اِنجیل مَتّی 22
22
جشن عروسی مَثَّل
1عیسی هَنی اَوون نَه مَثَّلون نَه گف ژَندِشَه، واتِشه: 2«آسِمونی پاُتشایی، ایلَه شاهی شیوارَه كه اِشتَن زوعَه را عروسی گِتَشه. 3پاُتشا اِشتَن نوکَرون، ویسا آکَردِشه دَعوتیون وَر تا اَوون نَه بوآجِن بان جشن، امّا اَوِن نِپیستِشونَه بان. 4پاُتشا هَنی چَن گِله دییَر نوکَر ویسا آکَردِشه و واتِشه: ”دعوتیون نَه بوآجَه دَیِسه جشنی سِفره حاضیر آکَردَمه، چِمِن گا اون و کوکَه موندَه اون نی سَر آبِردَمه و همه چی حاضیرَه. بَس بایَه عروسی.“ 5امّا اَوِن اِعتِنا نِکَردِشونَه و هَر کمیله شینَه اِشتَن کاری سَر. ایی نفر شَه اِشتَن مزرعه را و اَ ایلَه شَه اِشتَن کَسب و کاری دومله. 6بَقیه نی، پاُتشا نوکَرون گِتِشونَه و اَوون نَه بَد رفتاری کَردِشونَه و اَوون کِشتِشونَه. 7وختی پاُتشا اِمی دَرَسِشَه، عصبانی آبَه و اِشتَن سربازون ویسا آکَردِشه و اَ قاتِلون از بِین بَردِشه و چَوون شهری آتش ژَندِشَه. 8دومله اِشتَن نوکَرون نَه واتِشه: ”جشن عروسی آمادَه یَه، امّا دعوتی اِن لایق نِبینَه بان. 9بَس بِشه کوچه بازارون را و هَر کسی ویندِرونَه دعوت بِکَرَه عروسی.“ 10نوکَرِن شینَه کوچه اون را و هَر کسی ویندِشونَه، چِه چاک و چِه بَد؛ جمع آکَردِشونَه و اِشتَن نَه وَردِشونَه و اِنتَه عروسی میهمونون نَه پُور آبَه.
11«امّا وختی پاُتشا اومَه مِجلِسی دیلَه تا میهمونون بِوینه، ایلَه مِردی ویندِشه که عروسی یَه خَلا دَکَردَش نِبَه. 12پاُتشا اَییکا دَفَرسِشه: ”اِی رَفِق، چِنتَه بیدون اِم که عروسی یَه خَلا دَکَری اومَیش اییا؟“ اَ مِرد جَواویشی نِبَه. 13اَ موقع پاُتشا اِشتَن نوکَرون نَه واتِشه: ”چَیی دَس و پا دَوَسَه و دَرَفَنَه بِرونی تاریکی کا، جِگایی که داد بَکَردین و دَندون دَندونی سَر فیشار بَداین.“ 14چوم کسونی که دَعوت بَیی نَه وِری نَه، امّا کسونی که اِنتخاب بَیی نَه كَمی نَه.»
مالیات آدوعِه بِه امپراطور
15دومله فریسی فِرقه عُلما شینَه بِرون و نَخشه کَشِشونَه تا بِوینِن چِنتَه بَشاین عیسی چَیی اِشتَن گَفون نَه تَله کا دَرَفَنِن. 16فریسییِن اِشتَن شاگِردون، هیرودیسی طَرَفدارون هَمراه ویسا آکَردِشونَه عیسی وَر و دَفَرسِشونَه: «اُستاد، اَمَه بَزنیمون كه تِه مِرد راستگویی اِستیش و خِدا راه، درستی نَه تعلیم بَدایش و بَه تِرا مهم نییِه که خَلک چِه فیکری بَکَردین، چوم که تِه ظاهِری گولی نییَری. 17بَس اِشتِه نظری بَمون نَه بوآج؛ رومی اِمپِراطوری مالیات آدوعِه جایزَه یا نِه؟» 18عیسی که چَوون بَدَه نیَّتی بَزنی، واتِشه: «اِی دِ دیمِن، چیرا مِن اِمتحان بِکَردیرون؟ 19ایلَه سکه که اَیینه شِمَه مالیاتی آدییَه مِن نیشون بِدییَه.» اَوِن ایلَه سکه ی، ایی دیناری آدوشونَه عیسی. 20عیسی اَوون کا دَفَرسِشه: «چیکی دیم و چیکی نوم سکه سَری کا یَه؟» 21اَوِن جَواو دوشونَه: «رومی اِمپِراطوری شِن.» عیسی اَوون نَه واتِشه: «بَس اَ چیی که اِمپراطوری شِنَه آدییَه اِمپراطوری و اَ چیی که خِدا شِنَه آدییَه خِدا.» 22وختی اَوِن اِمی دَرَسِشونَه، حَیرون بینَه، و عیسی وِل آکَردِشونَه و شینَه.
سوال قَیامَت روزی درباره
23هَ روز، صَدوقیون فِرقه عُلما اومینَه عیسی وَر. صَدوقییِن قبول نِدارین که مَرده اِن زِندَه آبون. اَوِن عیسی کا دَفَرسِشونَه: 24«اُستاد، موسی پیغمبر اَمَه نَه واتَشه اَگم مِردی بیدون خِردَن بِمِره، چَیی بِرا بَسی چَیی ویوَه ژِنی نَه اِزدواج بِکَرِه تا اِشتَن بِرا را نَسلی بِنه. 25چَمَه دیلَه کا هفت گِله بِرا بینَه که اوّلین بِرا ایلَه ژِنی بَردِشه و بیدون اِم که خِردَنی بِدارِه مَردَه. بَس دوّمین بِرا چَیی ژِنی بَردِشه. 26دوّمین بِرا و سوّمین بِرا نَه، تا هفتمین بِرا نی هِنتَه بینَه. 27آخِرسَر، اَ ژِن نی مَردَه. 28حِسَه، روزی کا که مَرده اِن زِندَه آبون، اَ ژِن، اَ هفت گِله بِرا اون کا کَملیه بِرا ژِن بَبی؟ چوم گِرد اَ بِرا اِن اَیینه عروسی کَردَشونَه.»
29عیسی جَواو دوشَه: «شِمَه اِشتباه فیکر بَکَردیرون، چوم نِه خِدا کلامی کا چیی بَزنیرون و نِه خِدا قدرتی کا! 30چوم روزی کا که مَرده اِن زِنده آبون کسی نِه ژِن بَبردی و نِه شو بَکَردی، بَلكَم گِرد، آسِمونی ملائیکه اون شیوار بَبین. 31امّا مَرده اون زِنده آبییِه درباره، بَگم توراتی کا خَنده رون نی خِدا شِمَه نَه چِه واتَشه؟ 32خِدا واتَشه: ”از اِبراهیمی خِدا، اِسحاقی خِدا و یعقوبی خِدا ایمَه.“ خِدا مَردَه اون خِدا نییَه بَلکَم زِنده اون خِدایَه.» 33جماعت اِم گفی دَرَسِه کا، چَیی تعلیمون کا مات بیینَه.
یالتَرین حُکم
34امّا وختی فریسی فِرقه عُلما دَرَسِشونَه كه عیسی چِنتَه اِشتَن جَواوی نَه صدوقیون گَ دَوَستِشه، یَندی دور جمع آبینَه. 35ایی نفر اَوون کا كه شریعتی قاضییون کا بَه، اِمی واسی که عیسی اِمتحان بِکَرِه، اَیی کا دَفَرسِشه: 36«اِی اُستاد، شریعتی یالتَرین حُکم کَمیله یَه؟» 37عیسی جَواو دوشَه: «خِداوند اِشتِه خِدا نَه، تَمون اِشتِه دیل و تَمون اِشتِه جان و تَمون اِشتِه فیکری نَه خِش بِبَش.“ 38اِم اوّلین و یالتَرین حُكمَه. 39دوّمین حُكم نی اوّلین حُکمی شیوارَه: ”اِشتِه خَمسوعه نَه اِشتِه جانی شیوار خِش بِبَش.“ 40اِم دِ گِله حُکم، گِرد تورات و پیغمبرون نیویشتَه اون پایَه و اَساسَه.»
مسیح موعود چیکی زوعَه یَه؟
41وختی فریسی فِرقه عُلما یَندی نَه جمع آبَه بینَه، عیسی اَوون کا دَفَرسِشه: 42«شِمَه نَظر درباره ی مسیح موعود چَه؟ اَ چیکی زوعَه یَه؟» اَوِن جَواو دوشونَه: «داوود پاُتشا زوعَه.» 43عیسی واتِشه: «بَس چِنتَه یَه كه داوود، خِدا روح واسطه نَه، مسیح نَه خِداوند بَواتی؟ چوم که داوود بَواتی:
44«”خِداوند چِمِن خِداوندی نَه واتِشه:
چِمِن راستَ دَسی کا بِنِش
تا وختی که اِشتِه دِشمَنون اِشتِه پا جیری کا دَرَفَنِم.“
45اَگم داوود اَیی نَه خِداوند بَواتی، بَس چِنتَه مسیح موعود بَشای داوودی زوعَه بِبو؟» 46و هیچکس نِشاستِشه ایی کلمه جواو بِدَه و چَیی پَش دِ هیچکس جِکَه نِکَری عیسی کا سؤالی دَفَرسی.
ទើបបានជ្រើសរើសហើយ៖
اِنجیل مَتّی 22: ITB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
