اِنجیل مَتّی 20
20
اَنگِرَه باغی کاریگَرون نَقل
1«آسِمونی پاُتشایی، ایلَه باغَ صاحیبی شیوارَه كه صِبی زو بَشی بِرون تا اِشتَن اَنگِرَه باغی را کاریگر بِگِرِه. 2باغَ صاحیب، کاریگرون نَه طِی کَردِشه که روزی ایی دینار که ایلَه کاریگری ایی روزی دَسمزد بَه، آدَه هَر کمیله اَوون. دومله اَوون ویسا آکَردِشه اِشتَن اَنگِرَه باغی را. 3تقریبا ساعت نِه صِبح بَه، باغَ صاحیب هَنی شَه بِرون و ویندِشه كه چَن نفر مَیدونی کا بیکار مَند بینَه. 4اَوون نَه واتِشه: ”شِمَه نی بِشه چِمِن اَنگِرَه باغی کا كار بِکَرَه و هَر چیی که شِمَه حقَّه شِمَه آدَم.“ 5بَس اَوِن نی شینَه. هَنی حدود ساعت دونزَه ناهار و هَم حدود سِه بعد اَز ناهار شَه بِرون و هَ کاری کَردِشه. 6تقریبا ساعت پینج بعد اَز ناهار نی شَه بِرون و چَن نفری ویندِشه که بیکار مَند بینَه. اَوون کا دَفَرسِشه: ”چیرا تَمون روز اییا کا بیكار مَندیرونَه؟“ 7اَوِن جَواو دوشونَه: ”چوم هیچ‌کس بَمون كاری آدوعَه نیشَه.“ باغَ صاحیب اَوون نَه واتِشه: ”شِمَه نی بِشَه چِمِن اَنگِرَه باغی کا كار بِکَرَه.“ 8مَغریب دَم، باغَ صاحیب، سَر کاریگری نَه واتِشه: ”كاریگرون دَخون و کسونی کا که گِردی آخِرتَر اومَیینَه شروع بِکَه تا کسونی که اوّل اومَیینَه، چَوون مُزدی آدَه.“ 9کاریگرِنی كه حدود ساعت پینج اومَه بینَه کاری سَر، هَر کمیله ایی دینار ویگِتِشونَه. 10وختی کسونی نوبت آرَستَه كه گِردی کا زودتَر اومَه بینَه کاری سَر، خیال بَکَردین که وِرتَر مُزد ویگرِن. امّا اَوِن نی هَر کمیله ایی دینار مُزد ویگِتِشونَه. 11وختی اَوِن اِشتَن مُزدی ویگِتِشونَه، غُرغُر کَردِشونَه و باغَ صاحیبی نَه واتِشونَه: 12”اِمِن که آخِر اومَینه فقط ایی ساعت كار کَردِشونَه و تِه اَوون اَمَه نَه ایلَه کَردَره که تَمون روز، کاری سنگینی چَمَه دوشی سَری کا بَه و داغَ آفتاوی جیری کا کار کَردَمونَه!“ 13باغَ صاحیب ایلَه اَوون کا دَیشتَه و واتِشه: ”اِی رَفِق، اَز كه بَه تِنَه ناحقی کَردَه نیمَه. بَگم چَمَه قرار مَدار هِم ایی دینار نِبَه؟ 14بَس اِشتِه حَقی ویگِه و بِش! اَز پیستِمَه اِم آخِرین نَفری نی اِشتِه قَدَر مُزد آدَم. 15بَگم اَز حق نِدارِم چِمِن مالی نَه هَر چِه پیستِمَه بِکَرِم؟ چِم نِداری چِمِن دَس و دیل بازی بِوینی؟“ 16بَس، کسونی که آخِرین اِستینه اوّلین بَبین و اَوّلینِن، آخِرین بَبین!»
عیسی سِوّمین پیشگویی اِشتَنِش مرگ و زِنده آبییِه درباره
17وختی عیسی بَشی اورشلیمی شهری طرفی را، راه دیلَه کا اِشتَن دونزَه گِله شاگِردی بَردِشه گوشه اییرا و اَوون نَه واتِشه: 18«دَیِسه، بَشَیمون اورشلیمی شهری را. اوآ کا اِنسانی زوعَه، سرَان کاهِنون و توراتی معلمون تَسلیم بَکَردین. و اَوِن اَیی مَحکوم بِه مَرگ بَکَردین. 19اَوِن اِنسانی زوعَه آدَن غیر یهودیون دَس تا اَئی مسخره بِکَرِن و شِلاق بِژَنِن و مَصلوب بِکَرِن. و اَ سِوّمین روزی کا زِنده آبو.»
یعقوب و یوحنا، نَنه درخواست
20اَ موقع یعقوب و یوحنا نَنه، اِشتَن دِ گِله زوعَه اون نَه اومَه عیسی وَر. یعقوب و یوحنا زِبِدی زوعَه اِن بینَه. چَوون نَنه عیسی ناری کا زِنگ ژَندِشَه، عیسی کا پیستِشَه که اَیی را کاری بِکَرِه. 21عیسی دَفَرسِشه: «چِه پیستِرَه؟» ژِن واتِشه: «بوآج تا چِمِن اِم دِ گِله زوعَه اِن اِشتِه پاُتشایی کا، ایلَه اِشتِه راست طرفی کا و اَ ایلَه اِشتِه چپَ طرفی کا بنِشِن.» 22عیسی واتِشه: «شِمَه نیمَزنَه چِه چی پیستِرونَه. مَگم شِمَه بَشایرون اَ عذابَ قَدره ای کا كه اَز هِم زودییون اَیی کا هِنجِم، شِمَه نی بِنجَه؟» اَوِن جَواو دوشونَه: «ها، بَشایمون.» 23عیسی اَوون نَه واتِشه: «شِمَه نی چِمِن هَ قَدَره کا هِنجَه، امّا بِزونَه اَز اِختیار نیمَه که بوآجِم کی چِمِن راست طرف و چپ طرفی کا بِنِشه. اِم جِگا کسونی شِنَه که چِمِن آسِمونی یَه دَده اَوون را آمادَه آکَردَشَه.»
24وختی اَ دَه گِله شاگِرد اِم ماجرا دَرَسِشونَه، اَ دِ گِله بِرا را بَرک عصبانی آبینَه. 25امّا عیسی اَوون دَخوندِشه و واتِشه: «شِمَه بَزنیرون که دییَر قومون حاکِمِن اَوون را حکمرانی بَکَردین و چَوون رَئیسِن اِشتَن دَس جیرون دَستور بَداین. 26امّا شِمَه دیلَه کا اِنتَه مَبو. هَر کسی پیستِشَه شِمَه دیلَه کا یال بِبو، بَسی شِمَه نوکَر بِبو. 27و هَر کسی پیستِشَه شِمَه دیلَه کا اوّل بِبو، بَسی شِمَه غلام بِبو. 28حتی اِنسانی زوعَه نی اومَه نییَه تا اَیی خدمت بِکَرِن، بَلكَم اومَه تا مردمی خدمت بِکَرِه و اِشتَن جانی وِر کَسون آزادی را فیدا بِکَرِه.»
دِ گِله كوری شفا
29وختی عیسی و چَیی شاگِردِن اَریحا شهری نَه کارا بَشین، وِرَه جماعتی عیسی دومله راه دَلَکینه. 30راه کَناری کا، دِ گِله کورَه مِرد نِشت بینَه. وختی اَوِن دَرَسِشونَه كه عیسی اوآنَه دَوییَره، خِلِع بَکَردین، بَواتین: «اِی آقا، اِی داوود پاُتشا زوعَه، بَمون رَحم بِکَه!» 31مردم اَوون را زِرَه گِتِشونَه و اَوون نَه واتِشونَه که ساكیت آبون؛ امّا اَ دِ نفر وِرتَر خِلِع بَکَردین، بَواتین: «اِی آقا، اِی داوود پاُتشا زوعَه، بَمون رَحم بِکَه!» 32عیسی مَنده و اَ دِ نفری سَس کَردِشه و دَفَرسِشه: «پیستِرونَه شِمَه را چِه بِکَرِم؟» 33اَوِن واتِشونَه: «اِی آقا، اَمَه پیستِمونَه چَمَه چِمِن بِوینِن.» 34عیسی دیل اَوون را سیستَه و چَوون چِمی دَس آسوشَه. چَوون چِمِن اَلبَحَل آبینَه و بَشاین بِوینین و عیسی دومله راه دَلَکینه.
ទើបបានជ្រើសរើសហើយ៖
اِنجیل مَتّی 20: ITB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
