مرقس انجیل 13

آخر زمونِ نیشونه أن

1وختی که عیسی معبدَ جی بیرون أمه دبو ، یکته اونه شاگردؤن بوته: «اوستاد، نیگاه بکون! چی قشنگ سنگؤن و چی قشنگ بنایونی ایسه!» 2عیسی اونه بفرماسّه: «همۀ ایی پیله بنایون اینی؟ بودؤن که دِ ایره سنگ سنگ سر نومؤئنه، بَلکه همته فگردنه.»

3وختی عیسی زیتون کوه سر، معبد رو به رو نیشته بو، پِطرُس و یعقوب و یوحنا و آندریاس خلوته میئن اونه جی بپورسِئن: 4«اَمره بُگو ایی اتفاقؤن کَی دکِئنه و ایشونه نزدیکَ بوئن نیشؤنه او زمونی که عملی بنه چی ایسّه؟» 5عیسی ایشونِ بفرماسّه: «واخوب ببین تا هیشکس شمره گُمراه نکونی. 6چونکه خیلی أن می ایسم أمره هَنن، گونَن مو ”هونم“ و خیلی أن گُمراه کوئنَن. 7وختی جنگؤن باره ایشتؤنین و جنگؤن خبر شیمه گوشَ رسنه، هراسون نبین. ایجور اتفاقؤن باید دکای، ولی حله آخر زمون نرسه. 8یکته قوم یکته قوم دیگه ضد و یکته مملکت یکته مملکت دیگه ضد ویریسَنن. زلزله‌ و قحطی خیلی جاأن هنه. امّا ایی تازه شروع درد زایمؤن مؤنه که زمؤن، ایی دردِ جی تا او درد کمتر و کمترَ بنه.

9«و امّا شمه خودتؤن واخوب ببین، چونکه شمره محکمه أن دست هَدِئنَن و عبادتگاه أن میئن زئنن و می وسه فرماندارؤن و پادشاهون ورجه شنین تا اوشونِ جلو گُوائی بدین. 10اول باء انجیل همته قومؤنِ به اعلام ببی. 11پَس هر وخت که شمره بیتَن که محاکمه بکونن، پیشتر نیگرؤن نبین که چی بوگوین، بَلکه هرچی هو وخت که شمره هَدَه بنه، اونه بوگوین چونکه شمه نییئن که گوتدرین، بَلکه روح‌القدس ایسّه. 12برار برارِ و پئر زاکِ موردنِ به تسلیمَ کوئنَه. زاکون، خوشونه پئر و مَئر ضد ویریسَنن، اوشونه به کوشتن دئنَن. 13همه می ایسم واسه شیمه جی نفرت دئنَن؛ امّا هر کس تا آخر دوم بئری، نجاتِ هگینه.

14«امّا وختی او ویرؤنَ گر چندش آور اوره که نباید دبی، بینین که برپا بوبو، خواننده دقت بکونی- بزون اوشون که یهودیه‌ ولایت میئن ایسَئن، کوهؤن سو فرار بکونَن؛ 15و هر کی خونه بؤم سر بیسی جیر نشی و خونه دیرون نشنه تا یه چی ویگیره؛ 16و هر کس زمین میئن بیسی، خوشِ رخت ویتَن به هم خونه ونگردنه. 17وای بر شوکُم دار زناکون و مَئرونی که خوشونه زاکون او روزؤن میئن شیر دِئنَن! 18دوعا بکونین که ایی اتفاق زمستون میئن دنکای. 19چونکه او روزؤن میئن چنؤن مصیبتی اتفاق دکِئنه که اونه مورسؤن از وختی که خدا ایی عالم خلق بوده تا الؤن اتفاق دنکته. هَرگیزم اتفاق دنکِئنه. 20اگه خُداوند او روزؤن کوتاه نؤده بی، هیچ آدمی جؤنِ سالیم در نبوردنابو. امّا سیوا بوبؤکؤنِ واسه، که خودوش اوشونه انتخاب بوده، او روزؤن کوتاه بوده. 21او زمون میئن، اگه یه نفر شمره بوگوی: بَین مسیح موعود اِره ایسَه“، یا بَین اوره ایسَه“ باور نکونین. 22چونکه دروغی مسیحی أن و دروغی پیغمبرؤن ویریسَنن، نیشونه أن و پیله مُعجزه أن آشکارَ کوئنن تا اگه ببی، حتی انتخاب بوبوُکوئنه گُمراه بکونَن. 23پَس واخوب ببین، چونکه پیشتر، ایشونِ همه شمره بوتَم.

24«امّا او روزؤن میئن، بعدِ او مصیبت،

«”آفتؤ تاریکَ بنه

و ماه دِه فونتؤئنه.

25ستاره أن آسمؤناجی جیر کِئنن

و آسمؤنِ قوتون لرزنن.“

26هووخت مردوم، انسون ریکه اینَن که قوت و پیله جلال أمره ابرؤن سر أَمَئدره. 27او فرشته أن سرا دِئنه و خوشِ انتخاب بوبوُکؤئنه چار گوشه دنیا جی، ایی طرف زمینای تا اوطرف آسمؤن، جومَه کوئنه.

28« ایی درسِ انجیل دارَ جی یاد بگیرین: هیطو که اونه خالؤن تی تی کوئنه، وَلگ دِئنه، فَهمنین که تابستؤن أَمَئدره. 29هیطؤرَم، هر زمون بینین که ایی چیزؤن اتفاق دکِئنه، فَهمنین که انسون ریکه اَمَئن نزدیکِ، بَلکه درِ سر ایسه. 30راست راست، شمره گونَم که تا ایی هَمَه اتفاق دنکای، ایی نَسل ازبین نشنه. 31آسمؤن و زمین از بین شنه، امّا می گبؤن هرگی از بین نشنه.

هیشکس او روز و ساعت خبر ندائنه

32«اما هیشکس او روز و او ساعت خبر ندائنه به جز آسمونی پئر؛ حتی آسمؤن فرشته أن و ریکه هم اونای خبر ندائنن. 33پَس واخوب ببین و بیدار بیسین، چونکه نودوئنین او وقت کی رسنه. 34او وقت یکته مرداکه مورسؤن ایسّه که خائنه سفر بشی.او وقتی خوشه خونه اجی شو دره، خو خونه اختیاره، خوشِ خدمتکارؤنِ دست ایسپارنه، و هر کسِ یکته وظیفه هدئنه و دربون هم فرمون دئنه که بیدار بیسی. 35پَس شمه هم بیدار بیسین، چونکه نودوئنین که صابخونه کی هنه، شؤ یا نیصف شؤ، تله اویی گودن وخت یا صوبه دم. 36نبی که او یدفاری بای و شمرِ خؤ میئن بَینی. 37اوچیِ که شمره گونَم، همتَه گونَم: بیدار بیسین!»

ទើបបានជ្រើសរើសហើយ៖

مرقس انجیل 13: EGB

គំនូសចំណាំ

ចែករំលែក

ចម្លង