اِنجیل مَتّی 19
19
عیسی تعلیم دوعِه درباره طلاق
1وختی عیسی اِم گفِن تَمون آبینَه، جلیلی ولایتی نَه شَه بِرون و شَه اُردن رِواری اَ طَرف یهودیه نواحی را. 2وِرَه جماعتی عیسی دومله راه دَلَکینه و عیسی اوآ کا اَوون شفا دوشَه.
3فریسی فِرقه عُلما نی اومینَه عیسی وَر تا اَیی اِمتحان بِکَرِن. اَوِن دَفَرسِشونَه: «جایِزَه مِرد اِشتَن ژِنی هَر چی واسی طلاق بِدَه؟» 4عیسی جَواو دوشَه: «بَگم توراتی کا خَندَرون نی، کسی که اَوون خلق کَردِشه، صِفته نهَ ”اَوون مِرد و ژِن خَلق کَردِشه“، 5و واتِشه که: ”اِمی واسی، مِرد اِشتَن دَده نَنه کا جِدا آبو، اِشتَن ژِنی دَچیکه و اَ دِ نفر ایلَه بَدَن آبون“؟ 6بَس اَوِن دِ، دِ گِله بَدن نینَه بَلكَم ایلَه بَدنی نَه، بَس اَ چی که خِدا پیوند دوعَشَه، اِنسان جِدا آمَکَرِه.» 7اَوِن عیسی نَه واتِشونَه: «بَس چیرا موسی پیغمبر حُکم کَردِشه كه مِرد ایلَه طلاق نامه اِشتَن ژِنی آدَه و اَیی وِل آکَرِه؟» 8عیسی جَواو دوشَه: «شِمَه دیل سِنگ بییِه واسی موسی اِجازه دوشَه شِمَه ژِنی طلاق بِدییَه، امّا صفته نَه اِنتَه نِبَه. 9شِمَه نَه بَواتیم، هَر کسی اِشتَن ژِنی زِنا غِیراز، دییَر چیی واسی طلاق بِدَه و دییَر ژنی بِبَرِه، زِنا کَردَشه.» 10شاگِردِن عیسی نَه واتِشونَه: «اَگم اِنتَه بِبو، بَس چاکتَرَه که هیچ مِردی ژِن مَبَرِه!» 11ولی عیسی اَوون نَه واتِشه: «هَر کسی نیمَشا اِم کلامی قبول بِکَرِه، مَگم اَ کسونی که اَوون عطا بییَه بِبو. 12چوم بعضی خواجه اِن مادر زادی خواجه اینه؛ بَعضی خواجه اِن نی، مردم اَوون خواجه کَردَشونَه؛ و بَعضی نی آسِمونی پاُتشایی واسی عروسی نِکَرِن. بَس هَر کسی بَشای اِمی قبول بِکَرِه، بِدا قبول بِکَرِه.»
عیسی و خِردَنن
13دومله مردم خِردَنون وَردِشونَه عیسی وَر که اِشتَن دَسی چَوون سَر پِنَه و اَوون را دعا بِکَرِه. امّا شاگِردِن مردمی را زِرَه گِتِشونَه. 14امّا عیسی واتِشه: «بِدارَه روکه خِردَنِن بان چِمِن وَر و چَوون ناری مَگِرَه، چوم آسِمونی پاُتشایی اِنتَه رَه کَسونی شِنَه.» 15عیسی خِردَنون سَری دَس پِنوشه و اَوون بَرکت دوشَه و اوآکا شَه.
جَوونَ ثیروتمند
16ایی روز ایلَه مِردی اومَه عیسی وَر و دَفَرسِشه: «اِی اُستاد، چِه چاکَه كاری بَسی بِکَرِم تا بِشام اَبَدی یَه زِندگی بِه دَس بواَرم؟» 17عیسی اَیی نَه واتِشه: «چیرا چاکَه کاری درباره بَه مِن کا دَفَرسی؟ فقط خِدا چاکَه. اَگم پیستِرَه اَبَدی یَه زندگی دیلَه دَشی، خِدا اَحکامی اَنجام بِدَه.» 18اَ مِرد عیسی کا دَفَرسِشه: «کَمیله اَحكام؟» عیسی جَواو دوشَه: «”قتل مَکَه، زِنا مَکَه، دِزدی مَکَه، دوروعه شهادتی مَدَه، 19اِشتِه دَده نَنه حُرمت بِکَه و اِشتِه خَمسوعَه نَه اِشتِه جانی شیوار خِش بِبَش.“» 20اَ جوونَ مِرد واتِشه: «اَز گِرد اِمون اَنجام دوعَمه؛ دِ چِه چیی کم دارِم؟» 21عیسی اَیی نَه واتِشه: «اَگم پیستِرَه كامِل بِبی، بِش و هَر چیی که هِستِرَه بِخرَش و چَیی پولی آدَه فُقَرا تا آسِمونی کا گنج بِداری. دومله بِری و بَه مِن کا پِیرَوی بِکَه.» 22وختی اَ جَوونَ مِرد اِمی دَرَسِشَه، پَکَر آبَه و اوآنَه شَه، چوم وِر ثروتِش اِستبَه.
23اَ موقع عیسی اِشتَن شاگِردون نَه واتِشه: «حقیقتن شِمَه نَه بَواتیم، که ایلَه ثیروتمندی را وِر چَتینَه که آسِمونی پاُتشایی دیلَه دَشو. 24هَنی شِمَه نَه بَواتیم كه دَوَه دَوییَرده دَرزِنی خِلَه کا راحتتَرَه تا اِم که ایلَه ثیروتمندَه آدَم، دَشو خِدا پاُتشایی دیلَه.» 25شاگِردِن اِم گَفی دَرسِه کا مات آبینَه و دَفَرسِشونَه: «بَس دِ کی بَشای نجات پیدا بِکَرِه؟» 26امّا عیسی اَوون دَیشتَه و واتِشه: «اِم کار اِنسانی را غِیر ممکِنَه، امّا خِدا را همه چی مُمکِنه.» 27دومله پطرس، عیسی نَه واتِشه: «دَیِس اَمَه همه چی وِل آکَردَمونَه اومَیمونَه بَه تِه کا پیروی بَکَردیمون. بَس چِه چی چَمَه نصیب بَبی؟» 28عیسی جَواو دوشَه: «حقیقتن شِمَه نَه بَواتیم، وختی اِنسانی زوعَه اَ تازه دنیا کا، اِشتَن شکوهمندَه پاُتشایی تختی سَری کا بِنِشِه، شِمَه نی كه بَه مِن کا پِیروی کَردَرونَه، دونزَه گِلَه تَختون سَری کا نِشَه و اِسرائیلی دونزَه گِلَه قبیله داوری بَکَردیرون. 29و هَر کسی چِمِن نومی واسی اِشتَن کَ یا بِرا اون، یا اِشتَن خالا اون، یا اِشتَن دَده نَنه، یا خِردَنون و یا اِشتَن مِلک اَملاکی وِل آکَردَش بِبو، چَیی صد برابری ویگِرِه و اَبَدی یَه زِندگی بِه اِرث بَبَردی. 30امّا وِر کَسِن که اوّلین اِستینه آخِرین بَبین، و آخِرینِن اوّلین بَبین!
ទើបបានជ្រើសរើសហើយ៖
اِنجیل مَتّی 19: ITB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
