انجیل متی 11

عیسی لاوَعان یحیی تعمیددهنده درباره

1وختی عیسی اِشتن اَ دونزده گله شاگردش سفارش بکه که چِه بکرنده، واردِنه راه دگس تا چوان شهرانک تعلیم بِدَیه و چَوان را لاوَه بکره.

2وختی یحیی تعمید دهنده زندان دِلَک، مسیح کاران لاوَش بشنَوِسنده، اِشتنِش شاگرده بِخِرسانسنده عیسی وَر 3تا عیسیک آپَرسنده: «آیا تِه اَ کسی اِسش که گه بایه، یا علوده نفری منتظر ببام؟» 4عیسی چَوان جواوش ایزه بدا: «بِشا و هر چی که وینا و اَشنوا یحیی را باجا، که 5کورَه آدمه ویننده، لنگه آدمه مِجنده، جذامیه شفا اَرگیرنده، کَرِه اَشنونده، مَرده زنده آبییرنده و فقیران شاده خبر آرسه. 6خَسه ببا اَ کسی که چِمن درباره شک مَکره.»

7وختی یحیی شاگرده شییردنده، عیسی یحیی درباره لاوش بکه و جماعتنش باته: «چیه وینَدَنِه را شییَه بران بیابان؟ ایگله نِیی ویندنه واسنه که باهادنه لرزه؟ 8چیه وینَدَنِه را شییَه بران؟ مردکی که گِرانه خلوان و لطیفه خلوان دِکَره؟ اَوه که گِران و لطیف خلوان دِکرنده پادشاهان قصران دِلک زندگی کرنده. 9پس چیه وینَدَنِه را شییَه بران؟ ایگله پیامبری ویندنه واسنه؟ آها، بزانا یحیی پیغمبرک نی کفاتره. 10اَ هَ کسیه که چَوه درباره ملاکی پیغمبره کتابک نیویشته بییَه:

«”اِم چِمن قاصده که اِشته پرانتر خرسانم،

که اِشته راه اِشته را حاضر آکَره.“

11حقیقتا، شامانه واجم، که کسی یحیای تعمید دهندک پیله تر دنیا آمییَه نی، امّا ویلی ترین شخص آسمانه پادشاهیک اَوِک پیله تره. 12یحیای تعمید دهنده زمانک تا اِسا، آسمانه پادشاهی پر ظِلم بییَر؛ و ظالمه آدمه رایشانه زورنه اَوه بیگیرنده. 13چون که تمان پیغمبران نیویشته هانک و توراتک تا یحیی تعمید دهنده زمانه درباره پیشگویی کردشانه. 14و اگم بتانا قبول بکرا، یحیی هَ ایلیا پیغمبر اِسه که قراره باییه. 15هر کی گوش اَشنوسنه را داره، بشنوه.

16«امّا اِم نسله مردمه چیه شوار اِسِنده؟ اَوه خوردنانی شوار اِسِنده که بازارانک نشنده و اِشتن هم بازیان صَص کرنده و واجنده:

17«شاما رامان نی بیزی، دوشران نِکه،

مرثیه مان بخواند، سینه ران نیزی.“

18چون که یحیی بامه که نه خَردردشه و نه آخَردردشه اَوه واجنده: ”دیو داره.“ 19انسان زا بامه که هم خَره و هم آخَره اَوه واجنده: ”دیسا اَ ایگله تِرنَینَه آدم و عرق آخره آدم، و باجگیران و گناهکاران رَفقه.“ اَ چیی که شاما واترا آمانِه که هیچ عقل و حکمتی شاماک نی.»

وای بر شهرانی که توبه نکرنده

20اَدمی عیسی شهرانی شی سَرَزان بکه که پرتر اِشتن معجزش اگا انجام دییه به، چون اَوان توبه کرده نبه. 21عیسی باته: «وای بر شاما! ای خورَزین اهالی! وای برشاما، اِی بِیت‌صِیْدا اهالی! چون اگم معجزاتی که شاما را انجام بییَه شهر صور و شهر صیدونک انجام بییَه به، اَگاره مردم چِمه پرانتر خاکستره سر نشتنده و پلاس دکردننه توبشان کرده. 22امّا حقیقتا، شامانه واجم، که داوریه روجک، مجازاته تُوع بردن شهر صور و صیدون را آسان تر بی، تا شاما را. 23و ته، ای شهر کَفَرناحوم، رایره اییَنده بیشی کفا که اِشته سر آسمانه را آرسه؟ هرگزه را نیبی، بلکم جهنمک سرنگون بی. چون اگم معجزاتی که اِشته دلک انجام بییه شهر سُدوم را انجام بییَه به، اَ شهر تا اُوریجین روج باقی مانده. 24امّا شامانه واجم، که داوریه روجک، مجازات توع بردن شهره سُدوم را آسان تر بی تا اِشته را.»

بایا چِمن وَر

25اَ موقع، عیسی باتشه که: «ای پِه، ای آسمان و زمین خداوند، تِه ستایش کرم که اِم چییان دانا آدمان و عقلمند آدمانکِر نویین آکرده و خوردیان را آشکار آکرده. 26ها، ای چِمَن پِه، اِشته پر لطف گَوسه اِم بِه. 27چِمن آسمانیه پِه همه چیش من دِرَسمارده. هیچ کس زا آنزانه جُز پِه، و هیچ کس پِه آنزانه جز زا، و اَ کسانی که زا بگوشه پییر چوان را آشکار بکره.

28«بایا چِمن وَر، ای همه‌ی کسانی که پر زحمت کشا و شاما بار سنگینه، که از شاما آسایش آدیم. 29چِمن یوُه شاما دوشک بیگیرا و منک باموجا، چون از آرام و دِلِک فروتن اِسِم و شاما جان آسایش گیره. 30چون یوُ ای که از شاما دوشه سرک اَنَیِم آسانه و باری که از شاما دوشه سرک اَنَیِم سُبکه.»

ទើបបានជ្រើសរើសហើយ៖

انجیل متی 11: TIT

គំនូសចំណាំ

ចែករំលែក

ចម្លង