန် လို့ဒျာႏဝင်ꩻကျောင်ꩻ ယိုခါ ခွေသေလဲဉ်းနဝ်ꩻသွူ။ 35လိုꩻကငမ်း ရိုႏသေႏဒါႏ ဗွေႏဘုရာꩻတွော့ꩻ မာꩻဒျာႏ နုဲင်းအမဲဉ်ႏတရာꩻဖုံႏနဝ်ꩻ ဝွေꩻသီးထွာခန်း လိုꩻမျိုꩻမုဲင်ꩻတယဝ်း ကိစ္စတအဲဉ်ထဝ်း ဝွေꩻဗွေႏ လက္ခံႏနွောင်ꩻဒျာႏသွူ။ 36တရာꩻ ဝွေꩻဗွေႏ ကပသာဒါႏ ဣသရေး လိုꩻမျိုꩻဖုံႏထျꩻနဝ်ꩻ ကအုပ်စိုꩻထာꩻ ကားကအဝ်ႏအဗွေႏ စွဉ်ႏဗွေႏယေသျု ခရစ်တောႏ ကကေႏညာႏဒါႏ ထာꩻငိမ်ꩻချမ်ꩻသာႏ သတင်ꩻဟဝ်နဝ်ꩻ သီအဝ်ႏသေဒျာႏသွူ။ 37ယောဟန်ကဟော်ꩻ ဝွေꩻဗတ္တိဇံႏတရာꩻ ထွိုင်ႏထွူ တယ်ႏစစွဉ်ႏ ကာလိလဲခမ်း စွစ်ꩻစဲစ်စွဉ်ႏ ဣသရေးတခမ်းလွုမ်း ထာꩻကထွာလွဉ် သန်မွေးဒါႏနဝ်ꩻ သီ အဝ်ႏသေဒျာႏသွူ။ 38ပွိုင်းဝွို့တွမ်ႏ နာဇရဲစ် ဝေင်ꩻသား ဗွေႏယေသျု ခရာႏစွဉ်ႏ ဗွေႏဘုရာꩻ ထောက်ꩻထန်ႏဖေႏ ဝွေꩻဗွေႏလောင်း ကြောင်းစင် ဝိညာဉ်ႏတောႏ တွမ်ႏတန်ꩻခိုꩻ ခွိုင်းကားမုဲင်ꩻနဝ်ꩻ သီအဝ်ႏသေဒျာႏသွူ။ ပွိုးဗွေႏဘုရာꩻ အဝ်ႏငီꩻစွဉ်ႏ ဝွေꩻဗွေႏ နဝ်ꩻမꩻဝွေꩻဗွေႏ လွေꩻစွဉ်ႏ ခင်ႏလမ်းမုဲင်ꩻတယဝ်း အဝ်ႏမာꩻဒျာႏ ထာꩻဟဝ်တဲင် လုမ်ꩻလာꩻဟဝ်ဖေႏဒျာႏ လိုꩻကခံႏဗာႏဒါႏ မာရ်ႏနတ် ထာꩻနစ်စက်ဖုံႏနဝ်ꩻသွူ။ 39ဝွေꩻဗွေႏ ကမာꩻလဲဉ်း ထာꩻမာꩻ ဣသရေးခမ်းကိုတွမ်ႏ ဝေင်ꩻယေရုသလမ်ႏကို ကားကအဝ်ႏခရာႏနဝ်ꩻ နီအဝ်ႏထွာ သက်သေႏသွူ။ နဝ်ꩻထွူ စွဉ်ႏမုဲင်းနာꩻ ဝွေꩻသီး တွဲႏဒပ် ဝွေꩻဗွေႏ ကင်းထွန်ႏ တဗာႏလောင်းတွော့ꩻ မာꩻသီထိုꩻစွဉ်ႏ ဝွေꩻဗွေႏသွူ။ 40ကွဲႏတွော့ꩻ သွံနီꩻထွူ အဝ်ႏထာꩻသီကို ဗွေႏဘုရာꩻ မာꩻထွိုင်ႏမွန် ဖေႏချာယင်းဝွေꩻတဲင် ဝွေꩻဗွေႏ ပေါႏနယ်ထေ့ဖေႏ အနမ်း၊ 41လိုꩻစွုမ်ႏဖြာꩻထျꩻ မွေးတဝ်း၊ ကွဲႏတွော့ꩻ ပေါႏနယ်ထေ့ဒျာႏ ပါꩻဗွေႏဘုရာꩻ ကလွိုက်သေꩻခါꩻလဲဉ်းဒါႏ ကအီႏခံႏ သက်သေႏသားဖုံႏလွုမ်ꩻသွူ။ ဝွေꩻဗွေႏ ကအဝ်ႏထာꩻသီ ထွိုင်ႏမွန်လွဉ်ချာထွူ လိုꩻကအဝ်ႏအံႏ အွꩻငီꩻဒါႏ တွမ်ႏဝွေꩻဗွေႏနဝ်ꩻ ထွာဒျာႏ နီသွူ။ 42ဖေႏကဟော်ꩻဖေႏ လိုꩻဖုံႏ သတင်ꩻဟဝ် တရာꩻတွမ်ႏ ဖေႏကခံႏဖေႏ သက်သေႏ၊ ဝွေꩻဗွေႏနဝ်ꩻထွာ ဗွေႏအပါꩻ ဗွေႏဘုရာꩻ ခန်ꩻသေꩻခါꩻ အီႏစီႏရင်ႏဗာႏ လိုꩻသက်မွန်သားတွမ်ႏ လိုꩻသီလဲဉ်းသားဖုံႏ တရာꩻနဝ်ꩻ ဝွေꩻဗွေႏ မိန်းဖေႏနီနဝ်ꩻသွူ။ 43လိုꩻကယွုမ်းဒါႏ ဝွေꩻဗွေႏသား ကားကအဝ်ႏ တွမ်ႏဝွေꩻဗွေႏ အမဉ်ꩻတောႏ နာႏမတန်ꩻခိုꩻနဝ်ꩻ ဝွေꩻသီးအပဲစ်ဖုံႏ အီႏလွစ်ဗာႏ ပွိုင်းဝွို့တွမ်ႏ ကအဝ်ႏရိုꩻဒါႏ ဝွေꩻဗွေႏခရာႏနဝ်ꩻ ပရောဖဲစ်ဖုံႏ ကားကအဝ်ႏ ဟော်ꩻသေꩻခါꩻလဲဉ်း” နုဲင်းနဝ်ꩻသွူ။
လိုꩻမျိုꩻလင်ဖုံႏလက်ခံႏလꩻကြောင်းစင်ဝိညာဉ်ႏတောႏ
44ပေတရု ကအဝ်ႏဒေါ့ꩻကျာꩻနဝ်ꩻ ကြောင်းစင် ဝိညာဉ်ႏတောႏ ကျွꩻလင်ꩻလွဉ် လိုꩻကအဝ်ႏနာႏဒါႏ ဝွေꩻတရာꩻငဝ်းသား လောင်းနဝ်ꩻသွူ။ 45လိုꩻမျိုꩻလင်ဖုံႏ လောင်းနဝ်ꩻတဲ့ ဗွေႏဘုရာꩻ အဝ်ႏထောက်ꩻလင်ꩻဖေႏပါက ဝွေꩻဗွေႏ ဆုကေꩻဇူꩻ ကြောင်းစင် ဝိညာဉ်ႏတောႏ နဝ်ꩻမ ကယွုမ်းသားဂျူး လိုꩻမျိုꩻဖုံႏ အဝ်ႏဝေင်ꩻယုပ္ပေ ကလွဉ်လွဉ်ꩻဒါႏ စွဉ်ႏပေတရုနဝ်ꩻ အံႏဖြာႏမွေးနေးစွဉ်ႏသွူ။ 46ပွိုးဝွေꩻသီးနဝ်ꩻ အဝ်ႏဟွိုန်၊ လိုꩻမျိုꩻလင်ဖုံႏ ဒေါ့ꩻငဝ်းထူꩻဆန်ꩻတဲင် အဝ်ႏအုပ်ꩻထင်ႏ ကတန်မျတ်ငါႏ ဗွေႏဘုရာꩻ ဂွုဏ်ႏတောႏ အတွက်သွူ။ ပေတရု ဒေါ့ꩻထန်ႏ၊ 47“နုဲင်းနီကလꩻလဲဉ်း ကြောင်းစင် ဝိညာဉ်ႏတောႏနဝ်ꩻ ဝွေꩻသီးယို အဝ်ႏလက်ခံႏလꩻလဲဉ်း နေနေသွူ။ နဝ်ꩻထွူ စွဉ်ႏထီ ကအီႏခံႏဒါႏ ဗတ္တိဇံႏမင်္ဂလာႏနဝ်ꩻ ပါꩻမုဲင်ꩻတဖြာꩻ အီႏရဲဆီꩻနွောင်ꩻ ဝွေꩻသီးဟောင်း” နုဲင်းနဝ်ꩻသွူ။ 48နဝ်ꩻမꩻ စွဉ်ႏဗွေႏယေသျု ခရစ်တောႏ အမဉ်ꩻတောႏနာႏမ ဖေႏကခံႏဗတ္တိဇံႏ ထီမင်္ဂလာႏနဝ်ꩻ ပေတရုမိန်းဖေႏ ဝွေꩻသီးသွူ။ နဝ်ꩻထွူ ဖေႏကအုံငီꩻ တွမ်ႏဝွေꩻသီး တဆင်ႏပေႏနဝ်ꩻ ဝွေꩻသီး တောင်ꩻပြန်ႏ ပေတရုသွူ။
ទើបបានជ្រើសរើសហើយ៖
တမန်ႏတောႏ 10: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
